A PELEIKIWOOKO na a moo fanowdu wooko di wi e du aini a ten ya. U mu teke en fu bigi taki Yehofa e meke u du a wooko ya. Ma tokuso, á a makiliki gi den pionili anga den peleikiman fu tan lobi a peleikiwooko. Fu saide?

Son peleikiman e taki te den e peleiki osu fu osu den nái miti sama. Ma te den sama de a osu, den nái wani aliki. Son wan fu den ati e boon a wi. Taa peleikiman baka, e si enke noiti den o poi peleiki gi ala sama di e tan na a pisi pe a kemeente fu den e peleiki, bika a pisi fu den bigi tumisi. Taawan lasi ati fu di a omen yali den e peleiki, ma a kaba á kon ete.

A omen sani sa gi u booko-ede aini a peleikiwooko. Wi e tan aini wan goontapu di de na a „ogiiwan” ondoo. A „ogiiwan” a Saatan Didibii. Neen ede meke u sabi taki a ná o makiliki gi u fu paati a bun nyunsu.​—1 Yohanisi 5:19.

Winsi sowtu booko-ede yu abi aini a peleikiwooko, i sa abi a biibi taki Yehofa o yeepi i. Ma san i mu du fu tan lobi a peleikiwooko? Meke u go luku wantu sani di sa yeepi u.

A omen sama e dopu ala yali enke Kotoigi fu Yehofa. Efu yu a wan fu den sama di dopu nyunyun, a omen sani i sa leli fu den sama di e du a peleikiwooko wan pisi ten kaba. Efu yu a wan sama di e peleiki omen yali kaba, i poi yeepi nyun peleikiman fu peleiki moo bun? Yu o fii bun te yu o yeepi den.

Yesesi be sabi taki den bakaman fi en be o abi yeepi fanowdu fu toon bun leliman. A be leli den tu fa den mu du a peleikiwooko (Lukasi 8:1). Aini a ten ya den sama di dopu nyunyun abi yeepi fanowdu tu fu toon bun leliman.

Wi á mu denki taki a te wan nyun peleikiman e go aini a peleikiwooko, da a leli ai leli kaba fa fu peleiki. A abi wan sama fanowdu fu soi en finifini fa a mu du a peleikiwooko. Wan sama di  abi switifasi anga lobi. A peleikiman di abi ondoofeni mu leli en (1) fa a mu seeka enseefi a fesi fu taki anga den sama aini a peleikiwooko, (2) fa a mu bigin taki anga wan sama, (3) fa a mu paati buku, (4) san a mu du te ai go a den sama baka di be aliki (5) fa a sa bigin wan Beibelsutudi anga wan sama. Wan nyun peleikiman sa toon wan bun leliman te ai meke moiti fu leli sama enke den peleikiman di abi ondoofeni (Lukas 6:40). Den nyun peleikiman e fii moo bun te den sabi taki u de kaba kaba fu yeepi den te a de fanowdu. Wi o man yeepi den nyun peleikiman te wi e gafa den. Wi o man yeepi den tu te wi soi den fa den sa du a peleikiwooko moo bun.​—Peleikiman 4:9, 10.

Son dei wi o go e meke moiti fu taki anga sama aini a peleikiwooko, ma den ná o aliki u. Kande a wan enkii sama di yu anga en o taki bunbun a dei de aini a peleikiwooko, na a baala efuso a sisa di e wooko makandaa anga i. Yu á mu feegete taki Yesesi be sende „tu tu fu den” bakaman fi en go peleiki (Lukasi 10:1). Te den be e wooko anga makandaa, den be e man gi makandaa taanga-sikin. Te wi e wooko anga u baala anga sisa aini a peleikiwooko wi abi a okasi fu „taanga makandaa”.​—Romesama 1:12.

Fu sowtu toli u sa taki? Wan sani de di be gi wan fu u taanga-sikin aini a peleikiwooko? I be leli wan moin sani na a Osufamii Anbegi efuso di i be e sutudeli? I leli wan sani a komakandaa di gi i taanga-sikin? Son leisi wi e wooko anga wan peleikiman di wi á kaba sabi bunbun. Sonten i sa akisi en fa a du leli sabi a waaleiti. Saide ai biibi taki a de aini a olikanisâsi fu Yehofa? Sowtu gaandi a abi? Fa Yehofa holibaka gi en aini waaleiti? Son leisi i sa gi en ondoofeni toli fi iseefi. Winsi sama e aliki efuso den nái aliki, tokuso yu anga a sama di e wooko abi a okasi fu „yeepi makandaa”.​—1 Tesalonikasama 5:11.

Efu u wani tan lobi a peleikiwooko, da u mu puubei fu ondoosuku sani moo fini te wi e sutudeli. „A koni saafu di u sa fitoow” meke omen buku di u sa koboloiki fu du a sani de (Mateyesi 24:45). Meke u go luku wan fu den toli di i sa sutudeli. Sonten i sa luku a akisi ya: Saide a peleikiwooko de taanga fanowdu? A faki „ Fu saide i mu meke moiti fu tan lobi a peleikiwooko?” e soi fu saide.

