A omen fasi sama e denki fu a diingi di sama e diingi sopi. Son sama e diingi wanwan leisi anga den mati fu den. Taawan nai diingi seefiseefi. Taawan e diingi te enke den duungu. Ma san Beibel e taki fu a diingi di sama e diingi sopi?

1. A fowtu fu diingi sopi?

Beibel á taki a fowtu fu diingi sopi. Beibel taki ‘sopi a wan fu den bun sani di Gadu gi u’ (Psalm 104:14, 15). Wantu sama di be e dini Gadu a fosi be e diingi sopi tu.​—1Timotiyesi 5:23.

2. San Beibel taki wan sama mu holi a pakisei te ai diingi sopi?

Yehofa e kuutu a diingi di sama e diingi te enke den duungu (Galasiyasama 5:21). Beibel taki: ‘Wa mu diingi win pasa maiki’ (Odo 23:20). Te ye diingi ya mu diingi te da i nai fusutan iseefi moo. Ya mu diingi te da ye taki efuso du lawlaw sani. Efi ye diingi pasa peesi, aw tyai siki gii. Efu ai taanga gii fi ya diingi pasa peesi, da a moo bun fi ya diingi seefiseefi.

3. Fai sa soi taki ye holi taawan a pakisei te a abi fu du anga sopi?

A wan sama seefi mu luku efu a wani diingi sopi. Wa mu kuutu wan sama efu ai diingi sopi. Wa mu dwengi wan sama di á wani diingi sopi fu a diingi namonamo (Romesama 14:10). Efii fusutan taki wan sama o fii wan fasi te a si ye diingi sopi, da i mu holi en a pakisei. (Leisi Romesama 14:21.) Wa mu ‘denki useefi, ma u mu holi taawan a pakisei’.​—Leisi 1 Korentesama 10:23, 24.

 LUKU A TOLI YA MOO FINI

4. Sai mu holi a pakisei te ye luku efi yo diingi efuso i naw diingi?

Fa Yesesi be e si a diingi di sama e diingi sopi? Poti pakisei na a fosi wonduu di a be du. Leisi Yohanisi 2:1-11, da i luku efii poi piki den akisi ya:

• San a wonduu ya e leli i fu a fasi fa Yesesi e si a diingi di sama e diingi sopi?

• Yesesi á be taki a fowtu fu diingi sopi. Neen meke fa wan Kelesten mu si a diingi di sama e diingi sopi?

Winsi fa wan Kelesten sa diingi sopi, toku a ná ala yuu a wan koni sani fu diingi. Leisi Odo 22:3, da i luku efu a be o de wan koni sani fu diingi a den okasi ya:

• Te ye go lei wagi, boto, efuso yo wooko anga wan masini.

• I de anga bee.

• Dataa taigi i taki ya mu diingi sopi.

• Ya poi holi iseefi fi ya diingi pasa peesi.

• Ya doo a yali di lanti poti fii sa diingi sopi.

• I de a wan peesi anga wan sama di nai diingi moo, fu di a be e diingi pasa peesi fosi.

San o yeepi i fu sabi efii mu paati sopi a wan toow efuso wan fesa? Efii wani sabi a sani ya, i sa pee a FELON.

Leisi Romesama 13:13 anga 1 Korentesama 10:31, 32. Luku a akisi ya baka te i leisi ibiiwan fu den tekisi:

• Fa a tekisi ya sa yeepi i fii du san Yehofa lobi?

 5. Luku pe te yo diingi doo

Efi yo diingi sopi holi a sani ya a pakisei: Yehofa á taki wa mu diingi, ma a taki wa mu diingi pasa peesi. Saide? Leisi Hoseya 4:11, 18, da i luku efii poi piki a akisi ya:

• San sa pasa efu wan sama e diingi pasa peesi?

San o yeepi i fi ya diingi pasa peesi? I mu sabi pe i swaki. Leisi Odo 11:2, da i luku efii poi piki a akisi ya:

• Saide a bun fu sabi on fuu yo diingi fosi i bigin diingi?

6. I poi tapu anga a diingi di ye diingi pasa peesi

 SAI LELI?

Yehofa gi u sopi fu u sa piisii, ma aa wani u diingi pasa peesi.

Sai be o piki?

• San Beibel e taki fu a diingi di sama e diingi sopi?

• San sa pasa efu wan sama e diingi pasa peesi?

• Fai sa soi taki ye holi taawan a pakisei te abi fu du anga sopi?