Buulu a wan pelensipali sani, bika ala wi abi buulu fanowdu fu man tan a libi. A Yehofa meke u, neen meke neen mu taigi u faw mu si buulu. San a taki fu buulu? U sa nyan mi en? Te u siki, u mu teke buulu? Faw sa du sani anga koni te a abi fu du anga buulu?

1. Fa Yehofa e si buulu?

Yehofa be taigi a foluku fi en taki: ‘Na a buulu na a libi fu iniiwan libilibi sani’ (Lefitikesi 17:14). Yehofa e si a buulu enke a libi. A libi a wan santa sani di Yehofa gi u. Neen meke a buulu seefi santa tu.

2. San a wantu sani di Gadu taki wa mu du anga buulu?

Fosi Yesesi kon a goontapu, Yehofa be taigi den sama di e dini en taki den á mu nyan buulu. (Leisi Genesesi 9:4 anga Lefitikesi 17:10.) Baka di a Kelesten kemeente be seeka, Yehofa be taigi a foluku fi en baka taki den á mu nyan buulu. Den baala di be e tii a wooko na a ten de be taigi den Kelesten taki ‘den mu tan faawe fu buulu’.​—Leisi Toli fu den Apostel 15:28, 29.

San a wani taki fu tan faawe fu buulu? Kow taki dataa taigi i taki i mu tan faawe fu sopi. Ya be o diingi sopi, ná so noh? I be o nyan wan sani di abi sopi aini? Efuso sutu wan piin go aini i sikin di abi sopi? Noiti i be o du sowan sani. A letiso Beibel e taigi u taki u mu tan faawe fu buulu. Dati wan taki wa mu nyan efuso diingi sani di abi buulu aini. Efu den kii wan meti tu neen den á koti en neki puu a buulu aini, wa mu nyan mi en.

Ma faw mu si a fasi fa dataa e si buulu? Son sani di dataa e du anga buulu nai kai seefiseefi anga den weiti fu Gadu. Wan fasi fa den e wooko anga buulu, na a gi di den e gi sama en. Den moo pelensipali pisi fu buulu a: Lebi buulu cel, weti buulu cel, buulu plaatjes, anga buulu plasma. Dataa e gi sama den sani ya, ma a nai kai anga den weiti fu Gadu. Wa sabi efu na ala fasi fa den e wooko anga buulu Gadu e kuutu. Son yuu den e puu pikin finifini sani aini buulu fu meke deesi. Son yuu na a sama buulu seefi den e koboloiki fu yeepi en. Aini den okasi ya, a wan sama seefi mu luku san aw du. a​—Galasiyasama 6:5.

 LUKU A TOLI YA MOO FINI

3. Du sani di o meke Yehofa piisii

San o yeepi i fu du sani di o meke Yehofa piisii te a abi fu du anga buulu? Pee a FELON, baka dati da i luku saide a pelensipali fu du den sani di sikiifi ya.

• Begi Yehofa fu a gi i koni.​—Yakowbesi 1:5.

• Luku san de leli fu Beibel e taki fu buulu.​—Odo 13:16.

• Luku sowtu dataa yeepi i sa fende.

• Luku sowtu wan fu den dataa yeepi ya be o teke.

• Du sani di naw meke i kosensi fon i.​—Toli fu den apostel 24:16. b

• Holi a pakisei taki nawan sama naw poi teke bosoloiti gi i. Ná i toowpaa, ná den owluman. A sama di e sutudeli Beibel anga iseefi naw poi taigi i sai mu du.​—Romesama 14:12.

• Sikiifi poti a pampila sowtu bosoloiti i teke.

4. Yehofa Kotoigi e suku a moo bun dataa yeepi

U poi fende wan bun dataa yeepi sondee fu u pasa den weiti fu Gadu. Pee a FELON.

Leisi Titesi 3:2, da i luku efii poi piki a akisi ya:

• Saide a pelensipali fu taki a wan lesipeki fasi anga den dataa?

 5. Faw mu si den deesi di sama e meke anga den pikinpikin sani di den puu aini buulu?

Buulu paati aini fo pelensipali pisi: Lebi buulu cel, weti buulu cel, buulu plaatjes, anga buulu plasma. A omen pikinpikin sani i sa puu aini den fo pelensipali pisi fu buulu. Son leisi den e koboloiki den sani ya fu meke deesi fu deesi siki, efuso fu tapu a buulu fu aa lon moo. c

Te a abi fu du anga den pikinpikin sani di dataa e puu aini den fo pelensipali pisi fu buulu, da ibii Kelesten mu luku san aw du. Fosi wan Kelesten teke a bosoloiti ya, a mu sutudeli Beibel bun fu luku san aw du. Yu abi son Kelesten di nai teke den deesi ya. Ma yu abi son Kelesten di e koboloiki den deesi ya.

Luku san yo du. Akisi iseefi a sani ya:

• Efu a dataa akisi mi saide mi á wani teke deesi di meke anga pikinpikin sani fu buulu, san mi be o piki en?

 SAI LELI?

Yehofa wani u si buulu enke wan santa sani.

Sai be o piki?

• Saide Yehofa e si buulu enke wan santa sani?

• Gadu taki u mu tan faawe fu buulu. Faw du sabi taki a sani ya abi fu du anga a teke di sama e teke buulu tu?

• San o yeepi i fu du sani anga koni te abi fu du anga buulu?