1, 2. Sowtu gaan sani Yehofa be du na a pinksterfesa di be holi aini a yali 33? Sama be toon a nyun foluku fi en? (Luku a fowtow na a bigin.)

YEHOFA be du wan gaan sani na a pinksterfesa di be holi aini a yali 33. A be sete wan nyun foluku di den e kai „a Islayeli fu Gadu” efuso a „nyun Islayeli” (Galasiyasama 6:16). Yehofa be meke santa yeye kon a den sama ya tapu, di a teke den enke a nyun foluku fi en. Pawlesi be sikiifi taki a á be de fanowdu taki a nyun foluku ya be mu besnei enke fa den bakapikin fu Abalaham be e besnei. Ma ’a den ati den besnei. A ná wan weiti di sikiifi meke a de so, ma na a santa yeye meke a de so.’​—Romesama 2:29.

² Den fosi sama di Gadu be teke fu toon a nyun foluku fi en, a be den apostel anga moo enke wan ondoo taa disipel. A sani ya be pasa di den be de makandaa a wan tapu sodoo aini Yelusalem (Toli 1:12-15). Gadu be meke santa yeye kon a den tapu, neen den toon manpikin fi en (Romesama 8:15, 16; 2 Korentesama 1:21). A sani ya be e soi taki Yehofa be fende a ofaandi di Yesesi be tyai bun. Neen meke a nyun kuudei kon na a peesi fu a kuudei fu a Weiti. (Lukasi 22:20; leisi Hebrewsama 9:15.) A den disipel di Gadu be salufu anga santa yeye be toon a nyun  foluku fi en. Di santa yeye kon a den tapu den be man taki omen sowtu tongo, anga ala den be man fusutan den tu. Den be man leli sama „den gaan sani di Gadu du.”​—Toli 2:1-11.

3-5. (a) San Peitilisi taigi den Dyu na a dei fu a Pinksterfesa? (b) Fa a nyun foluku be kon moo ipi baka a Pinksterfesa?

³ Yehofa be meke Peitilisi gi Dyu anga taakondee sama di be teke a Dyu biibi a kai fu toon wan pisi fu a foluku fi en. A nyun foluku ya a be a kemeente fu salufu Kelesten. Sondee feele Peitilisi taigi den Dyu na a dei fu a Pinksterfesa taki a den kii Yesesi. A taigi den tu taki a be de fanowdu fu den teke Yesesi enke den „Masaa anga Kelestesi.” Di den akisi Peitilisi san den mu du, neen a taigi den taki: „U daai u libi, da u dopu aini a nen fu Yesesi Kelestesi fu u sa kisi paadon fu den sondu fu u. Da a so Gadu o gi wi a santa yeye di ai gi sama fu soso” (Toli 2:22, 23, 36-38). A wan sani fu 3000 sama toon wan pisi fu a nyun Islayeli na a dei de (Toli 2:41). Bakaten den apostel tan paati a bun nyunsu. A sani ya be meke moo sama teke a biibi (Toli 6:7). A nyun foluku ya be e kon moo ipi.

⁴ Bakaten den disipel fu Yesesi bigin peleiki gi den Samaliyasama. A omen fu den dopu di den teke a biibi, ma den á be kisi a santa yeye ete. Den apostel anga den owluman di be e tii a wooko, be sende Peitilisi anga Yohanisi go a den sama ya di be toon Kelesten. Den tu apostel ya poti ana a den tapu, „neen santa yeye kon a den  tapu” (Toli 8:5, 6, 14-17). A so den Samaliyasama toon salufu Kelesten. Denseefi be toon wan pisi fu a nyun Islayeli.

⁵ Aini a yali 36, Gadu be koboloiki Peitilisi fu kai wan taa guupu sama kon aini a nyun Islayeli fu Gadu. A sani ya be pasa di a be peleiki gi Koneiliyesi, wan fu den suudati edeman fu Rome. A be peleiki gi a osufamii anga den mati fu Koneiliyesi tu (Toli 10:22, 24, 34, 35). Beibel e taki santa yeye kon na ala den taakondee sama tapu di be e aliki Peitilisi di a be e taki. „Den sama di be kon anga Peitilisi be besnei. Den be e foondoo fu di a santa yeye di Gadu e gi sama fu soso be kon a taa nasi sama tapu” (Toli 10:44, 45). Fanafu a ten de, taa nasi sama di á be besnei be abi a okasi fu toon wan pisi fu a nyun Islayeli fu Gadu.

6, 7. San den sama di Yehofa be teke fu tyai a nen fi en be e du?

⁶ Di den baala di be e tii a wooko be kon a makandii aini a yali 49, neen a disipel Yakowbesi taki: „Simeyon [Peitilisi] taigi u finifini fa Gadu bigin teke taa nasi sama, fu toon wan foluku di e tyai a nen fi en” (Toli 15:14). A nyun „foluku di e tyai a nen fi en” na Dyu anga sama di á de Dyu. Ala den fiya na Kelesten di Gadu teke fu toon a foluku fi en (Romesama 11:25, 26a). Bakaten neen Peitilisi sikiifi taki: „Fosi, wi á be de Gadu foluku, ma now u toon Gadu foluku.” Peitilisi be yeepi den fu fusutan saide Gadu be sete wan nyun foluku. A taigi den taki: „A wi a den sama di Gadu teke fu toon pilisite di o tii enke kownu. U na wan santa foluku, wan foluku di de enke wan apaiti gudu, fu u sa gafa den bun fasi fu a sama di puu wi aini dunguu poti na a kiin” (1 Peitilisi 2:9, 10). Den á be mu feele fu peleiki a bosikopu fu Yehofa, anga fu gafa en enke a sama di abi a leti fu tii hemel anga goontapu.

⁷ Fanafu a ten de, anga a nyun Islayeli Yehofa be e wooko, neen meke a be e kai den „a foluku di miseefi meke fu gafa mi” (Yesaya 43:21). Den á be e feele te den be e taigi sama taki ala den taa gadu a falisiwan, ma a Yehofa wawan na a tuu Gadu (1 Tesalonikasama 1:9). Den ben de kotoigi gi Yehofa anga Yesesi ’aini Yelusalem, Yuda, Samaliya anga a den moo faawe uku fu goontapu.’​—Toli 1:8; Kolosesama 1:23.

8. Fa Pawlesi be wasikoi a foluku fu Gadu aini a ten fu den apostel?

⁸ Pawlesi be de wan kotoigi di á be e feele. Winsi a be e taki anga koniman di be e dini falisi Gadu, a be e soi den taki a Yehofa wawan na a tuu Gadu. A be e yeepi sama fu fusutan taki a Yehofa „meki goontapu anga ala den sani di de neen tapu.” Pawlesi be e soi den tu taki a Yehofa „na a Gadu fu hemel anga goontapu” (Toli 17:18, 23-25). Pawlesi be wasikoi a kemeente tu. A be taki: „Mi sabi taki di mi o gwe, ogii busidagu o kon a wi ini, da den o du ogii anga den sikapu. Sama o de a wi ini di e leli taawan falisi sani, soso fu meke den disipel waka a den baka” (Toli 20:29, 30). Fosi den apostel dede, sama be kon anga falisi leli kaba aini den kemeente.​—1 Yohanisi 2:18, 19.

