1, 2. Saide omen sama á be e fusutan den sani di Yesesi be e taki?

TE WAN sama e taki anga u, da wi e yee en siten. U man sabi efu ai piisii efu en ati e boon. Ma a ná abi nawan wini te u nái fusutan san a sama e taki (1 Korentesama 14:9). Yesesi be e taki anga dunsu dunsu sama aini a tongo di den be e fusutan. Ma a omen fu den á be e fusutan den sani di a be e taki. Neen meke Yesesi be taki: „Ala sama di de ya, u aliki mi. U mu fusutan san mi e taki.”​—Malikisi 7:14.

² Saide somen fu den sama ya á be e fusutan den sani di Yesesi be e leli den? Son wan fu den be e si sani a wan taa fasi. Yesesi be taigi den sama ya taki: „U sabi bunbun fa fu wai den weiti fu Gadu poti a wan se, soso fu wooko anga den haw gwenti fu u” (Malikisi 7:9). Den á be e meke moiti fu fusutan san Yesesi be e leli den. Den á be wani kengi a fasi fa den be e denki anga a fasi fa den be e du sani tu. Den be e yee san a be e taki, ma a á be e doo den ati. (Leisi Mateyesi 13:13-15.) San o yeepi u fu fusutan den sani di Yesesi be e leli sama?

3. Saide meke den disipel be e fusutan san Yesesi be e taki?

³ U mu suku fu de enke den disipel fu Yesesi di be abi sakafasi. Yesesi be taigi den taki: „U na sama di de koloku, bika den ain fu wi e si, den yesi fu u e yee tu” (Mateyesi 13:16). Saide meke a den wawan be e fusutan san Yesesi be e taki? Dii sani be e yeepi den. A fosi sani a taki den á be e feele fu akisi sani di den á be e fusutan. Den be e meke moiti tu fu sabi san den leli fu Yesesi be wani taki (Mateyesi 13:36; Malikisi 7:17). Du fu tu, a taki den be e luku fa den nyun sani di den leli be e kuudei anga san den be sabi kaba. (Leisi Mateyesi 13:11, 12.) Du fu dii, a taki den be de kabakaba fu wooko anga den sani di den be leli fu yeepi denseefi anga taa sama.​—Mateyesi 13:51, 52.

4. San a den dii sani di o yeepi u fu fusutan den ageisitoli fu Yesesi?

⁴ Leti enke den disipel, dii sani o yeepi u tu fu fusutan den ageisitoli fu Yesesi. A fosi sani a taki u mu meke ten fu sutudeli anga fu denki dipi fu den wowtu di Yesesi taki. U mu ondoosuku san wi á fusutan, da u poti akisi tu di o yeepi u fu fusutan den pisi de moo bun. A so wi o sabi sani (Odo 2:4, 5). Du fu tu, a taki u mu ondoosuku luku san den sani ya abi fu du anga den sani di u sabi kaba. U mu luku tu fa u sa fende wini fu den sani ya. A so wi o fusutan sani moo bun (Odo 2:2, 3). Du fu dii, a taki u libi mu soi taki wi e du den sani di u leli. A so wi o soi taki wi abi koni.​—Odo 2:6, 7.

5. Taki fu saide sabi, fusutan anga koni á de aseefi.

⁵ Sabi, fusutan, anga koni a ná aseefi. Fu saide? Kon u taki yu e taampu a wan pasi mindii, da wan wagi e lei kon taanga ai tapu. I sabi taki a wan wagi. Yu e fusutan taki a o naki i efu yu á komoto na a mindii pasi. Fu di i koni, meke yu e dyombo go a wan se fu a wagi a fende i naki. Beibel e taki fu u „tan poti pakisei a koni”, bika a den sani ya o yeepi u fu tan a libi.​—Odo 3:21, 22; 1 Timotiyesi 4:16.

