TOLI 11

San o yeepi i fu kon lobi leisi Beibel?

PEE

A be taanga gii wan leisi fu bigin anga wan gaan wooko? Kande a sani di be yeepi i, a di i bigin du en pikinpikin. Na aseefi sani ya i sa du tu efii wani bigin leisi Beibel. Kande ye akisi iseefi taki: ‘Pe fu a Beibel mi o bigin leisi?’ Aini a pisi ya, wo luku wantu sani di o yeepi i fu sabi sai sa du te ye leisi, efuso sutudeli Beibel. Den sani ya o yeepi i fu kon lobi leisi Beibel.

1. Saide u mu e leisi Beibel ala dei?

Wan sama di e leisi Beibel, efuso ‘a weiti fu Yehofa’ ala dei, o go e piisii ala yuu. Sani o waka bun anga en tu. (Leisi Psalm 1:1-3.) Kande i sa bigin leisi wantu miniti ala dei. O moo ye leisi Beibel, o moo yo lobi en.

2. San o yeepi i fu fusutan den sani di ye leisi aini Beibel?

Te i leisi wan pisi, sitopu, da i pakisei sai leisi. Ya mu e leisi namo, ma i mu e ‘teke ten pakisei sai leisi’. A sani ya o yeepi i fu fusutan Beibel moo bun (Yowsuwa 1:8). Te i leisi wan pisi, akisi iseefi taki: ‘San a pisi ya e leli mi fu Yehofa? Fa mi sa wooko anga en aini mi libi? Fa mi sa yeepi taawan anga a sani di mi leisi ya?’

3. On ten i sa leisi Beibel?

Ai taanga gii fu fende ten fu leisi Beibel? A omen fu u a sani ya e taanga gi. Neen meke Beibel e gi u taanga-sikin fu ‘koboloiki u ten anga koni’ (Efeisesama 5:16). Kande i sa poti wan yuu fu leisi Beibel ala dei. Son sama e leisi Beibel mamanten fosi den du taa sani. Taawan e leisi en moo lati aini a dei, kande te den e teke boo a wooko. Taawan e leisi en fosi den go didon. On ten i si enke be o moo bun gii fu leisi Beibel?

LUKU A TOLI YA MOO FINI

Wo luku san o yeepi i fu kon lobi leisi Beibel. Wo luku tu fai sa seeka iseefi fosi i sutudeli Beibel.

Leti enke fai sa kon lobi son nyanyan di ya be gwenti, a so i sa kon lobi leisi Beibel

4. Meke moiti fu kon lobi leisi Beibel

Aa makiliki fu bigin leisi Beibel. Ma leti enke fa yu abi fu tesi wan nyanyan fosi fu sabi efu a switi, a so yo abi fu bigin leisi Beibel fu si den wini di a abi. Leisi 1 Peitilisi 2:2, da i luku efii poi piki a akisi ya:

I si enke efi ye leisi Beibel ala dei, yo kon lobi leisi en?

Pee a FELON, da yo si san yeepi wantu sama fu kon lobi leisi Beibel. Baka dati da i luku efii poi piki den akisi ya.

FELON: Wantu yonkuuwan kon lobi a Wowtu fu Gadu (5:33)

Saide a be e taanga gi den yonkuuwan ya fu leisi Beibel?
San yeepi den fu tan leisi Beibel ala dei?
San yeepi den fu den kon lobi leisi Beibel?

Wantu sani di o yeepi i fu bigin leisi Beibel:

Suku wan Beibel di makiliki fu fusutan. A mu sikiifi enke faw gwenti taki aini a ten ya. I sa leisi a Nyun-Grontapuvertaling efu a de aini wan tongo di ye fusutan.
I sa bigin leisi wan pisi di i si enke o simpan. Efii wani sabi sowtu toli i sa leisi, luku a faki di den e kai ‘Leisi Beibel ala dei’ di de aini a buku ya.
Sikiifi sowtu pisi i leisi kaba. Wooko anga a ‘Sikeima fu leisi Beibel’ di de aini a buku ya.
Wooko anga a JW Library^®app. I sa leisi Beibel aini a app ya. Aini son tongo son wan fu den Beibel buku abi audio. Winsi pe i de, i sa aliki den anga i telefon, tablet efuso computer.
Wooko anga a pikin buku di den e kai Studeri Gado Wortu moro fini. A buku ya abi kaita, fowtow, anga taa sani di e yeepi i fu sabi moo fu Beibel.

5. Fai sa seeka fosi wan sama sutudeli anga i?

Leisi Psalm 119:34, da i luku efii poi piki den akisi ya:

Saide a bun fu begi fosi i leisi Beibel, efuso fosi i seeka iseefi fu sutudeli Beibel?

San o yeepi i fu fusutan san yo leli na a Beibel sutudi? Wantu sani di i sa du te ye seeka iseefi:

Leisi den paragraaf di de na a bigin fu a toli.
Leisi den Beibeltekisi di de aini den paragraaf. Meke moiti fu si san den e leli i fu a toli di e taki aini a paragraaf.
Maiki den piki fu den akisi aini a paragraaf. A sani ya o yeepi i te ye luku a pisi ya anga a sama di e sutudeli anga i.

I be sabi a sani ya?

A omen Beibel Yehofa Kotoigi e koboloiki, ma den moo lobi a Nyun-Grontapuvertaling bika a moo makiliki fu fusutan. Gadu nen de aini tu.—Luku a artikel di den e kai ‘Yehofa Kotoigi abi den eigi Beibel?’

SON SAMA E TAKI: ‘Mia poi sutudeli Beibel, mi nai abi ten. Mi lai sani e du.’

Fa ye si a toli ya?

SAI LELI?

Efii wani fusutan a Beibel, i mu e meke moiti fu leisi en ala dei. I mu begi Gadu fu a yeepi i fu fusutan san yo leisi. I mu begi fosi i bigin seeka iseefi gi a Beibel sutudi tu.