Yesesi leli u taki a te wan sama dopu fosi a sa taki en a wan Kelesten tuutuu. (Leisi Mateyesi 28:19, 20). Ma san a dopu? San wan sama mu du efu a wani dopu?

1. Fa den e dopu wan sama?

A wowtu dopu di kai aini Beibel a be wan Giiki wowtu di wani taki ‘doki go a ondoo wataa’. Di Yesesi dopu aini a Yordaan liba, neen hii sikin be go aini a wataa. Baka dati ‘a opo kon a tapu’ (Malikisi 1:9, 10). Na aseefi fasi tuu Kelesten e dopu aini a ten ya. Den hii sikin e sungu go aini a wataa.

2. Te wan sama dopu, da san a sani de e soi?

Te wan sama dopu, ai soi taki a paamisi Yehofa taki ao libi enke fa a wani. Fa wan sama e paamisi Gadu a sani ya? Fosi wan sama dopu, ai begi Yehofa, da a taigi en taki ao dini en fu teego. Neen wawan e de a wan peesi te ai paamisi Gadu a sani ya. Ai paamisi Yehofa taki ao dini en wawan. Ai paamisi en tu taki na a wani fu Gadu ao poti a fesi aini en libi. ‘A naw teli enseefi moo, ma ao meke moiti fu du sani enke Yesesi’ (Mateyesi 16:24). Te wan sama paamisi Yehofa taki ao libi enke fa a wani da a dopu, da a sani ya e yeepi en fu toon wan bun mati fu Yehofa. Ai toon mati anga taa sama di e dini Yehofa tu.

3. San wan sama mu du fosi a sa dopu?

Fosi i dopu i mu leli sabi Yehofa. I mu e fitoow en tu. (Leisi Hebrewsama 11:6.) O moo ye leli sabi Yehofa, o moo i biibi o taanga. A sani ya o meke i kon moo lobi en. Te i kon lobi Yehofa, yo wani taigi taawan den sani di ye leli fi en aini Beibel. Yo meke moiti fu libi enke fa a wani tu (2 Timotiyesi 4:2; 1 Yohanisi 5:3). Efu wan sama e ‘tyai enseefi enke fa Yehofa wani’, a sa paamisi en taki ao libi enke fa a wani da a dopu.​—Kolosesama 1:9, 10. a

 LUKU A TOLI YA MOO FINI

4. San u sa leli fu a dopu fu Yesesi?

Leisi Mateyesi 3:13-17, da i luku san ai taigi u fu a dopu fu Yesesi. Baka dati, da i piki den akisi ya:

• A beibibeibi Yesesi be de di a dopu?

• Fa a be dopu? A tyatya den be tyatya wataa neen di a be e dopu?

Baka di Yesesi dopu, a bigin du a wooko di Gadu be sende en kon du a goontapu ya. Leisi Lukasi 3:21-23 anga Yohanisi 6:38, da i luku efii poi piki a akisi ya:

• Baka di Yesesi dopu, sowtu wooko a poti a fesi aini en libi?

5. Ya mu feele fu dopu

Kande ye feele pikinso fu paamisi Yehofa taki yo libi enke fa a wani. Ma di yo kon leli sabi Yehofa moo bun, yo kon moo lobi en da a sani ya o yeepi i fi ya feele moo fu dopu. Pee a FELON, da yo si san yeepi wantu sama fu dopu.

Leisi Yohanisi 17:3 anga Yakowbesi 1:5, da i luku efii poi piki a akisi ya:

• San sa yeepi wan sama fu dopu?

1. Fosi u dopu, u mu begi Yehofa da u paamisi en taki wo libi enke fa a wani

2. Te u dopu, we soi ala sama di de ape taki u paamisi Yehofa taki wo libi enke fa a wani

 6. Te yo dopu yo kon aini a gaan osufamii fu Yehofa

Te yo dopu, yo abi baala anga sisa a hii goontapu. We tan aini omen kondee. A omen sowtu tongo we taki tu. Ma toku a denseefi sani we biibi. A denseefi sani we leli tu. Ala we meke moiti fu wooko anga den sani di we leli aini Beibel. Leisi Psalm 25:14 anga 1 Peitilisi 2:17, da i luku efii poi piki den akisi ya:

• Te wan sama dopu, da fa a matifasi fi en anga Yehofa o de? Fa a matifasi fi en anga den taa sama di e dini Yehofa o de?

 SAI LELI?

Yesesi taki Kelesten mu dopu. Efu wan sama wani dopu a mu taanga en biibi aini Yehofa. A mu libi tu enke fa Gadu wani. Baka dati da a paamisi Gadu taki ao libi enke fa a wani.

Sai be o piki?

• Fa den e dopu sama? Saide a pelensipali fu dopu?

• Te wan sama dopu, da san a sani ya e soi?

• San wan sama mu du fosi a paamisi Yehofa taki ao libi enke fa a wani, da a dopu?