9. San pasa anga a foluku fu Gadu baka di den apostel dede?

⁹ Baka di den apostel dede, neen falisi leli be kon moo ipi aini den kemeente. Den sama di be komoto a  biibi be bigin opo den eigi keliki. A so den falisi Kelesten keliki bigin. A peesi fu den toon wan foluku di e tyai a nen fu Gadu, den falisi Kelesten ya puu a nen fu Gadu aini omen fu den Beibel fu den. Den poli a nen fu Gadu a omen sowtu fasi tu. Den bigin du sani enke fa den sama di e dini falisi gadu e du. Den bigin leli sama sani di á sikiifi aini Beibel. Te den be e go feti anga taa foluku, da den be e taki a gi Gadu den be e feti den feti ya. Den falisi keliki ya e bidiigi sama, den e libi wan hulu libi tu. Aini den somen ondoo yali baka di falisi keliki opo, a wantu sama namo be de di be tan dini Yehofa. Ma aini den yali de Yehofa á be abi wan olikanisâsi moo a goontapu di be de enke „wan foluku di e tyai a nen fi en.”

10, 11. (a) San Yesesi be taki fu „a alisi” anga „a takuu paansu”? (b) Fa a toli ya pasa baka 1914 enke fa Yesesi be taki?

¹⁰ Aini a toli fu a alisi anga a takuu uwii, Yesesi be meke sama fusutan taki a be o taanga fu si sowtu biibi na a bun wan. A be taki „a ten di den sama be e siibi”, Didibii go paandi takuu paansu aini a alisi goon fu a Manpikin fu libisama. A alisi anga a takuu uwii be o goo makandii te go miti „a kaba fu a goontapu.” A be tyai kon a kiin taki „a alisi” a „den manpikin fu a Kownukondee.” „A takuu paansu” a „den manpikin fu a ogiiwan”. Na a ten fu a kaba da a manpikin fu libisama be o sende engel fu puu den takuu uwii a den alisi ini. Baka dati den engel be o tyai den manpikin fu a Kownukondee kon a makandii (Mateyesi 13:24-30, 36-43). Fa a sani ya pasa? Fa a sani ya be meke Yehofa abi wan olikanisâsi a goontapu baka di e du sani enke fa a wani?

¹¹ A ten fu a kaba be bigin aini a yali 1914. A ten de a wan sani fu 5000 salufu Kelesten be de a goontapu. A ten di a oloku bigin aini 1914, den salufu „manpikin fu a Kownukondee” be de a katibo ete aini a Gaan Babilon. Ma Yehofa fii den aini 1919. Fanafu a ten de sama bigin si moo kiin sowtu biibi a falisiwan anga sowtuwan na a bun wan. Yehofa tyai den „manpikin fu a Kownukondee” kon a makandii aini wan olikanisâsi, leti enke fa a polofeiti Yesaya be taki a fesi. A be taki: „Wan kondee poi meke aini wan dei? Wan foluku sa kon a goontapu wanboo wanboo so? Tokuso a fa bee nyan Siyon, a so a meke den manpikin fi en wanten” (Yesaya 66:8). Aini a tekisi ya Siyon na ala den engel fu Yehofa. Siyon „meke den manpikin fi en” di salufu Kelesten bigin de a goontapu ya.

12. Fa den salufu Kelesten de enke wan foluku di e tyai a nen fu Yehofa?

 ¹² Leti enke fa den Kelesten aini a ten fu den apostel a be kotoigi fu Yehofa, a so den salufu „manpikin fu a Kownukondee” aini a ten ya a kotoigi fu Yehofa tu. (Leisi Yesaya 43:1, 10, 11.) Den anga den taa keliki a ná a wan, bika den e tyai denseefi enke tuutuu Kelesten. Den e peleiki a bun nyunsu fu a Kownukondee a „hii goontapu” tu (Mateyesi 24:14; Filipisama 2:15). A so den yeepi miliyun miliyun sama fu kon koosube a Yehofa.​—Leisi Daniyeli 12:3.

13, 14. San den Kelesten di á salufu mu du fu Yehofa fende den bun? Fa Beibel be taki a sani ya a fesi?

¹³ Aini a artikel di pasa, u be leli taki Yehofa be e fende en bun taki taakondee sama be sa dini en, solanga den be e du dati makandaa anga den Islayelisama di be de a foluku fi en (1 Kownu 8:41-43). Aini a ten ya, den sama di á de salufu Kelesten mu dini Yehofa makandaa anga den salufu Kelesten tu.

