1, 2. (a) Sowtu ageisitoli Yesesi be gi den mati fi en? (Luku a fowtow na a bigin.) (b) San u mu sabi fu a ageisitoli di e taki fu den sikapu anga den kaabita?

YESESI be e taki anga den mati fi en di den e kai Peitilisi, Andeleyasi, Yakowbesi anga Yohanisi. A be e gi den wan sipan toli. Baka di a gi den a ageisitoli fu a koni saafu di u sa fitoow, den tin uman di á didon anga man ete anga a ageisitoli fu den talenti, neen a gi den ete wan ageisitoli. Aini a ageisitoli ya, a be taki fu a ten di „a Manpikin fu libisama” o kuutu ala den foluku. A taigi den taki „a Manpikin fu libisama” o paati den sama a goontapu aini tu guupu. Wan fu den guupu a be kai sikapu. A taawan a be kai kaabita. A be taki fu ete wan taa guupu. Dati a den „baala” fu a Kownu.​—Leisi Mateyesi 25:31-46.

² Leti enke fa den apostel be wani sabi san a ageisitoli ya wani taki, a so den sama di e dini Yehofa aini a ten ya  wani fusutan en tu, bika sama libi de aini a toli ya. Yesesi taki son sama o libi fu teego, ma taawan o dede. Neen meke a de taanga fanowdu fu fusutan san a ageisitoli ya wani taki, fu sabi san u mu du fu fende teego libi. Aini a artikel ya wi o taki fu fo akisi. Den akisi ya na: Fa Yehofa yeepi u fu fusutan a ageisitoli ya? Fa u du sabi taki a ageisitoli e soi go na a peleikiwooko? Sama a den sama di mu peleiki? Saide a de taanga fanowdu nownow fu holibaka gi „a Kownu” anga den „baala” fi en?

3, 4. (a) San u mu sabi efu u wani fusutan a ageisitoli ya? (b) Fa a Watch Tower fu 1881 be tyai a ageisitoli ya kon a kiin?

³ Efu u wani fusutan san a ageisitoli fu den sikapu anga den kaabita wani taki, da a bun fu u akisi useefi (1) sama na „a Manpikin fu libisama” efuso „a Kownu”? Sama a den sikapu anga den kaabita? Sama a den „baala” fu a Kownu? (2) On ten a „Manpikin fu libisama” o paati efuso kuutu den sikapu anga den kaabita? (3) Saide Yesesi kai son sama sikapu anga taawan kaabita?

⁴ A Watch Tower fu 1881 be tyai kon a kiin taki „a Manpikin fu libisama” di o de enke „Kownu” a Yesesi. A be soi tu taki den baala fu a Kownu a den sama di o tii makandaa anga Yesesi aini hemel anga ala den sama di o libi a goontapu ya te den ná o abi sondu moo. A Watch Tower be soi tu taki Yesesi o paati den sikapu anga den kaabita na a ten di a o tii dunsu yali. Den sama di a o si enke sikapu a den sama di e libi enke fa Gadu wani.

5. Fa a foluku fu Yehofa be e fusutan a ageisitoli aini a yali 1923?

⁵ Bakaten, Yehofa yeepi en foluku fu fusutan a ageisitoli ya moo bun. Aini 1923, a Watch Tower fu 15 oktober be soi taki „a Manpikin fu libisama” a Yesesi. A leisi ya den be koboloiki Beibeltekisi fu soi taki den „baala” aini a ageisitoli, a soso den sama di o tii makandaa anga Yesesi. Den o de makandaa anga Yesesi aini hemel te a o tii dunsu yali. A Watch Tower be soi tu taki den sikapu a den sama di o libi a goontapu ya te Yesesi anga den baala fi en o tii. Fu di a ageisitoli e soi taki den sama ya e yeepi den baala fu a Kownu, meke u sabi taki Yesesi o paati efuso kuutu sama na a ten di den baala fi en o de a goontapu ete. A sani de o pasa fosi a dunsu yali tii. A artikel be soi tu taki den sikapu a den sama di e poti biibi aini Yesesi. A den sama ya e biibi taki a Kownukondee o meke den abi wan moo bun libi.

6. Fa u kon fusutan a ageisitoli moo bun aini a yali 1995?

⁶ A omen yali u be e pakisei taki na a peleikiwooko o soi efu wan sama a sikapu efuso kaabita. U be e si enke a den sama di e aliki a bosikopu a den sikapu. U be e si enke den kaabita a den sama di á be e aliki. Ma aini 1995, a Watchtower meke u fusutan a ageisitoli ya moo bun. A Watchtower be taki finifini fu Mateyesi 24:29-31 (leisi) anga Mateyesi 25:31, 32 (leisi). Den tekisi ya e soi taki Yesesi o kuutu sama na a ten fu a gaan banowtu, te a Manpikin fu libisama o kon fu soi  a makiti fi en. *​—Luku san sikiifi a ondoose.

