1. Saide meke den sama di e dini Gadu o miti anga „omen banowtu”?

AI FOONDOO yu taki wi o miti anga „omen banowtu” fosi u fende a tego libi? Sonten yu o taki nono. Winsi o langa u de a waaleiti wi o miti anga banowtu namo. Saide? Wan fu den sani, a fu di wi e libi aini a goontapu fu Saatan.​—Openbaring 12:12.

2. (a) Boiti den polobelema di ala libisama e miti, sowtu taa tesi e miti Kelesten? (Luku a fowtow na a bigin.) (b) Sama na a sama di e tesi u? Fa u du sabi?

² Ala libisama e miti anga polobelema aini a libi. Ma den Kelesten e miti tesi moo iniiwan taa sama a goontapu (1 Korentesama 10:13). Wan fu den fasi fa tesi e miti den, na a du di sama e du ogii anga den, fu di den e dini Gadu. Yesesi be taigi den bakaman fi en taki: „Wan saafu á hei moo en masaa. Efu den du ogii anga mi, da den o du ogii anga u tu ”(Yohanisi 15:20). Ma sama e meke den sowtu tesi ya e miti u? A Saatan Didibii. Beibel e taki a de enke wan „lew di e bali” fu di ai ’suku fu gwili’ den sama di e dini Gadu (1 Peitilisi 5:8). Saatan o du ala san a man  fu meke u gwe fika Yehofa. Meke u go luku san be miti a apostel Pawlesi.

3-5. (a) San be miti Pawlesi aini Listra? (b) Fu saide den sani di Pawlesi be taki fu banowtu be gi den Kelesten taanga sikin?

³ A omen sowtu tesi be miti Pawlesi fu di a be e dini Gadu anga en hii ati (2 Korentesama 11:23-27). Wan leisi di Pawlesi be de aini a foto Listra, neen a deesi wan man di á be poi waka. Di a du a gaan sani ya, neen den sama be e si en anga Barnabas enke gadu. Den be abi fu begi den sama fu den á dini den. Ma di den fesiman fu a Dyu biibi doo de, neen den bigin taki omen lei sani fu Pawlesi anga Barnabas. Fu di den sama be biibi den lei toli ya, meke den fiingi siton naki Pawlesi fu kii en. A di den si enke en boo be koti neen den tapu.​—Toli 14:8-19.

⁴ Di Pawlesi anga Barnabas komoto a Derbe, neen den „go baka a Listra, Ikoniyum anga Antiokiya. Den go gi den disipel ape taanga sikin fu tan dini Yehofa. Den taigi den taki: ’Wi o miti anga omen banowtu fosi u go aini a Kownukondee fu Gadu’” (Toli 14:21, 22). Fu miti anga „omen banowtu” a ná wan sani di e gi taanga sikin. Da fa a waka taki Pawlesi anga Barnabas gi den disipel taanga sikin, efu den taigi den taki den o miti anga omen banowtu?

⁵ Te u luku moo fini san Pawlesi taki, dan wi o fusutan a toli ya. A á be taki namo taki „wi o miti anga omen banowtu”. Ma a be taki: „Wi o miti anga omen banowtu fosi u go aini a Kownukondee fu Gadu.” Pawlesi be wani den Kelesten pakisei a wini di den be o fende te den be o holidoo. A sani ya a ná wan deen. Yesesi be taki: „A den sama di holidoo te na a kaba o fende libi.”​—Mateyesi 10:22.

6. Den sama di e holidoo te tesi miti den, sowtu pai den o fende?

⁶ Efu wi e holidoo te tesi e miti u, da wi o fende pai fu dati. Gi Kelesten di salufu, a pai ya na a tii di den o tii enke kownu aini hemel makandii anga Yesesi. Noiti den o poi dede. Den taa sikapu o libi fu tego a goontapu ya pe ala sani o waka bun (Yohanisi 10:16; 2 Peitilisi 3:13). Ma fosi a ten de doo, wi o miti anga „omen banowtu”. Meke u go luku tu fasi fa tesi sa miti u.

