Puubei fu abi deki-ati anga koni enke Yesesi
„Noiti wi á si en, ma tokuso u lobi en. Anga ala fa u nái si en nownow, tokuso wi e poti biibi aini en.”—1 PEITILISI 1:8.
1, 2. (a) San u mu du efu u wani libi fu teego? (b) San o yeepi u fu wi á komoto na a pasi di wi e waka enke Kelesten?
TE U toon Kelesten, da a leti enke u bigin waka wan pasi. Efu u wani sani waka u bun te wi e waka a pasi ya, da u mu tan dini Yehofa. A sani de o meke u fende a teego libi. Yesesi be taki: „Na a sama di holidoo te na a kaba o fende libi” (Mateyesi 24:13). Taa fasi á de, efu u wani doo na a kaba fu a pasi ya, da u mu tan dini Yehofa te enke u boo koti efuso te enke a „kaba” fu a goontapu ya doo. Ma u mu luku bun tu fu a goontapu ya á puu wi na a pasi di wi e waka enke Kelesten (1 Yohanisi 2:15-17). San o yeepi u fu wi á komoto na a pasi ya?
2 Yesesi be soi u fa u sa waka neen baka. Efu u leisi den pisi fu Beibel di e taki fu a libi fi en, da wi o kon sabi den manii fi en. A sani de o yeepi u fu u lobi en. A o yeepi u tu fu poti biibi aini en. (Leisi 1 Peitilisi 1:8, 9.) A apostel Peitilisi sikiifi taki Yesesi soi u fa u sa waka neen baka (1 Peitilisi 2:21). Efu u du ala san u man fu waka a Yesesi baka, da wi o poi holidoo te na a kaba. * (Luku san sikiifi a ondoose.) Aini a artikel di pasa, u be luku fa u sa abi sakafasi anga tyali-ati enke Yesesi. Aini a artikel ya wi o luku fa u sa abi deki-ati anga koni enke Yesesi.
YESESI ABI DEKI-ATI
3. San a deki-ati? San o yeepi u fu abi deki-ati?
3 Deki-ati a wan fii di e gi wi taanga-sikin. Ai yeepi u fu wi á gi abaa te sani e miti u. Ai yeepi u tu fu du sani a wan leti fasi. Deki-ati e yeepi u fu tan dini Gadu winsi tesi e miti u. Den sani di o yeepi u fu abi deki-ati na a feele di u mu feele Yehofa, howpu, anga lobi. Fa den sani ya o yeepi u? A feele di wi e feele fu du sani di Yehofa á lobi, o yeepi u fu wi á feele libisama (1 Samuweli 11:7; Odo 29:25). A howpu di Yehofa gi u e yeepi u fu wi á booko wi ede tumisi te tesi e miti u, ma fu poti pakisei a den wini di wi o fende aini a ten di e kon (Psalm 27:14). Lobi o yeepi u fu abi deki-ati, awinsi sama e du ogii anga u (Yohanisi 15:13). Efu u wani abi deki-ati u mu fitoow Yehofa, u mu waka neen manpikin baka tu.—Psalm 28:7.
4. Fa Yesesi soi taki a abi deki-ati di a be de aini a tempel? (Luku a fowtow na a bigin.)
4 Di Yesesi be abi 12 yali, a be abi deki-ati. Wan leisi a „be sidon a den leliman mindii” aini a tempel. (Leisi Lukasi 2:41-47.) Den fesiman fu a Dyu biibi be sabi a Weiti fu Mosesi finifini. Ma á na dati wawan, den be sabi den gwenti fu den afo fu den bun tu. Den gwenti ya be e meke a moo taanga gi sama fu du san a Weiti e taki. Anga ala fa den fesiman fu a Dyu biibi be sabi a Weiti finifini, tokuso Yesesi á be e feele fu taki anga den. A be e „akisi den sani”. Den akisi ya a ná be pikinengee aksi. Ma den akisi ya be e meke den man go sidon denki. Den leliman be e suku fu fasi en anga akisi, ma den á be poi. Ala den sama di be e aliki den sani di Yesesi be e taki be e foondoo „di den be si fa a be koni anga a fasi fa a be e piki den akisi”. Yesesi á be e feele fu taigi sama san a Wowtu fu Gadu e taki!
5 Fa Yesesi soi taki a abi deki-ati di a be e peleiki?
5 A omen fasi Yesesi soi taki a abi deki-ati di a be e du a peleikiwooko. A be e taigi den sama taki den fesiman fu a Dyu biibi be e koli den anga den falisi sani di den be e leli den (Mateyesi 23:13-36). A á be e meke den sama poli den bun manii fi en (Yohanisi 16:33) Winsi sama be e suku fu du ogii anga en, a be e go doo anga a peleikiwooko (Yohanisi 5:15-18; 7:14). A tu leisi a yagi den sama di ben e poli a tuu biibi puu aini a tempel.—Mateyesi 21:12, 13; Yohanisi 2:14-17.
