1, 2. (a) Sowtu wooko wan sikapuman di be e tan fosi aini Islayeli be e du? (b) Sowtu sani mama anga dada mu du fu kiya den pikin bun?

SIKAPUMAN di be e tan fosi aini Islayelikondee be e wooko taanga. Den be mu de a doose anga den sikapu, winsi a peesi be koo efuso a san be ati. Den be mu luku den sikapu fu den fu meti á kon nyan den anga fu fuufuuman á kon fuufuu den. Sikapuman be e ondoosuku ibiiwan fu den sikapu fu den finifini. Te den be si taki wan sikapu siki efuso kisi mankei, da den be e solugu en. Den be e poti moo pakisei a den pikin sikapu bika den be swaki moo den gaanwan.​—Genesesi 33:13.

² Mama anga dada di de Kotoigi mu abi denseefi fasi di wan sikapuman abi. A den abi a faantiwowtu fu kiya den pikin fu den enke fa Yehofa wani (Efeisesama 6:4). A sani ya á makiliki, bika den pikin mu feti anga den sondu fii fu den. Na a taa se Saatan e meke moiti fu poli a denki fu den pikin tu (2 Timotiyesi 2:22; 1 Yohanisi 2:16). Fa i sa yeepi den pikin fi i? Meke u luku dii sani di o yeepi i fu  kiya den pikin fi i bun: (1) leli sabi den, (2) gi den leli, anga (3) poti den a pasi.

3. San o yeepi mma anga dda fu sabi fa ai go anga den pikin fu den?

³ Wan bun sikapuman e ondoosuku ala den sikapu fi en finifini, bika a wani sani go bun anga den. Beibel e taki: „I mu sabi fa ai go anga den sikapu fi i” (Odo 27:23). Enke wan mma efu wan dda, i wani sabi fa ai go anga „den sikapu fi i”. Den sikapu a den pikin di yu abi. Fu man sabi fa ai go anga den, da i mu sabi den sani di den e du, fa den e denki anga fa den e fii. San o yeepi i fu kon sabi den sani ya? I mu abi a gwenti fu e gi toli anga i pikin.

4, 5. (a) San i mu du efu ai taanga gi den pikin fi i fu taigi i san de aini den ati? (Luku a fowtow na a bigin.) (b) San i du fu meke en makiliki gi den pikin fi i fu gi toli anga i?

⁴ Te den pikin e kon moo bigi den nái wani taki ala yuu san den e denki efuso fa den e fii, neen ede meke ai moo taanga gi son mma anga dda fu sidon taki anga den. Efu na so den pikin fi i de, san i mu du? Yu á mu si enke namo namo i mu kai den poti a bangi fu taki gaan langa taki anga den. Ma i mu suku fu taki anga den a wan ten di den o wani aliki (Deitolonomi 6:6, 7). Meke ten gi den pikin fi i, go koi anga den, du piisii sani anga den, du son wooko makandii anga den a osu. Den sani ya o meke en moo makiliki gi den pikin fu taigi i fa den e fii anga san de aini den ati.

⁵ Efu i du ala den sani ya, neen den á wani taki noh? Da i mu puubei wan taa sani. Son leisi yu á mu akisi a umanpikin fi i fa en dei be waka. Ma i mu taigi en fa yu dei be waka. Da a o moo makiliki gi en fu taigi i fa en dei de. Efi i wani sabi fa ai denki fu wan toli, akisi en fosi fa den baya fi en e denki fu a toli de. Da bakaten i sa akisi en sowtu lai a be o gi den.

6. San i mu du efu i wani den pikin fi i kon taki anga i?

⁶ A o de wan piisii sani gi den pikin fi i fu taki anga i efu den si taki yu abi ten gi den, anga efu den sabi taki yu á o bali den. Efu noiti yu abi ten gi den pikin fi i, den ná o taigi i san a den polobelema fu den. San i mu du efu i wani den pikin fi i kon taki anga i? Yu á mu taigi den namo taki: „Efu wan sani de i sa kon fu u taki oo.” Den pikin fi i mu sabi taki i ná o ligei te den o taigi i wan sani. Den mu si tu taki yu e booko yu ede anga den. Kaila di abi 19 yali e taki: „Sani á de di mi á poi taki anga mi dda. A nái bali mi efuso  koti mi mofu te mi e taki. Ai aliki fosi da baka dati ai taigi mi bun sani di sa yeepi mi.”

