TOLI 26
Saide libisama e pina?
Te ogii e pasa, da omen sama e akisi denseefi ‘saide den sani ya e miti den’. We piisii fu sabi taki Beibel poi piki a akisi ya.
1. Fa Saatan tyai ogii kon a goontapu?
Saatan Didibii sitee anga Gadu, fu di a be wani sama dini en. A koli den fosi libisama Adan anga Efa fu taangayesi Gadu (Genesesi 3:1-5). A meke Efa fii enke Yehofa á gi den ala san den be abi fanowdu fu piisii tuutuu. A be wani soi en taki libisama be o moo piisii te den e libi enke fa denseefi wani. Saatan taigi Efa taki efu a taangayesi Gadu a naw dede. A disi na a fosi lei di Saatan meke. Neen meke Beibel e kai Saatan ‘a dda fu lei’.—Yohanisi 8:44.
2. San Adan anga Efa du?
Yehofa be gi Adan anga Efa ala san den be abi fanowdu. A be taigi den taki den sa nyan fu ala den sii aini a dyali, boiti wan fu den (Genesesi 2:15-17). Ma toku den nyan a wan kodo sii di Yehofa be taigi den taki den á mu holi. Beibel taki ‘Efa piki wan fu den sii na a bon neen a nyan’. Bakaten a gi Adan neen Adan seefi ‘nyan’ (Genesesi 3:6). Ala den tu man taangayesi Gadu. Adan anga Efa á be abi sondu, neen meke aa be taanga gi den fu du san Yehofa be taigi den. A fuseefi den taangayesi Yehofa. A sani di den du soi taki den á be wani Yehofa tii den moo. A soso takuu bakapisi a sani ya tyai gi den.—Genesesi 3:16-19.
3. Sowtu takuu bakapisi a sani di Adan anga Efa du tyai gi u?
Di Adan anga Efa taangayesi Gadu, den kon abi sondu. Neen meke ala den bakapikin fu den seefi abi sondu. Beibel e taki: ‘Wan man meke sondu de a goontapu, neen sondu tyai dede. Neen meke ala sama e dede, bika ala den abi sondu.’—Romesama 5:12.
A omen sani e meke we pina. Son leisi a den sani di we du efuso den sani di taawan e du e tyai ogii gi u. Ma son leisi ogii e miti u tu fu di wa poi si sani a fesi.—Leisi Peleikiman 9:11.
LUKU A TOLI YA MOO FINI
Luku faw du sabi taki a ná Gadu e meke sama e pina, anga fa ai fii te ai si den sani di e miti u.
4. Sama e meke we pina?
Omen sama e denki taki a Gadu e tii a goontapu. Ma a sani ya a tuu? Pee a FELON.
Leisi Yakowbesi 1:13 anga 1 Yohanisi 5:19, da i luku efii poi piki den akisi ya:
-
A Gadu meke we pina?
5. Sowtu bakapisi a tii fu Saatan tyai gi libisama?
Leisi Genesesi 3:1-6, da i luku efii poi piki den akisi ya:
-
Sowtu lei Saatan be taki?—(Luku vers 4, anga 5.)
-
San Saatan taki fu soi enke Yehofa be e kibii sani gi libisama?
-
San Saatan taki fu meke sama biibi taki u poi de koloku sondee Yehofa?
Leisi Peleikiman 8:9, da i luku efii poi piki a akisi ya:
-
Fa a goontapu de nownow di Yehofa nai tii libisama?
-
Di Yehofa meke Adan anga Efa, den á be abi sondu. A poti den aini wan moin paladeisi, toku den aliki Saatan neen den taangayesi Gadu
-
Baka di den taangayesi Gadu, sondu, pina, ogii, anga dede kon lai a goontapu
-
Dyonson Yehofa o puu sondu, pina anga dede, da libisama o fende a okasi baka fu libi fu teego aini wan paladeisi
6. Tyali e kisi Yehofa te ai si fa we pina
I si enke ai hati Yehofa te ai si den ogii di e miti u? Luku san Kownu David anga apostel Peitilisi be taki. Leisi Psalm 31:7 anga 1 Peitilisi 5:7, da i luku efii poi piki a akisi ya:
-
Fa ye fii di i sabi taki Yehofa e booko en ede anga u?
7. Gadu o puu a pina di libisama e pina
Leisi Yesaya 65:17 anga Openbaring 21:3, 4, da i luku efii poi piki a akisi ya:
-
Winsi sowtu ogii e miti libisama, Yehofa o seeka ala sani kon bun baka. Fa a sani ya e meke i fii?
I be sabi a sani ya?
Di Saatan meke a fosi lei, a poli Yehofa nen. A taki Yehofa nai tii bun, aa lobi libisama. Di Yehofa o puu ala den sani di e fooseli libisama, ala sama o si kiin taki neen na a moo bun Tiiman di de. Den o si taki a lei Saatan lei gi en. A sani ya a wan fu den moo pelensipali sani di ala sama mu kon fusutan.—Mateyesi 6:9, 10.
SON SAMA E TAKI: ‘Fa ogii e miti u ya, a Gadu wani en so.’
-
Fai be o piki sowan sama?
SAI LELI?
A Saatan Didibii anga Adan anga Efa tyai ogii kon a goontapu. Tyali e kisi Yehofa te ai si fa we pina. Dyonson ao puu ala den sani di e miti libisama.
Sai be o piki?
-
Sowtu lei Saatan Didibii taigi Efa?
-
Sowtu bakapisi a sani di Adan anga Efa du tyai gi ala u?
-
Faw du sabi taki tyali e kisi Yehofa te ogii e miti u?
MOO SANI FU A TOLI YA
Leisi a artikel ya, da yo si san a sondu.
A artikel ya e taki fu wantu lei di Saatan Didibii taki aini Eden.
‘Saide Gadu fika ogii fu e pasa?’ (A Saanantongo Wakititolen fu 1 yanuari 2014)
Wan man kon fusutan saide ogii e pasa a goontapu.