¹⁴ Langa ten a fesi Yehofa be meke polofeiti sikiifi taki taa sama ben o dini en makandaa anga a foluku fi en na a ten fu a kaba. Yesaya be taki: „A omen foluku o go ape da den o taki: Kon meke u go na a mongo fu Yehofa, na a osu fu a Gadu fu Yakopu. A o leli u san a den pasi fi en. Da wi o waka a den pasi fi en. Bika a weiti o komoto a Siyon, Yehofa o taki komoto a Yelusalem” (Yesaya 2:2, 3). Sakaliya be taki a fesi taki „a omen foluku anga kondee di abi gaan makiti o kon a Yelusalem fu suku Yehofa di e tii den fetiman fi en. Den o kon fu begi Yehofa fu en ati á boon a den moo.” Den sama ya be o komoto aini „ala sowtu nasi di e taki ala sowtu tongo.” Den be o dini Gadu makandaa anga a nyun Islayeli. Den be o taigi den sama fu a nyun Islayeli taki: „Wi wani go anga u, bika u yee taki Gadu de anga u.”​—Sakaliya 8:20-23.

15. Fa den „taa sikapu” e „go anga” den sama fu a nyun Islayeli?

¹⁵ Den „taa sikapu” e „go anga” den sama fu a nyun Islayeli te den e peleiki a bun nyunsu fu a Kownukondee (Malikisi 13:10). Den e toon wan pisi fu a foluku fu Gadu. Den anga den salufuwan a „wan ipi” di „a bun sikapuman” e tii. A bun sikapuman a Kelestesi Yesesi.​—Leisi Yohanisi 10:14-16.

16. San Yehofa o du fu meke Armagedon bigin?

¹⁶ Baka te den o poli a Gaan Babilon, da na ala se sama o boto a foluku fu Gadu fu feti anga den. A Yehofa namo sa yeepi u fu tan a libi. Na a ten de, Yehofa o meke sani waka a so wan fasi taki sama o kon fu feti anga a  foluku fi en. Ma te sama o kon fu feti anga den, da a lasiti pisi fu a „gaan banowtu” di den e kai Armagedon o bigin (Mateyesi 24:21; Eseikiyeli 38:2-4). Gok o go feti anga a ’foluku di Yehofa puu a den taakondee sama ini’ (Eseikiyeli 38:10-12). Te a sani ya o pasa, da Yehofa o dyombo teke peesi gi a foluku fi en fu fii den. A so a o feti anga Gok anga den bakaman fi en. Yehofa o soi taki neen na a sama di abi a makiti fu tii hemel anga goontapu. A o santa en nen tu. Yehofa e taki: „Mi o meke omen foluku sabi sama a mi. Mi o meke den sabi taki a mi a Yehofa.”​—Eseikiyeli 38:18-23.

17, 18. (a) San Yehofa o taigi den diniman fi en te Gok o go feti anga den? (b) San u mu du efu u wani Yehofa kibii wi?

¹⁷ Te Gok o bigin fu feti anga den diniman fu Yehofa, da Yehofa o taigi den diniman fi en taki: „Mi foluku, u go aini u kambaa, da u tapu u doo. U go kibii fu wan pisi ten, te enke mi ati á boon moo” (Yesaya 26:20). A pisi ten de Yehofa o soi u san u mu du fu u sa fende kibii. A kan taki den „kambaa” abi fu du anga den kemeente pe u de.

¹⁸ Efu u wani Yehofa kibii wi na a ten fu a gaan banowtu, da u mu fusutan taki a abi wan foluku a goontapu aini a ten ya. U mu fusutan tu taki a paati a foluku ya aini omen kemeente. U mu teke a se fu a foluku fi en. U mu tan wooko makandii anga a kemeente pe u de. Leti enke a psalm sikiifiman, u mu taki anga u hii ati taki: „A Yehofa e fii sama. A yu e belesi a foluku fi i.”​—Psalm 3:8.