Fu di u lobi Yehofa meke u paamisi en taki wi o libi enke fa a wani, baka dati neen u dopu. U paamisi Yehofa tu taki wi o dini en fu tego. Neen meke wi e du ala san u man fu du san u paamisi en. Ma a feyanti fu u, Saatan Didibii, o du ala san a man fu booko a mofu di wi anga Yehofa meke (Openbaring 12:17). A wiseefi piki Yehofa taki wi o dini en. A wiseefi piki en tu taki wi o libi enke fa a wani. Neen meke a sa tyai dede gi u efu u kengi pakisei.

Moo enke 2600 yali pasa, a kownu fu Babilon di den e kai Nebukadnesar be meke wan gaan gowtu pobiki. A be taki ala sama mu dini a pobiki ya. Den be o fiingi den sama di á be wani dini a pobiki go aini wan gaan onfu. Sadrak, Meisak, anga Abedneikow be de dii yonkuman di be e dini Yehofa. Fu di den á be wani taangayesi Yehofa meke den á dini a pobiki. A so meke den iti den go aini a gaan onfu. Yehofa kibii den a wan gaan foondoo fasi. Den boi ya be de kabakaba fu dede pe fu den taangayesi Yehofa.​—Daniyeli 3:1-27.

A polofeiti Daniyeli be sabi taki efu sama be si taki a be e begi Yehofa den be o fiingi en gi wantu lew di be de aini wan olo. Tokuso a be tan begi Yehofa dii boo wan dei enke fa a be gwenti. A á be daai baka gi Yehofa. Neen ede meke Yehofa kibii en „fu den lew á kii en”.​—Daniyeli 6:1-27.

Aini a ten ya den diniman fu Yehofa e du tu san den paamisi en. Wan a duupu yonkuu Kotoigi fu Afiikankondee á be wani singi gi a faaga di den be de a sikoo. Den sama fu a sikoo be taki den o puu den a sikoo efu den á singi gi a faaga. Bakaten a minesite fu sikoo toli be taki anga den yonkuu Kotoigi ya. Sondee feele den pikin ya taigi en a wan lesipeki fasi saide den ná o poi singi gi a faaga. Fanafu a ten de den yonkuu Kotoigi á be e kisi a polobelema ya a sikoo moo. Nownow den man go a sikoo sondee fu sama dwengi den fu taangayesi Yehofa.

Luku a toli fu Yowsefu. Tesi be miti en di a uman fi en lasi libi. Di Yowsefu soi den famii fi en fa a wani sani mu waka na a beli, neen den wooko anga san a taki. Ma den famii fi en uman á be de a waaleiti. Den be wani du omen sowtu sani na a beli di Yehofa á fende bun. Yowsefu e taki: „Di den si taki den á be poi meke mi kengi pakisei neen den wai go a den pikin fu mi. Ma ala den pikin holibaka gi mi. Den famii ya be wani holi bookode a mi osu tu. Ma mi taigi den taki efu den be wani holi bookode namo namo, da a wan taa peesi den mu go holi en, ma a ná mi osu. Den be sabi taki a gwenti fu holi bookode a ná wan sani di e kuudei anga a biibi fu mi efuso san mi uman be e biibi. Baka di u taki a toli ya wan hii pisi ten, neen den go a wan taa peesi go holi den bookode.

A pisi ten de mi be e begi Yehofa te, fu a yeepi mi anga mi osufamii fu wi á taangayesi den weiti fi en. A aliki a begi fu mi, bika a yeepi u fu tan aliki en, winsi fa den famii fu u be e meke moiti fu u kengi pakisei.” Yowsefu anga den pikin fi en á be pakisei wan dei seefi fu pasa Yehofa mofu.

Baka a Paskafesa di be holi aini a yali 32, wan uman be kon akisi Yesesi fu puu a ogii yeye di be de na a meisyo fi en tapu. A uman ya á be de wan Islayelisama. A be e tan begi Yesesi naamo fu yeepi en. Biginbigin Yesesi á be e piki en. A taigi den disipel fi en taki: „Gadu á sende mi, fu mi go a taa foluku, moo enke den lasi sikapu fu Islayeli Kondee.” Tokuso a uman be e tan begi Yesesi fu yeepi en, neen Yesesi taigi en taki: „A á fiti fu mi puu beele a den pikin ana towe gi den pikin dagu.” Ma fu di a uman ya be abi biibi, meke a taigi Yesesi taki: „A  tuu mi Masaa, ma tokuso den pikin dagu e nyan a beele saka saka di e kai komoto na a tafaa fu a masaa fu den.” A so Yesesi kengi pakisei neen a puu a ogii yeye na a meisyo fu a uman ya tapu.​—Mateyesi 15:21-28.

