1, 2. (a) San Yehofa wani den diniman fi en du? (b) Sowtu akisi wi o luku aini a artikel ya?

GADU be meke a apostel Peitilisi taki san sikiifi aini Lefitikesi. A be taki, Kelesten mu santa leti enke fa den Islayelisama be mu santa. (Leisi 1 Peitilisi 1:14-16.) Yehofa „A Santawan”, wani fu den salufu Kelesten anga den „taa sikapu” meke moiti fu libi a wan santafasi.​—Yohanisi 10:16.

² Aini a artikel ya, wi o taki fu wantu moi toli di de aini a Beibel buku Lefitikesi. Den toli ya o yeepi u fu libi a wan santa fasi. Wi o fende a piki tu fu den akisi di e kon now: Fa u mu si a poti di sama e poti den weiti fu Yehofa a wan se? Fa a buku Lefitikesi e yeepi u fu holibaka gi Yehofa di abi a leti fu tii? San u sa leli fu den ofaandi di den Islayelisama be e tyai gi Yehofa?

3, 4. (a) Saide Kelesten á mu taangayesi den weiti fu Yehofa? (b) Saide wi á mu pai ogii fu ogii efuso holi sama na ati?

³ Efu u wani Yehofa fende u bun, da u mu aliki den weiti fi en. Noiti u mu si den enke sani di á santa efuso taangayesi den. Aini a ten ya, u ná abi fu wooko anga a Weiti fu Mosesi moo, ma a Weiti de e yeepi u fu fusutan san  Yehofa lobi anga san a á lobi. Yehofa be taigi den Islayelisama taki: „Wi á mu pai ogii fu ogii. Wi á mu holi den kondeeman fu u na ati tu. U mu lobi taa sama enke fa u lobi useefi. A mi a Yehofa.”​—Lefitikesi 19:18.

⁴ Yehofa á wani u pai ogii fu ogii efuso holi sama na ati (Romesama 12:19). Efu u be o poti den weiti fu Yehofa a wan se, da Saatan be o piisii. U be o poli Gadu nen tu. Winsi wan sama du wan hati sani anga wi, wi ati á mu boon tee da wi e holi a sama na ati. Beibel taki libisama de enke „doti patu” di de anga gudu aini. A gudu ya na a peleikiwooko (2 Korentesama 4:1, 7). Efu u be o holi sama na ati, da a sani ya be o poli a gudu di wi abi.

5. San wi e leli fu a toli fu Aron di den manpikin fi en dede? (Luku a fowtow na a bigin.)

⁵ Lefitikesi 10:1-11 e soi taki wan sani be miti Aron di be hibi gi en anga en osufamii. Yehofa be meke faya komoto a tapu boon Nadab anga Abihu, 2 fu den manpikin fu Aron. Neen Gadu taigi Aron anga en osufamii taki den á be mu tyali. A sani ya be musu hibi gi den! Yu e tyai iseefi a wan santa fasi fu di i nái mosoo anga famiiman efuso taa sama di den puu aini a kemeente?​—Leisi 1 Korentesama 5:11.

6, 7. (a) San u mu holi a pakisei te famiiman di á de a biibi akisi u fu yeepi den na a toow fu den di o holi aini wan keliki? (Luku san sikiifi na a maiki a ondoose.) (b) Fa u sa yeepi famiiman di á de a biibi fu fusutan taki u ná o poi yeepi a wan toow di e holi aini wan keliki?

⁶ A kan taki a sani di be miti Aron anga en osufamii ná o miti u. Ma kon u taki wan famii fu u o toow aini wan keliki, neen a kai u. Weiti á de aini Beibel di e taki wi á mu go, ma toli de aini Beibel di o yeepi u fu sabi san fu du. *​—Luku san sikiifi a ondoose.

⁷ Kande u famii ná o fusutan fu saide u wani libi enke fa Yehofa wani efuso fu saide u wani de sama di santa (1 Peitilisi 4:3, 4). Wi á wani den atiboon. U mu taigi den kiin fa wi e pakisei fu son sani. Ma u mu du en a wan lesipeki fasi. Efu a kan, da u mu taki anga den a fesi fosi a toow. U sa gi den daa taki den pakisei u. Baka dati u sa taigi den taki u wani den piisii na a toowdei fu den. Wi á wani den anga den sama di o kon na a toow fii  wan fasi, fu di wi ná o teke paati a sani di abi fu du anga keliki leli. A so wi e meke moiti fu wi á du sani di sa poli a biibi fu u.

8. Fa a buku Lefitikesi e yeepi u fu fusutan taki a Yehofa na a sama di abi a leti fu tii?

⁸ A buku Lefitikesi e yeepi u fu fusutan taki a Yehofa na a sama di abi a leti fu tii. Moo enke 30 leisi a sikiifi taki a Gadu gi sama den weiti di de aini Lefitikesi. Mosesi be sabi a sani ya. Neen meke a du ala san Yehofa be taigi en (Lefitikesi 8:4, 5). Leti enke Mosesi, useefi mu aliki Yehofa, a moo Hei Tiiman. A olikanisâsi fi en e yeepi u. Ma son leisi tesi e miti u te u wawan de, leti enke fa tesi be miti Yesesi di en wawan be de aini a sabana (Lukasi 4:1-13). Efu wi e holibaka gi Yehofa enke a moo Hei Tiiman fu di wi e fitoow taki a o yeepi u, da nawan sama o poi meke u daai baka gi a biibi. U ná o du sani di Yehofa á lobi fu di wi e feele sama.​—Odo 29:25.

9. Saide meke sama e buuse den diniman fu Gadu?

⁹ U sabi taki tesi o miti den diniman fu Gadu, bika Yesesi be taigi den bakaman fi en taki: „Sama o pina u te enke den kii u seefi. Sama o buuse u na ala kondee fu mi ede” (Mateyesi 24:9). Winsi fa sama e buuse wi, tokuso wi e tan peleiki. Wi e tan meke moiti fu de santa sama tu. Wi e saka useefi a Gaanlanti ondoo. Da saide meke son sama e buuse wi? (Romesama 13:1-7) A fu di wi e si Yehofa enke a sama di abi a leti fu tii hemel anga goontapu meke den e buuse wi. „Neen wawan” u wani aliki.​—Mateyesi 4:10.

10. San miti wan baala di be daai baka gi a biibi?

¹⁰ Wi „nái mumui anga a goontapu”, neen meke wi nái go aini oloku efuso politiki. (Leisi Yohanisi 15:18-21; Yesaya 2:4.) Son Kelesten daai baka gi a biibi. A be hati somen fu den taki den du a sani ya, neen den daai kon baka a Yehofa (Psalm 51:17). Ma wantu fu den á daai kon baka. Aini Du Fu Tu Goontapu feti den poti omen baala fu u di be e tan aini Hongaria a sitaafu-osu. Suudati be kisi 160 baala fu u di á be doo 45 yali ete poti aini wan foto. Den be taigi den taki den mu go a suudati. Gaanse fu den á be teke a suudati wooko, ma 9 fu den be piki taki den o toon suudati fu feti gi a kondee. Baka tu yali den be taigi wan fu den baala di be toon suudati fu kii den Kotoigi di á be wani go a suudati. Wan fu den Kotoigi di a be mu kii a be en eigi baala. Ma koloku taki den á be kii den Kotoigi moo di á be daai baka gi a biibi.

11, 12. San wi e leli fu a fasi fa den Islayelisama be e tyai ofaandi?

¹¹ A Weiti be e soi den Islayelisama kiinkiin sowtu ofaandi den be mu tyai (Lefitikesi 9:1-4, 15-21). Den meti di den be e tyai enke ofaandi á be mu  abi nawan mankei, bika den be e soi go na a ofaandi fu Yesesi di á be abi nawan sondu. Ala den ofaandi be mu tyai a wan taa fasi. Lefitikesi 12:6 e soi san wan nyunyun mekeman be mu du. Ape sikiifi taki: „Te den dei pasa, da a uman mu kon kiin baka di a be meke wan manpikin efu wan umanpikin. A mu go na a pilisite na a doomofu fu a komakandaa-tenti. A mu tyai wan yonkuu mansikapu di abi wan yali go enke boon-ofaandi. A mu tyai wan yonkuu doifi go enke sondu-ofaandi tu, efuso wan sitondoifi.” Aladi Yehofa be e soi den pilisisi fa den be mu tyai den ofaandi, tokuso a weiti be e soi kiin taki Yehofa lobi sama. A nái akisi den sani di den á poi du. Bika efu wan mma á be abi sikapu fu tyai enke ofaandi da Yehofa be e gi en a okasi fu tyai tu doifi efuso tu sitondoifi (Lefitikesi 12:8). Winsi fa so wan uman á be gudu tokuso Yehofa be lobi en leti enke fa a be lobi den taawan di be man tyai sikapu enke ofaandi. San a toli ya a leli u?

