1, 2. San den kelen-owluman si di den go a son kemeente?

FOSI a kelen-owluman kaba taki anga den owluman na a owluman komakandaa, neen a opo en ede luku den. A be e lesipeki den man ya, bika den be e wooko taanga. Son wan fu den be sa de en dda seefi. Tokuso wan sani de di be e gi en booko-ede. A akisi den owluman taki: „Den baala ya, san u du fu yeepi den taa baala fu tyai moo faantiwowtu aini a kemeente?” Den owluman be sabi taki a lasiti leisi di a be kon, a be taigi den fu poti moo pakisei na a pisi toli de. Te fu kaba wan fu den owluman taki: „Beina wi á du sani ye.” Den taa owluman taki aseefi sani.

² Efu yu a wan owluman, kande na aseefi sani i be o taki tu. Den kelen-owluman kon si taki somen owluman mu meke moo moiti fu yeepi gaandi baala anga yonkuuwan fu tyai moo faantiwowtu aini a kemeente. Ma a sani ya á makiliki. Fu saide?

3. (a) Fa Beibel e soi taki a de taanga fanowdu fu leli taawan fu tyai faantiwowtu? Saide ala u mu poti pakisei na a sani ya? (Luku san sikiifi a ondoose.) (b) Saide a á makiliki gi son owluman fu leli taa baala fu tyai moo faantiwowtu?

 ³ Efu yu a wan owluman, da yu e fusutan taki a de taanga fanowdu fu leli taa baala fu tyai moo faantiwowtu. * (Luku san sikiifi a ondoose.) Yu e fusutan tu taki moo baala de fanowdu fu yeepi taanga a biibi fu den baala anga sisa fu den kemeente. Te nyun kemeente e opo, da den baala ya sa yeepi den kemeente ya. (Leisi Yesaya 60:22.) Beibel e taki u mu „leli taawan”. (Leisi 2 Timotiyesi 2:2.) Ma tokuso a á makiliki fu poti ten a wan se fu du a sani de. Bika i mu solugu i osufamii, i mu go a wooko, i mu poti pakisei tu a den sani di a kemeente abi fanowdu. Fu di owluman abi somen sani fu du, meke u wani go luku saide a de fanowdu fu den poti ten a wan se fu leli taa baala fu tyai faantiwowtu aini a kemeente.

4. Saide meke son owluman e daaidaai son leisi fu leli taa baala fu tyai faantiwowtu?

⁴ Saide meke a á makiliki gi son owluman fu leli taa baala fu tyai faantiwowtu? Kande son wan fu den e pakisei taki: ’Den taa wooko aini a kemeente de moo taanga fanowdu. Wi á poi fika den wooko de go du taa sani. Winsi mi á leli taa baala nownow fu tyai faantiwowtu, sani ná o du a kemeente.’ Ma a so a de tuu? A tuu taki i mu poti pakisei wantenwanten a son sani di a kemeente abi fanowdu. Ma bakaten sani ná o waka bun gi a kemeente efu yu e daaidaai fu leli taa baala fu tyai faantiwowtu.

5, 6. San a toli fu a wagi e leli u fu a leli di owluman mu leli taa baala fu tyai moo faantiwowtu?

⁵ Pakisei wan sama di abi wan wagi. Efu a á wani a wagi booko, da a mu e kengi a smeer-oli te a yuu doo. Kande a sama e si enke a moo pelensipali fu lai oli aini a tenki, bika efu a á poti oli aini a tenki a wagi ná o lei. Kande ai pakisei tu taki a ná abi ten nownow. Ma di na a wagi abi oli fu lei ete, da bakaten a sa kengi a smeer-oli. Ma efu a nái kengi a smeer-oli te a de fanowdu, a wagi o booko. A omen ten anga moni a o lasi fu seeka a wagi baka. San a toli ya e leli u?

⁶ Den owluman mu seeka son sani wantenwanten aini a kemeente efuso sani ná o waka bun. Leti enke fa wan sama mu e lai oli ala yuu na a wagi fi en, a so den owluman mu e poti pakisei a „den moo pelensipali sani” fu a kemeente tu (Filipisama 1:10). Ma son leisi a den pelensipali sani fu a kemeente wawan son owluman e poti pakisei, da den nái abi ten moo fu leli taa baala fu tyai faantiwowtu. Den owluman ya de enke wan sama di e daaidaai fu kengi a smeer-oli na a wagi fi en. Efu den e daaidaai fu leli taa baala, da baka wan pisi ten a kemeente ná o abi baala sai fu du den sani di de fanowdu.

7. Fa u mu si den owluman di e poti ten a wan se fu leli taa baala fu tyai faantiwowtu?

 ⁷ Neen ede meke noiti i mu si enke a á de fanowdu fu leli taa baala fu tyai faantiwowtu. Wan owluman di e leli taa baala fu tyai faantiwowtu a wan sama di koni. Bika ai du wan sani di o tyai wani gi a kemeente bakaten. (Leisi 1 Peitilisi 4:10.) Fa a sani ya o tyai wini gi a kemeente?

