1. San Yesesi be taigi den bakaman fi en fu a ten fu a kaba? San a be taigi den taki de mu du?

 WANTU dei fosi Yesesi dede, fo fu den bakaman fi en be akisi en taki: ‘San o soi . .  taki a kaba fu a goontapu ya de koosube?’ (Mat. 24:3) Kande den bakaman fu Yesesi be akisi denseefi fa den be o man sabi o ten sama be o poli Yelusalem anga a tempel. Ma di Yesesi piki den aa taki fu a poli di sama be o poli Yelusalem anga a tempel wawan, ma a be taki fu ‘a kaba fu a goontapu ya tu’. A be taki: ‘Nawan sama sabi a dei efuso a yuu. Den engel a hemel anga a manpikin seefi a sabi, na a Dda namo sabi.’ Baka dati, a taigi den bakaman fi en taki den ‘mu de na ain’. Nownow aini den lasiti dei fu a goontapu ya we libi.​—Malik. 13:32-37.

2. Saide den bakaman fu Yesesi be mu de na ain?

² Efu den bakaman fu Yesesi á be wani ogii miti den, da den be mu de na ain, bika Yesesi be taigi den taki sama be o poli Yelusalem anga a tempel. A be taigi den taki: ‘Te u si taki suudati lontu Yelusalem, da u mu sabi taki aa fika langa moo fu Yelusalem booko.’ Te den be si den sani ya da den mu du san Yesesi be taigi den, den be mu ‘lowe go a den mongo’ (Luk. 21:20, 21). Den bakaman fu Yesesi di be du san a taki, tan a libi di den Romesama poli Yelusalem.

3. San wo luku aini a artikel ya?

 ³ Nownow we libi aini den lasti dei fu a ogii goontapu ya. Neen meke u mu de anga kiin fusutan, u mu de na ain tu. Aini a artikel ya, wo si faw sa du den sani ya winsi fa we si taki a goontapu e kon moo ogii dei fu dei. Wo si tu faw sa du sani enke fa Yehofa wani anga faw sa koboloiki u ten a wan koni fasi.

4. Saide u mu poti pakisei a den polofeititoli di e kon tuu nownow?

⁴ Te we luku san e pasa a goontapu nownow, da a de taanga fanowdu fu poti pakisei a den polofeititoli di e kon tuu aini a ten ya. Yesesi be taki fu wantu sani di be o pasa na a ten fu a kaba. A be taki te den sani ya be o pasa, da u mu sabi taki aa fika langa moo fu a goontapu fu Saatan ya kisi poli (Mat. 24:3-14). Apostel Peitilisi be taki u mu tan poti pakisei a den polofeititoli di e kon tuu. Den polofeititoli ya o taanga u biibi (2 Peit. 1:19-21). A lasiti buku fu Beibel e taki: ‘Wan bosikopu di Yesesi Kelestesi tyai kon a kiin gi u. A Gadu gi en a bosikopu ya fu soi den saafu fi en san o pasa’ (Openb. 1:1). Neen meke we poti pakisei a den sani di e pasa nownow, we meke moiti tu fu si fa den sani ya e kai anga den polofeititoli di Beibel be taki be o pasa. Boiti dati, u lobi taki anga sama fu den polofeititoli ya.

5. San wa mu du? San u mu meke moiti fu du? (Luku a fowtow.)

⁵ Te we taki fu Beibel polofeititoli u mu konikoni. Saide? Bika efu wa luku bun, u sa taki sani di o buuya den baala anga sisa aini a kemeente. Kande i si a nyunsu fa den tiiman e seeka sani fu freide sa de a goontapu. Efi ya luku bun, kande i bigin taki na a tekisi fu 1 Tesalonikasama 5:3 e kon tuu. Wa mu taigi taawan san useefi e denki fu wan polofeititoli, ma u mu luku fa den baala di e teke fesi e fusutan en. Efu we du sani na a fasi ya, da we yeepi den baala anga sisa aini a kemeente fu ‘denki go na a wan se’.​—1 Kor. 1:10; 4:6.

