1-3. Fu saide meke Pawlesi be e biibi taki Yehofa o yeepi en? (Luku a fowtow na a bigin.)

EFI i be de wan Kelesten aini Rome na a ten fu den apostel, da a omen tesi be o miti i. Den Romesama be e du ogii anga den sama di be e dini Yehofa. Den be lei gi den taki a den be boon wan pisi fu Rome. Den be e lei gi den tu taki den á lobi sama. A omen baala anga sisa fi i den be poti a dunguu osu. Den Romesama be e fiingi sowan fu den Kelesten gi ogii meti. Den be e sipikii sowan fu den fasi a ponsu, da den be e sutu faya gi den fu kiin a peesi a neti. Iniiwan yuu fu a dei den tesi ya be sa miti i, efi i be e libi aini a ten de.

² Den Romesama be poti a apostel Pawlesi a dunguu osu tu. Kande Pawlesi be e akisi enseefi efu den baala anga sisa be o yeepi en. Bika ai membee ete taki wan leisi nawan sama be kon yeepi en di a be abi yeepi fanowdu. Ma Yehofa be meke Yesesi yeepi en. Pawlesi sikiifi taki: „Masaa á gwe fika mi, ai gi mi kaakiti anga  taanga-sikin.” Yesesi be gi Pawlesi a kaakiti di a be abi fanowdu. Pawlesi be sikiifi tu taki masaa „puu mi na a lew mofu.”​—2 Timotiyesi 4:16, 17. * (Luku san sikiifi a ondoose.)

³ Pawlesi be e denki den somen leisi di Yehofa be yeepi en di tesi be e miti en. Neen meke a be sabi taki Yehofa o gi en a kaakiti di a abi fanowdu fu holidoo fu pasa a tesi ya, anga den taawan di be o miti en aini a ten di e kon. Fu di a be e biibi taanga taki Yehofa be o yeepi en, meke a sikiifi taki: „Winsi sowtu ogii e miti mi, Masaa o yeepi mi” (2 Timotiyesi 4:18). Pawlesi be sabi taki winsi den baala anga sisa á be o poi yeepi en, tokuso Yehofa anga Yesesi be o yeepi en.

4, 5. (a) Sama poi yeepi i ala yuu anga den polobelema fi i? (b) San i mu du efi i wani toon wan moo bun mati fu Yehofa?

⁴ I be sidon anga wan polobelema wan dei kaba, sondee fu sama yeepi i? A kan taki i lasi i wooko efuso tesi e miti i a sikoo. Kande i be siki efuso abi wan taa polobelema. A kan taki yu e fii booko saka fu di den sama di i be begi fu yeepi i, á gi i a yeepi di i abi fanowdu. A tuu, libisama ná o poi yeepi i anga ala den polobelema di i abi. Ma san i mu du te den á poi yeepi i? Beibel e taki: „Fitoow Yehofa” (Odo 3:5, 6). Ma a poi yeepi i tuutuu? Eeye! A Beibel lai anga toli di e gi wi a fitoow taki Yehofa e yeepi den diniman fi en tuutuu.

⁵ Yu á mu fii booko saka te taawan á yeepi i enke fa i be wani. Leti enke Pawlesi, i mu e si tesi enke wan okasi di yu abi fu soi Yehofa taki yu e fitoow en. A fasi fa a o yeepi i te tesi e miti i o soi i taki ai booko en ede anga i. Yu o moo fitoow en. Yu anga en o toon moo bun mati tu.

6. Fu saide meke a á makiliki fu fitoow Yehofa te wi abi polobelema?

⁶ A kan taki yu abi wan polobelema di e gi i booko-ede. Kande i meke muiti fu losi en. A kan taki i begi Yehofa tu fu yeepi i anga a polobelema. Fu di i sabi taki a o yeepi i meke i ná o booko yu ede tumisi. (Leisi Psalm 62:8; 1 Peitilisi 5:7.) Efi i wani yu anga Yehofa toon bun mati, a de taanga fanowdu fi i fitoow en. Ma a ná ala yuu a makiliki fu fitoow Yehofa. Fu saide? Fu di a ná ala yuu Yehofa e piki den begi fu u wantenwanten.​—Psalm 13:1, 2; 74:10; 89:46; 90:13; Habakuk 1:2.