Di den kuutubakaa fu den Dyu di be e sidon a den moo gaan kuutu fu den Dyu be e poti akisi gi Yesesi, a á feele fu taigi den taki neen na Kelestesi, a manpikin fu Gadu
6. Fa Yesesi soi taki a abi deki-ati na a lasiti dei fi en libi a goontapu ya?
6 Meke u go luku fa Yesesi be soi deki-ati na a lasiti dei di a be de a goontapu ya enke wan libisama. Yesesi be sabi san be o miti en te Yudasi be o seli en. Tokuso a taigi Yudasi na a Paskafesa taki: „Go du a sani di i wani du esi esi” (Yohanisi 13:21-27). Di a be de aini a dyali fu Getsemanei, a á be feele fu taigi den suudati di be kon suku en taki neen na Yesesi. Winsi fa ogii be o miti en, tokuso a kiibi den disipel fi en, bika a taigi den suudati taki: „Fika den man ya meke den gwe” (Yohanisi 18:1-8). Bakaten di den kuutubakaa fu den Dyu di be e sidon a den moo gaan kuutu be e poti akisi gi en, a á feele fu taigi den taki neen na Kelestesi, a manpikin fu Gadu. Winsi fa a be sabi taki a suku a hei pilisite be e suku wan fasi fu kii en, toku a á be e feele (Malikisi 14:60-65). Yesesi tan du san Gadu wani. Neen meke a dede na a ponsu. Fosi en boo koti, neen a bali taki: „A kaba!”—Yohanisi 19:28-30.
PUUBEI FU ABI DEKI-ATI ENKE YESESI
7. Efu yu a wan yonkuuwan, fa yu e fii fu de wan Yehofa Kotoigi? Fa i sa soi taki yu abi deki-ati?
7 Fa u sa soi taki wi abi deki-ati enke Yesesi? Te i de a sikoo. Efu yu a wan yonkuuwan, i sa soi taki yu abi deki-ati, te yu e taigi den sikoo pikin anga taawan taki yu a wan Yehofa Kotoigi. Te yu e du a sani ya, da yu e soi taki ai bigi gi i fu tyai a nen fu Yehofa, winsi den o go e soso i. (Leisi Psalm 86:12.) Son sama o wani i biibi taki wi a mongii paansu. Ma i sa biibi den leli fu Beibel di e soi u taki a Gadu meke ala sani. I sa wooko anga a bolosilo Vijf belangrijke vragen over het ontstaan van het leven fu „piki den sama te den akisi u wan sani fu a biibi fu u” (1 Peitilisi 3:15). Yu o fii bun fu di i sabi taki i taki fu a biibi fi i sondee fu feele.
8. San a den sani di e gi u deki-ati fu peleiki?
8 Te wi e peleiki. Enke tuutuu Kelesten, ’u nái feele fu taki anga den sama, bika Yehofa gi wi a makiti fu du so’ (Toli 14:3). Saide u poi peleiki sondee fu feele? A fosi sani, a fu di u sabi taki den sani di wi e leli sama sikiifi aini Beibel. Den sani ya a ná lei toli (Yohanisi 17:17). Du fu tu sani, a taki „wi a sama di e wooko makandii anga Gadu”. Yehofa e yeepi wi anga en santa yeye tu (1 Korentesama 3:9; Toli 4:31). A du fu dii sani, a taki u lobi Yehofa anga taa sama. Neen meke u wani du ala san u poi fu taki anga taa sama fu a bun nyunsu ya (Mateyesi 22:37-39). Fu di wi abi deki-ati meke noiti wi o tapu anga a peleikiwooko. Wi o tan meke sama sabi taki den keliki fesiman „beendi” a fusutan fu den anga den falisi sani di den e leli den (2 Korentesama 4:4). Awinsi sama e du ogii anga wi efuso nái wani aliki u, tokuso wi o paati a bun nyunsu go doo.—1 Tesalonikasama 2:1, 2.
