1. San o pasa te u „kon koosube a Gadu”?

YEHOFA lobi den sama di e dini en. Efu yu e dini Gadu a o belesi yu nownow kaba, ma soseefi aini a ten di e kon. Beibel e taki: „Kon koosube a Gadu, da enseefi o kon koosube a yu.”​—Yakowbesi 4:8.

2. Fa u sa kon koosube a Gadu, anga fa a sani ya abi fu du anga den begi fu u?

² Efi i wani kon koosube a Gadu, da i mu sutudeli Beibel anga i mu du den sani di sikiifi aini en Wowtu tu. Te yu e akisi en sani di e kai anga a wani fi en, da a o aliki den begi fi i, a o piki den tu. A Kelesten aposteli Yohanisi be sikiifi taki: „A dati meke u nái feele, bika awinsi san wi e akisi [Gadu], ai yee wi, so langa den sani di wi e akisi en, e kai anga a wani fi en. Da fu di wi sabi taki ai aliki wi, awinsi san wi akisi en, neen ede meke wi sabi tu taki wi o fende den sani di wi akisi en, bika neen na a sama di wi akisi.”​—1 Yohanisi 5:14, 15.

3-7. Fa u sa kisi a koni fu Gadu, anga fa a koni ya sa yeepi u?

³ Wan taa sani, a taki te yu e kon koosube a Gadu, da a o gi yu a koni tu fu fa i sa libi a wan fasi di o tyai wini gi i aini den sani di yu e du ala dei. Beibel e taki: „Efu iniiwan fu wi e mankei koni, da meke a tan begi Gadu.”​—Yakowbesi 1:5.

⁴ Fa a koni fu Gadu sa yeepi i? Wan fasi, a taki a koni fu Gadu sa yeepi i fu sabi san a den sani di Gadu á lobi. I sa leli fu saide meke den sani ya á bun, anga san i sa du fu wai pasi gi den. Den leli ya sa kibii yu gi somen fu den polobelema di e miti fuu sama. Te wi e teke a lai fu Gadu fu tyai useefi a wan fasi di fiti, da dati o yeepi u fu wi á de anga bee sondee fu u wani, u ná o kisi siki di sama e kisi fu di den abi waka waka libi. U ná o du sani di o poli a toowlibi fu u, anga u ná o booko toow fu pikinpikin sani ede.

⁵ A on sowtu taa fasi a koni fu Gadu sa yeepi i? A o yeepi i fu libi a wan moo bun fasi. A o yeepi i fu teke koni bosoloiti, so enke fa i mu koboloiki i moni. Yu o du sani di e tyai somen wini gi i. I ná o lasi i ten a soso sani.

⁶ A koni fu Gadu sa yeepi i tu fu si fa i mu libi anga taawan. I sa abi wan moo koloku osufamii libi. Yu anga taawan o man de tuutuu mati, sama o lesipeki i, soseefi den wan di nái dini Gadu.

⁷ Boiti den sani ya, da a koni fu Gadu o yeepi i fu si a libi taa fasi. A o yeepi i fu libi anga den booko ede anga den polobelema di e miti i. I ná o pantan makiliki, anga i ná o feele den sani di sa pasa aini a ten di e kon. Den sani ya o yeepi i fu abi wan bun gosontu.​—Odoo 14:30; Yesaya 48:17.

8. San i ná o feele te yu e dini Gadu?

⁸ Efu yu e dini a tuu Gadu, da i ná o feele den sani di den sama di nái dini Gadu e feele. Fu di i sabi taki den dedesama nái libi moo, neen ede meke i ná o feele den. Fu di yu e biibi a paamisi fu Gadu taki den dedesama o weki baka, meke i nái feele fu dede. Di i kon sabi tu taki Gadu  abi ala makiti, neen meke i ná o feele sani fu bonu anga wisi.​—Yohanisi 8:32.

9-11. Sama o tan aini a Paladeisi, anga sama ná o tan ape?