6. San u sa leli fu a sani di sikiifi a 2 Peitilisi 3:11-13?

⁶ Leisi 2 Peitilisi 3:11-13. Apostel Peitilisi e yeepi u fu si san u mu e holi a pakisei te we ondoosuku Beibel polofeititoli. A taki ‘u mu e holi a pakisei taki a dei fu Yehofa e doo’. Saide? We a ná fu di u wani sabi ‘a dei anga yuu’ di Alimakedon o kon meke u mu du a sani ya. Ma te we poti pakisei a den polofeititoli di de aini Beibel, a sani ya o yeepi u fu ‘tyai useefi a wan fasi di e soi taki wi a santa sama di e dini Gadu anga u hii ati’ (Mat. 24:36; Luk. 12:40). U wani tyai useefi bun. U mu soi anga den sani di we du taki u lobi Yehofa tuutuu. Fu man du a sani ya, ala yuu u mu e ondoosuku useefi luku efu Yehofa lobi a fasi fa we tyai useefi.

7. Faw sa soi taki we wooko anga san Yesesi be taki a Lukasi 21:34?

⁷ Yesesi be taigi den bakaman fi en taki den mu poti pakisei a den sani di e pasa aini a goontapu, ma a be taigi den tu taki den mu luku bun. We si a sani ya kiin te u leisi san sikiifi a Lukasi 21:34. (Leisi en.) Yesesi be wani soi wi anga a sani ya  taki u mu luku bun fa we tyai useefi anga fa we denki. Neen meke u mu luku bun anga den sani di sa poli wi anga Yehofa. U mu tan faawe fu den sani di sa meke u du wan sani di Yehofa á lobi.​—Odo 22:3; Yud. 20, 21.

8. San Pawlesi be taigi den Kelesten?

⁸ Pawlesi be taigi den Kelesten taki den mu poti pakisei a denseefi. A be taigi den Kelesten a Efeise taki: ‘U mu luku bun fa we libi. Wa mu tyai useefi enke don sama, ma u mu libi enke sama di koni’ (Efe. 5:15, 16). Na ala yuu Saatan e meke moiti fu wi anga Yehofa poli. Ma efu we tan ‘meke moiti fu fusutan san Yehofa wani u du’, Saatan naw fende u koli.​—Efe. 5:17.

9. Fa wo du man sabi san Yehofa wani u du?

⁹ Beibel nai taki finifini fu ala den sani di Saatan e du fu koli u fu gwe fika Yehofa. A omen sani u mu du di Beibel nai taigi u pilisisi faw mu du den. Ma efu u wani du sani anga koni, u mu meke moiti fu sabi san ‘Yehofa wani u du’. U mu e sutudeli Gadu wowtu ala yuu, da u teke ten pakisei san u leli. U mu e meke moiti fu sabi san Yehofa wani u du. U mu e meke moiti fu ‘denki enke Kelestesi’ tu. Efu we du den sani ya, wo go e du sani anga koni, winsi Beibel nai taki pilisisi san u mu du son yuu (1 Kor. 2:14-16). Son yuu we si kiin taki u mu luku bun anga wan sani, ma a ná ala yuu a makiliki fu sabi san u mu koti pasi gi.

10. Anga san u mu luku bun?

¹⁰ Beibel e leli u taki wa mu pee anga taawan fii. Wa mu e diingi pasa peesi, wa mu e nyan pasa peesi, wa mu e gi tyobo lafu toli tu. Boiti dati, wa mu e paa anga sama di nai tyai denseefi bun. Wa mu e luku feti felon efuso sekisi felon. Wa mu e du taa sani di u sabi taki Beibel e kuutu (Ps. 101:3). Na ala yuu Saatan e suku okasi fu meke u du wan sani di o meke wi anga Yehofa poli (1 Peit. 5:8). Efu wa de na ain, Saatan sa koli u fu abi heimembee. A sa koli u fu lei, fu giili, fu buuse sama, efuso holi sama na ati. A sa meke u toon sama di ati e boon pasa peesi tu (Gal. 5:19-21). Den manii ya de enke makabon di e goo saafisaafi te enke den bigi. Biginbigin, kande u naw si den sani ya enke gaan sani, ma bakaten a sa tyai u go du moo gaan ogii. Neen meke efu u si enke u bigin abi den manii ya, u mu meke moiti fu puu den gawgaw.​—Yak. 1:14, 15.

