1. Fa Pawlesi be e si a taanga wooko fu den baala anga sisa di be e paati a bun nyunsu?

A FASI fa den baala anga sisa be e wooko taanga fu paati a bun nyunsu, be e bigi gi a apostel Pawlesi. A be sikiifi taki: „Bika te wi de a u Tata, Masaa Gadu fesi, da u nái feegete a wooko di wi e du fu di wi abi biibi, anga a moiti di wi e meke fu di wi abi lobi. U nái feegete a fasi fa wi e holidoo fu di wi e fitoow Masaa Yesesi Kelestesi” (1 Tesalonikasama 1:3). Yehofa seefi nái feegete a taanga wooko fu den diniman fi en. Ai teke a wooko di den e du gi en fu bigi, winsi den á poi du ipi.​—Hebrewsama 6:10.

2. Fu sowtu toli wi o taki aini a artikel ya?

² Aini den yali di pasa te doo den yali fu u ya, a omen sani Kelesten poti a wan se fu du moo gi Yehofa. Aini a artikel ya, wi o taki san son Kelesten aini a ten fu den apostel be du fu dini Yehofa. Wi o luku tu san den sama di e du a fuuten diniwooko e du aini a ten ya, anga san u sa du fu holibaka gi den.

3, 4. (a) Sowtu wooko son baala anga sisa be e du aini a ten fu den apostel? (b) Fa den baala anga sisa di be e paati a bun nyunsu fu a Kownukondee aini a ten fu den apostel be e solugu denseefi?

³ Baka di Yesesi dopu, neen wanten wanten a bigin paati a bun nyunsu fu a Kownukondee. A be leli taa sama fa fu du a wooko ya tu (Lukasi 3:21-23; 4:14, 15, 43). Baka di Yesesi dede, neen den apostel fi en tii a peleikiwooko go doo. A so a bun nyunsu bigin paati na ala se (Toli 5:42; 6:7). Son wan fu den Kelesten fika a peesi pe den be e tan fu go wooko enke zendeling. Filipesi a be wan fu den sama ya. A be e peleiki a omen peesi aini Palestina (Toli 8:5, 40; 21:8). Wan taa apostel di be de wan zendeling tu, a be Pawlesi. A be fika a peesi pe a be e tan fu go peleiki a bun nyunsu a wantu taa kondee (Toli 13:2-4; 14:26; 2 Korentesama 1:19). Taawan enke Malikisi, Lukasi anga Silfanesi (Silasi) be sikiifi Beibel buku efuso be wooko enke seketasi gi sama di sikiifi Beibel buku (1 Peitilisi 5:12). A omen sisa be e wooko makandii anga den baala ya (Toli 18:26; Romesama 16:1, 2). Wi e leisi den moi toli fu den baala anga sisa ya aini den Kelesten Giiki buku. Den toli ya e soi u taki Yehofa e teke a wooko di den diniman fi en e du fu bigi. Ai gi den san den abi fanowdu tu.

⁴ Fa den baala anga sisa di be e paati a bun nyunsu fu a Kownukondee aini a ten fu den apostel be e solugu denseefi? Den á be e musu den baala fu a kemeente fu solugu den, ma a denseefi be e du goontapu wooko wanwan leisi fu solugu denseefi (1 Korentesama 9:11-15). Ma te sama be e gi den sani den be e teke. Sama be e kai den kon nyan a den osu, den be e gi den peesi fu tan, anga den be e holibaka gi den a taa fasi tu. Wantu baala anga sisa, anga son leisi na a hii kemeente, be e yeepi den.​—Leisi Toli 16:14, 15; Filipisama 4:15-18.

