TOLI 36

I mu e taki a tuu ala yuu

PEE

Ala sama wani mati di den sa fitoow. A so a de anga Yehofa tu. Ma a ná ala yuu a makiliki fu taki a tuu, bika gaanse sama na a goontapu ya nai taki a tuu. Sowtu wini we fende te we taki a tuu ala yuu?

1. Saide a de taanga fanowdu fu taki a tuu ala yuu?

Te ye taki a tuu ala yuu, ye soi taki i lobi Yehofa. Ye soi tu taki ye lesipeki en. Holi a pakisei taki Yehofa sabi ala san ye denki, anga san ye du (Hebrewsama 4:13). Te Yehofa si taki ye taki a tuu ala yuu, ai teke a sani ya fu bigi. A sikiifi aini a Wowtu fi en taki: ‘Yehofa e buuse den sama di e bidiigi taawan, ma en anga den sama di e du sani anga wan kiin-ati, a mati.’—Odo 3:32.

2. Fai sa soi taki ye taki a tuu ala yuu?

Yehofa wani we taki ‘a tuu te we taki anga taawan’ (Sakaliya 8:16, 17). Faw sa du a sani ya? Te we taki anga u famii, sama a wookope, sikowtu, efuso u baala anga u sisa, u mu e taki a tuu ala yuu. Wa mu e politiki den tu. Sama di e du sani anga wan kiin ati nai fufuu, den nai bidiigi taawan tu. (Leisi Odo 24:28 anga Efeisesama 4:28.) Den e pai lanti moni (Romesama 13:5-7). Te we du den sani ya, da we soi taki we du sani anga wan kiin-ati.—Hebrewsama 13:18.

3. Sowtu wini wo fende te we taki a tuu ala yuu?

Efi ye taki a tuu ala yuu, sama o go e fitoow i. Den baala anga sisa aini a kemeente naw go e feele taki yo politiki den. Den o go e si yu enke den famii di den sa fitoow. I kosensi naw go e fon i tu. Te ye taki a tuu ala yuu, da yo de enke ‘wan keti di e moin a leli fu Gadu’. A sani ya o meke sama wani kon leli sabi Yehofa.—Titesi 2:10.

LUKU A TOLI YA MOO FINI

Wo luku sowtu wini aw tyai gi yu anga Yehofa te ye taki a tuu. Wo luku wantu okasi tu pe u mu soi taki we taki a tuu.

4. Te ye taki a tuu, ye meke Yehofa piisii

Leisi Psalm 44:21 anga Maleyaki 3:16, da i luku efii poi piki den akisi ya:

Saide wa mu koli useefi taki wo poi kibii wan sani di u du?
Fai denki Yehofa e fii te we taki a tuu winsi aa makiliki?

Te wan pikin e taki a tuu, en mma anga en dda e poolo anga en. Te we taki a tuu, Yehofa e poolo anga u tu

5. I mu e taki a tuu ala yuu

Son sama e taki, a ná ala yuu yo poi taki a tuu. Ma luku a felon ya, da yo si saide a de taanga fanowdu fu taki a tuu ala yuu. Pee a FELON.

FELON: San e meke wan sama piisii tuutuu?—Wan kiin kosensi (2:32)

Leisi Hebrewsama 13:18, baka dati da i luku fai sa soi taki ye taki a tuu ala yuu . . .

aini yu osufamii.
te i de a wooko, efuso sikoo.
anga taa okasi.

6. A omen wini we fende te we taki a tuu

Son leisi ai gei enke te we taki a tuu, a moo polobelema ai tyai gi u. Ma bakaten we kon si taki, te we taki a tuu a omen wini we fende. Leisi Psalm 34:12-16, da i luku efii poi piki den akisi ya: