TOLI 37

San Beibel e taki fu wooko anga moni?

PEE

Ye booko yu ede anga wooko efuso moni? Aa makiliki fu dini Yehofa enke fa a wani, anga fu solugu yu osufamii na aseefi yuu. Ma Beibel e soi u faw sa du a sani ya.

1. San Beibel e taki fu wooko?

Yehofa wani u piisii fu den wooko di we du. Beibel taki ‘a moo bun sani di wan libisama sa du, a fu piisii anga a taanga wooko di ai du’ (Peleikiman 2:24). Yehofa e wooko taanga. Efi ye wooko taanga enke Yehofa, aw piisii anga i.

A de fanowdu fu wooko. Ma wa mu si wooko enke a moo pelensipali sani, moo a dini di we dini Yehofa (Yohanisi 6:27). A paamisi u taki efu we poti en na a fosi peesi aini u libi, aw gi u san wi abi fanowdu.

2. Faw mu si moni?

Beibel taki ‘moni e yeepi sama’ so na tuu, ma aa poi meke u de koloku tuutuu (Peleikiman 7:12). Neen meke Beibel taigi u taki wa mu lobi moni, ma u mu tifeedi anga san wi abi. (Leisi Hebrewsama 13:5.) Efi ye tifeedi anga san yu abi, i naw abi tyaipi booko-ede. I naw go aini paiman sosokaali tu (Odo 22:7). Boiti dati, efi ye tifeedi anga san yu abi, i naw go bigin wan wooko di o meke i lasi tyaipi moni.

3. Faw sa koboloiki u moni a wan bun fasi?

Yehofa a wan Gadu di lobi gi sama sani. Neen meke efu u ‘lobi gi sama sani’, da we soi taki we waka neen baka (1 Timotiyesi 6:18). Wan fasi faw sa du a sani ya, a te we gi moni fu holibaka gi a kemeente. U sa yeepi taawan di de a nowtu tu, moomoo den baala anga sisa fu u. Yehofa nai luku san we gi, ma ai luku efu we du en anga u hii ati. Efii lobi gi sama sani yo piisii. Yehofa o piisii anga i tu.—Leisi Toli fu den apostel 20:35.

LUKU A TOLI YA MOO FINI

Luku sowtu wini a abi te we si wooko enke faw mu si en, anga te we tifeedi anga san wi abi.

4. Gi Yehofa gaandi anga a fasi fa ye du i wooko

A fasi fa ye du i wooko mu soi taki ye lesipeki Yehofa. Pee a FELON, da i luku efii poi piki den akisi ya.

FELON: Wooko anga i hii ati gi Yehofa (4:39)

Sai lobi fu a fasi fa Yason e tyai enseefi a wooko?
Fa a soi taki aa be e si wooko enke a moo pelensipali sani?

Leisi Kolosesama 3:23, 24, da i luku efii poi piki a akisi ya:

Saide a pelensipali fu sabi fa ye si wooko?

Wooko pelensipali. Ma noiti u mu meke a pelensipali moo den sani di u mu du fu dini Yehofa

5. Ai tyai wini te ye tifeedi anga san yu abi

Omen sama wani abi tyaipi moni. Ma Beibel e leli u faw mu si moni. Leisi 1 Timotiyesi 6:6-8, da i luku efii poi piki a akisi ya:

San Beibel e leli u fu moni?

I poi de koloku winsi i naabi tyaipi moni. Pee a FELON, da i luku efii poi piki den akisi ya.

FELON: U mu ‘tifeedi anga san wi abi nownow’ (3:20)

A osofamii ya naabi tyaipi moni, ma san meke den de koloku?

Fa a de anga den sama di abi tyaipi moni kaba, ma den wani moo? Yesesi be gi wan ageisitoli di e soi taki a sani ya sa tyai ogii gi u. Leisi Lukasi 12:15-21, da i luku efii poi piki a akisi ya:

San a ageisitoli fu Yesesi ya e leli i?—Luku vers 15.

Leisi Odo 10:22 anga 1 Timotiyesi 6:10. Da i luku efii poi piki den akisi ya:

San moo pelensipali gii? Meke tyaipi moni efuso a de di yu anga Yehofa de mati? Saide i taki so?
Sowtu takuu bakapisi a sa tyai gi wan sama di e feti fu kon abi tyaipi moni?

6. Yehofa o solugu u

Booko-ede fu wooko anga moni sa swaki a biibi fu u. Pee a FELON, da yo si sai mu du te yu abi den sowtu booko-ede ya. Baka dati da i luku efii poi piki den akisi ya.