Son Kotoigi di á toow ete, be taki denseefi sani ya tu, anga ala fa den sabi bunbun taki „anga wan bakaman fu Masaa” wawan Yehofa wani den toow (1 Korentesama 7:39). Saide meke son Kotoigi e taki den sowtu sani ya?

Den Kotoigi di e taki den sani ya e si enke sisa di á toow ipi moo baala di á toow. Aini son kondee den sisa moo ipi moo den baala tuu. Wan fu den kondee ya na Koreya. Te i teli 100 Kotoigi, da 57 a sisa, 43 a baala. Wan taa kondee na Kolombiya. Te i teli 100 Kotoigi, da 66 a sisa, 34 a baala.

Aini son kondee, son mma anga dda di á de Kotoigi e akisi tyaipi moni efuso gaan dii gudu te wan man wani toow anga a umanpikin fu den. Son baala ná abi a moni fu bai den sani ya. A sani ya e meke son sisa fii enke den o fika a ganda. Den e si enke noiti den o fende wan baala. *​—Luku san sikiifi a ondoose.

Efu na aseefi fasi yu e denki, da holi a pakisei taki Yehofa e fusutan i. A sabi fa yu e fii.​—2 Koloniki 6:29, 30.

Tokuso Yehofa e taigi wi aini Beibel fu toow anga wan bakaman fu Masaa. Fu saide? Fu di  a sabi san bun gi u, a á wani ogii miti u. A á wani fu u du sani di o hati u efuso di o meke u tyali bakaten. Aini a ten fu Nehemiya, a omen Dyu be e toow anga uman di á be e dini Gadu. Na a sani de meke Nehemiya be soi den san be miti Salomo. A taigi den Dyu taki a fu di „Gadu be lobi en, meke a be poti en enke Kownu fu hii Islayelikondee. Ma tokuso den taa nasi uman di a be teke meke a sondu” (Nehemiya 13:23-26). A fu di Yehofa wani sani waka u bun, meke ai taigi u fu toow anga wan bakaman fu Masaa (Psalm 19:7-10; Yesaya 48:17, 18). Ai bigi gi u taki Yehofa e booko en ede anga u fu di a lobi u. Neen ede meke wi e du den sani di a taki. Te wi e si Yehofa enke u tiiman, da wi o wani du den sani di ai taigi u.​—Odo 1:5.

Enke Kotoigi wi á wani toow anga wan sama di á de a biibi, bika a sa meke u daai baka gi Yehofa (2 Korentesama 6:14). Den sani di Gadu e taigi u e tyai wini gi u ala yuu. Neen meke somen Kelesten aini a ten ya e aliki Yehofa. Ma tokuso son Kotoigi go toow anga wan sama di nái dini Yehofa.

Wan sisa fu Australiyakondee di den e kai Maggy be kon de anga wan man di á be de wan Kotoigi. * (Luku san sikiifi a ondoose.) A taki: „A omen komakandaa mi á be e go fu di mi be e feti na a man ya baka. Mi be go a baka aini a dini di mi be e dini Yehofa.” Ratana, wan yonkuu sisa aini India be kon de anga wan boi fu en kalasi di be bigin sutudeli Beibel. Ma a fu di a boi ya be wani de anga Ratana meke a be e sutudeli. Bakaten Ratana gwe fika waaleiti. A go a wan taa keliki fu a be sa toow anga a boi ya.

Wan sisa fu Kameroen di den e kai Ndenguè be kon de anga wan man di á be de wan Kotoigi. A pisi ten de a be abi 19 yali. Fosi den toow, a man be taigi en taki a sa tan dini Yehofa. Ma tu wiki baka di den toow, neen a man taigi en taki a á mu go a komakandaa moo. A sisa ya e taki: „Mi be e fii enke a mi wawan de. Hii dei mi be e kee. Mi á be poi du sani enke fa mi wani. Ai hati mi taki mi toow anga wan goontapu man.”

A tuu taki son Kotoigi toow anga sama di abi bun manii aladi den nái dini Yehofa. Ma winsi i man efuso yu uman abi bun manii, tokuso i mu akisi iseefi efu a sani di i du bun gi Yehofa. Fa yu o fii efi i sabi taki i taangayesi Yehofa? Fa Yehofa e si a sani di i du? Dati na a moo pelensipali sani di i mu pakisei.​—Odo 1:33.

