1, 2. (a) San den fesiman fu a Dyu biibi be wani sabi? San Peitilisi piki den? (Luku a fowtow na a bigin.) (b) San be yeepi Peitilisi fu a á feele?

WANTU wiki baka di Yesesi dede, neen a apostel Peitilisi be taampu a wan guupu man fesi di be wani du ogii anga en. Den man ya a denseefi fesiman fu a Dyu biibi di be meke mofu fu kii Yesesi. Den ati be e boon a Peitilisi fu di a be deesi wan man di á be poi waka. Den akisi Peitilisi taki: „Pe i fende a kaakiti deesi a man ya? Aini sama nen i du a sani ya?” Peitilisi á be e feele. A piki den taki: „A man di taampu a u fesi ya kon betee aini a nen fu Yesesi Kelestesi fu Nasaret. Neen u be sipikii a wan ponsu, ma Gadu weki en puu a dede.”​—Toli 4:5-10.

² Fosi a sani ya be pasa, ná pikin feele Peitilisi be e feele. Dii leisi a be sitee taki a á sabi Yesesi (Malikisi 14:66-72). Ma a leisi ya a á be e feele di a taampu a den man ya fesi. Saide? A fu di Peitilisi be sabi taki Yesesi de a libi. Boiti dati, a santa yeye be e yeepi en tu. Saide a be e biibi taki Yesesi de a libi? San o yeepi u fu biibi tu taki Yesesi de a libi?

3, 4. (a) Sama be kisi wan opobaka fosi den apostel fu Yesesi be meke? (b) Sama Yesesi be weki kon a libi baka?

³ Den apostel be sabi taki dedesama poi kon a libi baka.  Fosi den apostel be meke, Yehofa be gi a polofeiti Eliya anga Elisa a kaakiti fu weki sama kon a libi baka (1 Kownu 17:17-24; 2 Kownu 4:32-37). Wan man di be dede kaba kon a libi di a dedesikin fi en be tuka anga den dedebon fu Elisa (2 Kownu 13:20, 21). Den Kelesten aini a ten fu den apostel be e biibi taki den toli ya be pasa tuutuu, leti enke fa wiseefi e biibi taki a Beibel na a Wowtu fu Gadu.

⁴ Te wi e leisi den toli pe Yesesi be weki dedesama kon a libi baka, da a sani de e meke u fii bun. Pakisei fa a uman be e piisii di Yesesi weki a wan kodo manpikin fi en kon a libi baka (Lukasi 7:11-15). Efuso pakisei a weki di Yesesi be weki wan pikin meisyo kon a libi baka. A tyali di en mma anga dda be e tyali kengi toon piisii, di den si taki a umanpikin fu den be kon a libi baka! (Lukasi 8:49-56) Pakisei fa den sama be piisii tu di den si Lasalesi komoto libilibi aini a geebi!​—Yohanisi 11:38-44.

5. Saide a opobaka fu Yesesi be kengi anga den taa opobaka?

⁵ Den apostel be sabi taki a opobaka fu Yesesi be kengi anga den taa opobaka. Den sama di be weki kon a libi baka be dede bakaten. Ma Yesesi be kon a libi baka enke wan yeye di á poi dede. (Leisi Toli 13:34.) Peitilisi be sikiifi taki „den kii en di a be de wan libisama, ma a kon a libi baka enke wan yeye.” A be sikiifi tu taki „A de a Gadu leti-ana, bika a go a hemel. Gadu meke den engel anga den wan di abi makiti, saka denseefi neen ondoo” (1 Peitilisi 3:18-22). A weki di sama be weki kon a libi baka a be wan gaan foondoo sani, ma a opobaka fu Yesesi bigi moo ala.

6. Fa a opobaka fu Yesesi be gi den disipel taanga-sikin?

⁶ A opobaka fu Yesesi be gi den disipel fi en taanga-sikin, bika a á be dede moo enke fa den feyanti fi en be e pakisei. Ma a be de a libi enke wan yeye di abi makiti. Nawan libisama á be poi du ogii anga en tu. A opobaka fu Yesesi be soi kiin taki en na a Manpikin fu Gadu. Fu di den disipel fu Yesesi be sabi taki a be de a libi, meke den á be e feele moo. Den á be e tyali moo tu. A sani ya be gi den taanga-sikin fu go doo. Efu Yesesi á be kon a  libi baka, da den sani di Gadu abi a pakisei á be o kon tuu. A bun nyunsu di den disipel be e paati be o de fu soso tu.

