TOLI 49

Fai sa abi wan koloku osufamii?—Pisi 1

PEE

Te tu sama e toow ná pikin piisii den e piisii. Den e howpu taki den sa piisii makandaa den hii libi langa. A omen Kelesten di toow kaba abi wan koloku toowlibi, fu di den e wooko anga san Beibel taki. Iseefi poi abi wan koloku toowlibi tu.

1. Fa Beibel taki wan man mu tyai enseefi aini a osufamii?

Yehofa poti a man enke a ede fu a osufamii. (Leisi Efeisesama 5:23.) Yehofa wani a man du sani di o tyai wini gi a osufamii fi en. Beibel e taigi a man taki: ‘I mu tan lobi yu uman’ (Efeisesama 5:25). Fa wan man sa wooko anga a sani di Beibel taki ya? Wan man di lobi en uman e libi switi anga en ala yuu. A ná te a de a sama ini wawan ai libi bun anga en, ma te a de a osu tu. Ai du ala san a man fu ogii á miti a uman fi en. Te en uman abi booko-ede, ai taki anga en fu a fii bun baka. Ai meke moiti fu gi en ala san a abi fanowdu tu (1Timotiyesi 5:8). Ma a moo pelensipali sani di wan man mu du, a fu yeepi en uman fi en anga Yehofa toon bun mati (Mateyesi 4:4). Wan fasi fa a sa du a sani ya, a te ai leisi Beibel anga en uman, anga te ai begi makandaa anga en. Efu wan man e solugu en uman, Yehofa o piisii anga en.—Leisi 1 Peitilisi 3:7.

2. Fa Beibel taki wan uman mu tyai enseefi aini a osufamii?

Beibel taki wan uman ‘mu e lesipeki en man anga en hii ati’ (Efeisesama 5:33). Fa wan uman sa wooko anga a sani di Beibel taki ya? A mu e poti pakisei a den bun manii fu a man fi en. A mu meke moiti fu si a moiti di a man fi en e meke fu solugu en anga den pikin. Wan taa fasi fa a sa soi taki ai lesipeki en man, a te ai holibaka gi den bosoloiti di ai teke. A mu e taki switi anga en. Winsi en man nai dini Yehofa, toku aa mu e kuutu en.

3. San wan toowpaa sa du fu abi wan koloku toowlibi?

Beibel taki: ‘Te tu sama toow den o toon wan sikin’ (Mateyesi 19:5). A sani ya wani taki den á mu meke nawan sani paati den. Den mu e du sani makandaa. Den mu e taigi denseefi fa den e fii anga fa den e denki. Nawan taa sama, efuso sani mu pelensipali gii moo i toowpaa. A Yehofa wawan i mu lobi moo i toowpaa. I mu luku bun fi ya bigin kisi fii gi wan taa sama.

LUKU A TOLI YA MOO FINI

Luku fa Beibel sa yeepi i fu abi wan koloku toowlibi.

4. Wan man mu lobi en uman, a mu e solugu en

Beibel taki wan ‘man mu lobi en uman enke fa a lobi enseefi’ (Efeisesama 5:28, 29). Fa wan man sa wooko anga a sani ya? Pee a FELON, da i luku efii poi piki a akisi ya.

FELON: I mu lobi yu uman enke fai lobi iseefi (9:53)

San a wantu fasi fa wan man sa soi taki a lobi en uman?

Leisi Kolosesama 3:12, da i luku efii poi piki a akisi ya:

Fa wan man sa soi den manii ya aini en toowlibi?

5. Wan uman mu lobi en man, a mu e lesipeki en

Beibel taki wan uman mu e lesipeki en man, winsi a man fi en nai dini Yehofa. Leisi 1 Peitilisi 3:1, 2, da i luku efii poi piki den akisi ya:

Efii man nai dini Yehofa, i be o piisii efu a be kon dini en. Sai si enke o moo yeepi a man fii: Fu e peleiki gi en hii dei efuso fu e soi en taki ye lesipeki en? Saide i taki so?

Gaanse leisi te wan man e du wan sani, en anga en uman e go na a wan se. Ma a ná ala yuu den e go na a wan se. Te a sani ya pasa, a uman sa taigi a man fi en a wan lesipeki fasi fa ai denki. A mu holi a pakisei taki na a man Yehofa poti fu teke fesi aini a osufamii, neen meke a mu e meke moiti fu holibaka gi en. Efu a du a sani ya, a osufamii o de koloku. Leisi 1 Peitilisi 3:3-5, da i luku efii poi piki a akisi ya:

Fa Yehofa e fii te wan uman e lesipeki en man?

6. Beibel sa yeepi i te yu abi polobelema aini i toowlibi

Ala osufamii de anga en booko-ede, neen meke toowpaa mu wooko makandaa fu losi den polobelema fu den. Pee a FELON, da i luku efii poi piki den akisi ya: