1, 2. Saide meke Yesesi be gi a ageisitoli fu den talenti?

YESESI be gi a ageisitoli fu den talenti fu soi den salufu bakaman fi en sowtu faantiwowtu den abi. Ma a ageisitoli ya e teli gi den taa bakaman fu Yesesi tu. Winsi wi o libi a hemel efuso a goontapu ya, ala u mu meke moiti fu fusutan san a ageisitoli ya wani taki.

² On ten Yesesi be gi a ageisitoli ya? Na a ten di a be e taigi den bakaman fi en san a den maiki di be o soi taki a toon Kownu, anga den maiki di be o soi taki den kiiboi dei bigin (Mateyesi 24:3). Neen meke a ageisitoli fu den talenti a wan fu den maiki ya. Ai kon tuu aini a ten fu u ya.

3. San wi e leli fu den ageisitoli di sikiifi aini Mateyesi kapitel 24 anga 25?

³ Di Yesesi be e gi a ageisitoli fu den talenti, a be taki fu ete dii ageisitoli di be o soi tu san be o pasa aini den kiiboi dei. Ala den ageisitoli ya e soi fa den bakaman fi en mu tyai denseefi aini den kiiboi dei. Den ageisitoli ya sikiifi aini Mateyesi 24:45 te go miti 25:46. A fosi  ageisitoli e taki fu a koni saafu di u sa fitoow. A koni saafu ya a den salufu baala di abi a faantiwowtu fu leli a foluku fu Yehofa. Den mu de sama di u sa fitoow anga sama di koni. * (Luku san sikiifi a ondoose.) A ageisitoli baka a wan de e taki fu den tin uman di á didon anga man ete. Aini a ageisitoli ya, Yesesi e taigi ala den salufu Kelesten taki den mu de na ain. Den mu de seekaseeka tu, bika den á sabi a dei anga a yuu di a o kon. * (Luku san sikiifi a ondoose.) Baka dati Yesesi e gi a ageisitoli fu den talenti fu leli ala den salufu Kelesten taki den be o abi fu wooko taanga fu tyai a faantiwowtu di a gi den. Baka dati Yesesi gi a ageisitoli fu den sikapu anga den kaabita. Aini a ageisitoli ya, ai taki fu den sama di o libi a goontapu. Yesesi e soi den taki den mu tan dini Gadu. Den mu du ala san den poi fu yeepi den salufu baala fi en tu. * (Luku san sikiifi a ondoose.) A artikel ya o soi san a ageisitoli fu den talenti wani taki.

4, 5. Sama na a man aini a ageisitoli? San a wan talenti?

⁴ Leisi Mateyesi 25:14-30. Aini a ageisitoli fu den talenti, Yesesi be taki fu wan man di be go a wan taa kondee. Aini wan taa ageisitoli di gei a wan ya, Yesesi e taki fu wan man di be go a wan taa kondee fu toon kownu. * (Luku san sikiifi a ondoose.) (Lukasi 19:12). A wan pisi ten kaba den buku fu u e soi taki a man aini den tu ageisitoli ya e soi go a Yesesi, di a be go a hemel aini a yali 33. Ma Yesesi á toon Kownu wantenwanten di a go a hemel. A be mu wakiti te enke 1914, te Gadu be o poti den feyanti fi en „enke wan bangi gi en fu poti futu”.​—Hebrewsama 10:12, 13.

⁵ Yesesi taki a man aini a ageisitoli be abi aiti talenti. Aiti talenti a be tyaipi moni. * (Luku san sikiifi a ondoose.) Fosi a man gwe, neen a gi den saafu fi en a moni ya. A taigi den fu meke moo moni anga den talenti di a gi den. Leti enke fa a moni be pelensipali gi a man ya, a leti so wan sani pelensipali gi Yesesi tu. San na a sani ya? Na a wooko di a be e du di a be de a goontapu.

6, 7. San den talenti wani taki?

⁶ A peleikiwooko be pelensipali gi Yesesi. A omen sama toon bakaman  fi en di a peleiki gi den. (Leisi Lukasi 4:43.) Ma a be sabi taki moo wooko be mu du, bika moo sama be o aliki a bun nyunsu. Neen meke a be taigi den disipel fi en taki: „U opo u ain luku den goon, da wi o si taki a nyanyan lepi fu koti” (Yohanisi 4:35-38). Wan sama di sabi paandi goon ná o gwe fika wan goon na a yuu di a mu puu den nyanyan aini a goon. Na aseefi fasi Yesesi be e denki. Neen meke, fosi a go a hemel, a taigi den bakaman fi en taki: „U mu go a sama fu ala kondee, da u meke den toon bakaman fu mi” (Mateyesi 28:18-20). A faantiwowtu di den disipel be abi fu peleiki be de enke wan gaan gudu di Yesesi be fika gi den.​—2 Korentesama 4:7.