9. Fa u sa soi taki wi abi deki-ati te tesi e miti u?
9 Te tesi e miti u. Efu wi e fitoow Gadu, a o yeepi u fu abi a deki-ati anga a biibi di de fanowdu fu holidoo te tesi e miti u. Wi o tyali te wan sama di u lobi dede, ma u ná o lasi ati tumisi, bika wi abi wan howpu. U sabi taki „a Gadu di e toosutu wi te u de aini banowtu” o gi u taanga-sikin (2 Korentesama 1:3, 4; 1 Tesalonikasama 4:13). Winsi wi e fii pen te u siki efuso kisi mankei, tokuso u ná o teke deesi efuso dataa yeepi di Gadu nái fende bun (Toli 15:28, 29). „Awinsi sowtu sani e meke wi ati kuutu wi” te wi e fii booko-saka, u ná o gi abaa. Wi e fitoow Yehofa, bika neen na a sama di de „koosube fu den sama di booko-saka”. * (Luku san sikiifi a ondoose.)—1 Yohanisi 3:19, 20; Psalm 34:18.
YESESI KONI
10. Fa wan Kelesten di koni e tyai enseefi?
10 Te wan sama koni, da a sabi san bun anga san ogii. Fu di a koni, meke ai du san bun (Hebrewsama 5:14). Wan Kelesten di koni o du sani di o meke en anga Yehofa toon moo bun mati. Ai luku bun taki a nái taki sani di e hati taawan. Ma ai meke Yehofa piisii fu di ai taki sani di e meke taawan fii bun (Odo 11:12, 13). En „ati nái boon gaw” (Odo 14:29). Ai „waka na a bun pasi”. Dati wani taki a fasi fa ai libi efuso e du sani e soi taki a koni (Odo 15:21). San o yeepi u fu u kon koni? U mu sutudeli a Wowtu fu Gadu, da u du san ai taki (Odo 2:1-5, 10, 11). U sa ondoosuku a libi fu Yesesi tu fu si fa a be e du sani fu soi taki a koni, da u puubei fu waka neen baka.
11. Fa a fasi fa Yesesi be e taki be soi taki a koni?
11 Den sani di Yesesi be e taki anga den sani di a be e du be e soi taki a koni. A fasi fa a be e taki. A fasi fa Yesesi be e taki be e foondoo sama (Mateyesi 7:28; Lukasi 4:22). Te a be e taki anga sama, a be lobi soi den san a Wowtu fu Gadu e taki. A be sabi sowtu tekisi a be mu koboloiki te a be e taki anga den sama (Mateyesi 4:4, 7, 10; 12:1-5; Lukasi 4:16-21). Te Yesesi be e tyai a Wowtu fu Gadu kon a kiin, da a sani de be e doo a ati fu den sama di be e aliki en. Baka di Yesesi opobaka, a be taki anga tu disipel fi en di be de a pasi e go a Emayesi foto. A be yeepi den fu „fusutan ala den sani fi en di sikiifi aini Gadu buku”. Bakaten neen den disipel ya be taki: „Luku fa wi ati be e piisii di a be e meke u fusutan finifini san sikiifi aini Gadu Buku, di a be e waka anga wi a pasi.”—Lukasi 24:27, 32.
12, 13. Fa u du sabi taki Yesesi ati á be e boon gawgaw? Fa u du sabi taki a be e holi taawan a pakisei?
12 Den fii anga den manii fi en. Koni be e yeepi Yesesi fi en ati á boon gawgaw (Odo 16:32). A be poi holi enseefi. A be abi „safu-ati” tu (Mateyesi 11:29). Awinsi fa den disipel fi en be e meke fowtu ala yuu, toku a be abi pasensi anga den (Malikisi 14:34-38; Lukasi 22:24-27). Winsi fa sama be e du ogii anga en, toku a be e holi enseefi.—1 Peitilisi 2:23.
13 Fu di Yesesi be koni meke a be e Malikisi 5:25-34.) A uman be pasa a tyaipi sama ini go holi a koosi fu Yesesi. Neen a kon betee. Enke fa a Weiti be e taki, da a uman á be mu holi nawan sama, bika a á be kiin (Lefitikesi 15:25-27). Ma Yesus be e fusutan taki den moo pelensipali leli fu a Weiti be e soi taki wan sama be mu abi tyali-ati anga taawan. A be mu du sani enke fa Gadu wani tu. Neen meke a á be puu kaasi gi a uman (Mateyesi 23:23). A wan switifasi Yesesi taigi a uman ya taki: „Mi umanpikin, a biibi fi i meki i betee. Ná booko yu ede moo. I ná o abi a takuu siki ya moo.” A toli ya e soi u kiin taki a koni di Yesesi be abi be e yeepi en fu a soi switifasi.
holi taawan a pakisei. A be sabi san Yehofa be wani leli den Islayelisama anga a Weiti fu Mosesi. I be e si a sani ya na a fasi fa a be e libi anga taawan. Denki a toli fu a uman di „be de neen futu” 12 yali langa. (Leisi14. Sowtu wooko be moo pelensipali gi Yesesi? San be yeepi en fu poti a wooko ya a fesi?