7. San Yesesi e du aini a ten ya? Sowtu sani u mu akisi useefi?

⁷ Yesesi á be de wan popileli efuso wan koni man namo. Ma u sabi taki a de a libi nownow. Neen na a sama di e tii a peleikiwooko. Ai tii enke Kownu fu a Kownukondee fu Gadu di o puu ala den ogii a pasi di e miti wi. Na a Kownukondee ya o meke a goontapu toon wan paladeisi pe sama o libi fu tego (Lukasi 23:43). Nawan fu den sani ya be o man pasa efu Yesesi á be kon a libi baka. San meke u sa biibi taki Yesesi kon a libi baka? San a opobaka fu Yesesi wani taki gi wi?

8, 9. (a) San meke den keliki fesiman be wani poti wakitiman na a geebi fu Yesesi? (b) San pasa di den uman doo na a geebi?

⁸ Baka di den be kii Yesesi, den keliki fesiman fu a Dyu biibi go a Pilatesi, neen den taigi en taki: „Lesipeki Masaa! U membee wan sani di a bidiigiman be taki fosi a dede. A be taki: ’Baka dii dei, mi o kon a libi baka.’ Neen meke u kon begi i, fu poti sama holi wakiti na a geebi dii dei langa, fu den bakaman fi en á go fufuu en da den lei taki: ’A opobaka!’ Bika efu wi á du so, da a koli ya o ogii moo fa den be koli sama a fesi kaba.” Neen Pilatesi taigi den taki: „U poti wakitiman, da u tapu a geebi enke fa u poi.” A leti so den du.​—Mateyesi 27:62-66.

⁹ Den be beli Yesesi aini wan geebi di be meke aini wan siton olo. Den be tapu a mofu fu a geebi anga wan gaan siton. Den keliki fesiman be wani Yesesi tan ape fu alaten. Ma a ná dati Yehofa be abi a pakisei. Dii dei baka di Yesesi dede, neen Maliya Makidaleina anga a taa Maliya go na a geebi. Den si taki a siton be lolo komoto na a mofu fu a geebi. Wan engel be sidon na a siton tapu. A engel taigi den uman fu luku go aini a geebi fu denseefi si taki a leigi. A taigi den taki: „A á de ya, bika a kon a libi baka” (Mateyesi 28:1-6). A tuu, Yesesi be de a libi!

10. Fa Pawlesi tyai kon a kiin taki Yesesi be kon a libi baka tuutuu?

¹⁰ Den sani di be pasa 40 dei baka di Yesesi dede, be e soi kiinkiin taki a weki kon a libi baka. Pawlesi be sikiifi den Korentesama taki: „Bika wan fu den fosi sani di mi taigi u, a san miseefi kon sabi. A sani de, a taki Kelestesi dede fu pai gi den sondu fu u, enke fa a sikiifi aini Gadu buku. Den beli en, ma baka dii dei neen Masaa Gadu weki en puu a dede enke fa a sikiifi aini Gadu buku. A meke Seifas si en. Baka dati a meke ala den twalufu bakaman fi en si en. Bakaten a meke moo enke 500 biibiman di be de makandii si en tu. Somen fu den dede kaba, ma son wan fu den de a libi ete. Baka dati a meke Yakowbesi si en,  neen a meke ala den apostel si en tu. Te fu kaba miseefi si en enke mi a wan pikin di meke fosi en yuu doo.”​—1 Korentesama 15:3-8.

11. Fa a opobaka fu Yesesi be pasa leti „enke fa a sikiifi aini Gadu buku”?

¹¹ Yesesi be kon a libi baka leti „enke fa a sikiifi aini Gadu buku.” Beibel be taki a fesi fu a opobaka ya. Bika David be sikiifi taki den ná o fika „a sama di tan dini” Gadu aini geebi. (Leisi Psalm 16:10.) Na a Pinksterfesa di be holi aini a yali 33 da na ape Peitilisi be soi kiin taki a Yesesi na a „sama di tan dini” Gadu. „[David] be taki a fesi fu a opobaka fu Kelestesi taki, en sikin á be o poli, den á be o fika en aini geebi tu.”​—Toli 2:23-27, 31.

