TOLI 07

San Beibel e leli u fu Yehofa?

PEE

San ye pakisei te i yee a nen Yehofa? Son sama e taki a abi makiti, a taanga, wi anga en naw poi toon mati, bika a de faawe tumisi. A so ye denki tu? Fa Yehofa Gadu de tuutuu? Beibel e taigi u sowtu manii Yehofa abi. Ai soi u taki Yehofa e booko en ede anga u.

1. Saide wa poi si Gadu?

‘Gadu a wan yeye’ (Yohanisi 4:24). A naabi sikin enke libisama. Yehofa a wan yeye. A hemel ai tan, wan peesi pe wa poi si.

2. Sowtu manii Yehofa abi?

Wa poi si Yehofa, ma te u kon sabi en moo bun, we kon lobi en bika we kon si taki a abi bun manii. Beibel taki: ‘Yehofa lobi te sani e waka a wan letifasi, neen meke noiti ao gwe fika den sama di nai gwe fika en’ (Psalm 37:28). Beibel e leli u tu taki Yehofa lobi sama tuutuu. ‘Tyali e kisi en’ te a si fa sama e pina (Yakowbesi 5:11). ‘Yehofa de koosube fu den sama di booko-saka. Ai yeepi den sama di lasi-ati’ (Psalm 34:18). I be sabi taki son sani di we du sa meke tyali kisi Yehofa? Te a si sama e du ogii, ai hati en (Psalm 78:40, 41). Ma te wan sama e du bun sani, da a sani de e meke Yehofa piisii.—Leisi Odo 27:11.

3. Fa Yehofa soi taki a lobi u?

A lobi na a moo pelensipali manii fu Yehofa. Beibel taki: ‘Gadu a lobi’ (1 Yohanisi 4:8). A ná te we leisi Beibel wawan we si fa Yehofa lobi u, ma te we luku den sani di a meke, we si a sani ya tu. (Leisi Toli fu den apostel 14:17.) Pakisei fa Yehofa meke u. U poi si moin kololu, u poi aliki moin poku, efuso nyan switi nyanyan. Den sani ya e soi taki Gadu wani u piisii.

LUKU A TOLI YA MOO FINI

Luku san Yehofa e koboloiki fu du sani, anga fa ai soi u den moin manii fi en.

4. A santa yeye na a kaakiti fu Gadu

Leti enke fa we wooko anga wi ana, a so Yehofa e koboloiki en santa yeye fu du sani. Beibel e leli u taki a santa yeye a ná wan sama, ma na a kaakiti di Gadu e koboloiki fu du sani. Leisi Lukasi 11:13 anga Toli fu den apostel 2:17, da i luku efii poi piki den akisi ya:

Efii begi Gadu fu a gii santa yeye, aw gi yu en. Te i pakisei a sani ya, da i si enke a santa yeye a wan sama efuso na a kaakiti fu Gadu? Saide i piki so?

A omen gaan sani Yehofa e du anga a santa yeye fi en. Leisi Psalm 33:6 anga 2 Peitilisi 1:20, 21, da i luku efii poi piki a akisi ya:

San a wantu sani di Yehofa e du anga a santa yeye fi en?

5. Yehofa abi bun manii

Mosesi a wan man di be e dini Gadu anga en hii ati. A be wani sabi Gadu moo bun, neen meke a be begi en taki: ‘Meke mi kon sabi den pasi fii fu mi sa sabi i’ (Ekisodesi 33:13). Di Mosesi begi Gadu a sani ya, neen Yehofa taigi en sowtu manii a abi. Leisi Ekisodesi 34:4-6, da i luku efii poi piki den akisi ya:

Sowtu manii Yehofa taigi Mosesi taki a abi?
Sowtu wan fu den manii fu Yehofa i moo lobi?

6. Yehofa e booko en ede anga sama

Fosi den Hebrewsama a be a foluku fu Gadu. Wan pisiten den be de enke saafu a Egepte. Fa Yehofa be e fii di den Egeptesama be e pina den? Aliki a AUDIO, efuso leisi Ekisodesi 3:1-10, da i luku efii poi piki den akisi ya.

AUDIO: A be e hati Yehofa te a be e si fa den e pina (2:45)

Te i luku a toli ya, da fai si enke Yehofa e fii te libisama e pina?—Luku vers 7 anga 8.
I si enke Yehofa wani yeepi wi enke libisama? I si enke a poi yeepi u? Saide i taki so?

7. Te u luku den sani di Yehofa meke, we si sowtu manii a abi

Den sani di Yehofa meke, e yeepi u fu si sowtu manii a abi. Pee a FELON. Baka dati da i leisi Romesama 1:20, da i luku efii poi piki den akisi ya.