1. (a) Sowtu sani den diniman fu Yehofa e fusutan? Fa den e soi aini a ten ya taki den sabi a sani de? (b) Fu sowtu toli wi o taki aini a artikel ya?

A FOLUKU fu Gadu e fusutan taki sani e waka bun te sama kisi leli. Abalaham anga ala den futuboi fi en di be leli fa den mu feti, be wini di den go fii Lot (Genesesi 14:14-16). Den singiman aini a ten fu Kownu David be leli fa den mu singi gafa Yehofa (1 Koloniki 25:7). Aini a ten ya ala u mu feti anga a goontapu fu Saatan (Efeisesama 6:11-13). Wi e gafa Yehofa tu te wi e taki fu a nen fi en (Hebrewsama 13:15, 16). Leti enke den diniman fu Yehofa aini a ten fu Beibel, a so useefi mu kisi leli tu. Yehofa gi den owluman a faantiwowtu fu gi sama leli aini a kemeente (2 Timotiyesi 2:2). Sowtu sani son owluman du di den be e leli taa baala fu tyai faantiwowtu?

2. San wan owluman mu du fosi a leli wan baala fu tyai faantiwowtu? Fu saide?

² Wan owluman de enke wan sama di e paandi wan goon. Fosi a paandi den sii fi en, a mu poti mesi gi a doti fu meke den sani goo bun. Na aseefi sani de wan owluman mu du tu. Fosi a leli wan baala fu tyai faantiwowtu, a mu soi en wantu sani aini Beibel di o yeepi en fu wooko anga den sani di a o leli.​—1 Timotiyesi 4:6.

3. (a) Fa wan owluman sa koboloiki a sani di Yesesi taki aini Malikisi 12:29, 30 fu taki anga a baala di ai leli? (b) Fa a begi fu wan owluman sa gi a baala di ai leli taanga-sikin?

³ A bun fu sabi fa a baala di yu e leli e pakisei fu waaleiti. Efi i wani sabi a sani de, da i mu akisi en efu a paamisi di a paamisi fu libi enke fa Yehofa wani, kengi a fasi fa ai libi. Te i akisi en a sani de, da yu o abi a okasi fu soi en fa a sa dini Yehofa anga en hii ati. (Leisi Malikisi 12:29, 30.) Kande a o de fanowdu fi i begi anga a baala. Akisi Yehofa fu a gi a baala a santa yeye fi en fu a sa wooko anga den sani di yu e leli en. Te a baala e yee fa yu e begi gi en, da a o kisi taanga-sikin fu meke moiti aini a kemeente.

4. (a) Sowtu toli fu Beibel o yeepi wan baala fu go a fesi? (b) San mu de a maiki fu owluman te den e leli taa baala?

⁴ Fosi i yeepi wan baala fu tyai faantiwowtu, i mu soi en wantu toli aini Beibel di o yeepi en fu si saide a de taanga fanowdu fu a de wan sama di e yeepi taawan, wan sama di taawan e fitoow, anga di abi sakafasi (1 Kownu 19:19-21; Nehemiya 7:2; 13:13; Toli 18:24-26). Den manii ya de taanga fanowdu leti enke fa mesi de taanga fanowdu gi a doti. Den o yeepi a baala fu goo efuso fu meke go a fesi moo gaw. Wan owluman fu Faansikondee di den e kai Jean-Claude taki, te ai leli wan baala, da ai yeepi en fu si den wini di a o fende te ai du sani enke fa Beibel taki. A taki: „Mi e suku okasi fu u sa leisi wan tekisi makandaa. A so mi e meke moiti fu opo a ain fu a baala fu a ’sa si den moin sani’ fu a Wowtu fu Gadu” (Psalm 119:18). San a wantu  taa sani di o yeepi a baala fu go a fesi?

5. (a) Saide meke a de fanowdu fu taki anga wan baala fu den sani di a wani du gi Yehofa? (b) Saide owluman mu bigin leli wan baala neen yonkuu yuu? (Luku san sikiifi a ondoose.)

⁵ Akisi a baala di yu e leli san a den sani di a wani du gi Yehofa. Efu a ná abi nawan maiki, da yeepi en fu poti wan maiki di a poi doo. Taigi en fa i be e piisii di i be doo wan fu den maiki di i be poti. Anga ala fa a sani ya e gei wan pikin sani, tokuso a o yeepi a baala. Wan owluman di den e kai Victor e pionili aini Afiikan. A baala ya taki: „Son owluman di abi ondoofeni taki, a moo bun fu leli wan baala neen yonkuu yuu. I sa meke den du wooko di den o poi du aini a kemeente. Efu yu e leli wan baala neen yonkuu yuu, a o tan meke moiti fu du den sani di a wani du gi Yehofa, winsi a kon moo bigi efuso winsi taa sani o wani puu en pakisei.”​—Leisi Psalm 71:5, 17. * (Luku san sikiifi a ondoose.)

