TOLI 21
Fa we paati a bun nyunsu?
Dyonson moo, a Kownukondee fu Yehofa o puu ala den polobelema di de na a goontapu ya. Yesesi wani den bakaman fi en paati a bun nyunsu ya gi ala sama, fu denseefi sa fende wini fi en (Mateyesi 28:19, 20). Fa den Yehofa Kotoigi e du a sani di Yesesi taki ya?
1. Fa a sani di sikiifi a Mateyesi 24:14 e pasa aini a ten ya?
Yesesi be taki: ‘A bun nyunsu fu a Kownukondee fu Gadu mu paati na a hii goontapu fu ala sama yee’ (Mateyesi 24:14). Yehofa Kotoigi lobi a pelensipali wooko ya. We paati a bun nyunsu a hii goontapu aini moo enke 1000 tongo. Ma fu man du a gaan wooko ya, a mu seeka bun. Efu Yehofa á be e yeepi u, wa be o poi du a wooko ya.
2. Sowtu moiti we meke fu peleiki gi sama?
We peleiki na ala peesi pe we miti sama. Leti enke den Kelesten a fositen, we go peleiki gi ‘den sama a den osu tu’ (Toli fu den apostel 5:42). Fu di we peleiki a den fasi ya, meke a omen sama e yee a bun nyunsu. Son leisi te u go a den sama, den nai de a osu. Neen meke we peleiki a pe tyaipi sama e pasa. We koboloiki ala den okasi di we fende fu yeepi sama fu kon sabi sama a Yehofa, anga san a abi a pakisei gi libisama.
3. Sama mu paati a bun nyunsu?
Ala tuu Kelesten abi a wooko fu paati a bun nyunsu. We si a wooko ya enke wan pelensipali wooko. We du ala san u poi fu leli sama, bika na a sani ya o yeepi den fu fende a teego libi. (Leisi 1 Timotiyesi 4:16.) Sama nai pai u fu du a wooko ya, bika Beibel taki: ‘A fu soso u fende den sani ya, da u mu gi fu soso tu’ (Mateyesi 10:7, 8). Winsi sama nai wani aliki u, toku we peleiki go doo, bika a Gadu sende u fu du a wooko ya. We peleiki fu di u wani meke Yehofa piisii.
LUKU A TOLI YA MOO FINI
Wo si fa Yehofa Kotoigi e peleiki a hii goontapu, anga fa Yehofa e yeepi u fu du a wooko ya.
We peleiki a hii goontapu: (A) Kosta Rika, (B) Ameekankondee, (C) Benin, (D) Tailand, (E) Yapkondee, (F) Sweden
4. We du ala san u poi fu miti ala sama
Yehofa Kotoigi e du ala san den poi fu paati a bun nyunsu gi ala sama winsi pe den de. Pee a FELON, da i luku efii poi piki a akisi ya.
-
Fai fende a moiti di Yehofa Kotoigi e meke fu peleiki gi sama?
Leisi Mateyesi 22:39 anga Romesama 10:13-15, da i luku efii poi piki den akisi ya:
-
Fa a peleiki di we peleiki e soi taki u lobi taa sama?
-
Fa Yehofa e si den sama di e paati a bun nyunsu? (Luku vers 15.)
5. We wooko makandaa anga Gadu
A omen ondoofenitoli de di e soi taki te we peleiki, Yehofa e holibaka gi u. Luku a toli fu wan baala den e kai Paul di e tan a Nieuw-Zeeland. Wan bakadina di a be e peleiki osu fu osu, a miti wan uman. A mmanten de, a uman ya be begi Gadu. Di a be e begi a be kai Yehofa nen. A akisi en fu wan sama be sa kon leli en. Paul taki: ‘Dii yuu baka di a uman ya begi, neen mi doo neen baka doo.’
Leisi 1 Korentesama 3:9, da i luku efii poi piki a akisi ya:
-
Fa den ondoofenitoli enke a wan fu a baala a Nieuw-Zeeland e soi taki Yehofa e holibaka gi u te we peleiki?
Leisi Toli fu den apostel 1:8, da i luku efii poi piki a akisi ya:
-
Saide wi abi Yehofa fanowdu fu man du a peleikiwooko?
I be sabi a sani ya?
Ala wiki we leli a den mindiiwiki komakandaa faw mu peleiki. Efii go a wan fu den komakandaa ya kaba, da fai fende den sani di we leli ape?
6. Te we peleiki we du san Gadu sende u fu du
Aini a ten fu den apostel, sama be wani tapu den bakaman fu Yesesi fu den á peleiki moo. Ma den Kelesten fu a ten de be e du ala san den poi fu lanti sa gi ‘den pasi fu peleiki’ (Filipisama 1:7). Na aseefi sani den Yehofa Kotoigi e du aini a ten ya. a
Leisi Toli fu den apostel 5:27-42, da i luku efii poi piki a akisi ya:
-
Saide u naw meke sama tapu u fu peleiki? Luku vers 29, 38, anga 39.
KANDE WAN SAMA AKISI I TAKI: ‘Saide Yehofa Kotoigi e waka a sama osu?’
-
Sai be o piki en?
SAI LELI?
Yesesi taigi den bakaman fi en taki den mu paati a bun nyunsu gi ala sama. Yehofa e yeepi a foluku fi en fu du a wooko ya.
Sai be o piki?
-
Fa a bun nyunsu e paati a hii goontapu?
-
Fa a peleiki di we peleiki e soi taki u lobi taa sama?
-
I si enke a peleikiwooko a wan switi wooko? Saide i taki so?
MOO SANI FU A TOLI YA
Luku fa Yehofa Kotoigi e peleiki aini den gaan foto.
Fa Yehofa Kotoigi e yeepi den sama di lowe komoto a den kondee?
Den sama di lowe komoto a den kondee lobi leli sani fu Gadu (5:59)
Luku fa sama e piisii te den e du a fuuten diniwooko.
Leisi wantu toli di u tyai go a kuutu anga fa a wini di u wini den toli ya meke a moo makiliki gi u fu du a peleikiwooko.
a A Yehofa gi wa wooko fu peleiki, neen meke winsi san den tiiman fu a goontapu ya e du, den naw poi tapu u fu du a wooko ya.