8. (a) Fu saide owluman mu poti ten a wan se fu leli taa baala fu tyai faantiwowtu? (b) San den owluman di go yeepi taa kemeente mu du? (Luku a faki: „ Wan wooko di de taanga fanowdu.”)

⁸ Wan owluman mu fusutan taki winsi a lai ondoofeni, tokuso a ná o poi du so ipi moo di a o kon gaandi (Mika 6:8). Owluman mu sabi tu taki „sani di den á poi si a fesi” sa meke a moo taanga gi den fu du a wooko fu den aini a kemeente (Peleikiman 9:11, 12; Yakowbesi 4:13, 14). Den owluman lobi den baala anga sisa aini a kemeente. Den e booko den ede anga den tu. Neen ede meke den e du ala san den man fu leli yonkuu baala fu tyai faantiwowtu aini a kemeente.​—Leisi Psalm 71:17, 18.

9. Sowtu sani di mu pasa ete, e meke a de fanowdu fu owluman leli taa baala fu tyai faantiwowtu?

⁹ Den owluman ya de taanga fanowdu, bika a moiti di den e meke fu yeepi taa baala o meke a kemeente kon moo taanga. Moo baala o de fu yeepi a kemeente fu libi na a wan anga fu tan dini Gadu. A yeepi ya de fanowdu aini den kiiboi dei. A o de moo taanga fanowdu na a ten fu a gaan banowtu tu (Eseikiyeli 38:10-12; Mika 5:5, 6).  Owluman, poti ten a wan se fu leli taa baala fu tyai faantiwowtu. A tidetide seefi i mu bigin.

10. San wan owluman mu du efu a wani leli taa baala fu tyai faantiwowtu?

¹⁰ U sabi taki yu enke owluman abi tyaipi sani fu du aini a kemeente. Tokuso, i mu koboloiki pikinso fu a ten de fi i leli taa baala fu tyai faantiwowtu (Peleikiman 3:1). A moiti fi i ná o de fu soso, bika a o tyai wini gi a kemeente bakaten.

11. (a) San wi e leli te u luku den sani di wantu owluman taki? (b) Enke fa Odo 15:22 e soi, da saide a de taanga fanowdu fu luku san den owluman ya taki?

¹¹ Den be akisi wantu owluman fa den e yeepi taa baala fu tyai faantiwowtu aini a kemeente. * (Luku san sikiifi a ondoose.) Ala den owluman ya be taki aseefi sani, anga ala fa den nái tan aini aseefi kondee. San wi e leli fu a sani ya? Wi e leli taki den leli fu Beibel poi yeepi baala ’na ala se efuso na a ala kemeente’ fu tyai moo faantiwowtu (1 Korentesama 4:17). Aini a artikel ya anga a wan di e kon, wi o taki fu den sani di den owluman ya du fu yeepi taa baala.​—Odo 15:22.

12. Sowtu sani wan owluman mu du fosi a bigin leli wan baala? Fu saide?

¹² Wan owluman mu seeka a ati fu wan baala fosi a leli en fa a mu tyai faantiwowtu. Saide a sani ya de fanowdu? Leti enke fa wan goonman mu seeka a doti fosi a bigin paandi, a leti so wan owluman mu seeka a ati fu wan baala fosi a o poi leli en fu tyai faantiwowtu. Fa wan owluman sa seeka a ati fu a baala di ai leli? A sa waka a den bun leliman baka di be e libi aini a ten fu Beibel. Wan fu den leliman ya a be Samuweli.

13-15. (a) San Yehofa be taigi Samuweli? (b) Fa Samuweli seeka Saul gi a nyun wooko di a be o du? (Luku a fowtow na a bigin.) (c) Saide a toli fu Samuweli pelensipali gi owluman aini a ten ya?

¹³ Moo enke 3000 yali pasa, Yehofa be taigi a gaandi polofeiti di den e kai Samuweli taki: „Tamaa so wan yuu mi o sende wan man fu a lo fu Benyamin kon a yu. I mu salufu en fu toon tiiman fu mi foluku Islayeli” (1 Samuweli 9:15, 16). Samuweli be fusutan taki a neen be o de enke fesiman moo fu den Islayelisama. Yehofa be wani a salufu wan taa sama fu teke fesi. Fu di Samuweli be wani seeka a ati fu a man ya gi a nyun wooko di a be o du, meke a be bigin pakisei luku fa a mu du a sani ya.

¹⁴ A tamaa fi en, neen Samuweli miti anga Saul. Yehofa taigi Samuweli taki: „Na a man ya mi be e taki.” Neen wantenwanten Samuweli du a sani di a be abi a pakisei. A seeka sani fu taki anga Saul. A kai Saul anga a futuboi fi en fu den kon nyan makandaa anga en. A meke Saul sidon na a moo bun peesi fu a tafaa, neen a gi en a moo bun pisi totoo. A taigi Saul taki: „Teke da i nyan, bika a gi yu u be kibii en.” Baka di den nyan, neen a kai Saul kon neen osu. Den be e gi toli di den be de a pasi e go na a osu fu Samuweli. Di den doo, neen den go na a tapu osu, neen Samuweli „taki wan hii pisi ten anga Saul  na a tapu osu” te enke den go siibi. A tamaa fi en, neen Samuweli salufu Saul, a bosi en, neen a soi en san a mu du. Baka dati Saul gwe. Den sani ya be meke Saul de seekaseeka gi den sani di be o pasa bakaten.​—1 Samuweli 9:17-27; 10:1.

