TOLI 02

Beibel taki sani o go bun aini a ten di e kon

PEE

Na ala se fu goontapu sani e miti sama di e meke den e tyali, taawan e kusumi, den e fii pen. Sani miti i kaba di meke i fii so? Kande ye kusumi fu di i siki. Kande wan sama di i lobi dede. Kande ye akisi iseefi taki: ‘On ten sani o kengi?’ Beibel e piki a akisi ya.

1. Fa Beibel e toosutu u?

Beibel e taigi u saide ogii lai a goontapu nownow. Ai soi u tu taki dyonson Gadu o puu ala den polobelema ya. Gadu paamisi wi aini Beibel taki sani o ‘waka bun aini a ten di e kon’. (Leisi Yelemiya 29:11, 12.) Den sani di Gadu paamisi u, e yeepi u fu piisii winsi sai miti u. Den e toosutu u, bika den e soi taki sani o go bun aini a ten di e kon.

2. San Beibel taki o pasa aini a ten di e kon?

Beibel taki wan ten o kon pe ‘dede naw de moo, nawan sama o tyali moo, sama naw kee moo, pen seefi naw de moo’. (Leisi Openbaring 21:4.) Den sani di e meke a libi taanga nownow naw de moo. Sani enke pina, siki, ogiidu, anga dede naw de moo. Beibel taki libisama o libi fu teego aini wan paladeisi a goontapu.

3. San o yeepi i fu biibi den sani di sikiifi aini Beibel?

A omen sani sama e wani, ma den á sabi efu wan ten o kon pe den o fende den sani ya. Ma den sani di Beibel taki o pasa tuu. Efu u wani biibi den sani ya, u mu ‘ondoosuku Beibel finifini’ (Toli fu den apostel 17:11). Te yo du a sani ya, yo sabi efii sa biibi den sani di Beibel taki o pasa aini a ten di e kon.

LUKU A TOLI YA MOO FINI

Wo luku wantu fu den sani di Gadu paamisi u. Wo luku tu sowtu wini we fende fu den sani ya aini a ten ya.

4. Beibel taki wo libi fu teego sondee booko-ede

Luku wantu fu den sani di Gadu paamisi wi aini Beibel. Sowtu wan fu den sani ya i moo lobi? Saide?

Leisi den tekisi, da i luku efii poi piki den akisi ya:

Den tekisi ya gi i taanga-sikin? I si enke den sa gi wan mati efuso wan famii fii taanga-sikin?

Fa aw de fu libi aini a nyun goontapu?

DEN SANI YA NAW MITI SAMA MOO:	ALA SAMA O PIISII TE DEN SANI YA O PASA:
Sama naw fii pen moo, den naw gaandi moo, dede seefi naw de moo.—Yesaya 25:8.	Den sama di dede o weki baka fu libi a goontapu ya.—Yohanisi 5:28, 29.
Siki naw de moo. Malengii sama naw de moo.—Yesaya 33:24; 35:5, 6.	Wo gusontu. Den sama di be gaandi o yonkuu baka.—Yopu 33:25.
Sama naw du ogii anga taawan moo.—Yesaya 32:16, 17.	Wo abi nyanyan sai. Wo abi wan bun peesi fu tan. Wo du wooko di u lobi tu.—Psalm 72:16; Yesaya 65:21, 22.
Feti naw de moo.—Psalm 46:9.	Sani naw de moo di e meke sama feele.—Psalm 37:11.
Sama naw membee den ogii di be miti den moo.—Yesaya 65:17.	Wo libi fu teego, nawan ogii o go e pasa a goontapu moo.—Psalm 37:29.

5. Den sani di sikiifi aini Beibel sa kengi i libi

A omen sama aini a ten ya e fii booko-saka te den si den sani di e pasa aini a goontapu, taawan ati e boon. Son sama e feti fu sani go moo bun a goontapu. Luku sowtu wini wantu sama fende di den kon sabi san Beibel paamisi u. Pee a FELON, da i luku efii poi piki den akisi ya.

PFELON: Mi be e feti fu sani go moo bun a goontapu (4:07)

Anga san Rafika be e booko en ede?
Fa Beibel yeepi en winsi fa sani á be kengi?

Te we biibi den sani di Gadu paamisi wi aini Beibel, a sani ya o yeepi u fu wa booko wi ede tumisi winsi wi abi polobelema. Leisi Odo 17:22 anga Romesama 12:12, da i luku efii poi piki den akisi ya: