1. Fa u sa fende wini fu a Beibel buku Lefitikesi?

YEHOFA wani ala den diniman fi en santa. A hii Beibel e taki fu santa fasi, ma a buku di e taki moo ipi fi en na Lefitikesi. Te wi o fusutan san sikiifi aini a buku ya, da wi o sabi san u mu du fu toon sama di santa.

2. San a den sani di sikiifi aini a Beibel buku Lefitikesi?

² A Beibel buku Lefitikesi di Mosesi sikiifi a wan pisi fu „ala den sani di de aini a buku” fu Gadu. Den sani ya „bun fu gi sama leli” (2 Timotiyesi 3:16). U sa fende a nen fu Yehofa so wan tin leisi aini ibiiwan fu den kapitel fu Lefitikesi. Efu u fusutan a buku Lefitikesi da a o yeepi u fu wi á go du sani di o poli a nen fu Yehofa (Lefitikesi 22:32). Den wowtu „a mi a Yehofa” sikiifi omen leisi aini Lefitikesi. Den wowtu ya e membee wi taki a Yehofa na a sama di u mu aliki. Aini a artikel ya anga a wan di e kon, wi o go luku pelensipali sani di u sa leli aini a buku Lefitikesi. Den sani ya o yeepi u fu de santa sama te wi e dini Gadu.

3, 4. San a wasi di Aron anga den manpikin fi en be mu wasi wani taki? (Luku a fowtow na a bigin.)

³ Leisi Lefitikesi 8:5, 6. Yehofa be poti Aron a wooko enke hei pilisite gi a foluku, ma den manpikin fi en be e  wooko enke pilisite tu. A wooko di Aron be e du be e soi go na a wooko di Yesesi be o du. A wooko di den manpikin fu Aron be e du be e soi go na a wooko di den salufu Kelesten be o du. San a wasi di Aron be mu wasi wani taki? Yesesi be mu wasi fu kon kiin tu? Nono, bika Yesesi á be abi sondu. A á be „abi nawan fowtu” tu (Hebrewsama 7:26; 9:14). A baka te Aron be wasi fosi, a be e teke peesi gi Yesesi fu di Yesesi a wan sama di kiin. Ai du sani a wan leti fasi tu. Ma san a wasi di den manpikin fu Aron be e wasi wani taki?

⁴ A wasi di den manpikin fu Aron be mu wasi e soi taki den sama di Gadu teke fu de enke pilisite aini hemel be mu kiin. A dopu fu den sama ya abi fu du anga a kiin di den manpikin fu Aron be mu kiin denseefi? Nono, bika dopu nái wasi sondu puu. Ma te wan sama dopu da ai soi taki a paamisi Gadu taki a o dini en. Na „a wowtu fu Gadu” e meke den salufuwan kon kiin. Neen meke den e du sani enke fa Yesesi be e leli sama (Efeisesama 5:25-27). A so den e toon sama di kiin anga sama di santa. Ma fa fu den „taa sikapu”?​—Yohanisi 10:16.

5. San meke u sa taki na a Wowtu fu Gadu e meke den taa sikapu kon kiin?

⁵ A ná den manpikin fu Aron be e teke peesi gi a „gaan kulu sama” efuso den taa sikapu fu Yesesi (Openbaring 7:9). Tokuso a Wowtu fu Gadu e meke den taa sikapu seefi kon kiin. Ai meke den kon santa tu. Te den sama di abi a howpu fu tan a goontapu e biibi aini a ofaandi fu Yesesi, dan a sani de o gi den taanga-sikin fu dini Yehofa „dei anga neti” (Openbaring 7:13-15).  A kiin di den salufuwan anga den taa sikapu mu kiin denseefi a wan sani di den mu du ala yuu. A sani ya e meke den tyai denseefi a wan bun fasi ala yuu (1 Peitilisi 2:12). Yehofa e piisii te ai si taki ala den diniman fi en e waka a Yesesi baka, a sikapuman fu den, fu di den e meke moiti fu tan kiin. Ai piisii tu te ai si taki den e meke moiti fu libi na a wan.

6. Saide u mu e ondoosuku useefi ala yuu?

⁶ San a kiin di den pilisite be mu kiin wani taki gi wi aini a ten ya? A omen Beibelsutudi e si taki wi e wei koosi di fiti anga koosi di kiin. Den e si taki den komakandaa peesi fu u kiin tu. Boiti den sani de, den sama di e dini Yehofa mu abi „wan kiin ati.” (Leisi Psalm 24:3, 4; Yesaya 2:2, 3.) Te wi e dini Yehofa, da u mu e denki sani di fiti. Wi ati anga u sikin mu kiin tu. Neen meke u mu e ondoosuku useefi ala yuu. Son leisi wi abi fu fika son gwenti anga manii di wi abi efu u wani de santa sama (2 Korentesama 13:5). Kande wan Kelesten di dopu e luku felon efu fowtow pe sama de anga soso sikin efuso fa man anga uman e didon anga denseefi. A mu akisi enseefi taki: ’Mi e tyai miseefi a wan santa fasi?’ Baka te a ondoosuku enseefi, da a mu go suku yeepi fu a sa tapu anga a takuu gwenti ya.​—Yakowbesi 5:14.

7. San wi e leli fu Yesesi te wi luku san sikiifi aini Lefitikesi 8:22-24?

⁷ Di Gadu sete a pilisite wooko aini Islayeli, Mosesi be mu poti a buulu fu wan mansikapu na a leti se yesi, a leti se doin, anga a leti se gaanto fu Aron anga den manpikin fi en. (Leisi Lefitikesi 8:22-24.) A sani di den du anga a buulu be e soi taki den pilisite be o aliki Yehofa. Den be o meke moiti tu fu du a wooko fu den leti enke fa Gadu wani. Na aseefi sani Yesesi, a Hei Pilisite fu u, du tu. Neen na a moo bun sama di soi den salufuwan anga den taa sikapu fa fu aliki Yehofa. Bika a be e aliki Yehofa, a be e du a wani fi en. A fasi fa a be e libi be santa tu.​—Yohanisi 4:31-34.

8. San ala Kelesten mu du?

⁸ Enke diniman fu Yehofa, u mu waka a Yesesi baka. Ala yuu a be e du san Gadu wani. U mu e aliki san Gadu e taki aini a Wowtu fi en, da u ná o du sani fu „meke tyali kisi a santa yeye fu Gadu” (Efeisesama 4:30). U mu e „tan seeka a pasi” di wi e waka.​—Hebrewsama 12:13.

9. San dii baala di be wooko makandii anga den baala di e tii a wooko e taki? Fa den sani di den taki o yeepi i fu de santa sama?

⁹ Meke u poti pakisei a san dii baala di be wooko makandii anga den baala di e tii a wooko fu u a hii goontapu taki. Wan fu den baala e taki: „Ai bigi gi mi taki mi man wooko makandii anga den baala ya. Ma aini a wooko makandii, mi kon si taki den e meke fowtu son leisi winsi fa den a salufuwan. Tokuso aini ala den yali pasa mi  meke moiti fu aliki den baala ya di e teke fesi.” Wan taa baala e taki: „Den tekisi enke 2 Korentesama 10:5 pe sikiifi taki u mu „aliki Kelestesi”, e yeepi mi fu aliki den baala di e tii a wooko. Ai yeepi mi tu fu wooko makandii anga den. Anga mi hii ati mi e saka miseefi a den baala ya ondoo.” A du fu dii baala e taki: „Te u lobi san Yehofa lobi anga te wi e buuse den sani di ai buuse, da wi o aliki a olikanisâsi anga den baala di ai koboloiki fu du san a abi a pakisei. Boiti dati, u mu e meke Yehofa poti wi a pasi da wi e du sani di e meke a fii bun.” A baala ya e membee san Baala Nathan Knorr be du. Baala Knorr di be toon wan fu den baala di e tii a wooko, be wooko anga wan artikel di sikiifi aini A Waktitoren fu 1925 di den e kai „Birth of the Nation” (A bigin fu wan nyun pipel), winsi fa omen taa sama á be wani wooko anga a sani di sikiifi de. A baala ya be abi lesipeki gi a fasi fa Baala Knorr be saka enseefi. Te wi e pakisei den sani di den dii baala ya taki, da a o yeepi u fu useefi aliki Gadu. Wi o santa tu.

10. Saide meke u mu aliki a weiti fu Gadu di e taki fu buulu?

¹⁰ Leisi Lefitikesi 17:10. Yehofa be taigi den Islayelisama taki den á be mu nyan „nawan sowtu buulu.” Kelesten á be mu koboloiki a buulu fu libisama anga a buulu fu meti (Toli 15:28, 29). A o hati wi efu u du wan sani di o meke Gadu daai baka gi wi efuso puu wi aini a kemeente. U lobi Yehofa, neen meke u wani aliki en. Son leisi sama di á lobi Yehofa efuso sama di nái booko den ede anga en o wani u du sani fu taangayesi en. Ma winsi u sa lasi u libi seefi, u ná o aliki den. Winsi son sama o wisiwasi u fu di wi nái teke buulu, u ná o taangayesi Yehofa (Yudasi 17, 18). San o yeepi u fu wi á nyan buulu efuso teke buulu?​—Deitolonomi 12:23.

11. Saide meke a dei di a foluku be e kisi paadon fu sondu, á be de wan gwenti namo di den Islayelisama be mu holi ala yali?

¹¹ A sani di a hei pilisite be e du na a dei di a foluku be e kisi paadon fu sondu e yeepi u fu si fa Gadu e denki fu buulu. A wan fasi namo den be mu koboloiki buulu. A buulu a be fu yeepi den Islayelisama fu kisi paadon fu sondu fu den anga Yehofa be sa tan bun mati. Den be e tyatya a buulu fu a mankaw anga a kaabita a fesise fu a koosi di be e tapu a ark fu a kuudei (Lefitikesi 16:14, 15, 19). Na a buulu de be o meke taki Gadu gi den Islayelisama paadon fu den sondu fu den. Yehofa be taigi den Islayelisama taki efu wan man be kii wan meti fu nyan, a be mu towe a buulu da a tapu en anga doti, „bika na a buulu na a libi fu iniiwan libilibi sani ” (Lefitikesi 17:11-14). Den weiti ya á na be wan gwenti namo di den Islayelisama be mu holi. Omen hondoo yali fosi a sani ya Gadu be taigi Nowa anga den bakapikin fi en taki den á mu nyan buulu (Genesesi 9:3-6). San wi enke Kelesten e leli fu a sani ya?

12. San Pawlesi be taki fu buulu?

¹² A apostel Pawlesi be taki a buulu  poi meke sani kon kiin. A be taki: „Enke fa a Weiti e soi, da buulu sa kiin pikinmoo ala sani. Efu buulu á towe a doti, sama ná o kisi paadon fu den sondu fu den” (Hebrewsama 9:22). Ma tokuso a buulu fu meti á be poi meke sama kisi paadon fu ala ten. Pawlesi be taki a ofaandi fu den meti be e membee den Islayelisama taki den abi sondu. A be e membee den tu taki den abi wan moo bun ofaandi fanowdu di be o puu a sondu fu den fu alaten. A Weiti be de „a kaaka fu den bun sani di mu kon ete, ma a neen na den bun sani” (Hebrewsama 10:1-4). Ma fa libisama be o kisi paadon fu den sondu fu den?

