Te u de makandaa anga den baala anga sisa fu u di e dini Yehofa, da we fii enke Kownu David di be taki: ‘Luku fa a bun anga fa a switi te baala e libi na a wan!’ (Psalm 133:1) Na a fasi fa we tyai useefi aini a kemeente, e meke u man libi na a wan. Neen meke efu u wani sani go bun aini a kemeente, u mu tan tyai useefi bun.

1. Sai lobi fu a foluku fu Yehofa?

Te i go a komakandaa a wan taa kondee, winsi i nai fusutan a tongo, toku ai gei enke aini i kemeente i de. Saide we fii so? Na ala se fu goontapu we koboloiki aseefi buku fu sutudeli Beibel. We du ala san u poi fu soi taki u lobi useefi. Winsi pe u de, we ‘kai a nen fu Yehofa, te we dini en makandaa’.​—Sefanya 3:9.

2. Sai sa du fu yeepi a kemeente fu libi na a wan?

Beibel e taki: ‘U mu lobi useefi anga u hii ati’ (1 Peitilisi 1:22). Fai sa du a sani ya? Ya mu e luku den fowtu fu taawan, ma i mu e meke moiti fu si den bun manii fu den. Ya mu e paa anga den sama di yu anga den lobi aseefi sani namo, ma i mu meke moiti fu toon mati anga den sama di kiya taa fasi tu. I mu e paa anga sama di komoto a wan taa kondee tu. U mu e meke moiti fu u nai paati bee.​—Leisi 1 Peitilisi 2:17. a

3. Sai mu du te yu anga wan baala efuso wan sisa abi sani?

Winsi fa we meke moiti fu libi na a wan, toku a ná ala yuu sani e go bun. Son yuu we taki efuso du sani di e hati taawan, bika wi abi sondu. A Wowtu fu Gadu e taigi u taki ‘u mu e gi taawan paadon anga u hii ati’. Ai taki tu taki: ‘Leti enke fa Yehofa e gi u paadon, a so useefi mu e gi taawan paadon tu.’ (Leisi Kolosesama 3:13.) A omen leisi we du sani di e hati Yehofa, ma toku ai gi u paadon. Neen meke a wani we gi u baala anga sisa paadon tu. Efii si enke i du wan sani di hati wan taawan, i mu meke moiti fu go meke en bun anga en.​—Leisi Mateyesi 5:23, 24. b

 LUKU A TOLI YA MOO FINI

4. Ya mu e paati bee

U wani soi taki u lobi ala den baala anga sisa fu u, ma son wan fu den abi manii di wa kaba lobi. San o yeepi u fu lobi den? Leisi Toli fu den apostel 10:34, 35, da i luku efii poi piki den akisi ya:

• Yehofa e teke ala sowtu sama fu dini en. Neen meke faw mu e si sama fu taa nasi?

• San a wantu fasi fa sama e paati bee na a pisi pe ye tan? Saide ya mu de enke den sama ya?

Leisi 2 Korentesama 6:11-13, da i luku efii poi piki a akisi ya:

• San o yeepi i fu lobi den baala anga sisa fii di de fu wan taa nasi?

5. U mu e gi useefi paadon, u mu meke en bun anga useefi

Yehofa e gi u paadon anga en hii ati, winsi fa enseefi nai du sani fu u gi en paadon. Leisi Psalm 86:5, da i luku efii poi piki den akisi ya:

• San a tekisi ya e leli i fu a fasi fa Yehofa e gi sama paadon?

• Saide ai bigi gii taki Yehofa e gi sama paadon?

• On ten a sa taanga gi u fu libi bun anga taawan?

Efu we waka a Yehofa baka a sani ya o yeepi u fu libi bun anga den baala anga sisa fu u. Leisi Odo 19:11, da i luku efii poi piki a akisi ya:

• Efu wan sama du wan sani di ya lobi efuso a du wan hati sani anga i, da sai sa du fu sani á kon moo ogii?

 Son yuu we du sani di e hati taawan. San u mu du te a sani ya pasa? Pee a FELON, da i luku efii poi piki a akisi ya.

• San a sisa aini a felon du fu meke en bun anga a taa sisa?

 SAI LELI?

Efii wani yeepi a kemeente fu libi na a wan, i mu e meke moiti fu gi den baala anga sisa paadon. Ya mu e paati bee tu.

Sai be o piki?

• San o yeepi i fii nai paati bee?

• San yo du efi yu anga wan baala efuso wan sisa abi sani?

• Saide u mu gi taawan paadon enke Yehofa?