TOLI 31

San na a Kownukondee fu Gadu?

PEE

A moo pelensipali toli di Beibel e taki fi en na a Kownukondee fu Gadu. Na a Kownukondee ya o meke a goontapu toon wan paladeisi. Ma san na a Kownukondee? Faw du sabi taki ai tii kaba? San a Kownukondee ya du kaba? San ao du aini a ten di e kon? Wo luku den akisi ya aini a pisi ya, anga den taa tu toli di e kon neen baka.

1. San na a Kownukondee fu Gadu? Sama na a Kownu fu a Kownukondee ya?

A Kownukondee a wan tiimakiti di Yehofa Gadu seefi sete a hemel. A poti Yesesi enke Kownu fu a tiimakiti ya (Mateyesi 4:17; Yohanisi 18:36). Beibel taki fu Yesesi taki: ‘Ao tii fu teego enke Kownu’ (Lukasi 1:32, 33). A Yesesi, a Kownu fu Gadu Kownukondee o tii ala sama di o de a goontapu a ten de.

2. Sama o tii anga Yesesi?

A ná Yesesi wawan o tii. Beibel taki: ‘Sama fu ala lo, tongo, nasi anga kondee’ o tii goontapu enke kownu. (Leisi Openbaring 5:9, 10.) Omen sama o tii makandaa anga Yesesi? Baka di Yesesi kon a goontapu, a miliyunmiliyun sama toon en bakaman. Ma a 144.000 fu den sama ya namo o tii anga en a hemel. (Leisi Openbaring 14:1-4.) Ala den taa Kelesten o libi fu teego a goontapu ya, da den o saka denseefi na a Kownukondee ya ondoo.—Psalm 37:29.

3. Saide Gadu Kownukondee bun moo libisama tiiman?

Winsi fa libisama tiiman e meke moiti fu du bun sani, toku den naabi a makiti fu du ala san den wani. Wan taa sani di e pasa tu, a taki te den tii doo wan pisi da wan taa sama e teke den peesi. Gaanse leisi den nai booko den ede anga a foluku. Ma nawan sama o poi teke a peesi fu Yesesi, a Kownu fu Gadu Kownukondee. Beibel taki: ‘Gadu sete wan kownukondee di sama naw poi puu a pasi’ (Daniyeli 2:44). Te Yesesi o tii a hii goontapu, a naw lobi a wan sama moo a taawan. A lobi ala sama, a abi bun manii, ai du sani a wan letifasi. Den sama di ao tii o abi denseefi manii ya tu.—Leisi Yesaya 11:9.

LUKU A TOLI YA MOO FINI

Wo luku saide Gadu Kownukondee bun moo den libisama tiiman.

4. Gadu Kownukondee o tii a hii goontapu

Nawan libisama tiiman abi makiti enke Yesesi. Leisi Mateyesi 28:18, da i luku efii poi piki a akisi ya:

Enke fa a tekisi ya e soi, da saide u sa taki Yesesi abi makiti moo iniiwan libisama tiiman?

Ala yuu den kondee e puu tiiman poti taawan. Boiti dati, den tiiman ya a wan pisi fu goontapu namo den e tii. Ma fa a de anga a Kownukondee fu Gadu? Leisi Daniyeli 7:14, da i luku efii poi piki den akisi ya:

Saide a wan bun sani taki nawan sama o poi booko a Kownukondee fu Gadu?
Saide u mu poolo taki Gadu Kownukondee o tii a hii goontapu?

5. Libisama á mu tii moo

Saide Gadu Kownukondee o puu ala libisama tiiman? Pee a FELON, da i luku efii poi piki a akisi ya.

FELON: San na a Kownukondee fu Gadu?—Wan satu pisi (1:41)

Fa sani waka fanafu di libisama bigin tii?

Leisi Peleikiman 8:9, da i luku efii poi piki a akisi ya:

I si enke Gadu Kownukondee mu puu libisama tiiman? Saide i taki so?

6. Den tiiman fu Gadu Kownukondee e fusutan u

A Kownu fu u Yesesi be libi a goontapu yaaso enke libisama, neen meke a poi fusutan den ‘swakifasi fu u’ (Hebrewsama 4:15). Den 144.000 man anga uman di o tii makandii anga Yesesi e fusutan u tu. A goontapu ya Yehofa teke den sama ya, ‘fu ala lo, tongo, nasi anga kondee’ fu go tii anga Yesesi enke kownu a hemel.—Openbaring 5:9.

Yesesi anga den sama di e tii makandaa anga en, e fusutan fa we fii, den sabi sai miti u tu. Fa ye fii di i sabi a sani ya?

Yehofa teke man anga uman fu ala sowtu nasi fu tii anga Yesesi a hemel

7. Den weiti fu Gadu Kownukondee moo bun

Den tiiman fu a goontapu ya e meke moiti fu meke weiti, di o tyai wini gi den sama di den e tii. Den e meke moiti fu kibii den. A letiso Gadu Kownukondee abi weiti tu. Ala den sama di ao tii mu wooko anga den weiti ya. Leisi 1 Korentesama 6:9-11, da i luku efii poi piki den akisi ya:

Fai denki a goontapu o de te ala sama e wooko anga den weiti fu Gadu? a
I si enke a wan bun sani taki Gadu poti weiti gi den sama di a Kownukondee fi en o tii? Saide i taki so?
Faw du sabi taki den sama di nai holi den weiti ya poi kengi?—Luku vers 11.