⁷ Leti enke a man di gi den saafu a moni fi en, a leti so Yesesi gi den salufu bakaman fi en a wooko fu meke disipel (Mateyesi 25:14). Neen meke den talenti e soi go na a faantiwowtu fu peleiki anga a faantiwowtu fu meke disipel.

8. San a masaa be wani den dii saafu du, winsi a á be gi den aseefi moni?

⁸ Yesesi taki a masaa gi a fosi saafu feifi talenti, a gi tu talenti na a du fu tu saafu, neen a gi wan talenti na a du fu dii saafu (Mateyesi 25:15). A masaa á gi den saafu aseefi moni, ma tokuso a be wani ala dii du ala san den  man fu meke moo moni gi en. A leti so Yesesi wani den salufu bakaman fi en meke ala moiti fu paati a bun nyunsu (Mateyesi 22:37; Kolosesama 3:23). Na a Pinksterfesa di be holi aini a yali 33, den disipel fu Yesesi be bigin yeepi sama fu ala sowtu nasi fu toon disipel. Te wi e leisi Toli fu den apostel, da wi e si o taanga den wooko. * (Luku san sikiifi a ondoose.)​—Toli 6:7; 12:24; 19:20.

9. (a) San den tu fosi saafu du anga a moni di den fende? San a sani ya e leli u? (b) San den Kelesten di o libi a goontapu mu du?

⁹ Den tu fosi saafu di meke moo moni anga a moni di a masaa fu den gi den, e soi go a den salufu baala anga sisa na a ten fu a kaba. Moomoo fanafu a yali 1919, den salufu Kelesten be e wooko taanga aini a peleikiwooko. Aini a ageisitoli, da den tu saafu á be fende aseefi moni. Ma a sani ya á wani taki a tu guupu salufu Kelesten be o de, bika ala den tu saafu wooko taanga fu meke moo moni gi a masaa fu den. Ma a den salufu Kelesten wawan e wooko taanga aini a peleikiwooko? Nono. A ageisitoli di Yesesi be gi fu den sikapu anga den kaabita, e soi taki den Kelesten di o libi a goontapu ya mu yeepi den salufu baala fu Yesesi anga a peleikiwooko. Ai bigi gi den taki den poi yeepi den salufu Kelesten. A foluku fu Yehofa a „wan ipi”. Ala den fiya e wooko taanga fu paati a bun nyunsu. Den e wooko taanga tu fu yeepi sama toon disipel.​—Yohanisi 10:16.

10. San e soi taki wi e libi na a ten fu a kaba?

¹⁰ Yesesi wani ala den bakaman fi en wooko taanga fu meke disipel. Na  a sani de den Kelesten aini a ten fu den apostel be e du. Ma fa den bakaman fu Yesesi e du aini a ten ya pe a ageisitoli fu den talenti e kon tuu? Den e peleiki tu? Eeye. Fosi toon somen sama e yee a bun nyunsu. Fosi toon somen sama toon bakaman fu Yesesi tu. Fu di den bakaman fu Yesesi e wooko taanga meke a omen ondoo dunsu sama e dopu ala yali. Den sama di e dopu nyunyun seefi e wooko taanga fu paati a bun nyunsu gi taa sama tu. Ala den sani ya e soi u kiin taki a peleikiwooko a wan fu den maiki di Yesesi taki u be o si na a ten fu a kaba. Ná pikin piisii Yesesi e piisii anga den sama di e paati a bun nyunsu!

11. Fa u du sabi taki Yesesi o kon na ten fu a gaan banowtu?

¹¹ Yesesi be taki: „Baka wan pisi ten neen a masaa fu den saafu daai kon baka fu luku fa den saafu wooko anga a moni di a gi den” (Mateyesi 25:19). A sani ya e soi go a san Yesesi di de enke a Masaa o du na a kaba pisi fu a gaan banowtu. Fa u du sabi a sani ya? Aini Mateyesi kapitel 24 anga 25 a omen leisi Yesesi taki a o kon. Wan fu den leisi de, a di a taki den sama „o si a manpikin fu libisama e kon a den woluku tapu”. A sani ya e soi go na ten fu a gaan banowtu te Yesesi o kuutu sama. A be wasikoi den bakaman fi en di o libi na a ten fu a kaba fu de na ain. A taigi den taki: „Wi á sabi on dei a Masaa fu u e kon.” A be taki tu: „A manpikin fu libisama o kon a wan yuu di wi á poti pakisei” (Mateyesi 24:30, 42, 44). Neen meke a ageisitoli fu den talenti e soi go na a ten di Yesesi o kon fu kuutu sama anga a ten di a o poli a goontapu fu Saatan. *​—Luku san sikiifi a ondoose.