12. Sama a den sama di be si Yesesi di a be kon a libi baka?

¹² A omen sama si Yesesi baka di a kisi wan opobaka. Fotenti dei baka di Yesesi be kon a libi, neen Yesesi be meke den disipel fi en si en. Den be si en koosube na a geebi fi en, den be si en tu di den be de a pasi e go a Emayesi foto. Den be si en a taa peesi tu (Lukasi 24:13-15). A be taki anga son wan fu den. Wan fu den sama ya a be Peitilisi. Son leisi a be e taki anga wan hii guupu sama. Wan leisi Yesesi be meke moo enke 500 sama si en wan pasi Neen meke wi e biibi taki Yesesi kon a libi baka fu di somen sama be si en.

13. Fa a peleiki di den disipel be e peleiki e soi taki den be e biibi taki Yesesi be kon a libi baka?

¹³ Den bakaman fu Yesesi be e paati a bosikopu taki a kon a libi baka. Fu di den bakaman fu Yesesi be e peleiki taki Kelestesi kon a libi baka, meki sama be e du ogii anga den, den be e pina den, den be e kii den tu. Denki luku: I denki taki Peitilisi be o taigi den Keliki fesiman taki Yesesi kon a libi baka aladi a be sabi taki a den be kii en? I denki a be o taki fu a sani ya aladi a sabi taki den be sa kii en tu? Peitilisi anga den taa disipel be sabi taki Yesesi be de a libi. Den be sabi taki neen e tii a peleikiwooko. A kon di Yesesi be kon a libi baka be gi den bakaman fi en a fitoow taki denseefi o kon a libi baka tu. Neen meke Sitefanesi dede anga a howpu taki a o kon a libi baka.​—Toli 7:55-60.

14. Saide meke yu e biibi taki Yesesi de a libi?

¹⁴ A omen buweisi e soi taki Yesesi e tii enke Kownu. Buweisi de di e soi tu taki neen na a edeman fu a Kelesten kemeente. Moo anga moo sama e kon aini a tuu Kelesten biibi. A sani ya be o pasa efu Yesesi á be kon a libi? Kande noiti u be o yee fu Yesesi efu a á be kon a libi. Ma buweisi de di e soi kiin taki Yesesi de a libi. Neen na a sama di e tii a peleikiwooko.

15. Saide a kon di Yesesi kon a libi baka e gi wi taanga-sikin fu peleiki?

¹⁵ A kon di Yesesi kon a libi baka e gi wi taanga-sikin fu peleiki. So wan 2000 yali kaba den feyanti fu Gadu e du ala sowtu ogii fu tapu a peleikiwooko. Son sama di komoto a waaleiti e leli taawan falisi sani. Gaanlanti tapu a peleikiwooko fu u aini son kondee. Sama e wisiwasi den diniman fu Gadu, den e du ogii anga den, e pina den efuso e kii son wan fu den. Ma tokuso  Beibel be taki a fesi taki „winsi sowtu sani sama meke fu feti anga yu, a ná o abi wini” (Yesaya 54:17). U nái feele den sama di Saatan e koboloiki fu du ogii anga u. Bika Yesesi e yeepi wi enke fa a be paamisi u (Mateyesi 28:20). A á de fu u feele. Bika noiti den feyanti o man tapu a wooko fu wi, winsi san den e du.

16, 17. (a) Fa a kon di Yesesi kon a libi baka e soi taki a tuu sani a be e leli sama? (b) Sowtu makiti Yehofa gi Yesesi enke fa Yohanisi 11:25 e soi?

¹⁶ A kon di Yesesi kon a libi baka e soi taki a be e leli sama sani di tuu. Wan sabiman fu Beibel sikiifi taki efu Yesesi á be kon a libi baka, da den Kelesten a don sama, fu di den e biibi wan gaan lei. Pawlesi be sikiifi taki efu a de so taki Yesesi á be kon a libi baka, a biibi anga a peleikiwooko fu Kelesten be o de fu soso. Den Beibel buku Mateyesi, Malikisi, Lukasi anga Yohanisi be o de anainsi-toli di e taki fu wan koniman di be e libi bun, ma di dede fu di den feyanti fi en be kii en. Ma Yesesi be kon a libi baka. A sani ya e soi kiin taki a soso tuu sani Yesesi be e leli sama.​—Leisi 1 Korentesama 15:14, 15, 20.

