BAALA Guy Hollis Pierce be kaba anga a diniwooko fi en a goontapu ya na a tudewooko 18 maart 2014. A be de wan fu den baala di e tii a wooko fu Yehofa Kotoigi a hii goontapu. A be doo a libi maiki fu 79 yali. Fu di a be de wan fu den baala fu Kelestesi meke a opobaka fu go libi aini hemel.​—Hebrewsama 2:10-12; 1 Peitilisi 3:18.

Baala Guy Pierce be meke na a 6 november aini a yali 1934 a Auburn, wan peesi a Kalifornia, di de aini Ameekankondee. A be dopu aini a yali 1955. Aini 1977 a toow anga Penny, a uman fi en di a be lobi. Den be kiya wantu pikin makandii. A baala ya be de enke wan dda gi omen taa sama tu. Baala Pierce anga en uman bigin pionili aini a yali 1986. Bakaten a be wooko 11 yali langa enke kelen owluman na Ameekankondee.

Aini a yali 1997 neen baala Pierce anga en uman bigin wooko na a Betel osu fu Ameekankondee. Baala Pierce be e wooko na a Diniwooko Kantoo. Ma aini 1998 neen den poti en fu yeepi na a Wookoman Komte fu den baala di e tii a wooko fu u. Na a 2 oktober 1999, den baala di e tii a wooko be holi a komakandaa di den gwenti holi ala yali. Na a komakandaa de den meke sama sabi taki Baala Pierce toon wan fu den baala di e tii a wooko fu wi a hii goontapu. Aini den yali di pasa ya a be wooko na a Wookoman Komte, a Sikiifi Komte, a Buku Komte anga a Fesiman Komte.

Baala Pierce be de wan sama di be lobi lafu. A be e meke sama lafu tu anga den toli fi en. Neen meke ala sowtu sama be lobi en. Ma den sani di sama be moo lobi, na a sakafasi di a be abi anga a lobi di a be lobi sama. Den be lobi a fasi fa a be e lesipeki den weiti fu Yehofa tu anga a taanga biibi di a be abi aini Yehofa. A be lobi taki, winsi a san ná o opo wan dei, tokuso den sani di Yehofa paamisi o kon tuu namo. A be wani sama a hii goontapu sabi a sani ya.

Baala Pierce be e wooko taanga gi Yehofa. A be e bigin wooko fuuku mmanten. Son leisi a be e wooko te gaan neti. A omen peesi fu goontapu a go fu gi baala anga sisa taanga-sikin. Ala yuu a be e meke ten gi sama di be abi yeepi fanowdu efuso sama di be wani taki anga en. Sama be sabi en enke wan baala di be abi bun manii, wan baala di be de wan tuutuu mati anga wan baala di be e koboloiki Beibel fu gi den taanga-sikin.

U lobi baala anga mati fika en uman, sigisi pikin anga galanpikin a baka. Ma soseefi den sama di be e si en enke den dda. Mark Sanderson, wan fu den taa baala di e tii a wooko fu wi a hii goontapu be holi a beli lezing fu Baala Pierce. A lezing ya be holi na sataa 22 maart 2014. A be taki fu a howpu di baala Pierce be abi fu go a hemel. A leisi a sani di Yesesi be taki: „A omen tanpeesi de aini a osu fu mi Tata. . . . Da te mi go seeka a peesi te mi kaba, da mi o daai kon baka. Mi o teke wi a osu fu u sa de pe mi de. U sabi a pasi fu doo a pe mi e go.”​—Yohanisi 14:2-4.

Son leisi wi o go e angii fu baala Pierce. Ma wi e piisii taki a ’be sabi a pasi’ di tyai en go neen tego „tanpeesi”.