TOLI 55

Holibaka gi a kemeente pe i de

PEE

A omen dunsu kemeente de a goontapu. A omen sama e dini Yehofa aini den kemeente ya. Den e du a sani ya anga piisii. Den e teke en fu bigi taki den man leli sani fu Yehofa. Neen meke den e meke moiti fu holibaka gi den kemeente enke fa den poi. A so ye pakisei fu a kemeente pe i de?

1. Fai sa koboloiki i kaakiti anga i ten fu holibaka gi a kemeente?

Na ala u sa yeepi a kemeente. Sama de aini i kemeente di gaandi efuso siki? Kande i sa yeepi den fu kon a komakandaa. Kande i sa go bai sani gi den, efuso kande i sa yeepi den anga osu wooko. (Leisi Yakowbesi 1:27.) Wan taa fasi faw sa yeepi a kemeente, a te we yeepi kiin a Kownukondee zaal. Nawan sama nai dwengi u fu du den wooko ya. A di u lobi Yehofa anga u baala anga sisa, meke u de ‘kabakaba fu yeepi’.—Psalm 110:3.

Te wan sama dopu a sa du moo aini a kemeente. Den baala sa toon dinali. Bakaten den sa toon owluman tu. Baala anga sisa di wani du moo, sa du a kowownu-pioniliwooko. Son baala anga sisa e yeepi meke komakandaa peesi. Son yuu den e go yeepi a pe moo peleikiman de fanowdu tu.

2. Faw sa holibaka gi a kemeente anga u moni anga taa sani di wi abi?

U sa ‘gi Yehofa gaandi anga den gudu di wi abi’ (Odo 3:9). We si en enke wan gaandi fu gi moni anga taa sani di wi abi fu holibaka gi a kemeente. We meke moiti fu holibaka gi a peleikiwooko di e du a hii goontapu tu. (Leisi 2 Korentesama 9:7.) Den moni di we gi, a fu holibaka gi den baala anga sisa fu u di e tan a peesi pe gaan ogii e pasa. Son baala anga sisa gwenti poti wan pikin sani a wan se fu holibaka gi a kemeente. (Leisi 1 Korentesama 16:2.) Te u go a komakandaa, u sa poti moni aini a kedee di de ape. Ma u sa poti moni a internet tu, a donate.pr418.com. Yehofa e gi wi a okasi fu soi taki u lobi en. Te we holibaka gi a kemeente, a wan fasi fa we soi taki u lobi en.

LUKU A TOLI YA MOO FINI

Wo luku wantu fasi faw sa holibaka gi a kemeente.

3. U sa gi wan pikin sani fu holibaka gi a kemeente

Yehofa anga Yesesi lobi te we gi sani anga u hii ati. Wan leisi wan pooti uman di man dede, be poti moni aini a moni kedee. Di Yesesi si a sani ya, a gafa a uman. Leisi Lukasi 21:1-4, da i luku efii poi piki den akisi ya:

Anga den sama di e gi tyaipi moni wawan Yehofa e poolo?
Fa Yehofa anga Yesesi e fii te sama e gi moni anga den hii ati?

Efii wani sabi san den baala e du anga a moni di we gi, da pee a FELON. Baka dati da i luku efii poi piki a akisi ya.

FELON: ‘Gi Yehofa wan sani’ (4:47)

Fa den baala e yeepi den kemeente a hii goontapu anga den moni di we gi?

4. Wantu fasi faw sa yeepi

Aini Beibel ten, a ná moni wawan den be e gi fu holibaka gi a wooko. Ma den sama di be e dini Yehofa be e wooko taanga tu fu seeka den peesi pe den be e go dini en. Leisi 2 Koloniki 34:9-11, baka dati da i luku efii poi piki a akisi ya:

Fa den Islayelisama be e yeepi seeka a peesi pe den be e go dini Yehofa?

Efii wani si fa den Yehofa Kotoigi e du sani aini a ten ya enke den Islayelisama, da pee a FELON. Baka dati da i luku efii poi piki den akisi ya.

FELON: Solugu den peesi pe we go dini Gadu (3:31)

Saide a de fanowdu fu e seeka a Kownukondee zaal anga fu e kiin mi en?
San a wantu fasi fai sa yeepi anga a wooko ya?

5. Den baala sa meke moiti fu du moo aini a kemeente

Beibel e gi den baala taanga-sikin fu meke moiti fu fende moo faantiwowtu aini a kemeente. Efii wani si fa den sa du a sani ya, da pee a FELON. Baka dati da i luku efii poi piki a akisi ya.

FELON: Baala, meke moiti fu du wan bun wooko (5:19)

San Ryan du fu yeepi a kemeente?

Beibel e soi fa wan baala mu tyai enseefi efu a wani toon dinali efuso owluman. Leisi 1 Timotiyesi 3:1-13, da i luku efii poi piki a akisi ya:

Fa wan baala mu tyai enseefi efu a wani toon dinali efuso owluman?
Fa a osufamii fi en mu de? —Luku vers 4 anga 11.
Sowtu wini a kemeente e fende te wan baala e tyai enseefi enke fa Beibel e taki?