7. Fu saide meke a ná ala yuu Yehofa e piki den begi fu u wantenwanten?

 ⁷ Saide meke a ná ala yuu Yehofa e piki den begi fu u wantenwanten? Beibel taki Yehofa a wi Dda, wi neen pikin (Psalm 103:13). A ná ala sani di wan pikin begi en dda, en dda e gi en. A ná ala yuu ai gi en a sani di a wani wantenwanten tu. Wan dda sabi taki son leisi a wanboowanboo so wan pikin e wani wan sani, ma bakaten a nái wani en moo. Wan dda sabi san bun gi en pikin. A sabi tu efu a sani di a pikin begi en, o tyai bun efuso ogii gi taawan. A dda sabi san a pikin abi fanowdu tuutuu. A sabi tu on ten a pikin mu fende den sani di a abi fanowdu. Efu a dda gi a pikin ala san a wani, da a dda o toon wan saafu fu a pikin. Yehofa, a dda fu u di de a hemel lobi u. Fu di a koni, meke a sabi san wi abi fanowdu. A sabi tu san na a moo bun ten di a mu gi u den sani di u begi en. Ala u o fende wini te wi e wakiti anga pasensi fu meke Yehofa gi u den sani di u begi en.​—Luku Yesaya 29:16; 45:9.

8. San Yehofa paamisi u te wan tesi e moo wi?

⁸ Holi a pakisei tu taki Yehofa sabi sowtu tesi u poi tyai, anga sowtu tesi wi á poi tyai (Psalm 103:14). Ai gi wi a kaakiti di wi abi fanowdu. Son leisi wi o go e fii enke wi á poi moo. Ma Yehofa paamisi u taki efu wan tesi e moo wi, „a o yeepi u”. (Leisi 1 Korentesama 10:13.) Fu di u sabi a sani de meke u nái kusumi tumisi.

9. San u mu du efu Yehofa á piki den begi fu u wantenwanten?

⁹ Efu u begi Yehofa wan sani, ma a á piki a begi fu u wantenwanten, da u mu abi pasensi. Ná feegete taki Yehofa wani yeepi u. Ma a wakiti ai wakiti a moo bun yuu fu a gi u den sani di wi abi fanowdu. Beibel taki: „Yehofa e wakiti anga pasensi fu du bun sani gi u. A o opo taampu fu soi u tyali-ati. Bika Yehofa a wan Gadu di e kuutu sani a wan leti fasi. Ala den sama di e wakiti en anga pasensi o de koloku.”​—Yesaya 30:18.

10-12. (a) Saide meke a á makiliki fu solugu wan famii di siki? (b) Sowtu wini yu o fende efu yu e fitoow Yehofa te yu abi polobelema?

¹⁰ Son leisi den polobelema fu u e moo wi te ná pikin sani. Kande den e meke u fii enke a apostel Pawlesi di be abi wan sama fanowdu fu yeepi en di a be de na „a lew mofu” (2 Timotiyesi 4:17). Te yu abi den sowtu polobelema de, da a de taanga fanowdu fi i fitoow Yehofa. Kon u taki i mu solugu wan famii fi i di siki. Kande i begi Yehofa fu a yeepi i fu du sani enke fa a wani. A kan tu taki i begi en fu a gi i taanga-sikin. * (Luku san sikiifi a  ondoose.) Yu o fii bun baka te i du den sani ya, bika i sabi taki Yehofa e si san e miti i. Yehofa o yeepi i fu holidoo tu.​—Psalm 32:8.

¹¹ Son leisi a o gei enke Yehofa nái yeepi i anga a polobelema fi i. A kan tu taki den dataa di mu yeepi i nái taki go na a wan se. Kande den taa famii fi i meke a libi kon moo ibi gi i, pe fu den taki anga i meke i fii bun. Tan begi Yehofa ala yuu fu gi i a kaakiti di yu abi fanowdu. Tan meke moiti fu kon moo koosube neen. (Leisi 1 Samuweli 30:3, 6.) Bakaten iseefi o si fa Yehofa yeepi i. A so yu anga en o toon moo bun mati.

¹² Na a sani de wan uman di den e kai Linda be ondoofeni. * (Luku san sikiifi a ondoose.) A be e solugu en siki mma anga dda te enke a dei di den dede. Linda taki: „Di mi be e solugu den, a ná ala yuu mi anga mi man anga mi baala be e sabi san fu du. Son leisi wi á be sabi moo fa u mu yeepi den. Ma te u sidon pakisei baka, da wi e si kiinkiin taki a Yehofa be e holibaka gi u. Winsi a be e gei enke wi á be sabi san u mu du, a be e gi u taanga-sikin anga taa sani di u be abi fanowdu.

