Kande a moo enke 12 miliyun sama o kon na a Membeefesa di o holi 23 maart. Ná pikin sani den o leli. Wan baala o holi wan lezing di e taki fu a kado di Yehofa gi u di a sende en manpikin kon dede gi libisama. A o soi san a den wini di libisama o fende fu a kado ya tu (Yes 11:6-9; 35:5, 6; 65:21-23; Yoh 3:16). Ma a ná a baala ya wawan o gi den sama taanga-sikin. Ala wi sa soi switifasi gi den sama di o kon (Rom 15:7). Meke u luku wantu fasi fa u sa soi switifasi gi den.

• Ná sidon pii te enke a komakandaa bigin. Meke moiti fu bali wadaa gi den sama di kon. Son wan fu den a wi kai den. Taawan a baala efuso sisa di nai peleiki moo. Gi den odi, lafu anga den.

• Te yu e poti pakisei a den sama di i kai, yu á mu feegete den taa sama di kon. Son wan fu den sama ya, na a pampila di u be e paati osu fu osu fu kai sama kon na a Membeefesa den fende. I sa akisi den efu a fositoon den kon a wan komakandaa. Akisi den fu den sidon a yu se. Meke den luku anga yu te wi e singi efuso leisi Beibel tekisi

• Efu a wani sabi wantu sani baka a lezing, i sa yeepi en. Efi i ná abi ten fu di a kemeente fi i mu komoto aini a zaal gi wan taa kemeente, da i mu seeka sani fu go na a sama. A á mu teke langa fosi i go neen. Efi i wani sabi en telefon nombuu efuso pe ai tan, da i sa taigi en taki: „Mi be sa wani sabi fa i be fende a komakandaa. Fa mi sa miti i?”