Baala anga sisa a hii goontapu kon si taki wan fu den moo bun sani di den du, a di den toow anga wan bakaman fu Masaa. Baala anga sisa di á toow ete wani Yehofa piisii, neen meke den wani toow anga wan sama di e dini en. Michiko, wan sisa a Yapankondee, be wani aliki Yehofa, winsi fa den famii fi en be e dwengi en fu toow anga wan sama di á de wan Kotoigi. A á be makiliki te a be e si fa den mati fi en be e toow aladi a á be poi fende wan baala. Ma a sisa ya e taki: „Mi be lobi taki wan sani fu mi. Efu Yehofa a wan ’koloku Gadu’, da a ná namo namo mi mu toow fu mi sa de koloku. Mi sabi taki a o gi u den sani di wi ati wani. Neen meke efu u wani toow, ma wi á fende wan sama ete, da a moo betee u wakiti te enke u fende wan” (1 Timotiyesi 1:11). Bakaten Michiko toow anga wan bun baala. Ai piisii taki a du sani enke fa Yehofa wani.

Son baala be abi fu wakiti tu te enke den fende wan sisa fu toow. Bill, wan baala a Australiya taki son leisi a be e luku den moin uman di á de Kotoigi. Ma a á be e meke moiti fu toon mati anga den, bika a á be wani toow anga wan sama di nái dini Yehofa. A be e si sisa di a be lobi, ma nawan fu den be e luku en. A 30 yali a wakiti fosi a fende wan sisa di fiti en. Ai taki: „A nái hati mi taki mi wakiti. Mi e piisii tuutuu  bika mi anga mi uman e peleiki makandaa, wi e sutudeli makandaa anga ala wi e dini Yehofa makandaa tu. Mi e piisii taki mi kon sabi den mati fu mi uman, bika ala den e dini Yehofa. Mi anga mi uman e du san sikiifi aini Beibel fu a toowlibi fu u sa waka bun.”

San a den sani di i sa du te yu á fende wan man efu wan uman aini waaleiti ete? Pakisei saide meke yu á toow ete. Efu a fu di i wani aliki Yehofa, da Yehofa e piisii (1 Samuweli 15:22; Odo 27:11). Tan begi Yehofa tu. Taigi en fa yu e fii (Psalm 62:8). Te yu e meke moiti fu feti anga den takuu fii di yu abi, da yu anga Yehofa o toon bunbun mati. I sa abi a fitoow taki Yehofa e fusutan i. Ai booko en ede anga den sani di i abi fanowdu. A nái paamisi nawan sama taki a o gi den wan man efuso wan uman. Ma efi i wani toow tuutuu, da Yehofa o gi i san yu abi fanowdu.​—Psalm 145:16; Mateyesi 6:32.

Kande son leisi yu o go e fii enke David. A be taki: „Kee Yehofa, piki mi esi-esi baa. Mi ná abi nawan kaakiti moo. Ná kibii i fesi gi mi” (Psalm 143:5-7, 10). Ná gi abaa. Gi Yehofa ten fu a soi yu san i mu du. Leisi Beibel, da i denki dipi fu den sani di i leisi. Te i du den sani ya, da yu o fusutan den Weiti fu Yehofa moo bun. Yu o si tu fa a yeepi a foluku fi en aini a ten di pasa. Te yu o aliki Yehofa, yu o fende taanga-sikin fu tan du sani enke fa a wani.

San a den sani di i sa du te yu á toow ete? Meke moiti fi i anga Yehofa toon moo bun mati. I mu meke moiti tu fu taa sama lobi i. I mu e paati sani anga taawan, i mu e wooko taanga, e libi bun anga taawan. Meke moiti fu a biibi fi i kon moo taanga tu. Den sani ya de taanga fanowdu efi i wani sani waka bun te yu o toow (Genesesi 24:16-21; Rut 1:16, 17; 2:6, 7, 11; Odo 31:10-27). Poti a Kownukondee a fesi fu di yu o du ala san i man aini a peleikiwooko anga a Kemeente. A den sani ya o yeepi i fi i du sani enke fa Yehofa wani. Bill e taki: „Fosi i pingi i ain opo den yali pasa! Mi be e koboloiki a ten fu mi fu du a pioniliwooko.”

Yehofa be taki u mu toow anga wan bakaman fu Masaa. A sani de e teli gi wi aini a ten ya ete. Te u toow anga wan sama di de a biibi, da wi e gi Yehofa gaandi. Wi o de koloku tu. Beibel e taki: „A man di e lesipeki Yehofa o de koloku. Ai piisii anga den Weiti fi en tu. Diidii sani anga gudu de aini en osu. Alaten a o du sani a wan leti fasi” (Psalm 112:1, 3). Neen meke i mu du ala san i poi fu toow „anga wan bakaman fu Masaa”.