7. (a) Fa mma anga dda sa taki anga den pikin fu den te den wani de anga wan sama? (b) Fa mma anga dda sa meke den pikin fu den ati weli?

⁷ Son leisi yu o abi fu taki anga den pikin fi i fu toli di á makiliki. Kande i mu taki anga en te a wani de anga wan sama. Te yu o taki fu den sowtu toli ya, da i mu soi den fa den mu tyai denseefi bun aini a pisi toli ya. Kon u taki i go bai nyanyan a wan nyanyan osu, neen den e wasikoi i taki: Luku bun anga ala den nyanyan ya, i sa siki efi i nyan den. I be o bai nyanyan na ape ete? I be o suku wan taa peesi fu bai nyanyan, na so noh? Na aseefi fasi a de te yu e taki anga i pikin. Efu ala yuu te i mu taki anga den a soso wasikoi yu e wasikoi den, den ati o weli. Den ná o kon a yu moo fi i poti den a pasi. (Leisi Kolosesama 3:21.) Yu á mu ogii tumisi, ma yu á mu fika den tu fu du san den wani. Wan yonkuu sisa di den e kai Emily e taki: „Te mi mma anga mi dda e taki anga mi fu a abi di sama e abi mofu, da den nái taki enke a wan ogii sani. Den e taki fa a de wan piisii sani fu leli sabi wan sama di i sa wani toow anga en. A sani ya e meke mi fii bun te mi anga den e taki. Neen meke mi nái kibii sani gi den. Mi o taigi den te mi wani de anga wan sama.”

8, 9. (a) Saide meke i mu aliki i pikin sondee fu koti en mofu te ai taki anga i? (b) Sowtu wini i si di i sidon aliki i pikin?

⁸ I mu aliki i pikin anga pasensi te ai taki anga i. Te i du so da noiti a pikin o feele fu kon taki anga i (Leisi Yakowbesi 1:19.). Wan mma di den e kai Katiya e taki: „Fosi mi á be abi pasensi anga a meisyo fu mi. Mi á be e meke a kaba taki san a be wani taki seefi. Mi á be abi boo fu aliki te a be e taki. Son leisi a weli mi be e weli. Ma di mi kengi a fasi fa mi be e tyai miseefi, neen a meisyo fu mi bigin libi taa fasi tu. Nownow wi e fusutan useefi moo bun meke.”

⁹ Wan baala di den e kai Ronald be miti aseefi sani ya anga a umanpikin fi en. „Ná pikin boon mi ati be boon di a umanpkin fu mi taigi mi taki a lobi wan boi a sikoo.” Ma di mi pakisei fa Yehofa abi pasensi, anga fa ai soi taki ai fusutan den diniman fi en, neen mi kon si taki mi mu gi a umanpikin fu mi pasi fu a taigi mi san de aini en ati, fosi mi soi en san a mu du. Di mi wooko so, mi fii piisii. A no fosi mi kon fusutan fa a umanpikin fu mi e fi i. Di mi meke a taki, a be moo makiliki gi mi fu taki anga en a wan bun fasi. Mi foondoo di mi si taki a teke san mi taigi en. A soi tu taki a wani du sani taa fasi. Te yu e taki ala yuu anga den pikin fi i, da yu o sabi fa den e denki  anga san de aini den ati. A so yu o poi yeepi den fu tyai denseefi bun. *​—Luku san siikifi a ondoose.

10, 11. San i mu du fu yeepi den pikin fi i fu tan a waaleiti?

