A Watchtower fu 15 september 1950 be taki, son leisi wan sama efuso wan sani di sikiifi aini Beibel, e soi go a wan moo gaan sani di mu pasa ete. Aini a ten di pasa, da den buku fu u be e soi taki sama enke Debora, Elihu, Yefta, Yopu, Rakab, Lebeka anga somen taawan ete, a den salufuwan efuso den sama fu a „gaan kulu” (Openbaring 7:9). Den buku fu u be sikiifi taki Yefta, Yopu anga Lebeka be e soi go a den salufu Kelesten. Debora anga Rakab be e soi go a den sama fu a „gaan kulu”. Ma aini den bakabaka yali, wi á du a sani ya moo. Fu saide?

Beibel e leli u so na tuu taki son toli wani taki wan moo gaan sani di mu pasa ete. Bika aini Galasiyasama 4:21-31, a apostel Pawlesi e taki fu „wan ageisitoli” di e taki fu tu uman. A fosi uman a Hagar, a umansaafu fu Abalaham. Pawlesi be soi taki Hagar e soi go a den Islayelisama. A Weiti fu Mosesi be meke den toon a foluku fu Gadu. A „uman di á be de saafu” aini a ageisitoli a Sala, a uman fu Abalaham. Sala e soi go na a uman fu Gadu, efuso a pisi fu a olikansisâsi fu Gadu a hemel. Pawlesi e taki tu fu den somen sani di e soi taki Melikiseideki e soi go a Yesesi (Hebrewsama 6:20; 7:1-3). Pawlesi be sikiifi tu taki a polofeiti Yesaya anga den manpikin fi en e soi go a Yesesi anga den salufu Kelesten (Hebrewsama 2:13, 14). A Yehofa be meke Pawlesi sikiifi den sani ya, neen meke u sa biibi den sani di a taki fu den sama ya.

Ma winsi Beibel e teke wan sama gei anga wan moo gaan sani di mu pasa ete, tokuso dati á wani taki na ala pikinpikin sani di a sama du wani taki wan sani. Di Pawlesi be teke Melikiseideki gei anga Yesesi, a á taki nawan sani fu a ten di Melikiseideki be tyai beele anga win gi Abalaham baka di Abalaham be wini fo kownu aini feti. Neen meke u ná abi fu suku san den sani de wani taki, bika Beibel nái taki a pisi de.​—Genesesi 14:1, 18.

Son sama di be sikiifi sani omen ondoo yali  baka di Yesesi dede, be meke wan gaan fowtu. Den be e teke ala toli aini Beibel gei anga wan moo gaan sani di mu pasa ete. Wan buku (The International Standard Bible Encyclopaedia) e taki fu den sani di Origenes, Ambrosius anga Hiéronimus be e leli sama. A buku sikiifi taki den man ya be e suku san ala pikinpikin sani di sikiifi aini Beibel wani taki. Den be e si enke ala den pikinpikin sani seefi e soi go a wan moo gaan sani di mu pasa ete. Den be taki a sani ya tu fu den 153 fisi di den disipel be kisi na a neti di den si Yesesi baka di a kon a libi baka. Aladi a nombuu 153 á wani taki wan sani, tokuso den be e meke moiti fu sabi san a wani taki.

Wan taa sikiifiman di den e kai Augustinus fu Hippo, be sikiifi taki a pisi toli aini Beibel pe Yesesi be koboloiki tu fisi anga feifi beele di meke anga gerst fu gi 5000 sama nyanyan, wani taki wan sani. A be taki den feifi beele di meke anga gerst (wan sowtu alisi) e soi go a den feifi fosi buku fu Beibel. Fu di sama na a ten de be e si enke gerst á be bun enke tarwe (wan sowtu alisi tu) meke a sani ya be e soi go na a bun di a „Nyun Testamenti” be bun moo a „Gaandi Testamenti”. A man ya be sikiifi tu taki, den tu fisi e soi go a wan kownu anga wan pilisite. Wan taa sabiman be sikiifi fu a bai di Yakopu be bai a leti di Esau be abi enke fosi pikin anga a nyanyan di a be boli. Fu di a nyanyan be lebi, meke a be taki a sani ya e soi go na a pai di Yesesi pai anga en buulu fu sama be sa go libi a hemel.

Yu e fusutan now taki a fasi fa sama be e tyai Beibel toli kon a kiin be taanga fu fusutan. Libisama á poi sabi sowtu Beibel toli e soi go a wan moo gaan sani di mu pasa ete. Da san na a moo bun sani di u mu du? A te Beibel seefi taki wan sani efuso wan sama e soi go a wan moo gaan sani di mu pasa ete, fosi u mu biibi a sani de. Ma efu a á sikiifi aini Beibel taki wan toli e soi go a wan moo gaan sani di mu pasa ete, da wiseefi á mu du a sani de tu.

Ma fa u sa fende wini fu den toli di de aini Beibel? A apostel Pawlesi be sikiifi taki: „Ala sani di sama be sikiifi fositen, be sikiifi fu leli u wan sani. Den sani ya e yeepi u fu holidoo, den e meke u fende toosutu aini a Wowtu fu Gadu tu. Na a sani de o meke wi abi howpu” (Romesama 15:4). Pawlesi be sikiifi a sani ya gi den salufu Kelesten di be e libi aini a ten fu den apostel. A be wani soi den fa den be sa fende wini fu den sani di sikiifi aini Beibel. Na ala Kelesten e fende wini fu den sani di de aini a Wowtu fu Gadu, winsi den be e libi aini a ten fu Pawlesi efuso aini a ten fu u ya. Dati wani taki den „taa sikapu” e fende wini tu.​—Yohanisi 10:16; 2 Timotiyesi 3:1.

Neen meke somen sani di sikiifi aini Beibel nái teli gi den salufu Kelesten wawan efuso gi den taa sikapu wawan. Son sani e teli gi ala Kelesten, winsi aini sowtu ten den e libi. Ala den diniman fu Gadu aini a ten di pasa anga den wan aini a ten ya e fende wini fu den sani di sikiifi aini Beibel. Wan fu den sani di sikiifi aini Beibel na a toli fu Yopu. A buku ya e soi fa Yopu be e pina. Ma den sani di miti Yopu, a ná sani di miti den salufuwan namo na a ten fu a Fosi Goontapu Feti. A omen Kelesten nyan pina enke Yopu, winsi den a salufuwan efuso taa sikapu, winsi den a umansama efuso manengee. Ala den e fende wini te den e pakisei „fa Yehofa meke sani waka” gi Yopu bakaten. Den si taki „Yehofa lobi sama tuutuu. A abi tyali-ati tu.”​—Yakowbesi 5:11.

Ala den kemeente fu u aini a ten ya abi sisa di tan dini Gadu anga den hii ati enke Debora. Den kemeente abi Yonkuu owluman tu di koni enke Elihu. I sa fende pionili di abi deki-ati enke Yefta. Ma baala anga sisa de tu di abi pasensi enke Yopu fu di den e holidoo. Ai bigi gi u taki u sa leli wan sani fu ala den toli di Yehofa meke sama sikiifi aini Beibel. Den sani ya e meke u fende toosutu aini a Wowtu fu Gadu. Den e meke wi abi howpu tu.

A fu den sani ya ede meke u nái sikiifi moo taki ala toli di de aini Beibel e soi go a wan moo gaan sani di mu pasa ete. Ma nownow den buku fu u e poti moo pakisei a fa u sa wooko anga den leli di de aini Beibel.