‘Iniiwan sama di e luku wan uman anga a fii fu didon anga en, siibi anga en kaba aini en ati.’​—Mateyesi 5:28.

SAIDE U MU SABI A SANI YA

Aini a ten ya porno kon toon wan ala dei sani. Na ala peesi i sa fende en luku. Efii wani libi enke fa Gadu wani efuso piisii fu a libi, dai mu sabi fa Gadu e denki fu porno.

SAN BEIBEL E TAKI

I naw fende a wowtu porno leisi aini Beibel. Tokuso a omen leli aini Beibel e soi taki porno á bun.

Beibel e soi u kiin taki efu wan man di toow ‘e tan luku wan uman’ anga a fii fu didon anga en winsi fa á neen uman, da a sani de sa meke a go didon anga en tuu. A sani di sikiifi ya e teli gi ala sama di e luku porno. A sa meke den angii fu didon anga wan sama di den á toow anga en. Gadu e buuse a sani ya.

‘Neen meke u mu kii den pisi fu u sikin di sa meke u libi wan hululibi, wan libi di á kiin, sekisi fii, takuu losutu anga takuudu’.​—Kolosesama 3:5.

SAN SAMA E TAKI

Son sama di e ondoosuku sani e taki den á sabi tuutuu efu porno e meke sama tyai gaansama fasi a pikinnengee efuso suwa anga taawan. Winsi fa son sama e taki porno nai meke sama du den ogii ya, tokuso ye si enke Gadu e fende porno bun?

SAN BEIBEL E TAKI

Beibel e soi taki aa fiti fu ‘e gi tyobo lafu toli’ (Efeisesama 5:3, 4). Efu Beibel e taki wa mu e gi tyobo lafu toli, dai si enke a bun fu luku porno? Aini a ten ya den e meke felon fu porno pe ye si fa sama e didon anga taawan di den á toow anga en, pe man anga man efuso uman anga uman e siibi anga denseefi efuso iniiwan taa fasi fu seks. Neen meke te wan sama e luku porno, da a musu de taki Gadu e moo buuse a sani ya moo enke te sama e gi tyobo lafu toli.

Son sama e du den tyobo sani di den e denki efuso fii te den e luku porno? Son ondoosukuman taki a luku di sama e luku porno e meke den du den sani ya, ma taawan e taki a ná tuu. Ma den sani di Beibel e taki e soi kiin taki soso a luku di wo luku porno kaba sa meke u du sani di Gadu á lobi. Ai soi kiin taki Gadu e buuse porno. Neen meke Beibel e taki: ‘U mu kii den pisi fu u sikin di sa meke u libi wan hululibi efuso kii den sekisi fii fu u’ (Kolosesama 3:5). Den sama di e luku porno nai kii den fii ya, bika a porno di den e luku e meke den fii ya kon moo taanga.

‘Suku san bun, wa mu suku ogii. . . U mu buuse ogii, daw lobi san bun’.​—Amos 5:14, 15.

SAN BEIBEL E TAKI

Beibel e taki fu sama di be man tapu anga takuu gwenti enke duungu, fufuu anga a libi di sama e libi wan tyobo libi na a se fu man anga uman libi (1 Korentesama 6:9-11). San be yeepi den fu tapu anga den gwenti ya? Fu di den wooko anga den leli di de aini Beibel, meke den bigin buuse sani di á bun.

Wan fasi faw sa buuse porno, a te we teke ten pakisei sowtu takuu bakapisi porno sa tyai gi u. Sama di ondoosuku sani a wan universiteit na Ameekankondee be kon si taki son sama di be e luku porno be e kusumi, den á be wani mumui anga taawan, den á be e fende en anga taawan tu, boiti dati taa sani be e miti den. San moo ogii, enke faw be taki a fesi kaba Gadu e buuse porno fu di a sani ya sa poli libisama anga Gadu, a Sama di meke den.

Beibel poi yeepi u fu lobi bun sani. Te we leisi Beibel ala yuu, wo moo lobi den weiti fu Gadu. A sani ya o yeepi u fu wa luku porno. Wo denki leti enke a Psalm sikiifiman di be taki: ‘Mi nai luku sani di á bun anga mi ain’.​—Psalm 101:3.