¹⁰ Wan bun sikapuman sabi taki son sikapu sa lasi. Son leisi wan sikapu e komoto a den taawan ini go nyan gaasi en wawan. Saafi saafi ai diipi e gwe, te enke a tapu uku pii. Na aseefi sani sa pasa tu anga den pikin fi i. Den sa diipi komoto a waaleiti saafi saafi. Son leisi a den mati fu den efuso den sani di den e du fu meke piisii, e du a sani ya anga den (Odo 13:20). San i mu du fu yeepi den pikin fi i, fu a sani ya á miti den?

¹¹ Efi i si taki den pikin fi i abi yeepi fanowdu fu kengi wantu manii fu den di á bun, da yu á mu daaidaai fu yeepi den. Boiti dati i mu yeepi den tu fu kon moo bun aini den sani di den e du bun kaba (2 Peitilisi 1:5-8). A osufamii anbegi a wan fu den moo bun ten fu du a sani ya. Wi Kownukondre diniwroko fu oktober 2008 e taki: „Den osufamii edeman abi a faantiwowtu fu sutudeli a Beibel ala wiki anga den osufamii. Te den e holi a osufamii anbegi den mu yeepi a osufamii fu leli wan sani.” Yu e koboloiki a ten de bun fu yeepi i pikin? Sabi taki den pikin e teke en fu bigi te yu e meke moiti fu yeepi den.​—Mateyesi 5:3; Filipisama 1:10.

12. (a) Fa wantu yonkuu sama fende wini fu a osufamii anbegi? (Luku a faki di e taki: „ Den e teke en fu bigi.”) (b) Sowtu wini yu fende fu a osufamii anbegi?

¹² Wan meisyo di den e kai Karisa e taki fa en famii e fende wini fu a Osufamii Anbegi. A taki: „Mi lobi te wi e sidon makandii fu taki. A sani ya e meke u kon sabi useefi moo bun. Mi ná o feegete den ten de. Mi dda nái meke sipowtu anga a Osufamii Anbegi. Neen meke miseefi nái meke sipowtu anga en tu. A sani ya e meke mi abi moo lesipeki gi en enke a sama di e teke fesi aini a osufamii.” Wan yonkuu sisa di den e kai Britni e taki: „A osufamii anbegi yeepi mi fu lobi mi mma anga mi dda moo enke san mi be  lobi den. Ai yeepi mi fu fusutan taki mi mma anga mi dda e booko den ede anga mi, anga den polobelema fu mi. A osufamii anbegi e yeepi a osufamii fu u fu libi na a wan tu.” A moo gaan faantiwowtu fu mma anga dda a fu leli den pikin fu lobi Yehofa. A osufamii anbegi a wan fu den moo bun sani di o yeepi den fu du a sani ya. *​—Luku san siikifi a ondoose.

13. San o yeepi i pikin fu fii piisii fu dini Yehofa?

¹³ Wan bun sikapuman e koboloiki wan tiki fu kibii anga fu tyai den sikapu fi en. A moo gaan booko ede fi en a fu tyai den sikapu go a „wan peesi di lai gaasi” (Eseikiyeli 34:13, 14). Na aseefi faantiwowtu yu enke mma anga dda abi tu. Efi i wani den pikin fi i dini Yehofa da a yu mu poti den a pasi. I mu yeepi den pikin fi i fu denki enke a psalm sikiifiman di be taki: „Mi Gadu, mi e piisii fu du san i wani, a weiti fi i de aini mi ati” (Psalm 40:8). Te den pikin fi i abi a fii ya, den o wani gi den libi abaa a Yehofa da den teke dopu. Ma den mu fusutan fosi san a sani ya wani taki. Den mu wani dini Yehofa tuutuu tu.

14, 15. (a) Sowtu moiti mama anga dada mu meke fu yeepi den pikin fu den? (b) San meke son pikin nái kaba biibi ala den sani di den e leli?

¹⁴ Son leisi a gei enke den pikin fi i nái meke moiti fu toon wan mati fu Yehofa. Kande den nái kaba biibi taki a den Kotoigi abi a tuu biibi. San i mu du te i pikin abi den sowtu denki ya? Yeepi den fu fusutan sani moo bun. Yeepi den tu fu lobi Yehofa anga den hii ati. Leli den fu teke den sani di Yehofa du gi den fu bigi (Openbaring 4:11). Da te a doo yuu, da denseefi o luku efu den sa dini Yehofa.