6. San a den fo akisi di wi o luku te wi o taki fu seibi fu den ageisitoli fu Yesesi? ( Luku a faki.)

⁶ Aini a artikel ya anga a wan di e kon wi o taki fu seibi ageisitoli fu Yesesi. Te wi o luku den da wi o taki fu den fo akisi ya: San a ageisitoli ya wani taki? (Na a sani ya den e kai sabi.) San Yesesi wani leli wi anga a ageisitoli ya? (Na a sani ya den e kai fusutan.) Fa u sa koboloiki den sani di u leli fu a ageisitoli fu yeepi useefi anga taawan? (Na a sani ya den e kai koni.) San a ageisitoli ya e leli u fu Yehofa anga Yesesi?

7. San a ageisitoli fu a sii fu a mosterd bon wani taki?

⁷ Leisi Mateyesi 13:31, 32. San a  ageisitoli fu a sii fu a mosterd bon wani taki? A mosterd sii be e soi go na Kownukondee bosikopu di wi e peleiki. Ai soi go tu na a Kelesten kemeente. Di a Kelesten kemeente be sete aini a yali 33, a á be bigi. A be de enke „a moo pikin wan fu ala den sii”. Ma baka wantu yali neen a kemeente bigin goo gawgaw. Sama á be denki taki a so gaw a be o goo (Kolosesama 1:23).Yesesi be taki „den foo fu hemel” be man „fende wan tanpeesi a den taka fi en”. Den foo ya e soi go a den bun ati sama. Den kemeente be o de enke wan kibii peesi anga wan peesi pe den sama ya be sa teke boo. A den kemeente be o gi den nyanyan tu. Dati a den leli fu Beibel di den be o fende aini den kemeente.​—Luku Eseikiyeli 17:23.

8. Saide meke Yesesi be gi a ageisitoli fu a sii fu a mosterd bon?

⁸ Saide meke Yesesi be gi a ageisitoli ya? A be wani soi u taki, leti enke fa a mosterd sii e goo kon toon wan gaan bon, a leti so a Kownukondee wooko e goo. Ai kibii sama tu. Sani á de di man tapu en. Ná pikin goo a Kelesten kemeente goo fanafu a yali 1914 (Yesaya 60:22). A Kelesten kemeente e yeepi den sama di de aini fu tan wan mati fu Yehofa (Odo 2:7; Yesaya 32:1, 2). Sama á de di poi tapu  a Kelesten kemeente fu goo.​—Yesaya 54:17.

9. (a) San wi e leli fu a ageisitoli fu a sii fu a mosterd bon? (b) San a toli ya e leli u fu Yehofa anga Yesesi?

⁹ San wi e leli fu a ageisitoli di Yesesi be gi fu a sii fu a mosterd bon? A kan taki Kotoigi ná ipi ape yu e tan. Kande sama nái kon gawgaw a waaleiti tu. Ma tokuso u mu holi a pakisei taki sani á de di taanga tumisi gi a Kownukondee. Te wi e holi a sani ya a pakisei da a o yeepi wi fu holidoo. Di Baala Edwin Skinner be go a India aini a yali 1926, da a teli sii Kotoigi namo be de a India. A peleikiwooko be taanga a ten de, bika sama á be e kon makiliki a waaleiti. Fu di a baala ya á be gi abaa meke a kon si taki sani á de di taanga tumisi gi a Kownukondee. Tide na a dei a moo enke 37.000 Kotoigi de aini India. Aini a yali 2013, a moo enke 108.000 sama be de na membee fesa. Na aseefi yali di Baala Edwin go a India, a wooko bigin aini Sambia. Nownow a moo enke 170.000 Kotoigi de aini Sambia. Moo enke 763.915 sama be de na a membee fesa aini yali 2013. Dati wani taki te i teli 18 sama aini Sambia da wan fu den 18 sama be go na membee fesa. A wooko fu a Kownukondee go a fesi tuutuu!

