TOLI 17

Sowtu manii Yesesi be abi?

PEE

Te u luku den sani di Yesesi be e du, anga den sani di a be e taki di a be de a goontapu ya, a sani ya e yeepi u fu kon sabi sowtu manii a abi. Ai yeepi u tu fu kon sabi en Dda Yehofa moo bun. Wo luku wantu moin manii fu Yesesi anga faw sa waka neen baka.

1. Sowtu manii fu Yehofa Yesesi abi?

Di Yesesi be de a hemel, a omen miliyun yali en anga en Dda be de makandaa. Neen meke a teke en Dda aini a fasi fa ai du sani, a fasi fa ai denki, anga a fasi fa ai libi anga taawan. (Leisi Yohanisi 5:19.) Yesesi abi denseefi manii fi en Dda. Neen meke di a be de a goontapu ya a be man taki: ‘A sama di si mi, si a Dda tu’ (Yohanisi 14:9). Te yo kon sabi sowtu manii Yesesi be abi, a sani ya o yeepi i fu sabi Yehofa moo bun. A fasi fa Yesesi be e libi anga sama e soi u kiin taki Yehofa e booko en ede anga u.

2. Fa Yesesi soi taki a lobi Yehofa?

Yesesi be taki: ‘Mi e du san a Dda taigi mi, fu di mi wani goontapu sabi taki mi lobi a Dda’ (Yohanisi 14:31). Na ala yuu Yesesi be e du san en Dda taki, winsi a sani ya á be makiliki. A be lobi yeepi sama tu fu kon sabi en Dda, fu den anga en be sa toon mati.—Yohanisi 14:23.

3. Fa Yesesi soi taki a lobi sama?

Beibel taki fu ala den sani di de a goontapu, ‘a libisama Yesesi moo lobi’ (Odo 8:31). Ala yuu a be e gi sama taanga-sikin te den be booko-saka. A be e yeepi den te den be fuka. Den wonduu di a be e du be e soi tu taki a lobi sama (Malikisi 1:40-42). A be e libi switi anga sama, aa be e paati bee. Den sani di Yesesi be e taki be e toosutu sama. A di Yesesi lobi libisama meke a be de kabakaba fu dede gi u. Ma den sama di a moo lobi, a den sama di e du san a taki.—Leisi Yohanisi 15:13, 14.

LUKU A TOLI YA MOO FINI

Kow go luku moo fini sowtu manii Yesesi abi, anga faw sa soi taki u lobi taawan leti enke en.

4. Yesesi lobi en Dda

Yesesi soi u san u mu du fu soi taki u lobi Gadu. Leisi Lukasi 6:12 anga Yohanisi 15:10; 17:26. Baka te i leisi den tekisi, luku efii poi piki a akisi ya:

Faw sa soi taki u lobi Yehofa leti enke Yesesi?

Yesesi lobi en Dda. Di a be de a goontapu ya na ala yuu a be e begi en

5. Yesesi be lobi yeepi sama te den be fuka

Yesesi be e du ala san a poi fu yeepi taawan. Winsi a be weli seefi, toku a be e meke moiti fu yeepi sama di be fuka. Leisi Malikisi 6:30-44, da i luku efii poi piki den akisi ya:

Fa Yesesi soi taki ai booko en ede anga sama, aini a toli di u leisi ya?—Luku vers 31, 34, 41, anga 42.
Saide Yesesi be e yeepi sama?—Luku vers 34.
Beibel taki Yesesi anga Yehofa abi denseefi manii. Te i luku a toli ya, da san a sani ya e leli i fu Yehofa?
San a wantu fasi faw sa yeepi taawan leti enke Yesesi?

6. Yesesi lobi gi sama sani

Winsi fa Yesesi a ná be guduman toku a be lobi gi sama sani. A taki useefi mu lobi gi sama sani tu. Leisi Toli fu den apostel 20:35, da i luku efii poi piki a akisi ya:

San Yesesi taki u mu du, efu u wani piisii?

Pee a FELON, da i luku efii poi piki a akisi ya.

FELON: ‘Te yu e gi sama sani yu e moo piisii’—Wan satu pisi (4:00)

San a wantu sani di u sa gi sama winsi u naabi tyaipi sani?

I be sabi a sani ya?

Beibel taki te we begi Yehofa, u mu begi aini a nen fu Yesesi. (Leisi Yohanisi 16:23, 24.) Te we begi aini a nen fu Yesesi, da we soi taki we si Yesesi enke a sama di yeepi u fu toon Yehofa mati.

SON SAMA E TAKI: ‘Fa we pina ya, a Gadu wani en so.’

U si taki Yesesi abi denseefi manii fi en Dda. Te i luku a fasi fa Yesesi be e libi anga sama, da i si enke a Yehofa e meke we pina? Saide i taki so?

SAI LELI?

Yesesi lobi Yehofa, a lobi u tu. A abi denseefi manii fi en Dda. Neen meke te u kon sabi Yesesi moo bun a sani ya e yeepi u fu kon sabi Yehofa moo bun tu.