1, 2. Fa Yesesi gi den disipel fi en taanga-sikin di a opobaka?

TU DISIPEL fu Yesesi be de a pasi e go wan foto di de 11 kilomeiti fu Yelusalem. Den be e kusumi fu di Yesesi be dede. Den á be sabi taki a be opobaka. Te fu den denki neen Yesesi be de a den mindii e waka anga den. „A bigin taki fu den buku fu Mosesi anga ala den buku di den polofeiti sikiifi, fu meke den fusutan ala den sani fi en di sikiifi aini Gadu buku” (Lukasi 24:13-15, 27). Den disipel be e piisii fu toko, den á be e kusumi moo, bika Yesesi be meki den „fusutan finifini” san sikiifi aini a Wowtu fu Gadu.​—Lukasi 24:32.

² Aseefi neti de, den tu disipel ya be daai go baka a Yelusalem foto. Di den miti den apostel neen den taigi den san pasa. Na a taki tapu den de, neen sasasaa, Yesesi doo a den mindii. Den apostel be e feele te ná pikin sani, bika den á be e kaba biibi taki a Yesesi be kon a den mindii. Yesesi be yeepi den fu den á feele moo. A Beibel e taki: „A opo den ain fu den fusutan ala den sani di sikiifi aini a Wowtu fu Gadu.”​—Lukasi 24:45.

3. San a den sani di sa meke u fii booko saka te wi e du a peleikiwooko? San o yeepi u fu tan dini Yehofa anga piisii?

³ Winsi wi e du ala san u man aini a peleikiwooko,  son leisi wi o go e kusumi tu enke den disipel fu Yesesi. A kan taki wi e fii booko saka fu di sama nái aliki u te wi e peleiki gi den (1 Korentesama 15:58). Kande den Beibelsutudi fu u nái go a fesi enke fa u wani. Kande son wan fu den daai baka gi Yehofa seefi. San o yeepi u fu tan du a peleikiwooko anga piisii? A sani di o yeepi u, a te u fusutan san den ageisitoli fu Yesesi wani taki. Wi o taki now fu dii fu den ageisitoli ya, da wi o luku tu san u sa leli fu den.

4. San a ageisitoli fu a goonman di e siibi wani taki?

⁴ Leisi Malikisi 4:26-29. San a ageisitoli fu a goonman di e siibi wani taki? A man di paandi a goon a den sama di e paati a bun nyunsu fu a Kownukondee. A sii na a bosikopu di wi e peleiki gi den bun ati sama. A man e du den sani di ala taa libisama e du, „ai siibi te neti, da ai opo a mamanten”. A sii abi ten fanowdu fu goo, ai bigin goo fanafu a dei di a man paandi en te enke den koti a nyanyan fi en. Aini a pisi ten de „a sii e booko ain da ai goo kon bigi”. Neen seefi e goo. Ai goo saafisaafi te enke a meke nyanyan. A so a de tu te wan sama wani dini Yehofa. A abi ten fanowdu fu meke go a fesi. Te a doo na a yuu pe a taki a wani dini Gadu, da a leti enke ai „meke nyanyan” fu di ai paamisi Yehofa taki a o libi enke fa a wani, da a dopu.

5. Saide meke Yesesi be gi a ageisitoli fu a goonman di e siibi?

⁵ Saide meke Yesesi be gi a ageisitoli ya? Yesesi wani fu u fusutan taki a Yehofa na a sama di e meke a waaleiti goo aini a ati fu „den sama di ati bun fu fende a tego libi” (Toli 13:48; 1 Korentesama 3:7). Wi e paandi, wi e gi wataa, ma wi á poi du nawan sani fu meke a sii goo moo gaw. Leti enke a man aini a ageisitoli fu Yesesi, a so wiseefi á sabi fa a sii e goo. Kande u nái si fa a Kownukondee sii e goo aini wan sama ati fu di wi e poti pakisei a taa sani. Ma te a yuu doo, ai meke nyanyan, da aseefi sama ya e peleiki makandii anga u.​—Yohanisi 4:36-38.

6. San u mu fusutan fu a go di wan Beibelsutudi e go a fesi?

 ⁶ San wi e leli fu a ageisitoli ya? A fosi sani di wi e leli a taki wi á poi fooseli wan Beibelsutudi fu go a fesi gawgaw. Winsi omen moiti wi o meke fu yeepi wan Beibelsutudi fu a go a fesi, noiti u mu dwengi en fu dopu. Ma efu wi abi sakafasi, da wi o holi a pakisei taki na a Beibelsutudi seefi mu luku efu a o paamisi Yehofa taki a o libi enke fa a wani. A wan enkii fasi fa Yehofa e piisii anga a dini di wi e dini en, a te wi e dini en fu di u lobi en.​—Psalm 51:12; 54:6; 110:3.

7, 8. (a) Sowtu taa sani wi e leli fu a ageisitoli fu a goonman di e siibi? (b) San a toli ya e leli u fu Yehofa anga Yesesi?