7. San a ageisitoli wani taki?

⁷ Wi e fusutan a ageisitoli fu den sikapu anga den kaabita moo bun aini a ten ya. U sabi taki „a Manpikin fu libisama” efuso „a Kownu”, a Yesesi. Den „baala” fu a Kownu a den sama di salufu anga santa yeye. A den o tii makandaa anga Yesesi aini hemel (Romesama 8:16, 17). Den „sikapu” anga den „kaabita” na ala sowtu nasi sama. Yesesi o kuutu den na a kaba fu a gaan banowtu. A ná o teke langa moo fosi a sani ya pasa. Na a fasi fa sama holibaka gi den salufu Kelesten di de a goontapu ete, o meke Yesesi si den enke sikapu efuso kaabita. Ai bigi gi u taki Yehofa yeepi u fu fusutan a ageisitoli ya anga den taa ageisitoli di de aini Mateyesi kapitel 24 anga 25 moo bun!

8, 9. Saide Yesesi e si den sikapu enke bun-ati sama?

⁸ Yesesi á koboloiki den wowtu „peleiki” efuso „peleikiwooko” aini a ageisitoli fu den sikapu anga den kaabita. Da fa u du sabi taki a ageisitoli e soi u taki a peleikiwooko de taanga fanowdu?

⁹ Efu u wani sabi a piki, da u mu holi a pakisei taki a wan sani Yesesi be wani leli u anga a ageisitoli ya. A á be e taki fu tuutuu sikapu anga kaabita. A á be wani leli u tu taki ala sama di a o si enke sikapu mu gi den baala fi en tuutuu nyanyan efuso tuutuu koosi. Yesesi á be wani leli u taki den sama ya mu go luku den baala fi en te den de a sitaafu-osu efuso solugu den tuutuu te den siki. Ma a be wani leli u taki a o si den sikapu enke bun-ati sama fu di den e si den salufu Kelesten enke den baala fi en. A o si den enke bun-ati sama tu fu di den e tan holibaka gi den salufu Kelesten aini den kiiboi dei ya.​—Mateyesi 10:40-42; 25:40, 46; 2 Timotiyesi 3:1-5.

10. Fa den sikapu sa yeepi den baala fu Kelestesi?

¹⁰ Di Yesesi be gi a ageisitoli fu den sikapu anga den kaabita, a be e taki san be o pasa na a ten fu a kaba (Mateyesi 24:3). Yesesi be taki: „A bun nyunsu fu a Kownukondee fu Gadu mu peleiki doo hii goontapu” (Mateyesi 24:14). Fosi Yesesi gi a ageisitoli fu den sikapu anga den kaabita, a taki fu a ageisitoli fu den talenti. A be gi a ageisitoli fu den talenti fu soi den salufu Kelesten taki den mu du ala san den man aini a peleikiwooko. Ma a wantu salufuwan namo de a goontapu ete, aladi tyaipi wooko de fu du. Den salufuwan mu peleiki gi „sama fu ala kondee” fosi a kaba kon. Enke fa u  leli aini a ageisitoli fu den sikapu anga den kaabita, da „den sikapu” e yeepi den baala fu Yesesi. Wan fu den moo bun fasi fa den sa yeepi den baala fu Yesesi, a te den e holibaka gi den aini a peleikiwooko. Ma a moni wawan u mu gi fu holibaka gi a peleikiwooko? A taanga-sikin namo u mu e gi den fu paati a bun nyunsu?

11. Sowtu sani sama sa akisi denseefi? Fu saide?

¹¹ Nownow a aiti miliyun bakaman fu Yesesi de a goontapu. Gaanse fu den a ná salufu Kelesten. A ná den sama ya Yesesi be gi den talenti. A den salufu Kelesten wawan a gi den talenti (Mateyesi 25:14-18). A sani ya e meke u akisi useefi taki: Efu Yesesi á gi den sama ya den talenti, da den sama ya mu peleiki tu? Eyee. Meke u go luku fu saide.

12. San wi e leli fu den sani di Yesesi taki aini Mateyesi 28:19, 20?

¹² Yesesi taki ala den bakaman fi en mu paati a bun nyunsu. Baka di Yesesi kon a libi baka, a taigi den disipel fi en taki den be mu yeepi sama toon „bakaman” fi en. Den be mu leli den sama fu du ala den sani di Yesesi taigi den. A sani ya e soi taki den taawan di be o toon bakaman fu Yesesi be mu paati a bun nyunsu tu. (Leisi Mateyesi 28:19, 20.) Wi e si kiin taki ala u mu paati a bun nyunsu, winsi wi o libi a hemel efuso a goontapu ya.​—Toli 10:42.

