TOLI 09

Begi o yeepi i fu toon Gadu mati

PEE

Ye wani sama poti yu a pasi son yuu? I wani sabi son sani fu a libi? Yu abi toosutu fanowdu? I wani toon Yehofa mati? Begi o yeepi i fu du ala den sani ya. Ma sai mu taki te ye begi? Na ala begi Gadu e aliki? Sai mu du efii wani Gadu aliki i te ye begi en? Kow go luku den piki fu den akisi ya.

1. Sama u mu begi? San u sa taki te we begi?

Yesesi be leli den bakaman fi en taki aw Dda di de a hemel wawan u mu begi. Yesesi be e begi Yehofa tu. A be taki: ‘Neen meke u mu begi taki: “U Dda di de a hemel . . . ’” (Mateyesi 6:9). Te we begi Yehofa, wi anga en e toon moo bun mati.

A fu ala sani u sa begi Gadu. Ma efu u wani Gadu piki den begi fu u, u mu akisi en sani di e kai anga en. Beibel taki: ‘A winsi san we akisi en, ao aliki u, solanga ai kai anga san a wani’ (1 Yohanisi 5:14). Yesesi taigi u wantu sani di u sa akisi Gadu te wi e begi. (Leisi Mateyesi 6:9-13.) Te we begi Gadu wa mu e feegete fu gi en daa fu den sani di ai du gi u. Wa mu feegete fu begi gi taawan tu.

2. Faw mu begi?

Beibel taki u mu ‘puu ala san de a wi ati taigi Gadu’ (Psalm 62:8). A sani ya e soi taki u mu begi Gadu anga u hii ati. I sa begi taanga, ma i sa begi aini yu ati tu. A naabi toobi efii de taamputaampu, sidonsidon, efuso didondidon te ye begi. Ma i mu du en a wan lesipeki fasi. I sa begi Gadu iniiwan yuu di i wani, winsi pe i de.

3. Fa Gadu e piki den begi fu u?

A omen fasi Gadu e piki den begi fu u. A gi wi en Wowtu Beibel di e yeepi u fu sabi son sani. Te we leisi a Wowtu fu Gadu, ai yeepi u fu ‘du sani anga koni’ (Psalm 19:7; leisi Yakowbesi 1:5.) Gadu e yeepi u tu fu wa buuya te wi abi polobelema. A sa meke den sama di e dini en yeepi u tu te u fuka.

LUKU A TOLI YA MOO FINI

Kow luku fai mu begi efii wani Gadu aliki i. Wo si tu sowtu wini yo fende te ye begi.

4. A ná ala begi Gadu e aliki

San u mu du efu u wani Gadu aliki u te we begi en? Pee a FELON.

FELON: Na ala begi Gadu e aliki?—Wan satu pisi (2:42)

Yehofa wani i begi en. Leisi Psalm 65:2, da i luku efii poi piki den akisi ya:

I si enke a Sama di e aliki begi, wani yu begi en? Saide i taki so?

Efu u wani Gadu aliki den begi fu u, u mu e libi enke fa a wani. Leisi Mika 3:4 anga 1 Peitilisi 3:12, da i luku efii poi piki a akisi ya:

San u mu du efu u wani Yehofa aliki den begi fu u?

Te tu kondee e feti, ala den tu se e begi fu wini a feti. I si enke Gadu e aliki den sowtu begi ya?

5. U mu taigi Yehofa fa we fii tuutuu

Te son sama e begi, a denseefi sani den e taki ala yuu. Ma a so Gadu wani u begi en? Leisi Mateyesi 6:7, da i luku efii poi piki a akisi ya:

San o yeepi i fii nai taki denseefi sani naamo te ye begi?

Pakisei san Yehofa du gii, da i gi en daa fu a sani de. Efi ye du a sani ya ala dei, na ala yuu yo abi wan nyun sani fu taigi Yehofa te ye begi.

Wan bun dda wani en pikin taigi en fa ai fii tuutuu. A letiso Yehofa wani u taigi en fa we fii te we begi

6. Begi a wan kado di Gadu gi u

Fa begi sa yeepi u te sani e miti u? Pee a FELON.

FELON: Begi e yeepi u fu wi á gi abaa (1:32)

Beibel e soi taki begi sa yeepi u fu wa booko wi ede moo. Leisi Filipisama 4:6, 7, da i luku efii poi piki den akisi ya:

Fa begi e yeepi u, winsi fa a nai puu den polobelema fu u?
San a wantu sani di i be sa wani akisi Gadu te ye begi?

I be sabi a sani ya?

A wowtu ‘amen’ wani taki ‘a so a de’ efuso ‘a letiso’. Senten aini Beibel ten sama be e taki ‘amen’ te den be kaba begi.—1 Koloniki 16:36.

7. Ya mu e feegete fu begi

Son yuu we abi sani e du te da we feegete fu begi. Fa Yesesi be e si begi? Leisi Mateyesi 14:23 anga Malikisi 1:35, da i luku efii poi piki den akisi ya:

San Yesesi be e du te a be wani begi?
On ten i sa begi?

SON SAMA E TAKI: ‘A sosokaali ye lasi i ten e begi, bika nawan sama nai aliki.’

Ma fa ye si a toli ya?

SAI LELI?

Te we begi Gadu anga u hii ati, a sani ya e yeepi u fu wi anga en toon moo bun mati. Begi e yeepi u fu wa booko wi ede tumisi te wi abi polobelema. Ai gi u taanga-sikin tu fu libi enke fa Yehofa wani.