⁷ Du fu tu sani di a ageisitoli ya o yeepi u fu fusutan, a taki wi á mu fii booko saka te u si taki den sama di wi e leli nái go a fesi wantenwanten. U mu abi pasensi (Yakowbesi 5:7, 8). Efu u du ala san u poi fu yeepi wan sutudi, ma tokuso a nái go a fesi, da dati á wani taki wi á sabi leli sama. A soso aini a ati fu den sama di abi sakafasi Yehofa e meke a sii fu waaleiti goo. So wan sama mu wani kengi a fasi fa ai libi tu (Mateyesi 13:23). Neen meke wi á mu luku omen sama wi e yeepi fu dopu, leti enke na a sani de e soi taki wi e du a diniwooko a wan bun fasi. Yehofa nái luku omen sama e aliki u fu maiki luku efu wi abi bun bakapisi aini a peleikiwooko. Ma ai teke en fu bigi taki wi e du ala san u man.​—Leisi Lukasi 10:17-20; 1 Korentesama 3:8.

⁸ Du fu dii sani, a taki a ná ala yuu wi o poi si efu wan sama ati kengi. Wan man anga en uman be taigi a zendeling di be e sutudeli anga den taki den be wani toon peleikiman di á dopu ete. A zendeling taigi den taki den be abi fu tapu fosi anga a somoko di den e somoko. A zendeling foondoo di den taigi en taki a wantu mun kaba den nái somoko moo. Den be fusutan taki Yehofa e si den winsi den be o somoko kibii kibii, anga ala Yehofa á lobi bidiigiman. Neen meke den be taki efu den ná o somoko na a zendeling fesi, da a moo betee den á somoko moo. A lobi di a man anga a uman ya be lobi Yehofa be yeepi den fu du sani enke fa Yehofa wani, aladi a zendeling á be fusutan seefi taki den be kengi.

9. San a ageisitoli fu a seepi wani taki?

⁹ Leisi Mateyesi 13:47-50. San a ageisitoli fu a seepi wani taki? Yesesi be taki a Kownukondee bosikopu de enke wan gaan langa seepi di yu e sete aini a se. Leti enke fa i man kisi „ala sowtu fisi” anga wan seepi, a letiso a peleiki di wi e peleiki e hali ala sowtu sama (Yesaya 60:5). Den  miliyun miliyun sama di e kon ala yali a den konkelesi fu u anga a membee fesa, e soi kiin taki a sani ya a tuu. Son wan fu den sama ya de enke „bun” fisi. Den e toon wan pisi fu a Kelesten kemeente. Taawan de enke fisi „di á bun”. Yehofa nái teke den sowtu sama de.

10. Saide meke Yesesi be gi a ageisitoli fu a seepi?

¹⁰ Saide meke Yesesi be gi a ageisitoli ya? A paati di den e paati den fisi aini a ageisitoli fu Yesesi a ná a kuutu di den o kuutu sama na a ten fu a gaan banowtu. Ma ai soi go a wan sani di e pasa aini den kiiboi dei fu a goontapu ya. Yesesi be taki a ná ala sama di lobi a Kownukondee bosikopu o wani toon wan diniman fu Yehofa. A omen Beibelsutudi anga sama di e kon a den komakandaa fu u á wani paamisi Yehofa taki den o libi enke fa a wani (1 Kownu 18:21). Wantu sama nái kon moo seefiseefi a den komakandaa fu u. Son yonkuuwan de aini waaleiti fu di den mma anga dda a Kotoigi, ma a ná taki denseefi e meke moiti fu toon wan mati fu Yehofa. Yesesi be tyai kon a kiin taki a wan sama seefi mu luku efu a o dini Yehofa. Efu u taki wi o dini en, da Yehofa o si wi enke „gudu” efuso sama di a lobi.​—Hakai 2:7.

11, 12. (a) Sowtu wini wi e fende fu a sani di wi e leli aini a ageisitoli fu a seepi? (b) San a toli ya e leli u fu Yehofa anga Yesesi?

¹¹ Sowtu wini wi e fende fu a sani di Yesesi e leli wi aini a ageisitoli fu a seepi? Efu u fusutan a toli fu a seepi da u ná o booko saka tumisi te wan Beibelsutudi efuso wan pikin fu u á wani dini Yehofa. Kande u du ala san u poi fu yeepi en. A ná te wan sama wani sutudeli Beibel efuso kiya a waaleiti da a o toon wan mati fu Yehofa. Efu a á wani libi enke fa Yehofa wani, a ná o poi de wan diniman fi en.

¹² A sani ya wani taki den sama di gwe fika a waaleiti ná o abi a okasi moo fu daai kon baka na a kemeente? A de so taki den sama di á paamisi Yehofa ete taki den o libi enke fa a wani ná abi nawan howpu moo? Nono, den abi a okasi ete fu toon  wan mati fu Yehofa fosi a gaan banowtu doo. Yehofa e kai den sama ya taki: „U daai kon a mi baka, da miseefi o daai kon a wi” (Maleyaki 3:7). A sani ya e kon a kiin aini a toli fu a lasi manpikin.​—Leisi Lukasi 15:11-32.