7. San a den tesi fu Saatan di wi e si kiin?

⁷ Yesesi be taki a fesi taki: „Sama o kai wi a kuutu, den o fon wi aini den keliki osu fu den Dyu. Den o tyai u go a den tiiman fu kondee anga kownu fesi tu” (Malikisi 13:9). Yesesi be taki tesi be o miti son Kelesten di den man si kiin, tesi enke a du di sama be o du ogii anga den. Son leisi a den fesiman fu keliki anga den tiiman fu kondee e tesi u na a sowtu fasi ya (Toli 5:27, 28). Pakisei Pawlesi. I si enke a be e feele te a be e denki den ogii di be sa miti en? A á be e feele seefiseefi.​—Leisi Toli 20:22, 23.

8, 9. Fa Pawlesi soi taki a be de kabakaba fu holidoo, winsi san e pasa? Fa son baala anga sisa holidoo di tesi miti den?

⁸ Pawlesi á be e feele te Saatan be e meke sama du ogii anga en. A be taki: „Mi ná abi toobi fu tuka anga dede seefi. A wan enkii sani di mi wani du, a fu lon a sitee lon te na a kaba. Mi wani kaba a wooko tu di Masaa Yesesi gi mi. A wooko di a gi mi a fu paati a bun nyunsu finifini taki Gadu e soi sama bun ati” (Toli 20:24). Pawlesi á be e feele te tesi be e miti en. A be de kabakaba fu holidoo, winsi san e pasa. A sani di a be wani du a fu „paati a bun nyunsu finifini” winsi tesi be e miti en.

⁹ Aini a ten ya a omen baala anga sisa holidoo di tesi miti den. Aini wan kondee den poti son Kotoigi a sitaafu-osu sondee fu den tyai den go a kuutu. A wan sani fu 20 yali kaba den de a sitaafu-osu. Saide? A fu di den á wani mumui aini politiki. Famii anga taa sama á poi go luku den. Den du ala sowtu ogii-ati sani anga son wan fu den fu meke den fii pen.

10. Saide meke wi á mu feele te tesi e miti u wanboo wanboo so?

¹⁰ Aini son kondee, a wanboo wanboo so tesi e miti Kotoigi. Yu á mu feele te a sani ya miti i. Pakisei Yosefu. Den seli en enke saafu, ma Yehofa „puu en aini ala den tesi di be miti en” (Toli 7:9, 10). Yehofa man yeepi i na a seefi fasi tu. Noiti yu á mu feegete taki „Yehofa sabi fa fu fii den sama di e dini en anga den hii ati puu aini tesi” (2 Peitilisi 2:9). A omen sani e yeepi u fu fitoow Yehofa. Den e yeepi u fu holidoo tu te tesi e miti u. I mu fitoow Yehofa, taki a sa yeepi i aini a ogii goontapu ya fi i sa fende a tego libi.​—1 Peitilisi 5:8, 9.

11. Fa den tesi fu Saatan di u nái si á de aseefi enke den tesi di wi e si?

¹¹ Te tesi e miti u son leisi, da wi á poi si kiin taki a Saatan e tesi u. Fu san ede meke u mu de na ain gi den tesi ya? Den tesi di wi e si de enke wan gaan daai winta di sa booko a osu fi i wanboo wanboo so. Ma den tesi di wi á poi si de enke udulosu di e nyan den udu fu a osu fi i saafi saafi. A ten di i fusutan taki udulosu de ape a lati,  bika den kaba anga a hii osu fi i a soso.

12. (a) San a wan fu den fasi fa Saatan e tesi u? San a tesi ya e du anga u? (b) Fa Pawlesi be e fii son leisi?