¹⁵ Efu den pikin fi i nái biibi ala den sani di wi e leli, da i mu abi pasensi anga den efi i wani yeepi den. Yeepi den fu fusutan taki sani á de di switi enke te den e dini Yehofa. Meke den fusutan taki den wini di den o fende a ná fu wan pisi ten namo. Puubei fu kon sabi tu saide meke den nái kaba biibi ala sani di den e leli. Kon u taki yu abi so wan pikin. Na biibi a nái biibi tuutuu san Beibel e taki, efuso na feele ai feele fu peleiki gi den pikin a sikoo? A biibi a nái biibi tuutuu taki den weiti fu Gadu o yeepi en, efuso a fii ai fii enke neen wawan de fu di taa sama á wani mumui anga en?

16, 17. San mama anga dada mu du fu yeepi den pikin fu toon wan mati fu Yehofa?

¹⁶ Fa i sa yeepi den pikin fi i te den nái kaba biibi san wi e leli? Somen mma anga dda yeepi den pikin, fu di den poti akisi gi den. Akisi enke: „Ai taanga gi i fu de wan Kelesten? Sowtu wini wi o fende te u de wan Kelesten? San a den sani di u mu poti a wan se? Fa yu e si den wini di wi e fende aini a  ten ya, anga den wini di wi o fende aini a ten di e kon? I si enke den bun moo den sani di u poti a wan se?” A á de fi i poti den akisi ya gi den gbelen gbelen enke fa den sikiifi ya. Taki a wan fasi di e soi taki yu e booko yu ede anga den. Te yu e taki, a pikin á mu fii enke a kuutu yu e kuutu en. I sa taki fu Malikisi 10:29, 30 anga en. Meke den sikiifi san a den wini di den o fende te den e dini Yehofa anga san a den sani di den mu poti a wan se. A sani ya o yeepi yu anga i pikin fu sabi san a den polobelema di e miti den. A o yeepi u tu fu sabi fa fu losi den polobelema di den abi. Efu u mu sutudeli a „Bijbel leri-buku” anga a „Gado lobi-buku” anga sama, da yu á si enke u mu sutudeli den buku ya anga u eigi pikin tu noh? Yu e du a sani ya?

¹⁷ Te den pikin e kon bigi, da a denseefi mu luku efu den o dini Yehofa. A ná fu di yu e dini Yehofa meke denseefi o wani dini en. A den pikin fi i seefi mu meke moiti fu toon wan mati fu Yehofa (Odo 3:1, 2). San i mu du efu ai taanga gi a pikin fi i fu toon wan mati fu Gadu? Gi en taanga sikin fu poti akisi gi enseefi, da so a o man sabi o taanga a biibi fi en de. A kan akisi enseefi taki: Fa mi du sabi taki wan Gadu de? Fa mi du sabi taki Yehofa e booko en ede anga mi? Mi e biibi tuutuu taki efu mi e libi enke fa Yehofa wani, sani o waka bun gi mi? Mama anga dada, u mu de enke wan bun sikapuman da u yeepi den pikin fu u anga pasensi. Yeepi den fu denseefi kon fusutan taki sani á de di switi enke te den e dini Yehofa. * (Luku san siikifi a ondoose.)​—Romesama 12:2.

18. Fa mma anga dda sa waka a Yehofa baka enke a Gaan Sikapuman?

¹⁸ Ala tuu Kelesten wani waka a Yehofa baka, a Gaan Sikapuman (Efeisesama 5:1; 1 Peitilisi 2:25). Mama anga dada mu sabi den sikapu fu den, dati a den pikin di Gadu gi den. Den mu poti den pikin a pasi fu den sa fende den wini di Yehofa paamisi wi. Neen meke i mu du ala san i man enke mma anga dda fu yeepi den pikin fi i fu lobi Yehofa!