 A lobi di i abi gi a peleikiwooko o kon moo taanga efi i ondoosuku den toli di sikiifi aini a faki. Te yu e sutudeli, da kande i sa pakisei taa Beibeltekisi tu di o yeepi i fu lobi a peleikiwooko. Baka dati i mu sidon denki fu den toli ya. Te yu e du den sani ya, da yu o moo lobi a peleikiwooko.

Ala yuu a olikanisâsi fu Yehofa e soi u fa u sa du a peleikiwooko moo bun. Boiti taki wi e peleiki osu fu osu, u sa sikiifi biifi gi sama, u sa telefon sama, u sa peleiki a sitaati, efuso a peesi pe ipi sama de. U sa peleiki gi den sama a pe den e wooko. U sa peleiki gi sama winsi pe wi e miti den. U sa go peleiki tu a den peesi pe Kotoigi ná ipi, efuso peesi pe Kotoigi á de seefi seefi.

I de kaba kaba fu peleiki a wan taa fasi? Somen sama be abi bun bakapisi di den puubei den sani ya. Wi o taki fu dii fu den sama ya.

Wan sisa di den e kai April be puubei fu bigin Beibelsutudi leti enke fa wan fu den Kownukondee diniwooko fu u e taki. A akisi dii sama neen wookope efu den wani sutudeli Beibel. A be foondoo di ala den dii sama piki en taki den wani. A be piisii di a si taki ala den dii be bigin kon a komakandaa.

U be leli tu taki efu wan toli sikiifi aini wan fu den buku fu u, da u mu pakisei sama a den sama di u denki o lobi en. Wan kelen-owluman aini Ameekankondee taki a be paati wan Ontwaakt! di e taki fu banti gi wantu basi fu den wenkii di e seli banti. En anga en uman paati omen fu a Ontwaakt! „Heb begrip voor uw arts” a moo enke 100 dataa osu. A taki a fu di den be du a sani ya meke wantu sama e fusutan a  wooko di wi enke Kotoigi e du moo bun. Den kon sabi den buku fu u tu. Baka di a kelen-owluman anga en uman be kon sabi den sama fu a pisi de moo bun, neen den ben kon abi moo ipi gobaka.

Wan sisa di den e kai Judy be sikiifi wan biifi gi den baala fu a edekantoo, fu gi den daa fu di den gi peleikiman deki-ati fu peleiki gi taawan a telefon. A taki a mma fi en di abi 86 yali, ná abi wan bun gusontu, ma tokuso a gwenti peleiki gi sama a telefon. Neen meke nownow ai sutudeli a Beibel anga wan uman di abi 92 yali.

Den baala e soi wi a omen fasi fa u sa du a peleikiwooko moo bun. Den sani ya o yeepi u tuutuu efu u wooko anga den. Den o yeepi i fu tan lobi a peleikiwooko. A peleikiwooko o gi i piisii tu.

A ná te wi e paati tyaipi buku, e sutudeli Beibel anga omen sama, efuso e yeepi tyaipi sama fu toon Yehofa Kotoigi, da a wani taki wi abi bun bakapisi aini a peleikiwooko. Pakisei Nowa. Na a osufamii fi en wawan dini Yehofa anga ala fa a be peleiki gi somen sama. Ma tokuso Nowa be de wan bun peleikiman. A sani ya e leli u taki a moo pelensipali sani, na a dini di wi e dini Yehofa anga u hii ati.​—1 Korentesama 4:2.

A omen peleikiman kon fusutan taki den mu poti maiki di den poi doo efu den wani piisii te den e du a peleikiwooko. San a wantu fu den maiki ya? Wantu fu den sani ya sikiifi aini a faki „Poti maiki di i poi doo”.

Akisi Yehofa fu yeepi i fu sani waka bun gi i aini a peleikiwooko. Akisi en fu a yeepi i fu si a peleikiwooko enke wan pelensipali sani. Efi i doo den maiki di i be poti, yu o piisii, fu di i sabi taki yu e du ala san i poi fu paati a bun nyunsu.

A tuu taki a peleikiwooko á makiliki ala yuu. Ma a omen sani de di i sa du fu tan lobi a peleikiwooko. Te yu anga wan baala efuso sisa e wooko da u mu gi makandaa taanga-sikin anga den sani di wi e taki. Puubei fu ondoosuku sani moo fini te yu e sutudeli. Puubei fu wooko anga den sani di a olikanisâsi e soi u. Poti maiki di i sabi taki yu o poi doo. Ma a moo pelensipali sani di i mu holi a pakisei, a taki Yehofa gi i a gaandi fu paati a bun nyunsu fu di yu a wan Kotoigi fi en (Yesaya 43:10). Ná pikin piisii yu o piisii te yu o tan meke moiti fu lobi a peleikiwooko.