13. San a ageisitoli fu a lasi manpikin wani taki?

¹³ San a ageisitoli fu a lasi manpikin wani taki? A bun ati dada aini a toli fu a lasi manpikin a Yehofa, a Tata fu u di lobi u. A manpikin di poli den gudu di en dda gi en, a den sama di gwe fika a Kelesten kemeente. Te den sama ya gwe fika a kemeente, da a leti enke den e go a „wan faawe kondee”. Dati na a goontapu fu Saatan di á sabi Yehofa seefi seefi (Efeisesama 4:18; Kolosesama 1:21). Son wan fu den sama ya e kisi denseefi bakaten, da den e daai kon baka a Yehofa. A bunbun moiti den sama ya abi fu meke fu man daai kon baka. Ma fu di den abi sakafasi, fu di a sani di den du e hati den, meke Yehofa e gi den paadon da ai teke den baka anga ala piisii.​—Yesaya 44:22; 1 Peitilisi 2:25.

14. Saide meke Yesesi be gi a ageisitoli fu a lasi manpikin?

¹⁴ Saide meke Yesesi be gi a ageisitoli ya? Yesesi be soi taki Yehofa wani fu den sama di gwe fika en daai kon baka. Ala yuu a dada aini a toli fu a lasi manpikin be e si enke a boi fi en be o daai kon baka. Di a si a manpikin fi en „be opo uku a faawe e kon”, neen a lon go miti en. A dada be wani fi en manpikin fii taki a be e si en enke en manpikin ete. A toli ya e gi den sama di gwe fika waaleiti taanga-sikin fu daai kon a Yehofa baka. A kan taki den anga Yehofa a ná bun mati moo. A kan taki sen e kisi den fu daai kon baka efuso  kande ai taanga gi den. Ma Yehofa, Yesesi anga den engel o piisii te den e daai kon baka.​—Lukasi 15:7.

15, 16. (a) Sowtu wini wi e fende fu a sani di Yesesi e leli wi aini a ageisitoli fu a lasi manpikin? (b) San a toli ya e leli u fu Yehofa anga Yesesi?

¹⁵ Sowtu wini wi e fende fu a sani di Yesesi e leli wi aini a ageisitoli fu a lasi manpikin? U mu waka a Yehofa baka. Noiti i mu „fii enke a yu na a moo bun sama di de”, bika efu a so yu e denki, da i ná o wani mumui anga den sama di be gwe fika a kemeente. A sani ya sa poli wi anga Yehofa (Peleikiman 7:16). Wan taa sani di wi e leli a taki u mu si den sama di gwe fika a kemeente enke „wan sikapu di lasi” di sa daai kon baka (Psalm 119:176). Wi o du ala san u poi fu yeepi den sama di gwe fika a kemeente te wi anga den miti? Wi o meke den owluman sabi wantenwanten fu den sa yeepi den sama de? Efu wi e fusutan a toli fu a lasi manpikin tuutuu, da wi o du den sani ya.

¹⁶ Den sama di daai kon baka e piisii taki Yehofa soi tyali ati gi den. Den e piisii tu taki den baala anga sisa aini a kemeente e gi den taanga-sikin fu di den lobi den. Wan baala di be komoto a waaleiti 25 yali langa e taki: „Fanafu a ten di den teke mi baka, a soso piisii mi e piisii, bika Yehofa e gi mi ’kaakiti’ (Toli 3:19). Ala sama e gi mi taanga-sikin. Mi e si tu taki den lobi mi. Nownow mi de aini wan famii di e du san Yehofa wani.” Wan yonkuu sisa di daai kon baka na a kemeente baka di a be gwe feifi yali e taki: „Mi á poi taigi i fa mi e fii te mi e si a lobi di Yesesi taki be o de aini a kemeente. Den baala anga sisa e soi tuutuu taki den lobi mi. Sani á de di bigi gi mi enke a de di mi de aini a olikanisâsi fu Yehofa.”

17, 18. (a) San den dii ageisitoli ya leli u? (b) Sowtu moiti ala u mu meke?

¹⁷ San den dii ageisitoli ya leli u? A fosi sani a taki wi á poi fooseli wan Beibelsutudi fu go a fesi gawgaw. U mu fika a pisi de gi Yehofa. Du fu tu sani di u leli a taki wi á mu denki taki ala den sama di e kon a komakandaa efuso e sutudeli o wani dini Yehofa. A lasiti sani di u leli a taki aladi son sama e gwe fika Yehofa, tokuso wi á mu si enke noiti den o daai kon baka. Te den daai kon baka, u mu waka a Yehofa baka, da u teke den sama ya aini a kemeente.

¹⁸ Ala u mu meke moiti fu abi sabi, fusutan anga koni. Te yu e leisi den ageisitoli fu Yesesi, da i mu akisi iseefi taki: ’San a ageisitoli ya wani taki? Saide a de aini Beibel? Fa mi sa wooko anga den sani di a ageisitoli ya e leli mi? San a ageisitoli ya e leli mi fu Yehofa anga Yesesi?’ Efu u akisi useefi den sani ya, da wi o fusutan san den wowtu fu Yesesi wani taki.