¹² Saatan á wani yu anga Yehofa de mati. Neen ede meke ai meke sama du ogii anga u. Son leisi ai koboloiki taa sowtu tesi tu enke a fii di sama e fii booko saka. Den sowtu tesi ya sa meke a biibi fu u go a baka saafi saafi. Son leisi a apostel Pawlesi be e fii bookosaka tu. Wan leisi a be taki: „a libi fu mi tyali oo”. (Leisi Romesama 7:21-24.) Ma kande yu e akisi iseefi taki: ’Fa wan man enke Pawlesi be sa fii booko saka so?’ Pawlesi anga Yehofa a be bun mati. Enke fa u sabi tu, da a be de wan fu den baala di be e tii a wooko fu den Kelesten aini a ten de. Tokuso a be e fii booko saka fu di a be de wan sondu sama. A be wani du san bun, ma a á be makiliki. Efu yu e feti anga den sowtu fii ya tu, da yu á mu lasi-ati. Bika wan man enke Pawlesi seefi be e feti anga den sowtu fii ya.

13, 14. (a) Fu saide meke son sama di e dini Yehofa e fii booko saka? (b) Sama wani fu wi á dini Yehofa moo? Saide meke a wani du a sani ya?

¹³ Baala anga sisa e fii booko saka son leisi. Son leisi den e kusumi efuso fii enke den á bun seefi seefi. Wan pionili sisa be taki: „Ala yuu te mi e pakisei wan fowtu di mi be meke, da mi e fii booko saka. Te mi e denki ala den sani di mi du, da mi e si enke sama á de di sa lobi mi. Mi e fii enke Yehofa seefi ná o poi lobi mi tu.”

¹⁴ Fu saide meke son sama di e dini Yehofa e fii booko saka? A omen sani de di sa meke den fii so. Son leisi den e si enke a bun den á bun. Son leisi a den sani di e miti den meke den e fii so (Odo 15:15). Taawan e denki ogii fu denseefi fu di den gusontu e go a baka. Winsi sowtu sani e meke u fii booko saka, noiti u mu feegete sama na a sama di wani u fii so. Sama i denki wani u fii booko saka fu wi á dini Yehofa moo? A Saatan Didibii. Yehofa leisi dede sitaafu gi en kaba. Neen meke a wani iseefi fii enke yu á bun (Openbaring 20:10). Saatan sabi taki efu wi e kusumi tumisi, da a biibi fu wi e kon swaki. Den tesi di ai tyai kon a u tapu a fu meke wi á dini Yehofa moo. Yu á mu feegete taki den sama di e dini Gadu mu meke moiti ala dei fu soi taki den wani dini Yehofa anga den hii ati.

15. Enke fa 2 Korentesama 4:16, 17 e soi, san na a sani di u mu de kabakaba fu du?

¹⁵ Noiti i mu gi abaa. Ma holi a pakisei taki yu o fende wini aini a ten di e kon. Di Pawlesi be sikiifi den Kelesten aini Korente a taigi den taki: „Neen meke u nái gi abaa. Winsi a sikin e go anga baka, wi e fii taki dei fu dei wi e kisi nyun kaakiti. A tesi di e miti u nái ibi, a fu wan satu ten namo. Ma ai meke u fende bunbun wini fu tego.”​—2 Korentesama 4:16, 17.

16. Saide meke u mu seeka useefi nownow gi tesi?

¹⁶ Enke fa u si a fesi, Saatan lai politiki (Efeisesama 6:11). Neen meke u mu du san sikiifi aini 1 Peitilisi 5:9. A pe sikiifi: „Taampu gingin te ai kon a yu, i biibi mu taanga”. Efu u wani taampu gingin te Didibii e kon tesi u, da a nownow u mu seeka wi ati anga a fasi fa wi e denki. Da wi o de kabakaba fu du san bun. Pakisei wan suudati di mu go a feti. Fosi a go a feti ai teke seeka omen ten a fesi, bika a á sabi on ten feti o booko. Na aseefi sani u mu du tu. Bika wi á sabi on ten feti o kon miti u. Neen meke a nownow u mu teke seeka. A apostel Pawlesi be gi Kelesten taanga sikin taki: „U mu e ondoosuku naamo luku efu u de a biibi; e soi namo sowtu sama a yu.”​—2 Korentesama 13:5.

