TOLI 19

Den Yehofa Kotoigi a tuutuu Kelesten?

PEE

Wi enke Yehofa Kotoigi e biibi taki wa tuutuu Kelesten. Wo luku saide we biibi son sani, fa u du fende a nen Yehofa Kotoigi, anga fa we soi taki u lobi useefi.

1. Pe den Yehofa Kotoigi e puu den sani di den e leli sama?

Yesesi be taki: ‘A Wowtu fu Gadu na a tuu’ (Yohanisi 17:17). Leti enke Yesesi, a san sikiifi aini Beibel Yehofa Kotoigi e leli sama. Aini a yali 1870, wan kulu sama bigin ondoosuku Beibel fayafaya. Winsi fa den keliki fu a ten de be e leli sama taa sani, toku a san Beibel taki a kulu sama ya be e biibi. Anga san Beibel taki den be e wooko tu. Bakaten den bigin paati den sani di den be e leli aini Beibel anga taa sama. a

2. Saide we tyai a nen Yehofa Kotoigi?

Den sama di e dini Yehofa de enke en kotoigi, bika den e leli sama fa Yehofa de tuutuu (Hebrewsama 11:4–12:1). Yehofa be taigi den sama di be e dini en a fositen taki: ‘Wi a mi kotoigi.’ (Leisi Yesaya 43:10.) Beibel e kai Yesesi ‘a Kotoigi di i sa fitoow’ (Openbaring 1:5). Aini a yali 1931 u teke a nen Yehofa Kotoigi. Ai bigi gi u taki we tyai a nen ya.

3. Fa Yehofa Kotoigi e soi taki den lobi denseefi, enke fa Yesesi be lobi den bakaman fi en?

Yesesi be lobi den bakaman fi en tuutuu, a be e si den enke en famii. (Leisi Malikisi 3:35.) A so Yehofa Kotoigi a hii goontapu e libi na a wan leti enke wan famii. Neen meke we kai useefi baala anga sisa (Fileimon 1, 2). Beibel taki: ‘U mu lobi ala den baala fu u’ (1 Peitilisi 2:17). A omen fasi Yehofa Kotoigi e soi taki den lobi denseefi. Wan fu den fasi fa den e du a sani ya, na a yeepi di den e yeepi den baala anga sisa fu den a hii goontapu te den fuka.

LUKU A TOLI YA MOO FINI

Wo go luku wantu toli fu den Yehofa Kotoigi di e soi taki wa tuu Kelesten.

Tuutuu Kelesten e wooko anga san den e leli aini Beibel. Den e taigi taawan san den e biibi tu

4. A san sikiifi aini Beibel we leli sama

Yehofa be taki a fesi taki sama be o kon sabi den tuu leli fu Beibel. Leisi Daniyeli 12:4, da i luku efii poi piki a akisi ya:

Enke fa a tekisi e soi, da san be o pasa te a foluku fu Gadu be o ondoosuku Beibel finifini?

Luku fa Charles Russell, anga wantu taa sama be e ondoosuku a Wowtu fu Gadu. Pee a FELON, da i luku efii poi piki a akisi ya.

FELON: Den be bigin fusutan den leli fu Beibel baka (7:45)

Di i luku a felon, fai si Charles Russell anga den taa sama be e sutudeli Beibel?

I be sabi a sani ya?

Son leisi u be abi fu kengi a fasi fa u be e fusutan son pisi fu Beibel. Saide? Leti enke fa a peesi e moo kiin o moo a dei e opo, a so Gadu e yeepi a foluku fi en fu fusutan son sani moo bun. (Leisi Odo 4:18.) A Beibel nai kengi, ma we kon fusutan sani moo bun. Te u kon fusutan wan toli moo bun, u nai daaidaai fu kengi a fasi faw be e si sani fosi.

5. We meke sama sabi Yehofa

Saide we kai useefi Yehofa Kotoigi? Pee a FELON, da i luku efii poi piki a akisi ya.

FELON: Wan nen di e soi sama a wi tuutuu (2:40)

Saide a fiti taki we tyai a nen Yehofa Kotoigi?

Saide Yehofa teke wan kulu sama enke en Kotoigi? Yehofa gi den a wooko fu meke sama sabi taki neen na a tuu Gadu, bika a omen lei fi en sama e paati. Kow luku tu fu den lei ya.

Son keliki e leli sama taki Gadu wani u dini en anga pobiki, fowtow efuso taa sani. Ma leisi san Lefitikesi 26:1 e taki, da i luku efii poi piki den akisi ya:

San Beibel seefi e taki fu a toli ya? Yehofa wani u koboloiki pobiki anga taa sani te we dini en?

Son keliki e leli sama taki Yesesi a Gadu, ma leisi Yohanisi 20:17, da i luku efii poi piki den akisi ya:

San Beibel e taki fu a toli ya? Gadu anga Yesesi na aseefi sama?
Yehofa teke wan kulu sama fu leli taawan sama neen anga en Manpikin. Fai fende a sani ya?

6. U lobi useefi

Beibel taki tuu Kelesten de enke ala den pisi fu wan sikin di e wooko makandaa. Leisi 1 Korentesama 12:25, 26, da i luku efii poi piki den akisi ya:

San tuu Kelesten mu du te sani e miti wan taa Kelesten?
I si enke Yehofa Kotoigi lobi denseefi?

Te sani e miti Yehofa Kotoigi aini wan kondee, da ala den Kotoigi a hii goontapu e meke moiti fu yeepi den. Efii wani si wan fu den toli ya, da pee a FELON. Baka dati luku efii poi piki a akisi ya.

FELON: Fa den Kotoigi yeepi denseefi di wan gaan winta pasa a Haiti? (5:29)

Fa Yehofa Kotoigi e soi taki den lobi denseefi, te sani enke gaan wataa efuso gaan winta pasa a wan peesi?

Tuutuu Kelesten e yeepi taawan te den de a nowtu

SON SAMA E TAKI: ‘Yehofa Kotoigi a wan nyun keliki.’

Fanafu on ten Yehofa bigin kai den sama di e dini en, en kotoigi?

SAI LELI?

Yehofa Kotoigi a tuutuu Kelesten. Wa baala anga sisa a hii goontapu. A san sikiifi aini Beibel we leli sama. We yeepi sama fu kon sabi sama a Yehofa tuutuu.