¹² A apostel Pawlesi be gi Kelesten taanga-sikin fu „gafa Gadu anga u buba mofu” (Hebrewsama 13:15). Wi e gafa Gadu anga u buba mofu te wi e taki anga taawan fu a nen fu Yehofa. Baala anga sisa di dofu e taki anga ana fu man gafa Yehofa. Taawan di siki, di á poi komoto a osu e peleiki gi sama di e kon luku den, den e sikiifi biifi efuso e telefon sama fu peleiki gi den. Son sama man du fuu gi Yehofa aini a peleikiwooko. Ma taawan á poi du fuu fu di den gaandi efuso den siki. Ma ala yuu u mu du ala san u man gi Yehofa.​—Romesama 12:1; 2 Timotiyesi 2:15.

13. Saide u mu sikiifi omen yuu u peleiki ala mun?

¹³ Fu di u lobi Yehofa meke ala yuu wi e wani gafa en anga u hii ati (Mateyesi 22:37, 38). Ma den baala e wani u sikiifi na a peleikiwooko lapotu omen yuu u wooko. Fa wi e pakisei fu a sani ya? U mu de kabakaba fu du en, bika na a fasi ya wi e aliki Yehofa (2 Peitilisi 1:7). Tokuso nawan sama á mu fii enke a mu de omen yuu aini a peleikiwooko fu man soi den baala taki a wooko tyaipi yuu. Efu wan peleikiman á poi wooko langa aini a peleikiwooko fu di a gaandi efuso a siki, da winsi a 15 miniti seefi a wooko, a sa sikiifi dati. Efu disi na ala san a poi, da Yehofa e piisii anga dati. Yehofa sabi taki den baala anga sisa fu u lobi en. A sabi taki den wani de en Kotoigi tu. Leti enke den pooti Islayelisama di be e gi Yehofa san den poi te den be e tyai ofaandi, a leti so den Kotoigi di á poi du tyaipi e gi Yehofa san den man. Den mu piisii anga san den man du. Te ala Kotoigi e sikiifi na a peleikiwooko lapotu fu den san den du aini a peleikiwooko, da a sani de e yeepi a olikanisâsi fu sabi san de fanowdu fu du a peleikiwooko moo bun. Neen meke u mu sikiifi ala mun omen yuu u peleiki.

14. Saide u mu ondoosuku luku fa wi e sutudeli?

¹⁴ U leli tyaipi sani aini a buku Lefitikesi. Kande i kon lobi a buku ya fu di i kon fusutan fu saide a de aini Beibel (2 Timotiyesi 3:16). Kande i wani meke moo moiti now fu tyai iseefi a wan santa fasi. A Yehofa na a sama di u mu dini. Neen meke a wani u dini en na a moo bun fasi fa u man. Kande yu o wani ondoosuku den taa buku fu a Beibel moo fini tu. (Leisi Odo 2:1-5.) Begi fu Yehofa yeepi i fi i ondoosuku iseefi luku fa yu e sutudeli. Akisi iseefi: ’A disi na a moo bun fasi fa mi man dini Yehofa? Mi e meke tv, video game, a meke di mi e meke piisii, efuso taa sani di mi lobi tapu mi fu go a fesi aini waaleiti?’ Efu a so a de, da go sidon pakisei dipi san Pawlesi be taki aini a buku Hebrewsama.

15, 16. Saide Pawlesi á be feele fu taigi den Hebrew Kelesten kiin fa sani de di a be sikiifi den?

¹⁵ Pawlesi á be feele fu taigi den Hebrew Kelesten kiin fa sani de di a be e sikiifi den. (Leisi Hebrewsama 5:7, 11-14.) A be taigi den taki: „U yesi kon lesi fu aliki.” Saide a be taki a sani ya? Leti enke Yehofa, a be lobi den Kelesten. Ma a be si taki a soso meliki den be wani diingi fu tan a libi. Dati wani taki den á be e meke moiti fu ondoosuku a wowtu fu Gadu moo fini. Ma efu u wani go a fesi aini waaleiti, da u mu meke moiti tu fu kon sabi den fini leli fu Beibel. Te wi o du so, da a leti enke wi e nyan „taanga nyanyan”.