¹⁷ Yesesi be taki: „A mi na a opobaka anga a libi. A sama di e biibi mi o kon a libi baka, winsi a dede” (Yohanisi 11:25). A ná abi misi, a sani di Yesesi taki ya o kon tuu. Yehofa gi Yesesi a makiti fu meke den sama di o tii makandii anga en aini hemel anga den sama di o libi a goontapu ya kon  a libi baka. A dede di Yesesi dede gi wi anga a opobaka fi en e soi kiin taki dede ná o de moo. A sani ya e gi u taanga-sikin fu holidoo, winsi tesi e miti u di sa meke u dede seefi!

18. Sowtu biibi a opobaka fu Yesesi e gi wi?

¹⁸ A opobaka fu Yesesi e gi wi a biibi taki Gadu o kuutuu den sama a goontapu a wan leti fasi. Pawlesi be taigi wan guupu man anga uman aini Ateine taki Gadu „o gi wan man a wooko fu kuutu ala sama a goontapu a wan leti fasi. Ala sama sa biibi a sani ya, bika a meke a man ya kon a libi baka” (Toli 17:31). Gadu poti Yesesi enke kuutuuman fu libisama, neen meke u sa abi a biibi taki Yesesi o kuutuu sani a wan leti fasi, ma a o du en anga lobi tu.​—Leisi Yesaya 11:2-4.

19. San wi o du fu di wi e biibi taki Yesesi kon a libi baka?

¹⁹ Wi wani du san Gadu wani fu di wi e biibi taki Yesesi kon a libi baka. Efu Yesesi á be dede, efu a á be kon a libi baka, da sondu anga dede á be o kon a wan kaba noiti (Romesama 5:12; 6:23). Wi á be o abi nawan howpu. Kande u be o pakisei taki a libi a fu „nyan diingi, bika tamaa wi o dede” (1 Korentesama 15:32). Ma wi a ná sama di e poti pakisei namo a den piisii fu a libi. Wi a sama di e si en fu wan gaan sani taki wi abi wan howpu fu kon a libi baka. Neen meke ala yuu u de kabakaba fu aliki Yehofa.

20. Fa a opobaka fu Yesesi e soi kiin taki Yehofa a wan Gadu di abi makiti?

²⁰ A opobaka fu Yesesi e soi kiin taki Yehofa a wan Gadu di abi makiti. Ai soi u tu taki „ai pai den sama di e suku en anga den hii ati” (Hebrewsama 11:6). Nownow Yesesi de a libi aini hemel enke wan yeye di noiti o dede. A sani ya e soi kiin taki Yehofa abi tyaipi makiti anga koni. Gadu soi tu taki a man meke den sani di a paamisi kon tuu. Yehofa be paamisi taki wan „pikin” be o kon di be o du sani fu soi sama abi a leti fu tii hemel anga goontapu. Fu meke a sani ya kon tuu, da Yesesi be mu dede fosi, da a kon a libi baka.​—Genesesi 3:15.

21. San a opobaka howpu wani taki gi i?

²¹ Ai bigi gi u taki Yehofa o meke dedesama kon a libi baka. A Beibel e paamisi taki: „Luku, a tenti fu Gadu kon de a pe libisama de. Gadu o tan a den mindii. Den o de a foluku fi en, da a o de a Gadu fu den. A o dee den wataa ain fu den. Da dede, tyali, kee anga pen ná o de moo. Bika den fositen sani pasa gwe kaa.” Den be taigi a apostel Yohanisi a moi sani ya. A sama di be taigi en den sani ya taigi en tu taki: „Sikiifi den sani ya, bika den sani ya, a ná lei. I sa fitoow den.” Sama be tyai den sani ya kon a kiin gi a apostel Yohanisi? A Yesesi Kelestesi di be kon a libi baka!​—Openbaring 1:1; 21:3-5.