10. San a ageisitoli fu a sowda wani taki?

¹⁰ Leisi Mateyesi 13:33. San a ageisitoli fu a sowda wani taki? A toli ya e soi go na a Kownukondee bosikopu anga a fasi fa a bosikopu ya e yeepi sama fu daai den libi. „Ala a bolon” na ala den foluku fu goontapu. A fasi fa a bolon e soopu e soi go na a fasi fa a Kownukondee bosikopu e paati go na ala se fu di wi e du a peleikiwooko. Aladi u man si na a sii fu a mosterd bon taki ai goo, yu á poi si kiin kiin fa a bolon e soopu. A bakaten fosi yu e si taki a bolon soopu.

11. Saide meke Yesesi be gi a ageisitoli fu a sowda?

¹¹ Saide meke Yesesi be gi a ageisitoli ya? Yesesi be wani soi taki a Kownukondee bosikopu be o man doo te a „den moo faawe uku fu goontapu”. A be o man meke sama kengi a fasi fa den e libi tu (Toli 1:8). A kan taki na a bigin u nái si fa sama e kengi, ma den e kengi. Na ala se sama e aliki a Kownukondee bosikopu. A so den e kengi a fasi fa den e libi.​—Romesama 12:2; Efeisesama 4:22, 23.

12, 13. Taki fa a Kownukondee bosikopu e doo na ala se leti enke fa a sowda aini a ageisitoli fu Yesesi e soopu a bolon.

¹² Son leisi a baka omen yali fosi  yu e si a bakapisi fu a peleikiwooko. Aini a yali 1982 da Franz anga en uman Margit di be de a Betel a Balazilikondee be e peleiki aini wan pikin foto. A omen Beibelsutudi den be abi. Den be e sutudeli anga wan folow di be abi fo pikin. A moo gaan boi fi en be abi 12 yali. Sen be lobi kisi a boi ya. Ala yuu te den be go fu sutudeli a be e wani go kibii. Fu di den baala be gi Franz anga en uman wan taa wooko meke den á be poi sutudeli anga den moo. Baka 25 yali den be go luku den sama ya baka. Den go miti wan kemeente de di be abi 69 peleikiman. Tin na dii fu den sama ya a be kowownu pionili. Den be e holi komakandaa aini wan nyun Kownukondee zaal. A boi di be e sen kon bigi te a toon fesiman fu den owluman aini a kemeente. Leti enke fa a sowda aini a ageisitoli fu Yesesi e soopu a bolon, a letiso a Kownukondee bosikopu be paati na ala se. A sani ya be yeepi omen sama fu kengi den libi.

¹³ Na ala se a Kownukondee bosikopu e kengi sama libi, seefi aini kondee pe den tapu a peleikiwooko. Wi e foondoo te wi e yee a fasi fa a bosikopu e paati aini den sowtu kondee de. Aini a yali 1910, sama bigin peleiki aini Cuba. Baala Russel be go ape aini a yali 1913. Biginbigin peleikiman á be ipi seefi. Ma fa a wooko de a Cuba aini a ten ya? A moo enke 96.000 peleikiman de ape di e peleiki a bun nyunsu. Aini 2013, a 229.726 sama be go na a membee fesa. Dati wani taki te i teli 48 sama aini Cuba da wan fu den 48 sama be go na a membee fesa. Ma aini den kondee seefi pe den á tapu a wooko, a Kownukondee bosikopu e doo peesi pe den Kotoigi be pakisei taki sama nái peleiki. * (Luku san sikiifi a ondoose.)​—Peleikiman 8:7; 11:5.

14, 15. (a) Sowtu wini wi e fende fu a sani di Yesesi e leli wi aini a ageisitoli fu a sowda? (b) San a toli ya e leli u fu Yehofa anga Yesesi?