5. San wan baala anga en uman taki di den go aini a fuuten diniwooko?

⁵ Aini a ten ya, Kotoigi e du a fuuten diniwooko a omen sowtu fasi. (Luku a faki „ Fasi fa fu du a fuuten diniwooko.”) Fa den e si a wooko ya? Ná pikin taanga sikin yu o fende efi i poti a akisi ya gi sama di e du a fuuten diniwooko. Wan baala di be dini enke kowownu pionili, spesuutu pionili, anga zendeling, ma di e wooko a Bethel now e taki: „A fuuten diniwooko a wan fu den moo bun sani di mi du aini mi libi.  Di mi be abi den 18 yali, sani á be makiliki gi mi. Bika mi á be sabi ete efu mi be mu teke leli a hei sikoo, suku wan bun wooko efuso go pionili. Ma ondoofeni leli mi taki Yehofa nái feegete den sama di fika omen sani fu man du a fuuten diniwooko. Efu mi be suku balinen aini a goontapu ya, da noiti mi be o poi koboloiki a koni di Yehofa gi mi enke fa mi koboloiki en aini a fuuten diniwooko.” A uman fu a baala ya e taki: „Ala den sani di mi du aini a fuuten diniwooko yeepi mi fu toon wan moo bun sama. U be e si fa Yehofa be e yeepi u anga fa a be e tii a libi fu u. Wi á be o fende den wini ya efu wi á be e du a fuuten diniwooko. Ala dei mi e gi Yehofa daa taki wi e du a fuuten diniwooko.” Iseefi a wani sani waka gi i na a fasi ya noh?

6. Fa Yehofa e si den sani di wi e du gi en?

⁶ Son Kotoigi á poi du a fuuten diniwooko, ma tokuso den e du ala san den man gi Yehofa. Yehofa e teke den sani di den baala anga sisa ya e du fu bigi. Aini Fileimon 1-3, Pawlesi e sende odi gi ala den baala anga sisa fu a kemeente aini Kolose. A kai son wan fu den a den nen. (Leisi a tekisi.) Pawlesi be e teke en fu bigi taki den be e wooko taanga. Ma a ná Pawlesi wawan, Yehofa tu. A so den sani di yu e du gi Yehofa e bigi en. Ma san i sa du fu holibaka gi den sama di e du a fuuten diniwooko?

7, 8. San wan pionili mu du? Fa den baala anga sisa sa yeepi den pionili aini a kemeente?

⁷ Leti enke fa den Kelesten aini a ten fu den apostel be e gi den kemeente taanga sikin, a so den pionili aini a ten ya, e gi den kemeente taanga sikin tu. A wan sani fu 70 yuu den e peleiki ala mun. Fa i sa holibaka gi den pionili ya?

⁸ Wan pionili sisa di den e kai Shari be taki: „A gei enke den pionili taanga, bika den e go ala dei aini a peleikiwooko, ma tokuso den abi taanga sikin fanowdu” (Romesama 1:11, 12). Wan taa sisa di du a pionili wooko omen yali kaba, e taki: „Den pionili e wooko taanga, den nái gi abaa. Te den baala anga sisa e koboloiki den wagi efu boto fu tyai den pionili go aini a peleikiwooko, efuso e kai den kon nyan a den osu, da den e teke en fu bigi. Den e teke en fu bigi tu te sama e gi den moni fu lai oli efuso fu bai sani di den abi fanowdu. A so den pionili e si taki den baala anga sisa e booko den ede anga den.”

9, 10. Fa wantu baala anga sisa holibaka gi den pionili di de aini den kemeente?

⁹ Wan taa fasi fa u sa holibaka gi den pionili, a te wi e wooko anga den aini a peleikiwooko. Tu pionili sisa taki den abi baala anga sisa fanowdu, fu wooko makandii anga den mindii wiki anga bakadina te den e go aini a peleikiwooko. Wan sisa di e wooko na a Betel osu fu Ameekankondee e membee ete fa den baala anga sisa be e yeepi en di a be e pionili. Ai taki: „Wan sisa di be abi wan wagi be taigi mi taki, ’solanga yu abi wan sama fanowdu fu wooko anga i, i sa telefon mi, da mi anga yu o wooko.’ Na a sisa ya yeepi mi fu mi á komoto aini a pionili wooko.” Shari e taki:  „Den pionili di á toow wawan e de a osu te den komoto a peleikiwooko. I sa kai den pionili ya fu kon sidon na a osufamii anbegi fi i wan wan leisi. Te wi e kai den fu du taa sani makandii anga u, da a sani de e taanga a biibi fu den tu.”

¹⁰ Wan sisa di du a fuuten diniwooko wan sani fu 50 yali kaba e taki fa den owluman be e holibaka gi en anga den taa pionili sisa di á be toow. Ai taki: „Solanga wantu mun be pasa, da den owluman be e go luku den pionili. Den be e akisi fa ai go anga a gusontu anga a wooko fu u. Den be e akisi u tu sowtu booko ede wi abi. Den be e booko den ede anga u tuutuu. Den be e kon luku wi a osu fu si efu wi abi yeepi fanowdu.” A sani ya e meke u pakisei fa a be bigi gi Pawlesi di wan baala aini Efeise be e yeepi en, anga ala fa a baala be abi en osufamii fu solugu.​—2 Timotiyesi 1:18.

