TOLI 01

Fa Beibel sa yeepi i fu abi wan moo bun libi?

PEE

Ala u wani sabi saide we pina, saide we dede, anga fa sani o waka aini a ten di e kon. We booko wi ede tu fa wo solugu wi osufamii, anga san u mu du fu wi osulibi waka bun. Beibel e taki fu den sani ya. Ai soi u tu san u mu du fu u libi waka moo bun. A omen sama fende wini fu den sani di sikiifi aini Beibel. I si enke Beibel o poi yeepi i?

1. San a wantu akisi di Beibel e piki?

Beibel e piki den akisi ya: Faw du kon a goontapu? Saide u de a libi? Saide libisama e pina? Sai pasa anga wan sama te a dede? Saide feti lai a goontapu? San o pasa anga a goontapu ya dyonson? Beibel e gi u taanga-sikin fu suku den piki fu den akisi ya. A omen sama fende wini di den kon sabi den piki fu den akisi ya.

2. Fa Beibel sa yeepi u fu u libi waka bun?

A omen sani we leli aini Beibel. We leli san u mu du fu wi osulibi waka bun, anga san o yeepi u te wi abi booko-ede. We leli tu san o yeepi u fu piisii te we wooko fu solugu useefi anga wi osufamii. Te wo sutudeli a buku ya, wo taki moo fini fu den toli ya. Wo taki fu wantu taa toli tu. Iseefi o si taki i sa ‘fende wini fu den sani di sikiifi aini Beibel’.—2 Timotiyesi 3:16.

A buku ya a ná wan Beibel, ma ai yeepi u fu kon fusutan a Beibel moo bun. Neen meke gaantangi baa, te i doo wan tekisi, leisi en aini i Beibel, da yo si fa Beibel e piki den akisi di de aini a buku ya.

LUKU A TOLI YA MOO FINI

Kow luku fa Beibel yeepi son sama, sai sa du fu lobi leisi en, anga saide i mu meke sama yeepi i fu fusutan a Beibel.

3. Beibel e soi u faw mu libi

Beibel de enke wan adaaya. Ai soi u faw sa du sani anga koni. Ai taigi u san o pasa aini a ten di e kon tu.

Leisi Psalm 119:105, da i luku efii poi piki den akisi ya:

Fa a sama di sikiifi a tekisi ya be e si a Beibel?
Fa ye si a Beibel?

4. Beibel poi piki den akisi fu u

Beibel be yeepi wan uman fu kon sabi wantu sani di a be wani sabi senten. Pee a FELON, da i luku efii poi piki den akisi ya.

FELON: Noiti i mu gi abaa! (1:48)

Te i luku a felon, da sowtu akisi a uman ya be abi?
Sowtu wini a fende di a sutudeli Beibel?

Beibel taki wa mu e feele fu poti akisi. Leisi Mateyesi 7:7, da i luku efii poi piki a akisi ya:

Sowtu akisi i si enke Beibel sa piki?

5. San o yeepi i fu lobi leisi Beibel?

A omen sama lobi leisi Beibel, bika den e fende wini fi en. Pee a FELON, da i luku efii poi piki den akisi ya.

FELON: Leisi Beibel ala dei (2:05)

Den yonkuuwan aini a felon ya lobi leisi?
Saide den lobi leisi Beibel, winsi fa den á lobi leisi?

Beibel e toosutu u, ai yeepi u fu wi abi howpu tu. Leisi Romesama 15:4, da i luku efii poi piki a akisi ya:

I wani sabi fa Beibel sa toosutu i?

6. Taa sama sa yeepi i fu fusutan a Beibel

Son sama kon si taki te den e taki fu Beibel anga taawan, den e moo fusutan en. Leisi Toli fu den apostel 8:26-31, da i luku efii poi piki a akisi ya:

San o yeepi u fu fusutan a Beibel? (Luku vers 30 anga 31.)

A Etiyopiyaman be abi wan sama fanowdu fu yeepi en fusutan den sani di sikiifi aini a Wowtu fu Gadu. Aini a ten ya a omen sama e fende wini te den e taki anga taawan fu a Beibel

SON SAMA E TAKI: ‘A sosokaali ye lasi i ten e sutudeli Beibel.’