13. Fa a fitoow di Ronda be fitoow Yehofa yeepi en fu holidoo di tesi miti en baka makandaa?

¹³ A fitoow di wi e fitoow Yehofa o yeepi u te ogii miti u. Wan sisa di den e kai Ronda be ondoofeni a sani ya. A man fi en di á be de wan Kotoigi be e seeka sani fu booko a toow anga en. Na aseefi ten de, en baala be kisi wan siki di den e kai lupus. Baka wantu mun neen a uman fu a baala fi en dede. Di Ronda bigin kisi enseefi pikinso, neen a bigin pionili. Ma a á teke langa, neen a mma fi en seefi kon lasi libi. San yeepi Ronda fu pasa ala den tesi ya? A taki: „Ala dei mi be e taki anga Yehofa. Winsi a wan pikin sani mi be mu du, mi be e akisi en fu a soi mi san fu du. A sani de yeepi mi fu si Yehofa enke wan tuutuu mati. Begi yeepi mi tu fu fitoow Yehofa pe fu fitoow miseefi efuso taa sama. Yehofa yeepi mi tuutuu, a gi mi ala san mi be abi fanowdu. Mi fii tuutuu fa Yehofa wooko makandaa anga mi.”

14. Fa Yehofa sa yeepi i te den puu wan famii fi i aini a kemeente?

¹⁴ Denki wan taa tesi di sa miti i. Kande den puu wan famii fi i aini a kemeente. I sabi taki Beibel e taki wi á mu mumui anga sama di den puu aini a kemeente (1 Korentesama 5:11; 2 Yohanisi 10). Ma kande yu o si enke a taanga fu du san Beibel e taki fu di i lobi a famii fi i. Ma yu o fitoow Yehofa taki a o gi i a kaakiti di yu abi fanowdu fu aliki en? Yu o si a tesi ya  enke wan okasi fu kon moo koosube a Yehofa?

15. Fu saide meke Adan taangayesi Yehofa?

¹⁵ Denki a toli fu a fosi man di den e kai Adan. Adan be e denki taki a be sa tan a libi winsi a be taangayesi Yehofa? Nono, bika „Didibii á be koli Adan” (1 Timotiyesi 2:14). Da saide meke a ná aliki Yehofa? Adan nyan a sii fu a bon di en uman gi en, fu di a be lobi en uman moo Yehofa. A aliki en uman pe fu a aliki san Yehofa be taigi en.​—Genesesi 3:6, 17.

16. Sama na a sama di u mu moo lobi? Fu saide?

¹⁶ A sani ya wani taki wi á mu lobi u famii? Nono. Ma wi á mu lobi den moo Yehofa (Leisi Mateyesi 22:37, 38.) Te u lobi Yehofa moo u famii, da wi o poi yeepi den famii fu u moo bun, winsi den nái dini Yehofa nownow. Neen meke i mu e meke moiti ala yuu fu a lobi di i lobi Yehofa kon moo taanga. Meke moiti fu moo fitoow en tu. Efu yu e kusumi fu di den puu wan famii fi i aini a kemeente, da begi Yehofa. Taigi en fa yu e fii. * (Luku san sikiifi a ondoose.) (Romesama 12:12; Filipisama 4:6, 7) Winsi fa a tesi ya e meke i fii booko saka, i mu si en enke wan okasi fu toon wan moo bun mati fu Yehofa. A so yu o man fitoow en. Yu o si tu taki sani o waka i bun te yu e aliki en.

17. San Yehofa o du gi u efu wi e du ala san u man fu paati a bun nyunsu?

¹⁷ Saide meke Yehofa be puu Pawlesi na „a lew mofu”? Pawlesi taki: „Fu mi sa du a peleikiwooko finifini” (2 Timotiyesi 4:17). Leti enke Pawlesi, a so useefi mu du ala san u man fu paati a bun nyunsu. Efu u du a sani de, da u sa abi a biibi taki Yehofa o gi u „ala den taa sani tu” di wi abi fanowdu (Mateyesi 6:33). A wi Yehofa gi a faantiwowtu fu paati „a bun nyunsu”. Boiti dati, Yehofa e si wi enke „sama di e wooko makandii anga en” (1 Tesalonikasama 2:4; 1 Korentesama 3:9). Te wi e du ala san u poi aini a peleikiwooko, da a o moo makiliki gi u fu wakiti Yehofa fu a piki den begi fu u.

18. San i mu du efi i wani fitoow Yehofa efuso toon wan moo bun mati fi en?

¹⁸ U mu koboloiki a ten di wi abi nownow fu toon moo bun mati fu Yehofa. Te yu e bigin kusumi fu di tesi e miti i, da i mu si a ten di a tesi e miti i enke wan okasi di yu abi fu kon moo koosube a Yehofa. Leisi a Beibel finifini, da i sidon denki fu den sani di yu e leisi. Efu i du ala den sani ya, da i sa abi a biibi taki Yehofa o yeepi i fi i holidoo aini a ten ya, anga a ten di e kon.