TOLI 35

Fai sa du sani anga koni?

PEE

Ala sama abi fu denki fosi a du wan sani. Son sani we du sa poli u hii libi. Son sani we du sa poli wi anga Yehofa tu. Kande ye luku pe yo tan, sowtu wooko yo du, efi yo toow, efuso i naw toow. Efii denki bun fosi i du wan fu den sani ya, i naw du wan sani di o hati i bakaten. Aw yeepi i tu fi yu anga Yehofa á poli.

1. Fa Beibel sa yeepi i fu du sani anga koni?

Fosi i du wan sani a bun fii begi Yehofa fu a yeepi i. Baka dati, da i luku aini Beibel fa Yehofa e denki fu sowan toli. (Leisi Odo 2:3-6.) Son leisi Yehofa e taigi u kiin taki wa mu du wan sani. Te Yehofa taigi u taki wa mu du wan sani, wo fende wini te wi aliki en.

A ná ala yuu Beibel e taigi u kiin taki wa mu du wan sani, ma toku Yehofa e yeepi fu sabi san u mu du (Yesaya 48:17). Fa ai du a sani ya? A omen toli de aini Beibel di e yeepi u fu si fa Yehofa e denki fu wan toli. Te Beibel á taigi u kiin taki wa mu du wan sani, da a bun fu ondoosuku wan toli aini Beibel di o yeepi u fu sabi fa Yehofa e denki fu a sani di u wani du. Te i sabi fa Yehofa e denki fu wan toli, da a sani de o yeepi i fu du sani di o meke a piisii.

2. Sai mu teke i ten pakisei fosi i du wan sani?

Beibel taki: ‘Wan koni sama e luku bun pe ai poti en futu’ (Odo 14:15). Fosi i du wan sani, a bun fu teke i ten denki san na a moo bun fasi fu du a sani di i wani du. A bun fu akisi iseefi taki: ‘Sowtu leli fu Beibel e holibaka gi a sani di mi wani du? A sani di mi wani du o meke mi piisii tuutuu, efuso aw tyai takuu bakapisi gi mi? Aw tyai takuu bakapisi gi taawan? Ma a moo pelensipali sani, Yehofa o piisii anga a sani di mi wani du?’—Deitolonomi 32:29.

A Yehofa abi a leti fu taigi u san bun anga san á bun. Efi ye holi den weiti fi en, neen ye wooko anga san ai leli wi aini Beibel, a sani ya o yeepi i fu abi wan bun kosensi (Romesama 2:14, 15). A kosensi na a sani di e membee u san bun anga san á bun. Efu u kosensi e wooko bun, aw yeepi u fu du sani anga koni.

LUKU A TOLI YA MOO FINI

Meke u luku fa den leli fu Beibel anga a kosensi fu u sa yeepi u fu du sani anga koni.

3. Meke Beibel yeepi i fu du sani anga koni

Fai sa soi taki ye wooko anga san Beibel taki te i mu du wan sani? Pee a FELON, da i luku efii poi piki den akisi ya.

FELON: Wooko anga den leli fu Beibel te yu e du sani (5:54)

San Yehofa gi wi a okasi fu du?
Saide Yehofa gi wi a okasi fu du a sani ya?
San Yehofa gi u fu yeepi u fu du sani anga koni?

Leisi Efeisesama 5:15, 16, da yo si wan leli fu Beibel di o yeepi i fu du sani anga koni. Baka dati luku fai sa koboloiki i ten anga koni fu man du den sani ya . . .

leisi Beibel ala dei.
meke moiti fu toon wan moo bun toowpaa, wan moo bun dda, mma, efuso wan moo bun pikin.
go a den komakandaa.

4. Du sani di o yeepi i fii kosensi wooko bun

Te Beibel e taigi u kiin san u mu du, da ai moo makiliki gi u fu sabi san u mu du. Ma san o yeepi u fu du sani anga koni te Beibel nai taki kiin san u mu du? Pee a FELON, da i luku efii poi piki den akisi ya.

FELON: ‘I mu abi wan kiin kosensi ala yuu’ (5:13)

San yeepi a sisa ya fu du sani anga koni winsi fa Beibel á taigi en pilisisi san a mu du?

Saide aa bun fu akisi taawan fu den taigi i sai mu du? Leisi Hebrewsama 5:14, da i luku efii poi piki den akisi ya:

Son leisi ai gei enke a moo makiliki fu akisi sama fu den taigi i sai mu du. Ma san useefi mu meke moiti fu sabi?
San u mu du efu u wani u kosensi wooko bun?

A kosensi fu u de enke wan kaita di e soi u faw mu libi

5. Holi a kosensi fu taawan a pakisei

A ná ala sama e du sani na aseefi fasi. Fai sa soi taki ye lesipeki a kosensi fu taawan? Kow luku tu okasi pe i mu soi taki ye lesipeki a kosensi fu taawan:

1: Wan sisa di lobi koti en uwii satu foloisi go aini wan kemeente pe omen sisa á lobi te umanpikin e koti den uwii.

Leisi Romesama 15:1 anga 1 Korentesama 10:23, 24, da i luku efii poi piki den akisi ya:

Fa a sisa ya sa wooko anga den sani di den Beibel tekisi ya taki? Sai be o du efu a sani di i wani du nai kai anga a kosensi fu taawan?

2: Wan baala sabi taki Beibel á taki a fowtu fu diingi sopi, ma toku a teke a bosoloiti taki a naw diingi sopi. Ma now a go a wan pikin fesa pe a si baala anga sisa e diingi sopi.

Leisi Preikiman 7:16 anga Romesama 14:1, 10, da i luku efii poi piki den akisi ya:

Fa a baala sa wooko anga den sani di den tekisi ya e taki? Sai be o du efii si wan sama e du wan sani di nai kai anga i kosensi?

Den sani di o yeepi i fu du sani anga koni

1. Begi Yehofa fu a yeepi i fu du sani anga koni.—Yakowbesi 1:5.

2. Ondoosuku Beibel anga den buku fu a olikanisâsi di e taki fu a sani di i wani du. I sa akisi wan sisa efuso wan baala di abi ondoofeni tu fu den poti yu a pasi.