TOLI 40
San u mu du efu u wani Yehofa si wi enke sama di kiin?
Pakisei fa wan mma e seeka en pikin fosi a go a sikoo. Ai meke a wasi, da a wei kiin koosi gi en. Te wan mma e seeka en pikin na a fasi ya, a pikin naw siki makiliki. Taa sama seefi o si taki den gaansama fi en e solugu en bun. A so Yehofa wani u sikin de kiinkiin tu. A wani u libi wan kiin libi tu. Sama e gafa Yehofa te den si taki u kiin. Useefi e fende wini tu.
1. On ten u sa taki wan sama kiin?
Yehofa taki: ‘U mu santa’ (1 Peitilisi 1:16). A sani ya wani taki u sikin mu kiin. U mu e libi wan kiin libi tu. Efu u wani u sikin kiin, u mu e wasi bun. Den koosi fu u, wi osu, u wagi efuso u boto mu e de kiinkiin ala yuu. U mu e meke moiti fu kiin den komakandaa peesi tu. Sama o gafa Yehofa te den si taki u kiin.—2 Korentesama 6:3, 4.
2. Sowtu fasi fu libi wa mu abi efu u wani Yehofa si wi enke sama di kiin?
Beibel taki u mu ‘kiin useefi puu ala sowtu sani di sa tyobo a sikin anga a fusutan fu u’ (2 Korentesama 7:1). Neen meke wa mu du nawan sani di sa tyobo u sikin anga u pakisei. U wani Yehofa piisii anga u te ai luku den sani di we denki. Neen meke wa mu sidon e denki sani di á bun (Psalm 104:34). Efu u wani Yehofa si wi enke sama di kiin, da wa mu e gi molusu toli.—Leisi Kolosesama 3:8.
San a wantu sani di sa meke Yehofa á si wi enke sama di á kiin? A somoko di sama e somoko anga a hali den e hali tabaka-dosu á bun gi a sikin fu u. Te u nai koboloiki den sani ya, a sani ya e yeepi u fu wa kisi son siki. We soi tu taki we lesipeki a libi di Gadu gi u. Efu u wani Yehofa si wi enke sama di kiin, u mu meke moiti fu tapu anga a pee di sama e pee anga den senpeesi. Wa mu luku sekisi felon efuso fowtow. Wa mu aliki tyobo poku tu (Psalm 119:37; Efeisesama 5:5). Aa makiliki fu tapu anga den sani ya, ma Yehofa poi yeepi u fu tapu anga den gwenti ya.—Leisi Yesaya 41:13.
LUKU A TOLI YA MOO FINI
Wo si taki te we meke moiti fu u sikin kiin, a sani ya e gi Yehofa gaandi. Wo si tu san o yeepi u fu tapu anga gwenti di Yehofa á lobi.
3. Te we meke moiti fu u sikin kiin, a sani ya e gi Yehofa gaandi
Te u luku a weiti di Yehofa be gi den Islayelisama, da we si taki a wani u kiin. Leisi Ekisodesi 19:10 anga 30:17-19, da i luku efii poi piki den akisi ya:
-
San a tekisi ya e leli u fu a wani di Yehofa wani u kiin?
-
San a wantu sani di i mu du efii wani i sikin tan kiinkiin?
Aa makiliki fu de kiinkiin ala yuu.Ma winsi pe we tan, winsi u gudu, efuso pooti toku u poi de kiinkiin. Pee a FELON, da i luku efi i poi piki a akisi ya.
-
Saide den sani fu u mu de kiinkiin te we go peleiki?
4. Meke moiti fu fika takuu gwenti
Yehofa poi yeepi u fu wini iniiwan sowtu takuu gwenti
Efi ye somoko efuso e hali tabaka-dosu, da i musu sabi taki aa makiliki fu tapu anga den gwenti ya. Ma san o yeepi i? Denki sowtu takuu bakapisi den sani ya sa tyai gii. Leisi Mateyesi 22:37-39, da i luku sowtu takuu bakapisi a somoko di sama e somoko anga a hali di den e hali tabaka abi . . .
-
na a de di den anga Yehofa de mati.
-
a den osufamii anga taawan di de koosube fu den.
Yu abi fu du wantu sani fu man tapu anga den takuu gwenti ya. a Pee a FELON.