12, 13. (a) San a masaa taigi den tu fosi saafu? Fu saide? (b) On ten den salufu Kelesten o fende a kiiboi maiki fu den? (Luku a faki: „ Den o fende wan paiman fu di den tan dini Gadu te enke den dede.”) (c) Sowtu wini den sama di be yeepi den salufu Kelesten o fende?

¹² Di a masaa daai kon baka, neen a si taki a saafu di be fende feifi talenti  be kon abi tin. A saafu di be fende tu talenti be kon abi fo. A masaa taigi den tu man taki: „Moin so! Yu a wan bun saafu di mi sa fitoow! I wooko bun anga a pikin sani di mi gi i. Mi o gi i moo gaan gudu, fi i luku” (Mateyesi 25:21, 23). San Yesesi di de enke a Masaa o du te a o daai kon baka?

¹³ Fosi a gaan banowtu bigin, da Gadu o soi den salufu Kelesten di e wooko taanga fu a kiiboi leisi taki a fende den bun. Disi na a kiiboi maiki di den o fende (Openbaring 7:1-3). Fosi Alimakedon bigin, Yesesi o meke den go a hemel. Ma da fa fu den taa Kelesten di be yeepi den salufuwan anga a peleikiwooko? Yesesi o si den enke sikapu. Den o libi fu teego a goontapu ya te Gadu Kownukondee o tii.​—Mateyesi 25:34.

14, 15. A soi Yesesi be wani soi u taki somen fu den salufuwan be o de enke a ogii saafu di lesi?

¹⁴ A ageisitoli e taki tu fu wan saafu di be fende wan talenti namo. A á wooko anga en seefiseefi efuso poti en a bangi fu meke moo moni gi en masaa. Ma a be go beli a moni. A masaa be taigi en taki, en a wan ogii saafu di lesi. A masaa teke a talenti puu neen ana, neen a langa en gi a fosi saafu. A fiingi a ogii saafu go a doo „aini dunguu”. Na anda a o go e bali adyumadye.​—Mateyesi 25:24-30; Lukasi 19:22, 23.

¹⁵ A soi Yesesi be wani soi u taki son wan fu den salufu Kelesten be o  de enke a ogii saafu di lesi? Nono. Pakisei den tu taa ageisitoli baka. Aini a ageisitoli fu a koni saafu di u sa fitoow, Yesesi e taki fu wan ogii saafu di be o pina den taawan. A sani ya á be wani taki son wan fu den baala fu a koni saafu di u sa fitoow be o kon ogii tuutuu. Ma a wasikoi a be e wasikoi den salufu Kelesten fu den á kon enke a ogii saafu. Di Yesesi be gi a ageisitoli fu den tin uman di á didon anga man ete, a be taki feifi fu den be don. Yesesi á be wani soi taki afu fu den salufu Kelesten be o don. Ma a soi a be wani soi den san be o miti den efu den á de seekaseeka, anga efu den á de na ain. * (Luku san sikiifi a ondoose.) A leti so a de tu aini a ageisitoli fu den talenti. A ná soi Yesesi be wani soi u taki somen fu den salufuwan o lesi efuso o ogii. Ma wasikoi Yesesi be e wasikoi den salufuwan taki den á mu de enke a ogii saafu. Ma den mu du ala san den man fu paati a bun nyunsu.​—Mateyesi 25:16.

16. (a) San a den tu sani di wi e leli fu a ageisitoli fu den talenti? (b) Fa a artikel ya yeepi u fu fusutan a ageisitoli fu den talenti? (Luku a faki „ Fa u mu fusutan a ageisitoli fu den talenti?”)

¹⁶ San a den tu sani di wi e leli fu a ageisitoli fu den talenti? A fosi sani, a taki Yesesi gi den salufu bakaman fi en wan gaan gudu. Dati na a faantiwowtu di den abi fu paati a bun nyunsu, anga a faantiwowtu di den abi fu meke sama toon en bakaman. Du fu tu sani, a taki Yesesi wani ala den bakaman fi en wooko taanga aini a peleikiwooko. Te wi e holidoo fu du a peleikiwooko, te wi e tan aliki Yesesi, da a ná abi misi taki a o pai wi.​—Mateyesi 25:21, 23, 34.