13. San wi e leli fu a sani di Yohanisi be si?

¹³ Te wi e leisi Openbaring, wi e fusutan taki a den salufuwan anga den taa Kelesten o peleiki. Yesesi be meke a apostel Yohanisi si wan „uman”. A uman ya e kai sama fu diingi wataa di e meke sama tan a libi. A uman a den 144.000 salufuwan di o tii makandaa anga Yesesi aini hemel (Openbaring 14:1, 3; 22:17). A wataa di a uman e kai sama fu diingi na a dede di Yesesi dede fu fii wi fu sondu anga dede (Mateyesi 20:28; Yohanisi 3:16; 1 Yohanisi 4:9, 10). Den salufuwan e du ala san den poi fu leli sama san Yesesi du gi wi. Den e leli sama tu fa den sa fende wini fu a dede di Yesesi dede gi wi (1 Korentesama 1:23). Ma Yohanisi be si wan taa guupu sama tu di á de salufu Kelesten. Den sama ya o libi a goontapu. Denseefi kisi a faantiwowtu tu fu taigi taa sama taki: „U kon!” Te den e leli taa sama a bun nyunsu, da a so den e du san Yesesi taki. Den sani di Yesesi meke Yohanisi si, e soi kiin taki ala sama di e aliki a bosikopu fu a bun nyunsu mu peleiki gi taawan.

14. Fa u sa soi taki wi e wooko anga „a weiti fu Kelestesi”?

¹⁴ Ala den sama di e aliki „a weiti  fu Kelestesi” mu peleiki (Galasiyasama 6:2). Yehofa wani ala den sama di e dini en wooko anga aseefi weiti. Aini den ten di pasa, da den taa nasi sama di be kon tan a den Islayelisama mindii, be mu wooko anga denseefi weiti fu den Islayelisama (Ekisodesi 12:49; Lefitikesi 24:22). Aini a ten ya, a á de fu u wooko anga ala den weiti di Yehofa be gi den Islayelisama. Ma tokuso ala u mu wooko anga „a weiti fu Kelestesi” winsi u salufu efu wi á salufu. Wan fu den moo pelensipali sani di Yesesi leli u, a taki u mu abi lobi (Yohanisi 13:35; Yakowbesi 2:8). U mu lobi Yehofa, Yesesi anga taa sama. A moo bun fasi fa u sa soi taki u lobi taa sama a te wi e paati a bun nyunsu fu a Kownukondee gi den.​—Yohanisi 15:10; Toli 1:8.

15. Saide meke a taigi di Yesesi taigi den bakaman fi en fu paati a bun nyunsu e teli gi ala Kelesten?

¹⁵ Son leisi te Yesesi taigi wantu bakaman fi en wan sani, da na omen bakaman fi en a sani de e teli gi. Yesesi be meke wan kuudei anga 11 fu den bakaman fi en. A be paamisi den taki den o tii makandaa anga en aini hemel. Ma tokuso a sani de e teli gi ala den 144.000 salufuwan di o tii makandaa anga en (Lukasi 22:29, 30; Openbaring 5:10; 7:4-8). Baka di Yesesi be kon a libi baka, a wantu bakaman fi en namo be yee di a be taki u mu paati a bun nyunsu (Toli 10:40-42; 1 Korentesama  15:6). Ma tokuso na ala den bakaman fi en aini a ten fu den apostel be e peleiki (Toli 8:4; 1 Peitilisi 1:8). Wi aini a ten yaaso tu sabi taki u mu peleiki winsi fa Yesesi mofu seefi á taigi wi taki u mu peleiki. Anga aiti miliyun sama u de e paati a bun nyunsu. U sabi taki te wi e paati a bun nyunsu da wi e soi tuutuu taki wi e poti biibi aini Yesesi.​—Yakowbesi 2:18.

16-18. Fa u sa holibaka gi den baala fu Kelestesi? Saide meke a nownow u mu holibaka gi den?

¹⁶ A bunbun tesi Saatan e tesi den salufu baala fu Kelestesi aini a ten ya, fu di a sabi taki „a ná abi langa moo” (Openbaring 12:9, 12, 17). Ma winsi fa Saatan e suku fu du ogii anga den, den salufuwan e tan teke fesi aini a peleikiwooko. Fosi toon de so ipi sama a hii goontapu yee a bun nyunsu. Wi e si kiin taki Yesesi de anga den salufuwan, bika ai yeepi den.​—Mateyesi 28:20.

¹⁷ Wi e si en enke wan gaandi taki u sa yeepi den baala fu Kelestesi fu paati a bun nyunsu. Wi e yeepi den tu te wi e poti moni efuso te wi e go yeepi fu meke komakandaa peesi anga beikantoo. Te wi e aliki den owluman anga den taa baala di a „koni saafu di u sa fitoow” poti a wooko, da wi e soi taki u wani yeepi den baala fu Kelestesi.​—Mateyesi 24:45-47; Hebrewsama 13:17.

¹⁸ Dyonson den salufuwan o kisi a kiiboi maiki fu den. Baka dati den engel o losi „den fo winta fu goontapu”. A so a gaan banowtu o bigin (Openbaring 7:1-3). Fosi Alimakedon bigin, da Yesesi o teke den salufuwan tyai go a hemel (Mateyesi 13:41-43). Neen ede meke efu u wani Yesesi si wi enke sikapu te a o kon, da a nownow u mu holibaka gi den salufu baala fu Kelestesi.