¹⁵ Samuweli be salufu Saul fu toon tiiman fu wan foluku. A tuu taki a sani ya a ná aseefi enke a leli di wan owluman e leli wan baala fu toon wan dinali efuso wan owluman aini a kemeente. Tokuso den owluman sa leli omen sani fu a fasi fa Samuweli be seeka a ati fu Saul fu toon tiiman. Wi o taki fu tu sani di den sa leli.

16. (a) Fa Samuweli fii di den Islayelisama be wani wan libisama enke kownu? (b) San Samuweli du di Yehofa taigi en fu a salufu Saul enke kownu?

¹⁶ I mu wani, yu á mu daaidaai. A fosi leisi di Samuweli yee taki den Islayelisama be wani wan libisama enke kownu, neen a fii booko saka. A be fii enke a foluku á be wani en enke fesiman moo (1 Samuweli 8:4-8). A dii leisi Yehofa be abi fu taigi en fu a aliki a foluku, bika Samuweli á be wani poti wan sama enke kownu gi den (1 Samuweli 8:7, 9, 22). Winsi Samuweli be e fii so, tokuso en ati á boon na a sama di be o teke en peesi. A á dyalusu anga en tu. Di Yehofa taigi en fu salufu Saul enke Kownu, a á daaidaai. A du san Yehofa taki, ná fu di taa fasi á be de, ma a fu di a be lobi Yehofa.

17. Fa owluman aini a ten ya e waka a Samuweli baka? Fa den owluman ya e fii?

¹⁷ Aini a ten ya, a omen owluman di abi ondoofeni e waka a Samuweli baka. Den e poti ten a wan se fu leli taa baala a wan lobi-ati fasi (1 Peitilisi 5:2). Den nái feele fu paati wantu fu den wooko di den e du aini a kemeente anga den baala ya. Ma den e si den baala ya enke sama di e „wooko makandaa” anga den fu yeepi a kemeente (2 Korentesama 1:24; Hebrewsama 13:16). Den owluman ya di nái denki denseefi namo, e piisii te den e si fa den taa baala ya e koboloiki a koni  anga a kaakiti fu den fu yeepi a foluku fu Yehofa.​—Toli 20:35.

18, 19. Fa wan owluman sa seeka a ati fu a baala di ai leli? Fu saide meke a sani ya de fanowdu?

¹⁸ Ná leli wawan i mu leli den, ma i mu de wan mati tu. Di Samuweli be miti anga Saul, a be sa teke a oli kandi a Saul ede wanten. Dati be o sai kaba fu salufu Saul enke kownu. Ma a á be o de seekaseeka fu tii a foluku fu Gadu. Neen ede meke Samuweli teke ten fu seeka a ati fu Saul fosi. A so Saul be o de seekaseeka gi a nyun wooko. Fosi a salufu Saul, den nyan makandaa, den gi toli di den be de a pasi, den taki wan hii pisi ten na a tapu osu, baka dati den go siibi. A baka di a du den sani ya fosi a si taki a yuu doo fu be salufu Saul enke kownu.

¹⁹ A so a de tu aini a ten ya. Fosi wan owluman bigin leli wan taa baala, da a mu toon mati anga en fosi. A ná ala kondee sama gwenti du sani na aseefi fasi. Neen meke a ná ala yuu den sani di owluman e du fu toon mati anga taa baala o de aseefi tu. Ma winsi pe yu e libi, winsi yu abi tyaipi sani fu du, tokuso i mu poti ten a wan se gi a baala di yu e leli. A so a baala o si taki yu e booko yu ede anga en. (Leisi Romesama 12:10.) Den baala di yu e leli o teke en fu bigi te den si taki yu e booko yu ede anga den.

20, 21. (a) On ten i sa taki wan sama a wan bun leliman? (b) Sowtu toli wi o taki aini a taa artikel?

²⁰ Wan bun leliman a wan sama di lobi gi taawan leli. Ma wan bun leliman mu lobi a sama di ai leli tu. (Luku Yohanisi 5:20.) Saide meke a sani ya pelensipali? Efu wan baala e si taki yu e booko yu ede anga en tuutuu, a o de kabakaba fu teke den leli di yu e gi en. Efu yu a wan owluman, yu á mu leli den baala wawan, ma i mu de wan mati fu den tu.​—Odo 17:17; Yohanisi 15:15.

²¹ A baka te wan owluman seeka a ati fu wan baala fosi, a mu leli en fa fu tyai faantiwowtu. Fa a sa du a sani ya? Wi o taki fu a toli de aini a taa artikel.