6. San a wan fu den pelensipali sani di Yesesi be e du te a be e leli taawan?

 ⁶ Efi i wani gi wan baala taanga-sikin fu tyai faantiwowtu aini a kemeente, da yu á mu taigi en namo san a mu du. I mu soi en tu saide a de fanowdu. Yesesi be taigi den disipel fi en taki den mu peleiki. Ma fosi dati, a taigi den tu fu saide. A be taki: „Mi fende ala makiti a hemel anga goontapu. Neen ede meke u mu go a sama fu ala kondee, da u meke den toon bakaman fu mi. U mu dopu den aini a nen fu a Tata, a Manpikin, anga a santa yeye” (Mateyesi 28:18, 19). Fa i sa waka a Yesesi baka te yu e leli wan baala fu tyai faantiwowtu?

7, 8. (a) Fa owluman sa waka a Yesesi baka te den e leli wan baala fu tyai faantiwowtu? (b) Saide meke wan owluman mu e gafa a baala di ai leli? (c) San owluman sa du fu yeepi taa baala? (Luku a faki „ Fa i sa leli taa baala fu tyai faantiwowtu.”)

⁷ Te yu o gi wan baala wan wooko, soi en aini Beibel saide a wooko de taanga fanowdu. Te i du so, da a baala ná o du a wooko namo fu di i sende en, ma a o fusutan taki Beibel e holibaka gi a wooko di a o du. Efi i akisi wan baala fu kiin a doo mofu fu a Kownukondee zaal fu sama á kisi mankei, da kande i sa soi en san sikiifi aini Titesi 2:10. Soi en fa a wooko di a o du o moin a bosikopu fu a Kownukondee. Akisi en tu fu pakisei fa a wooko di a o du o tyai wini gi den gaandi sama fu a kemeente. Te i taki so anga en, da a o wani du a wooko fu di ai booko en ede anga taawan. A ná o du a wooko namo fu di den owluman sende en. Te a o si den wini di den baala anga sisa e fende fu a wooko di ai du, a o fii bun, bika ai yeepi taawan.

⁸ Wan taa sani, a taki i mu e gafa en te i si taki ai wooko anga den sani di yu e leli en. Saide meke a sani ya de fanowdu? Leti enke fa wataa de fanowdu fu meke wan bon goo bun, a letiso wan baala o go a fesi te yu e gafa en.​—Luku Mateyesi 3:17.

9. (a) Saide a taanga gi son owluman fu fende baala di wani tyai faantiwowtu? (b) Saide somen yonkuu baala nái poti a dini fu Yehofa na a fosi peesi aini den libi?

⁹ Son leisi ai taanga gi owluman aini gudu kondee fu gi baala di pasa 20 efuso 30 yali, taanga-sikin fu du moo aini a kemeente. Wantu owluman anga ondoofeni aini 20 kondee, kon fusutan fu saide son baala á wani tyai faantiwowtu aini a kemeente. Somen fu den owluman ya taki, di den baala be moo yonkuu, den mma anga den dda á be e gi den taanga-sikin fu tyai faantiwowtu aini a kemeente. Efu son wan fu den baala ya be wani du moo aini a kemeente, da den mma anga den dda be e gi den taanga-sikin fu go a moo hei sikoo efuso meke nen aini a goontapu ya. Neen meke noiti den poti a dini fu Yehofa na a fosi peesi aini den libi.​—Mateyesi 10:24.

10, 11. (a) Fa wan owluman sa yeepi wan baala fu kengi a fasi fa ai denki? (b) Sowtu tekisi wan owluman sa koboloiki fu gi wan baala taanga-sikin? Fu saide? (Luku san sikiifi a ondoose.)

¹⁰ Efu wan baala ná abi a fii fu tyai  faantiwowtu aini a kemeente, a ná pikin moiti yu o abi fu meke fu kengi en pakisei. Ma tokuso i kan yeepi en. Wan goonman poi yeepi wan yonkuu bon fu goo leti opu te a poti ahala gi en. A letiso wan owluman sa yeepi wan baala fu si san a mu kengi fu a sa tyai faantiwowtu aini a kemeente. Fa a sa du a sani de?

¹¹ Poti ten a wan se fu toon mati anga a baala. Meke a fusutan taki a kemeente abi en fanowdu. Sidon taki anga en fu tekisi di o meke a pakisei a paamisi di a paamisi Yehofa taki a o dini en (Peleikiman 5:4; Yesaya 6:8; Mateyesi 6:24, 33; Lukasi 9:57-62; 1 Korentesama 15:58; 2 Korentesama 5:15; 13:5). Suku fu poti akisi gi en di o doo en ati. Akisi en taki: ’San i taigi Yehofa di i paamisi en taki yu o dini en? Fa Yehofa be e fii di i dopu?’ (Odo 27:11). ’Fa Saatan be e fii?’ (1 Peitilisi 5:8). Den tekisi ya sa doo a ati fu a baala.​—Leisi Hebrewsama 4:12. * (Luku san sikiifi a ondoose.)

12, 13. (a) Fa Elisa be soi taki a be wani teke leli? (b) Fa Yehofa meke Elisa fende wini fu a holi di a be holibaka gi Eliya?

