Yehofa á lobi te sani e waka buuyabuuya (1 Korentesama 14:33). Neen meke den sama di e dini en á mu e du sani buuyabuuya tu. Fa sani seeka aini a Kelesten kemeente? San u sa du fu sani waka bun aini a kemeente?

1. Sama na a edeman fu a kemeente?

Beibel taki ‘a Kelestesi na a ede fu a kemeente’ (Efeisesama 5:23). A hemel Yesesi de e tii a foluku fu Yehofa a goontapu ya. Yesesi poti wan kulu owluman fu tii a wooko a hii goontapu. Beibel e kai den sama ya ‘a koni saafu di u sa fitoow’. (Leisi Mateyesi 24:45-47.) Fosi a den apostel anga den owluman di be de a Yelusalem be e tii a wooko di den Kelesten be e du. Na aseefi wooko ya den baala di e tii a wooko aini a ten ya e du a hii goontapu (Toli fu den apostel 15:2). Ma den man ya a ná basi fu a olikanisâsi fu u. Den e meke moiti fu wooko anga san Yehofa taki aini en Wowtu Beibel. Den e wooko anga san Yesesi taki tu, bika neen na a edeman fu a kemeente.

2. Sama a den owluman? Sowtu wooko den e du aini a kemeente?

Owluman a Kelesten baala di abi ondoofeni. Den man ya abi a wooko fu gi leli aini a kemeente. Den e gi den baala anga sisa taanga-sikin tu. A ná fu moni den e du a wooko ya. ‘Den nai du a wooko ya fu fende wini a wan bidiigi fasi, ma a di den wani yeepi taawan meke den e du en’ (1 Peitilisi 5:1, 2). Den dinali aini den kemeente e yeepi den owluman anga a wooko fu den. Bakaten, denseefi sa toon owluman tu.

Den baala di e tii a wooko a hii goontapu, poti son owluman enke kelen owluman. Den kelen owluman e go a omen kemeente fu gi den baala anga sisa taanga-sikin. Son leisi den e poti den baala anga sisa a pasi tu. Te den go luku wan kemeente, te den si taki wan baala doo den maiki di sikiifi aini Beibel fu toon owluman efuso dinali, da den e poti en enke owluman efuso dinali.​—1 Timotiyesi 3:1-10, 12; Titesi 1:5-9.

3. Sowtu wooko ala Kotoigi abi?

Ala sama aini a kemeente ‘e gafa a nen fu Yehofa’ te den e kon a den komakandaa, anga te den e du a peleikiwooko.​—Leisi Psalm 148:12, 13.

 LUKU A TOLI YA MOO FINI

4. Yesesi a wan bun fesiman

Yesesi e kai u fu u kon neen. Leisi Mateyesi 11:28-30, da i luku efii poi piki a akisi ya:

• Fa Yesesi wani den bakaman fi en fii te ai tii den?

5. Den owluman e tyai denseefi a wan bun fasi fu taawan sa waka a den baka

1. Owluman e meke moiti fu taanga den biibi. Den e yeepi den osufamii fu den biibi taanga tu

2. Owluman e yeepi ala sama aini a kemeente

3.   Den owluman e peleiki fayafaya

4. Den owluman e gi leli aini a kemeente, ma den e yeepi anga den taa wooko di mu du aini a kemeente tu

6. We wooko makandaa anga den owluman

Beibel e taigi u saide a pelensipali fu wooko makandii anga den owluman. Leisi Hebrewsama 13:17, da i luku efii poi piki den akisi ya:

• Beibel taki u mu saka useefi a den sama di e teke fesi ondoo. I si enke a wan bun sani fu e aliki den sama di e teke fesi? Saide i taki so?

Leisi Lukasi 16:10, da i luku efii poi piki a akisi ya:

• Saide a bun fu aliki den owluman, winsi son yuu ai gei enke aa de fanowdu?

 SAI LELI?

A Yesesi na a ede fu a kemeente. We wooko makandii anga den owluman di Yesesi poti fu teke fesi. Den owluman ya e leli u fa fu du san Beibel e taki.

Sai be o piki?

• Sama na a edeman fu a kemeente?

• Sowtu wooko den owluman e du aini a kemeente?

• San ala sama di e dini Yehofa mu du?