TOLI 03

I sa biibi den sani di sikiifi aini Beibel?

PEE

A omen sani Gadu paamisi wi aini Beibel. Ai soi u faw mu libi tu. Kande i wani sabi san sikiifi aini Beibel. Ma kande ye akisi iseefi efii mu biibi den sani di sikiifi aini, bika a wan gaandi buku. Den sani di sikiifi aini Beibel poi yeepi wi aini a ten ya? U sa biibi den sani di a taki o pasa aini a ten di e kon? A omen sama e biibi den sani di sikiifi aini Beibel. Kow luku san o yeepi i fu sabi efu den sani di sikiifi aini Beibel a tuu.

1. Den sani di sikiifi aini Beibel a tuu?

Beibel seefi taki den sani di sikiifi aini, sikiifi ‘enke fa den de tuutuu’ (Peleikiman 12:10). Beibel e taki fu sani di be pasa tuutuu. (Leisi Lukasi 1:3; 3:1, 2.) A omen koniman di e ondoosuku fositen sani taki den sani di sikiifi aini Beibel a tuu. Den taki den sama di kai aini Beibel be de tuutuu, den peesi di kai aini Beibel be de a fositen tu.

2. Saide u sa wooko anga den sani di sikiifi aini Beibel winsi fa a wan gaandi buku?

A omen sani Beibel e taki fu a fasi fa goontapu meke. A pisiten di Beibel be taki den sani ya, gaanse sama á be e biibi den. A bakaten fosi ondoosukuman kon si taki den sani ya a tuu. A sani ya e soi taki u sa biibi den sani di sikiifi aini Beibel.—Psalm 111:8.

3. Saide u sa biibi den sani di Beibel taki o pasa aini a ten di e kon?

A omen polofeititoli a de aini Beibel di e taki san o ‘pasa aini a ten di e kon’ (Yesaya 46:10). A omen sani di Beibel be taki a fesi, pasa pilisisi enke fa a be taki. A omen sani di Beibel be taki fu a ten di we libi nownow e pasa tu. Wo luku wantu polofeititoli di sikiifi aini Beibel. Wo si taki sani waka pilisisi enke fa Beibel be taki tu.

LUKU A TOLI YA MOO FINI

Poti pakisei a wantu sani di sabiman kon si aini a ten ya di e kai anga san Beibel be taki senten. Luku wantu polofeititoli aini Beibel di pasa enke fa a be taki tu.

4. Den sani di Beibel taki e kai anga san koniman ondoosuku

Fosi sama be e biibi taki a wan sani holi goontapu fu aa kai. Pee a FELON.

FELON: Nawan sani e holi goontapu a pe a de (1:13)

Luku san a Beibel buku Yopu be taki wan sani fu 3500 yali pasa. Leisi Yopu 26:7, da i luku efii poi piki a akisi ya:

Fa Yopu be du sabi taki goontapu á fasi a nawan sani?

A wan sani fu 200 yali pasa fosi ondoosukuman kon fusutan saide wataa nai kaba a goontapu. Den kon si taki te a san e pii, ai meke a wataa fu a se waan. Ai meke den liba, anga taa peesi pe wataa de waan tu. A so afu fu a wataa ya e dampu, da ai toon woluku. Bakaten ai kai kon a goontapu enke alen. Ma a sani ya be sikiifi aini Beibel kaba omen dunsu yali pasa. Leisi Yopu 36:27, 28, da i luku efii poi piki den akisi ya:

Sai lobi fu a sani di sikiifi ya?
Den tekisi di i leisi ya yeepi i fu biibi san sikiifi aini Beibel?

5. Wantu pelensipali sani di Beibel be taki o pasa

Leisi Yesaya 44:27–45:2, da i luku efii poi piki a akisi ya:

San Beibel be taki 200 yali fosi a foto Babilon be poli?

Pee a FELON.

FELON: Beibel be taki a foto Babilon be o booko (0:58)

Sani waka pilisisi enke fa Beibel be taki. Wan sani fu 540 yali Fosi Kelestesi, Kownu Sirus fu Persiya anga den suudati fi en teke a foto Babilon abaa. Den diki wan gotoo fu meke a wataa di be lontu a foto lon go a wan taa se. A neti de, a opo-opo den gaan doo fu a foto be fika, neen meke Sirus anga den suudati fi en be man go aini a foto sondee fu den feti. Nownow, wan sani fu 2500 yali pasa, Babilon a wan booko kondee ete. Luku san Beibel be taki.

Leisi Yesaya 13:19, 20, da i luku efii poi piki a akisi ya:

Fa a polofeititoli ya kon tuu?

A fowtow e soi pe Babilon be de fosi. Nownow a wan booko peesi aini Irak

6. Beibel be taki fu den sani di we si e pasa nownow

Beibel be kai a ten di we libi ya ‘den lasiti dei’ (2 Timotiyesi 3:1). Luku san Beibel be taki o pasa aini den lasiti dei.

Leisi Mateyesi 24:6, 7, da i luku efii poi piki a akisi ya:

San Beibel be taki be o pasa aini den lasiti dei?

Leisi 2 Timotiyesi 3:1-5, da i luku efii poi piki den akisi ya:

Fa Beibel taki sama be o tyai denseefi aini den lasiti dei?
Sowtu wan fu den manii ya i si sama abi aini a ten ya?

SON SAMA E TAKI: ‘A soso anainsitoli de aini a Beibel.’

Saide ye biibi taki den sani sikiifi aini Beibel a tuu?

SAI LELI?

Den sani di ondoosukuman kon si, anga den polofeititoli di de aini Beibel e soi taki u sa biibi den sani di sikiifi aini Beibel.

Sai be o piki?

U sa biibi den sani di sikiifi aini Beibel?
Kai wantu sani di e soi taki den sani di Beibel taki e kai anga san koniman ondoosuku.
I si enke den sani di Beibel taki o pasa tuu? Saide i taki so?

Sikiifi a dei di i kaba a pisi ya:

Puubei a sani ya

I sa leisi wan fu den artikel efuso luku wan fu den felon na a pisi di den e kai ‘Moo sani fu a toli ya’. A sani ya o yeepi i fu moo biibi a Beibel.

Taa sani di i sa puubei:

Taa sani di i sa puubei