17-19. (a) San u mu du efu u wani ondoosuku useefi? (b) Fa yonkuuwan sa seeka denseefi fu taki fu a biibi fu den a sikoo?

¹⁷ Wan fasi fa u sa ondoosuku useefi, a fu poti akisi gi useefi, akisi enke: ’Mi e begi ala dei? Efu taawan e sende mi fu go du ogii, mi e aliki den efuso mi e aliki Gadu? Mi e go a komakandaa ala yuu? Mi e feele te mi e taki anga taawan fu den sani di mi e biibi? Mi e gi taawan paadon leti enke fa mi  wani den gi mi paadon tu? Mi e aliki den owluman anga den baala di e tii a wooko fu u a hii goontapu?’

¹⁸ Wi e libi a sama mindii di wani poli u fusutan. A omen yonkuu baala anga sisa e taki fu a biibi fu den a sikoo sondee fu feele. Den nái sen fu taki fu a biibi fu den. Ma san meke den yonkuuwan ya nái feele? Wan sani di e yeepi den na a wooko di den e wooko anga den sani di sikiifi aini den buku fu u. Bladzijde 6 fu A Waktitoren fu 15 mei 2013 e soi fa pikin sa taki a sikoo anga taawan fu a biibi fu den sondee fu feele. A pisi de e soi fa den sa poti akisi gi taawan fu meke den go sidon denki. Mama anga dada, meke moiti fu seeka den pikin fi i gi den tesi di o miti den a sikoo.

¹⁹ A ná ala yuu a makiliki fu opo taki gi a biibi fu u efuso fu du sani enke fa Yehofa wani. Son leisi efi i wooko hii dei da yu abi fu meke taanga sikin fu go a komakandaa. Son leisi ai taanga tu fu opo a sibipe te mamanten fu go peleiki. Ma ná feegete taki yu o de seeka seeka gi gaan tesi efu nownow kaba i gwenti du den sani ya.

20, 21. (a) Fa wi o fende wini te wi e teke ten fu denki fu a dede di Yesesi dede gi u? (b) San u mu meke moiti fu du?

²⁰ Fa fu den tesi di wi á poi si? San u sa du fu wi á fii booko saka? Wan fu den moo bun sani di o yeepi u, a te wi e teke ten fu denki a dede di Yesesi dede gi wi. Na a sani de a apostel Pawlesi be e du. Son leisi a be e fii booko saka. Ma a be sabi taki a gi den sondu sama enke en Yesesi be dede gi, ná gi sama di nái meke fowtu. A be sikiifi taki: „A libi di mi e libi nownow a fu di mi e biibi aini a Manpikin fu Gadu. A soi taki a lobi mi neen a dede fu mi ede” (Galasiyasama 2:20). Pawlesi be teke en fu bigi taki Yesesi be dede gi libisama, a be fusutan taki a den sama enke en Yesesi be dede gi.

²¹ Efu yu e si a dede di Yesesi dede gi wi enke wan kado di Yehofa gi i, da a sani de o yeepi i te yu e fii booko saka. Ma a sani ya á wani taki a fii di yu e fii booko saka o gwe wanten wanten. Son sama o abi fu feti anga den sowtu fii ya te enke den go aini a nyun goontapu. Ma ná feegete: A den sama di nái gi abaa o fende wini. Dei fu dei a Kownukondee fu Gadu e kon moo koosube. Te a Kownukondee ya o bigin tii, ala sani o waka bun a goontapu. Nawan sama o abi sondu moo. Neen ede meke i mu meke moiti fu doo aini a Kownukondee, winsi omen tesi e miti i nownow.