14 A fasi fa a be e libi. Te i luku a fasi fa Yesesi be e libi, da i be e si taki a be koni. A peleikiwooko be de a moo pelensipali wooko gi en (Lukasi 4:43). Yesesi be e du sani tu di be o yeepi en fu poti pakisei na a wooko ya anga a kaba di a be mu kaba en. Fu di a be wani koboloiki en ten anga kaakiti gi a peleikiwooko, meke a á be e libi bigi (Lukasi 9:58). A be sabi taki a de taanga fanowdu fu leli taawan fu du a peleikiwooko. Te a be o dede, a den sama ya be o du a wooko ya go doo (Lukasi 10:1-12; Yohanisi 14:12). A be paamisi den disipel fi en taki a be o yeepi den anga a peleikiwooko „te enke a kaba fu a goontapu doo”.—Mateyesi 28:19, 20.
PUUBEI FU KONI ENKE YESESI
Te u koni da wi o puubei fu fusutan san taawan abi fanowdu. Baka dati u mu denki bun fosi u taki (Luku paragraaf 15)
15. Fa u sa soi taki u koni te wi e taki anga taawan?
15 San o yeepi u fu koni enke Yesesi? A fasi fa wi e taki. Te wi e taki anga u baala anga sisa, da u mu taki sani di e gi den taanga-sikin pe fu u taki sani di o booko den saka (Efeisesama 4:29). Te wi e taki anga taawan fu Gadu Kownukondee, da den sani di wi e taki „mu abi sawtu”. Dati wani taki wi á mu e taki sani di e hati taawan (Kolosesama 4:6). U mu puubei fu fusutan san taawan abi fanowdu anga san a den sani di den lobi. Baka dati u mu denki bun fosi u taki. Te wi e taki a wan switifasi, da sama o wani aliki u. A bosikopu fu u o doo den ati tu. Te wi e taki fu a biibi fu u, da ala yuu u mu meke moiti fu leisi Beibeltekisi gi den sama, bika na a Wowtu fu Gadu e yeepi sama fu kengi. U sabi taki a bosikopu fu Beibel e taki anga sama moo iniiwan sani di useefi be sa taki.—Hebrewsama 4:12.
16, 17. (a) San o yeepi u fu wi ati á boon gawgaw? San o yeepi u fu holi a fii fu taawan a pakisei? (b) San o yeepi u fu poti a peleikiwooko a fesi aini u libi?
16 Den fii anga den manii fu u. Koni o yeepi u fu holi useefi. Te u poi holi useefi da wi ati ná o go e boon gawgaw (Yakowbesi 1:19). Efu wi e fusutan fu saide wan sama du efuso taigi u wan hati sani, da a o moo makiliki gi u fu gi en paadon (Odo 19:11). Koni o yeepi u fu holi den fii fu taawan a pakisei tu. Wi o holi a pakisei taki den baala anga sisa fu u a sama di e meke fowtu. A kan taki sani e miti den di wi á sabi. Neen meke u mu e aliki te den e taigi u fa den e denki. Da efu a kan, u mu puubei fu du sani enke fa den wani, pe fu u du sani namonamo enke fa useefi wani.—Filipisama 4:5.
17 A fasi fa wi e libi. U sabi taki a paati di wi e paati a bun nyunsu na a moo moin gaandi di wi abi. Neen meke u wani du sani di o yeepi u fu poti a peleikiwooko a fesi. U wani poti Yehofa a fesi aini u libi. U nái suku fu libi bigi, fu di u wani koboloiki u ten anga u kaakiti fu du ala san u poi fu paati a bun nyunsu gi taawan fosi a kaba doo.—Mateyesi 6:33; 24:14.
18. San o yeepi u fu tan waka na a pasi di e tyai u go a teego libi? San i wani du baka di u kaba sutudeli a artikel ya?
18 Wi e piisii fa u kon sabi wantu fu den moin manii fu Yesesi! Pakisei den wini di wi o fende fu leli sabi den taa bun manii fi en efuso den wini di wi o fende te wi e puubei fu du sani enke en. Neen meke u mu du ala san u poi fu waka neen baka. A so wi o tan waka na a pasi di e tyai u go a teego libi. Wi o kon moo koosube a Yehofa tu!
^ paragraaf 2 A tekisi fu 1 Peitilisi 1:8, 9 be sikiifi gi den Kelesten di o go a hemel. Ma tokuso a tekisi ya e teli tu gi den Kelesten di o libi fu teego a goontapu.
^ paragraaf 9 Luku wantu toli fu sama di be abi deki-ati aladi polobelema be e miti den, aini A Waktitoren fu 1 december 2000, bladzijde 24-28; Ontwaakt! 22 april 2003, bladzijde 18-21; nanga a di fu 22 yanuari 1995, bladzijde 11-15.