¹⁴ Sowtu wini wi e fende fu a sani di Yesesi e leli wi aini a ageisitoli fu a sowda? Te wi e pakisei san a ageisitoli fu a sowda wani taki, da wi e fusutan taki u ná abi fu booko wi ede fa a Kownukondee bosikopu o doo den miliyun miliyun sama di á yee a bosikopu ya ete, bika a Yehofa e seeka a wooko. Ma san wi mu du? A Wowtu fu Gadu e taki: „Paandi i sii a mamanten. Yu ana á mu boo fosi neti tapu, bika yu á sabi on du fu den sii o goo. A kan taki na a wan ya, a kan taki na a taawan. A kan tu taki ala den tu goo” (Peleikiman 11:6). Ma noiti u mu feegete fu begi Yehofa fu a peleikiwooko go a fesi, moomoo aini den kondee pe den tapu a wooko.​—Efeisesama 6:18-20.

 ¹⁵ Wan taa sani tu, a taki wi á mu fii booko saka te wi nái si den wini wantenwanten fu a peleiki di wi e peleiki. Wi á mu si enke a ná abi wini te a wooko e bigin pikinpikin (Sakaliya 4:10). Te fu kaba, wiseefi o si taki sani o go moo bun moo enke san u be pakisei.​—Psalm 40:5; Sakaliya 4:7.

16. San a ageisitoli fu a man di e waka e bai sani seli anga a ageisitoli fu a gudu di de kibii kibii wani taki?

¹⁶ Leisi Mateyesi 13:44-46. San a ageisitoli fu a man di e waka e bai sani seli anga a ageisitoli fu a gudu di de kibii kibii wani taki? A ten fu Yesesi, son guduman be e teke gaan langa waka e suku den moo moin parel (wan sowtu dii kaala) fu bai. A „dii parel” aini a ageisitoli fu Yesesi a den moin toli fu a Kownukondee. A man a den bun-ati sama di e suku a waaleiti na ala se. A man be wani seli ala san a abi „wantenwanten” fu bai a dii parel ya. Yesesi be gi wan ageisitoli tu fu wan man di be e wooko a wan goon neen a fende wan „gudu di de kibii kibii”. Ma a man ya á be e suku gudu enke a man di e waka e bai sani seli. Ma di a fusutan taki a wan dii sani a be fende, neen a seli „ala san” a be abi fu man bai a gudu ya.

17. Saide meke Yesesi be gi a ageisitoli fu a man di e waka a peesi peesi e bai sani e seli anga a ageisitoli fu a gudu di de kibii kibii?

¹⁷ Saide meke Yesesi be gi den ageisitoli ya? A be wani soi taki na ala sowtu fasi sama sa fende a waaleiti. Son sama e fende en fu di denseefi e suku en. Den de kabakaba fu poti sani di den lobi a wan se. Taa sama e fende waaleiti aladi a ná denseefi e go suku en. Kande den e fende en te sama peleiki gi den. Ala den tu man aini den ageisitoli fusutan taki den fende wan dii sani, neen meke den be de kabakaba fu seli ala san den be abi fu man bai a gudu ya.

18. (a) Sowtu wini wi e fende fu den tu ageisitoli ya? (b) San a toli ya e leli u fu Yehofa anga Yesesi?

¹⁸ Sowtu wini wi e fende fu den tu ageisitoli ya? (Mateyesi 6:19-21) Akisi iseefi den sani ya: ’Mi e denki enke den tu man ya? Mi e si waaleiti enke wan gudu tu? Mi de kabakaba fu fika son sani? Mi e meke sani enke den booko ede fu a libi puu mi pakisei na a waaleiti?’ (Mateyesi 6:22-24, 33; Lukasi 5:27, 28; Filipisama 3:8) Efu u lobi a waaleiti tuutuu, wi o du ala san u man fu poti en a fesi aini u libi.

19. Fu sowtu toli wi o taki aini a taa artikel?

¹⁹ A fasi fa wi o libi mu soi taki a ná aliki wawan wi aliki, ma u fusutan san den ageisitoli ya wani taki tu. Holi a pakisei taki ná sabi wawan u mu sabi san den wani taki. U mu wooko anga den tu. Aini a taa artikel, wi o taki fu ete dii ageisitoli. Wi o luku tu san u sa leli fu den.