NA A 28 april 2013, den be holi wan gaan komakandaa a Nagoya, wan peesi aini Yapankondee. Na a komakandaa ya Anthony Morris, wan fu den baala di e tii a wooko fu u, piki den sama di be de ape taki den be meke wan nyun buku aini Yapantongo. A nen fu a buku na The Bible​—The Gospel According to Matthew (A Beibel buku di Mateyesi sikiifi). A moo enke 210.000 sama be e aliki a komakandaa ya. Son wan fu den be e luku a komakandaa a gaan tv. Di den yee a nyunsu ya, neen den naki ana wan hii pisi ten fu soi taki den e piisii.

Na a Beibel buku fu Mateyesi di be de kaba aini a Nyun-Grontapuvertaling den meke taa fasi aini Yapantongo. Tokuso a buku ya di abi 128 bladzijde de taa fasi. Baala Morris taki a den sama fu Yapan den meke en gi. Saide meke a buku ya de taa fasi? Saide meke a be de fanowdu? San sama taki di den leisi en?

A omen sama be foondoo di den si fa a buku be sikiifi. I sa sikiifi a Yapantongo komoto a tapu go a ondoo, efuso i sa bigin ai kukutu ana go ai leti ana. Te sama e sikiifi buku aini Yapantongo, da gaanse fu den e bigin a den kukutu ana go a den leti ana. A so a olikanisâsi e sikiifi den buku fu u aini Yapantongo. Ma a olikanisâsi sikiifi den wowtu fu a nyun buku ya komoto a tapu go a ondoo. A so sama e sikiifi gaanse fu den kolanti aini Yapan. Te den wowtu sikiifi so, da a moo makiliki fu leisi. Den baala puu den sani di den be gwenti sikiifi te a tapuse fu den bladzijde poti go a pe a toli de e bigin. A sani de e meke a moo makiliki fu si den moo pelensipali pisi.

Den baala anga sisa fu Yapan be bigin leisi a buku ya wanten wanten. Wan sisa di pasa 80 yali taki: „A omen toon mi leisi Mateyesi. Ma di den sikiifi den wowtu komoto a tapu go a ondoo, neen mi fusutan den sani di Yesesi taki aini Mateyesi 5 te anga 7 moo bun. Den pisi di den baala be gwenti sikiifi a tapuse fu den bladzijde yeepi mi tu.” Wan yonkuu sisa sikiifi taki: „Di mi bigin leisi a buku ya mi á tapu, mi leisi en te a kaba. Mi gwenti a sikiifi di sama e sikiifi a Yapantongo fu kukutu ana go a leti ana. Ma gaanse sama fu Yapan moo lobi te den wowtu sikiifi komoto a tapu go a ondoo.”

Saide meke a Beibel buku fu Mateyesi bun gi den sama fu Yapan? Winsi fa den sama fu Yapan á kaba sabi sani fu Beibel, tokuso den wani leisi en. Somen fu den di á be si wan Beibel ete, abi a okasi now fu holi efuso leisi wan fu den buku fu Beibel.

Saide meke na a buku fu Mateyesi den baala teke? Te gaanse sama aini Yapan e yee a wowtu Beibel, da wanten wanten den e denki go a Yesesi. Den baala be si enke a buku fu Mateyesi fiti fu di ai taki fu a ten di Yesesi meke, den afo fi en, den sani di a  be leli sama na a mongo, anga den sani di a be taki o pasa aini den lasiti dei. Ala den toli ya a sani di den sama fu Yapan lobi.

Wanten wanten den peleikiman aini Yapan bigin paati a buku ya osu fu osu. Den be e paati en tu te den be e go a den sama baka di be wani sabi moo. Wan sisa be sikiifi taki: „Nownow mi abi moo okasi fu taki fu a Wowtu fu Gadu anga den sama na a pisi pe wi e peleiki. A bakadina seefi fu a dei di den holi a gaan komakandaa mi paati wan buku fu Mateyesi.”

Fa den peleikiman e paati a nyun buku ya? A omen sama fu Yapan sabi wantu sani fu Beibel. Den sabi den pisi enke „a sumaa doo”, „parel gi agu”, „ná booko yu ede anga a taa dei” (Mateyesi 6:34; 7:6, 13). Den e foondoo te den leli taki a Yesesi be taki den sani ya. Te den e leisi den sani ya aini a buku fu Mateyesi, a omen fu den e taki: „Ná a tide mi be wani leisi a Beibel, winsi a wan kodo leisi.”

Di den peleikiman go a den sama baka di den be gi a buku, da omen sama taki a wanten wanten den leisi a hii buku efuso wan pisi fi en. Wan man di pasa 60 yali taigi wan peleikiman taki: „Di mi leisi a buku ya omen leisi mi fii bun. Gaantangi baa, leli mi moo sani fu Beibel.”

Den peleikiman e paati a buku ya tu te den e peleiki a peesi pe ipi sama e pasa. Di wan sisa paati a buku ya gi wan yonkuu uman, neen a sikiifi en email adres gi en. Wan yuu baka di den taki, neen a uman sikiifi taigi a sisa taki a leisi wan pisi fu a buku. A wani sabi moo. Baka wan wiki neen a sisa sutudeli anga a uman fu a fosi leisi. Bakaten a bigin go a komakandaa.

A moo enke 1.600.000 fu a buku ya den sende anga sipi go a den kemeente fu Yapan. Ala mun den Kotoigi e paati dunsudunsu fu a buku ya. A pisi di den baala sikiifi a fesise fu a buku, e soi san den abi a pakisei. Den sikiifi taki: „U howpu i wani sabi moo fu Beibel te i leisi a buku ya.”