13. Sowtu wini wi o fende fu a gi di Yesesi gi Yehofa a leti di a be abi fu libi enke libisama?

¹³ Leisi Efeisesama 1:7. Yesesi dede gi libisama fu meke den kon fii fu sondu. Den sama di lobi Yesesi anga en Dda o fende wini fu a dede fi en (Galasiyasama 2:20). Tokuso na a sani di Yesesi du baka di a be opobaka o meke u kon fii fu sondu. Den sani di a hei pilisite be e du na a dei di a foluku be e kisi paadon fu sondu, be e soi go a san Yesesi be o du. A dei de, a hei pilisite be mu go aini a Moo Santa Peesi. Te a be de ape da a leti enke a Yehofa fesi a be de. A be e tyai a buulu fu den meti gi Gadu na ape enke  ofaandi (Lefitikesi 16:11-15). Baka di Yesesi kon a libi baka, a go a hemel. Di a go a hemel neen a gi Yehofa a leti di a be abi fu libi enke libisama a goontapu ya (Hebrewsama 9:6, 7, 11-14, 24-28). Ai bigi gi u taki u sa kisi paadon fu sondu. Ai bigi gi u tu taki wi abi wan kiin kosensi fu di wi e biibi aini a buulu fu Yesesi!

14, 15. Saide meke a de taanga fanowdu fu fusutan a weiti fu Yehofa di e taki fu buulu? Saide wi á mu taangayesi a weiti de?

¹⁴ Kande yu e fusutan now fu saide Yehofa taki wi á mu nyan „nawan sowtu buulu” (Lefitikesi 17:10). I si fu saide Gadu e si buulu enke wan santa sani? Ai si buulu enke a libi fu wan sama efuso a libi fu wan meti (Genesesi 9:4). Yu e fusutan now fu saide u mu si buulu enke fa Gadu e si en? Yu e fusutan tu fu saide u mu aliki a weiti fu Yehofa di e taki wi á mu koboloiki buulu? A fasi fa wi o man de mati anga Yehofa a te wi e biibi aini a ofaandi fu Yesesi. Wi o man de mati anga Yehofa tu te wi e fusutan taki buulu a wan sani di pelensipali gi en.​—Kolosesama 1:19, 20.

¹⁵ Son sani sa miti wi aini a libi, pe wi o abi fu luku efu wi o teke buulu efuso pikinpikin sani di den puu aini buulu. Kande wi abi fu luku tu sowtu dataa yeepi wi o teke. Neen meke a de fanowdu fu ondoosuku den toli ya finifini, fu begi Gadu, fu sabi a fesi san i wani du fosi wan ogii miti i. A den sani de o yeepi i fi i á pasa a weiti fu Yehofa di e taki fu buulu. Wi á wani tyali kisi Yehofa fu di u du wan sani di ai buuse. Aini a ten ya a omen dataa anga taa sama e gi u taanga-sikin fu gi buulu fu den sa yeepi sama di abi buulu fanowdu. Ma enke a foluku fu Gadu di santa, u sabi taki a Yehofa wawan abi a leti fu taigi u fa u mu koboloiki buulu. Gi Yehofa na ala „sowtu buulu” santa. Neen ede meke u mu aliki den weiti fi en di e taki fu buulu. Wi e soi Yehofa taki wi e si en fu wan gaan sani taki Yesesi dede gi wi, te wi e libi a wan fasi di fiti. Na a buulu fu Yesesi na a wan enkii sani di o meke u kisi paadon fu sondu fu man libi fu tego.​—Yohanisi 3:16.

16. Saide meke a foluku fu Yehofa mu santa?

¹⁶ Di Yehofa fii den Islayelisama puu a katibo aini Egeptekondee neen a taigi den taki: „Bika mi a Yehofa, a sama di puu wi aini Egeptekondee, fu soi u taki a mi a u Gadu. U mu santa, bika mi santa” (Lefitikesi 11:45). Yehofa be wani den Islayelisama santa, bika enseefi santa. Aini a ten ya Yehofa wani fu useefi santa tu. A dati a san a buku fu Lefitikesi e soi u.

17. Fa yu e pakisei fu a Beibel buku Lefitikesi baka di u taki fi en?

¹⁷ U leli tyaipi sani aini a buku Lefitikesi. Kande i kon lobi a buku ya fu di i kon fusutan en moo bun. Sonten yu e fusutan moo bun tu fu saide meke u mu santa. Ma san u sa leli ete fu Lefitikesi? Fa a Beibel buku ya e yeepi u fu dini Gadu a wan kiin fasi? Wi o taki fu den toli ya aini a taa artikel.