11. San wan spesuutu pionili e du?

¹¹ Wan taa fasi fu du a fuuten diniwooko na a spesuutu pionili wooko. Somen fu den spesuutu pionili e wooko 130 yuu wan mun aini a peleikiwooko. Den e du somen taa wooko tu aini a kemeente fu den. A beikantoo e gi den wan pikin moni ala mun, bika den ná abi ten fu go du goontapu wooko. A sani ya e yeepi den fu man poti ala den pakisei na a peleikiwooko.

12. Fa owluman anga taa Kotoigi sa yeepi den spesuutu pionili?

¹² San u sa du fu yeepi den spesuutu pionili? Wan owluman di e wooko a wan beikantoo taki anga omen spesuutu pionili. Ai taki: „Den owluman mu taki anga den fu luku san den abi fanowdu, da den mu luku san den sa du fu yeepi den. Son Kotoigi e denki taki den spesuutu pionili ná abi yeepi fanowdu fu di a beikantoo e gi den wan pikin moni kaba. Ma den baala anga sisa sa yeepi den a omen sowtu fasi.” Leti enke den kowownu pionili a so den spesuutu pionili e teke en fu bigi te den baala anga sisa e wooko anga den aini a peleikiwooko. I poi wooko makandaa anga den tu?

13, 14. (a) San den keleng-owluman anga den uman abi fanowdu? (b) Fa i sa holibaka gi den keleng-owluman anga den uman?

¹³ Den keleng-owluman anga den uman fu den na lepi Kelesten di abi wan taanga biibi. Neen meke den man gi u taanga sikin. Ma wi á mu feegete taki denseefi abi taanga sikin fanowdu. Den wani baala anga sisa wooko anga den aini a peleikiwooko tu. Neen meke den e teke en fu bigi te baala anga sisa e kai den fu go koi efuso du taa sani makandii di e meke den e fii piisii. Te den siki efuso didon na ati-osu, u sa go luku den fu si san den abi fanowdu. Dataa Lukasi be de wan „lobi baala”, di be e solugu Pawlesi anga den taa baala di be e waka a den kemeente.​—Kolosesama. 4:14; Toli 20:5–21:18.

¹⁴ Den keleng-owluman anga den uman abi mati fanowdu di lobi den, anga di e gi den taanga sikin. Wan keleng-owluman e taki: „Den mati fu mi sabi on ten mi abi taanga sikin fanowdu. Den e poti akisi gi mi fu sabi fai go anga mi, da a so mi e man taki puu koko a mi ati. Soso a aliki di den e aliki e gi mi taanga sikin.” Keleng-owluman e teke en fu bigi te baala anga sisa e poti pakisei a den. Den e teke en fu bigi tu te baala anga sisa e meke moiti fu toon mati anga den.

15, 16. Saide meke a wooko di den Kotoigi e du a Betel anga den gaan komakandaa peesi pelensipali? Fa u sa holibaka gi den?

¹⁵ Den Kotoigi di e wooko a Betel efuso a den peesi pe wi e holi gaan komakandaa, e wooko taanga fu holibaka gi a peleikiwooko. Efu Kotoigi di e wooko a Betel de aini yu kemeente efuso wan kemeente a koosube, fa i sa soi taki i nái feegete den?

¹⁶ Te den Kotoigi ya doo a Betel biginbigin, da kande den sa e angii fu den famii anga den mati fu den. Neen ede meke den e piisii te baala anga sisa di de moo langa a Betel, efuso di de aini a kemeente e toon den mati (Malikisi 10:29, 30). Te a wooko nái ipi tumisi a Betel da den Kotoigi di e wooko ape, e kisi a okasi ala wiki fu go a komakandaa anga a peleikiwooko. Ma son leisi den abi fu wooko moo langa. A bun te den baala anga sisa e holi a sani ya a pakisei. Den mu soi den baala anga sisa di e wooko a Betel taki a wooko di den e du e bigi gi den.​—Leisi 1 Tesalonikasama 2:9.