⁹ Efu yu kon koosube a Gadu, da i ná o feele sani di sa pasa aini a ten di e kon. Enke fa u be luku, da Beibel be taki fu somen fu den polobelema di wi e si nownow a goontapu. Yehofa e taigi u taki den sani ya a fu wan pisi ten namo den o de. A ná o teke langa moo da a Kownukondee fu Gadu o meke goontapu toon wan paladeisi.​—Lukasi 21:10, 11, 31; 23:43.

¹⁰ A soso den sama di e kon koosube a Yehofa, den sama di e dini en, o tan aini a Paladeisi. Beibel taki: „Dyonson, da den ogii sama ná o de moo. Yu o luku pe den be de fosi, ma den ná o de moo. Ma a den safu-ati sama o fende goontapu. Den o piisii fu a libi, bika ala sani o waka bun.”​—Pisalon 37:10, 11.

¹¹ Den sama di á wani wooko anga den weiti fu Gadu seefi seefi, o lasi den libi fu tego (2 Tesalonika 1:8, 9). Den ná o de moo. Den o dede fu tego makandii anga Saatan anga den ogii yeye fi en (Kon A Kiin 20:10, 14). Ma den sama di e teke leli fu Yehofa, den sama di e dini en, o piisii fu libi aini a Paladeisi a goontapu ya.

12. San Beibel e taki fu den sani di o pasa aini a ten di de a wi fesi?

¹² Yehofa o du wan tu moi sani gi den sama di lobi en! Luku san a Wowtu fi en e taki fu a fasi fa a libi o de aini a Paladeisi:

• Tyaipi nyanyan o de fu nyan: „Tyaipi nyanyan o de a goontapu, te a den beligi ede seefi nyanyan o de pasa maiki.”​—Pisalon 72:16.

• Bun osu o de fu tan: „Den o meke osu da den o tan aini.”​—Yesaya 65:21.

• Wooko di e gi piisii: „Den sama di mi teke o nyan bun alaten fu a wooko di den du. Den ná o wooko taanga fu soso.”​—Yesaya 65:22, 23.

• Náwan siki o de moo: „Náwan sama di o tan ape o taki: ’Mi siki.’”​—Yesaya 33:24.

• Náwan malengiisama o de: „Na a ten de den ain fu den beendisama o opo, den yesi fu den dofusama o yee baka. Na a ten de den sama di lan o dyombo a tapu enke wan diya, anga a tongo fu den babawman o bali fu piisii ede.”​—Yesaya 35:5, 6.

• Pen, tyali anga dede ná o de moo: „[Gadu] o dee den wataa ain fu den. Da dede, tyali, kee anga pen na o de moo. Bika den fositen sani pasa gwe kaa.”​—Kon A Kiin 21:4.

• Oloku ná o de moo: „[Gadu] o tyai wan kaba kon a feti na ala se fu goontapu.”​—Pisalon 46:9.

• Tego libi: „A den sama di e gi yesi a Gadu o fende a goontapu, anga den o libi neen tapu fu tego.”​—Pisalon 37:29.

13. Sama na a wan kodo sama di poi meke a goontapu ya toon wan paladeisi, anga fu saide meke neen wawan poi du a sani de?

¹³ Libisama á poi du den sowtu sani ya, ma Yehofa abi makiti fu du ala sani di a taki a o du. Náwan sani man tapu en fu du san a wani. Beibel taki: „Bika ala sani di Gadu taki, a poi du.”​—Lukasi 1:37.

14. Fa i sa doo na a pasi di e tyai sama go a tego libi?

¹⁴ Yehofa e koboloiki den Kotoigi fi en fu gi sama na ala peesi a okasi fu „doo pasa go aini a sumaa doo”, anga fu waka a pasi di e tyai sama go a tego libi. Meke a de so taki yu a wan fu den koloku sama di e teke a kai ya. Teke a tuu biibi, da i piisii fu tego fu den belesi fu Yehofa!​—Mateyesi 7:13, 14.