A fasi fa Yesesi wooko e soi taki ai waka a Yehofa baka, bika Yehofa seefi e kengi pakisei te a de fanowdu. Di den Islayelisama be taangayesi Yehofa fu di den go dini wan pikin gowtu kaw, neen Yehofa be wani kii den. Ma di Mosesi begi en fu a á kii den, neen a kengi pakisei.​—Ekisodesi 32:7-14.

Leti enke Yehofa anga Yesesi a so Pawlesi be e kengi pakisei son leisi tu. A fosi leisi di a be teke a zendeling waka fi en, neen Malikisi gwe fika en. Neen ede meke a á be wani tyai en taa leisi moo. Ma Pawlesi kon si bakaten taki Malikisi be go a fesi a waaleiti. A be si taki Malikisi be sa yeepi en. Neen ede meke a be taigi Timotiyesi taki: „Tyai malikisi te yu e kon, bika a man yeepi mi anga a wooko.”​—2 Timotiyesi 4:11.

San wi e leli fu den toli ya? Aladi Yehofa ná abi sondu, tokuso a de kabakaba fu kengi pakisei. Ai kengi pakisei fu di a abi pasensi anga u, fu di tyali e kisi en gi u anga fu di a lobi wi. Wi abi sondu neen ede meke wi nái si sani a wan bun fasi ala yuu. Na a sani ya meke a de fanowdu fu u kengi pakisei son leisi. A kan taki u nái denki takuu fu wan sama moo, baka te u kon fusutan san e miti en.

Son leisi wi abi fu kengi pakisei te a abi fu du anga den sani di u wani du aini a diniwooko. A kan taki wi e sutudeli Beibel, wi e go a komakandaa, ma wi á wani dopu ete. A kan tu taki wi abi a okasi fu pionili, ma wi e daaidaai fu bigin anga a pioniliwooko. Son baala á wani toon dinali efuso owluman (1 Timotiyesi 3:1). A so yu e denki tu?  Yu á si enke i sa kengi pakisei noh? Yehofa wani gi i den gaandi ya. A wani i piisii tu te yu e dini en, anga te yu e dini taawan.

Ella, di e wooko a Betel na Afiikankondee e taki: „Biginbigin di mi go a Betel, mi be denki mi á be o poi tan de langa. Mi be wani du ala san mi man gi Yehofa, ma mi be lobi mi famii tu. Biginbigin mi be e angii fu den sama fu mi te! Ma a sisa di mi anga en be e tan aini a wan kambaa be e gi mi taanga-sikin. A so mi kon tan a Betel. Nownow a 10 yali kaba di mi de a Betel. Mi wani tan ya solanga mi man fu dini mi baala anga sisa.”

Son leisi u ná abi taa fasi moo enke fu kengi pakisei. Kain be bigin dyalusu anga en baala te „en ati boon fu ogii”. Gadu be si taki Kain be o du ogii, neen meke a wasikow en. Gadu be taigi en taki: „Sondu de leti ai doomofu e lulu i.” Ma Kain ná aliki san Yehofa taigi en. A tyali, bika a kii en baala bakaten!​—Genesesi 4:2-8.

Luku a toli fu Kownu Usiya. Biginbigin en anga Yehofa be de bun mati, a be e aliki Yehofa tu. Ma a tyali taki bakaten a be kon abi hei membee. A go aini a tempel fu boon sumee switi ofaandi, aladi a den pilisite wawan be abi a gaandi de. Di den pilisite wasikow en taki a á mu du a sani de „neen en ati boon fu ogii”, a á be aliki den. Neen meke Yehofa meke gwasi kisi en.​—2 Koloniki 26:3-5, 16-20.

Wan sama di be abi fu kengi en pakisei aini a ten fu u ya, a Joachim. A be dopu aini a yali 1955, ma aini a yali 1978 den puu en aini a kemeente. Ma baka 20 yali a be soi berow, neen a daai kon dini Yehofa baka. Di wan owluman akisi en saide a teke so langa fosi a daai kon baka, neen a taki: „Mi ati be boon, ma mi be abi bigifasi tu. Ai hati mi taki mi tan so langa. Mi be sabi taki a den Yehofa Kotoigi be e leli sama tuu sani anga ala fa mi á be de wan Kotoigi moo.”

Son leisi ai de fanowdu taki useefi mu kengi du sani taa fasi. Efu wi e libi so da Yehofa o piisii anga u.​—Psalm 34:8.