17, 18. Sowtu wooko den Kotoigi di e du a fuuten diniwooko e du a taa kondee?

¹⁷ Son wan fu den Kotoigi di e du a fuuten diniwooko e kisi a okasi fu go yeepi aini wan taa kondee. Den abi fu leli taki wan nyun tongo, fu nyan nyanyan di den á be gwenti, anga fu libi wan hii taa fasi. Sowtu wooko den e du aini den kondee pe den e go yeepi?

¹⁸ Son wan fu den na zendeling. A moo gaanse fu a ten fu den aini a peleiki wooko den e de. Den sabi peleiki bun. Den e paati a leli di den kisi anga taawan aini a kemeente. Na a beikantoo e suku wan peesi gi den fu tan. Den e gi den wan pikin moni tu fu bai san den abi fanowdu. Taawan di go yeepi a taa kondee e wooko na a beikantoo fu  a kondee. Son wan fu den e bow beikantoo, peesi pe sama e puu den buku fu u poti go aini taa tongo anga komakandaa peesi. Na a beikantoo efuso den baala fu a kondee e yeepi den anga den sani di den abi fanowdu, sani enke nyanyan anga wan tanpeesi. Leti enke den Kotoigi di e wooko a Betel, a so den Kotoigi ya e go a komakandaa anga peleikiwooko. A kemeente e fende wini fu a ondoofeni di den baala anga sisa ya abi.

19. Fa i sa yeepi den sama di kon du a fuuten diniwooko aini i kondee?

¹⁹ Fa i sa yeepi den sama di kon du a fuuten diniwooko aini a kondee fi i? Holi a pakisei taki te den kon biginbigin, den ná o gwenti den nyanyan fu a kondee. Neen ede meke te yu o kai den fu kon nyan a yu osu, da a be o bun fi i akisi den san den wani nyan. I sa akisi den tu san den nái nyan. Den ná o poi leli taki a tongo fu a kondee fi i wanboo wanboo so efuso libi enke fa wi e libi. Neen meke i mu abi pasensi anga den, bika den wani leli.

20. Fa u sa holibaka gi den Kotoigi di e du a fuuten diniwooko?

²⁰ Son leisi den Kotoigi di e du a fuuten diniwooko, mu luku fa den o yeepi den mma anga dda di kon gaandi. Efu a mma anga a dda a Kotoigi, da sonten den ná o wani den pikin fu den fika a fuuten diniwooko (3 Yohanisi 4). Den Kotoigi ya o du ala san den man fu solugu den mma anga dda. Te den abi a okasi den o go luku den tu. Ma den baala anga sisa di e tan koosube fu a mma anga dda sa yeepi den Kotoigi ya tu. Kande den sa yeepi solugu a mma anga dda fu den Kotoigi ya. Wi á mu feegete taki den Kotoigi di e du a fuuten diniwooko e du a moo pelensipali wooko di de a goontapu (Mateyesi 28:19, 20). I man holibaka gi den fu yeepi solugu den mma anga den dda?

21. Fa den sama di e du a fuuten diniwooko e fii te taawan e yeepi den efuso e gi den taanga sikin?

²¹ Somen sama e wooko taanga fu di den wani kon gudu. Ma den sama di e du a fuuten diniwooko e wooko taanga gi Yehofa. Den e wooko taanga tu fu di den wani yeepi taa sama. Neen meke den e teke en fu bigi, te den e si taki taawan e yeepi den anga sani. Wan sisa di e du a fuuten diniwooko aini wan taa kondee taki: „Awinsi a wan pikin sani wan sama e du, ai bigi gi mi. Bika den sani de e soi mi taki den e booko den ede anga mi. Ai soi mi tu taki den e piisii anga a wooko di mi e du.”

22. Fa yu e si a fuuten diniwooko?

²² Den Kotoigi di e du a fuuten diniwooko e fende wini fu a fasi fa den e libi. A libi fu den e gi den piisii tu, bika a fuuten diniwooko na a moo bun sani di den be sa du aini a ten ya. Den sama ya e kon abi manii di o tyai wini gi den nownow anga te den o libi aini a nyun goontapu. Aini a ten di e kon den diniman fu Yehofa o go e du wooko di e gi den piisii. Neen meke wi á mu feegete den sama di e du a fuuten diniwooko fu di den abi lobi anga biibi.​—1 Tesalonikasama 1:3.