11. San a wan sani di u mu luku bun anga en? Saide u mu luku bun anga a sani ya?

¹¹ San a wan sani di sa meke ogii miti u? Meke u luku wan toli. Kow taki ye wooko makandaa anga wan sama di nai dini Yehofa. Fu di i wani a taki bun fu den Yehofa Kotoigi, meke ye libi switi anga en. Ye yeepi en anga sani tu tei man. Kande ye sidon nyan anga en wanwan leisi. Baka wan pisiten ye sidon nyan anga en ala yuu tei go a wooko. Son leisi kande ai gi uman toli anga i, ma biginbigin ye daai a taki. Bakaten te ai gi den toli de, i nai fii wan fasi moo, bika i kon gwenti en. Neen wan dei, a kai i fu go diingi wan sani baka wooko. A so i kon go anga en. Te fii denki, ye bigin denki enke en. Yu anga en e kon moo gwenti. Te yu anga wan sama di nai dini Yehofa kon toon mati so, a naw langa seefi fosi yo bigin du denseefi sani di ai du. Neen meke winsi faw mu meke moiti fu libi bun anga ala sama, toku u mu  holi a pakisei taki efu we de omen ten makandaa anga wan sama wo bigin du sani enke en (1 Kor. 15:33). Winsi fa we miti anga sama di nai dini Yehofa a wooko efuso sikoo, tokuso efu we luku bun enke fa Yesesi taki, u naw go du sani makandaa anga den di á de fanowdu (2 Kor. 6:15). Wo si a bakapisi a fesi, da u koti pasi gi en.

12. Sowtu wooko Yesesi gi den bakaman fi en fu du fosi a kaba fu a goontapu?

¹² Yesesi á be wani den bakaman fi en sidon pii e wakiti a kaba fu a goontapu. A be gi den wooko fu du. A be sende den fu paati a bun nyunsu ‘a Yelusalem, Yudeya anga Samaliya te doo den moo faawe peesi a goontapu’ (Toli 1:6-8). A wan gaan wooko Yesesi gi den bakaman fi en. Te den be o du a wooko ya fayafaya, a sani ya be o yeepi den fu den á lasi den ten a taa sani.

13. Saide u mu koboloiki u ten bun? (Kolosesama 4:5)

¹³ Leisi Kolosesama 4:5. Wan fasi faw mu poti pakisei aw seefi, a te we koboloiki u ten bun. Sani di u nai si a fesi sa miti u wanboowanboo (Peleik. 9:11). Wa sabi on dei wo dede.

14-15. Faw sa soi taki we koboloiki u ten bun? (Hebrewsama 6:11, 12) (Luku a fowtow.)

 ¹⁴ A moo bun fasi faw sa koboloiki u ten, a te we du san Yehofa wani. U mu meke ten fu toon moo bun mati anga en (Yoh. 14:21). U mu meke moiti fu ‘taampu gingin, wa mu buuya. U mu wooko taanga gi Masaa’ (1 Kor. 15:58). Efu u du a sani ya, a naw hati u te u doo a kaba fu u libi, efuso a kaba fu a goontapu ya.​—Mat. 24:13; Rom. 14:8.

¹⁵ Yesesi e holibaka gi den bakaman fi en aini a ten ya anga a moiti di den e meke fu paati a Kownukondee bosikopu a hii goontapu. A du san a be paamisi u. Yesesi e meke a olikanisâsi leli u faw mu du a peleikiwooko. Ai gi u san wi abi fanowdu fu du a wooko ya tu (Mat. 28:18-20). Te we peleiki fayafaya, we soi taki we holibaka gi a pelensipali wooko ya. U mu de na ain tu fu man de seekaseeka gi a dei di Yehofa o poli a ogii goontapu ya. Efu u du san sikiifi a Hebrewsama 6:11, 12, a sani ya o yeepi u fu holidoo te na a kaba.​—Leisi en.

16. San u mu de kabakaba fu du?

¹⁶ Yehofa poti a dei anga a yuu kaba di aw poli a goontapu fu Saatan ya. Di a yuu o doo, aw meke ala den polofeititoli di de aini Beibel kon tuu. Son yuu kande wo fii enke u wakiti langa kaba fu a kaba kon. Ma a bun fu holi a pakisei taki a dei fu Yehofa ‘naw kon lati’ (Hab. 2:3). Neen meke u mu tan ‘wakiti Yehofa’. U mu tan ‘wakiti’ en fu a yeepi u.​—Mika 7:7.