Leisi Filipisama 4:13, da i luku efii poi piki den akisi ya:
-
Fa begi, sutudeli, anga a go di wan sama e go a den komakandaa sa yeepi en fu tapu anga son takuu gwenti?
5. Meke moiti fi ya denki sani di á bun. Meke moiti fu tapu anga takuu gwenti tu
Leisi Kolosesama 3:5, da i luku efii poi piki den akisi ya:
-
Faw du sabi taki Yehofa á lobi te sama e luku sekisi felon efuso fowtow, te den e sende tyobo bosikopu gi taawan a telefon anga te den e pee anga den senpeesi?
-
I si enke Yehofa abi leti di a taigi u taki u mu libi wan kiin libi? Saide i taki so?
Luku san o yeepi i fi ya pakisei sani di á bun. Pee a FELON.
Yesesi be gi wan ageisitoli fu soi taki a bunbun moiti u mu meke fu tapu anga gwenti di á bun. Leisi Mateyesi 5:29, 30, da i luku efii poi piki a akisi ya:
-
Yesesi á be wani u koti useefi tuutuu, ma a be wani soi taki a bunbun moiti u mu meke fu tapu anga son takuu gwenti. San a wantu sani di wan sama sa du efu aa wani pakisei sani di á bun? b
Kande ai taanga gii fu tapu anga a gwenti di yu abi fu pakisei sani di á bun. Ma Yehofa e teke en fu bigi fu a moiti di ye meke. Leisi Psalm 103:13, 14, da i luku efii poi piki den akisi ya:
-
Efu ye feti fu tapu anga wan gwenti di á bun, sowtu taanga-sikin a tekisi ya e gii?
Te i misi wan leisi a sani ya á wan taki i lasi a feti
Kande te i misi wan leisi ye denki taki: ‘A sosokaali mi e meke moiti, mi naw poi tapu anga a sani ya.’ Pakisei a sani ya: Efu wan sama di e siteelon dyakata kai, a sani ya á wani taki a lasi. A naabi fu go te na a bigin fu bigin lon baka, ma a pe a kai de aw opo da a bigin lon go doo. A so a de te ye feti fu tapu anga wan takuu gwenti tu. Yo go e misi wanwan leisi, ma dati á wan taki i lasi a feti. A sani ya á wani taki i nai go a fesi tu. Neen meke winsi ye misi, ya mu gi abaa Yehofa o yeepi fu wini a feti.
SON SAMA E TAKI: ‘Mi á si enke mi o poi tapu anga a sani ya.’
-
Sowtu tekisi i be o leisi gi wan sama fu soi en taki Yehofa o yeepi en fu tapu anga a takuu gwenti di a abi?
SAI LELI?
Efu u wani Yehofa piisii u mu meke moiti fu u sikin de kiinkiin. U mu libi wan kiin libi tu. Wa mu e denki sani di á bun.
Sai be o piki?
-
Saide a de taanga fanowdu fu de kiinkiin?
-
San a wantu sani di u mu e du efu u wani de kiinkiin?
-
San u mu du efu wa wani pakisei sani di á bun?
MOO SANI FU A TOLI YA
San a wantu sani di i sa du fu de kiinkiin winsi i naabi tyaipi moni?
Luku wantu sani di o yeepi i fu tapu anga somoko.
‘San o yeepi i fu tapu anga somoko?’ (A Saanantongo Ontwaakt! fu mei 2010)
Luku sowtu takuu bakapisi a abi te sama e luku sekisi felon.
‘Sekisi felon ogii tuutuu?’ (A Saanantongo Wakititolen fu 1 augustus 2013)
Luku san sekisi felon efuso buku e du anga wan sama.
‘Mi misi omen leisi fosi mi wini’ (A Saanantongo Wakititolen No. 4 2016)
a Luku a artikel di den e kai ‘San o yeepi i fu tapu anga somoko?’, di de aini a pisi di den e kai Moo sani fu a toli ya.
b Efii wani sabi san sa yeepi i fu tapu anga a gwenti fu pee anga i senpeesi, da luku a artikel di den e kai ‘San o yeepi mi fu tapu anga a gwenti fu pee anga mi senpeesi?’ aini a buku di den e kai Sani di yonkuu sama e akisi—Piki di e yeepi den Pisi 1, kapitel 25.