¹⁶ Pe fu den Hebrew Kelesten be e  leli taawan, da a den be abi sama fanowdu fu leli den. Saide? Den á be wani nyan „taanga nyanyan.” Akisi iseefi: Fa mi e pakisei fu den moo fini leli fu Beibel? Mi e meke moiti fu fusutan den? Mi a wan sama di nái booko ede anga den fini leli fu Beibel efuso anga begi? Na a fasi fa mi e sutudeli á bun? Ná peleiki namo u mu peleiki gi sama, ma u mu leli den tu fu den sa toon disipel.​—Mateyesi 28:19, 20.

17, 18. (a) Saide meke u mu tan nyan „taanga nyanyan”? (b) Fa u mu pakisei fu a sopi di sama e diingi fosi den go a komakandaa?

¹⁷ Yehofa nái dwengi sama fu sutudeli Beibel. Ma winsi fa ai taanga gi u fu sutudeli Beibel, tokuso u mu tan meke moiti fu nyan „taanga nyanyan”. U mu tan du a sani ya winsi o langa u de a waaleiti. A de taanga fanowdu fu sutudeli efu u wani tan tyai useefi a wan santa fasi.

¹⁸ Efu u wani de santa sama, da u mu ondoosuku Beibel moo fini. Boiti dati, u mu du sani enke fa Gadu wani. Yehofa be kii Nadab anga Abihu fu di den be „boon sumee switi ofaandi gi en aladi a á be taigi den fu du a sani de.” Kande den be du a sani ya fu di den be diingi sopi (Lefitikesi 10:1, 2). Luku san Gadu be taigi Aron baka di a sani ya pasa. (Leisi Lefitikesi 10:8-11.) A sani ya wani taki wi á mu diingi nawan sani di abi sopi aini fosi u go a komakandaa? Wantu sani de di u mu holi a pakisei: U ná abi fu wooko anga a Weiti fu Mosesi moo (Romesama 10:4). Aini son kondee baala anga sisa lobi diingi pikinso sopi te den e nyan, winsi den o go a komakandaa baka dati. Na a Paskafesa den be koboloiki fo kan anga win. Di Yesesi be sete a Membeefesa, a meke den apostel diingi win di be wani taki a buulu fi en (Mateyesi 26:27). Beibel e kuutu sama di e diingi sopi pasa maiki efuso di e diingi duungu (1 Korentesama 6:10; 1 Timotiyesi 3:8). A omen Kelesten nái diingi sopi fosi den go du sani di abi fu du anga a dini fu Yehofa, bika a kosensi fu den e tapu den fu du so wan sani. Ma a ná aini ala kondee sani de aseefi fasi. San u mu holi a pakisei a taki ala Kelesten mu „man si kiin san santa anga san á santa”. A so den o meke Yehofa piisii fu di den o tyai denseefi a wan santa fasi.

19. (a) Fa u sa fende wini te wi e holi a osufamii anbegi efuso e sutudeli Beibel? (b) San i mu du fu tan tyai iseefi a wan santa fasi?

¹⁹ A omen sani u sa leli te wi o ondoosuku Beibel moo fini. Koboloiki den sani di e yeepi u fu ondoosuku Beibel moo fini fu fende wini te yu e holi a osufamii anbegi efuso e sutudeli Beibel. Leli sabi Yehofa moo bun, ma soseefi den sani di a abi a pakisei fu du. Meke moiti fu kon moo koosube neen (Yakowbesi 4:8). Begi Gadu leti enke a Psalm sikiifiman di be begi taki: „Opo mi ain fu mi sa si den moi sani fu a weiti fi i moo kiin” (Psalm 119:18). Noiti i mu poti den Weiti fu Yehofa a wan se. Neen na „a Santawan” di u mu aliki. Du ala san i man fu du „a santa wooko fu a bun nyunsu fu Gadu” (1 Peitilisi 1:15; Romesama 15:16). Meke moiti fu tan tyai iseefi a wan santa fasi aini den lasiti dei ya di taanga. Meke u du ala san u man fu de santa sama, ma soseefi fu holibaka gi Yehofa enke a sama di abi a leti fu tii.