¹² Yonkuu baala, a kemeente abi i fanowdu! San o yeepi i fu go a fesi aini a dini di yu e dini Yehofa? Meke u luku wantu sani di be pasa aini a libi fu Elisa, wan sama aini a ten fu Beibel di be kisi leli. Da wi o fende a piki fu a akisi ya.

¹³ Wan sani fu 3000 yali pasa, a polofeiti Eliya be kai a yonkuu Elisa fu toon en futuboi. Elisa á be daaidaai. A be abi sakafasi, bika a be e du ala den wooko di Eliya be e gi en. Eliya be sa fitoow en (2 Kownu 3:11). A sigisi yali langa Eliya leli Elisa. Di a wooko di Eliya be e du aini Islayeli be e kon a wan kaba, neen a taigi Elisa taki a á de fu a wooko gi en moo. Ma te dii leisi Elisa taigi en taki: „Mi ná o gwe fika i.” A á be wani gwe fika a leliman fi en. Bakaten Yehofa be meke Elisa fende wini fu a holi di a be holibaka gi Eliya, bika a be abi a gaandi fu si fa wan gaan daaiwinta tyai Eliya gwe.​—2 Kownu 2:1-12.

14. (a) Fa den baala di e teke leli sa waka a Elisa baka? (b) Saide den owluman mu man fitoow a baala di e teke leli?

¹⁴ Fa i sa waka a Elisa baka efu yu a wan baala di e teke leli? De kabakaba fu du ala sowtu wooko aini a kemeente, winsi a wooko di taa sama á lobi. I mu si a owluman di e leli i enke i mati. Taigi en taki yu e teke en fu bigi fa ai yeepi i. Soi en taki i wani a leli i moo sani. Ma a moo pelensipali sani, a taki i mu de wan sama di den owluman sa fitoow te den gi i wan wooko aini a kemeente. Fu saide? Te den owluman o si taki den sa fitoow i fu di yu e meke moiti fu du i wooko bun, da den o si kiin taki a Yehofa wani fi i tyai moo faantiwowtu aini a kemeente.​—Psalm 101:6; leisi 2 Timotiyesi 2:2.

15, 16. (a) Fa Elisa soi taki ai lesipeki Eliya? (Luku a fowtow na a bigin.) (b) Saide den taa polofeiti be e fitoow Elisa?

¹⁵ A toli fu Elisa e soi tu taki baala aini a ten ya mu lesipeki den owluman di abi ondoofeni. Baka di Eliya anga Elisa go luku wantu polofeiti aini a foto Yerikow, neen den go na a Yordaan liba. Di den doo ape, neen „Eliya teke en dyakiti, a dombii en, neen a naki na a wataa tapu, neen a wataa paati a tu”. Den tu man abaa a liba na a pisi di be kon dee. Den be e „taki” di den be e waka. Elisa leli omen sani fu Eliya, bika a be e aliki bun te a be e taki. Noiti a be e fii enke a sabi ala sani kaba. Di a daaiwinta tyai Eliya gwe, neen Elisa daai go baka na a Yordaan liba. Di a doo, neen a naki a wataa anga a dyakiti fu Eliya. A taki: „Pe Yehofa, a Gadu fu Eliya de?” Neen a wataa fu a liba paati baka.​—2 Kownu 2:8-14.

¹⁶ A lasti wonduu di Eliya be du anga a fosi wonduu di Elisa du na aseefi. San a sani ya e leli u? Elisa á be si enke a sa du sani enke fa a wani fu di neen be e teke fesi, ma a be e wooko leti enke fa Eliya be soi en. A so a soi taki ai lesipeki Eliya, a leliman fi en. A sani ya be meke den taa polofeiti fitoow Elisa (2 Kownu 2:15). A 60 yali Elisa wooko enke polofeiti. Yehofa be gi en makiti fu du wonduu moo Eliya seefi. San den baala di e teke leli sa leli fu a toli ya?

17. (a) Fa den baala aini a ten ya di e teke leli sa waka a Elisa baka? (b) Fa Yehofa sa koboloiki den bakaten?

¹⁷ Ná fu di i kisi faantiwowtu aini a kemeente, da i mu du sani taa fasi. Ná feegete taki a wan enkii sani di sa meke i du sani taa fasi, a te a sani de o tyai wini gi a kemeente, efuso te a olikanisâsi kengi a fasi fa u mu du sani. Yu á mu kengi sani fu di i wani. Elisa be soi lesipeki gi Eliya fu di a be e wooko leti enke fa a be soi en. Na a sani de meke den taa polofeiti be e fitoow en. A so a de aini a ten ya. Den owluman e du sani enke fa Beibel e taki, neen ede meke efi i du sani enke fa den gwenti du sani, da yu e soi taki yu e lesipeki den. Den baala anga sisa o fitoow i tu. (Leisi 1 Korentesama 4:17.) Te yu o abi moo ondoofeni, yu o sabi on ten i mu kengi son sani di o yeepi a kemeente fu du sani enke fa a olikanisâsi fu Yehofa e soi u. Aini a ten di e kon, Yehofa o yeepi i fu du sani moo den leliman fi i, leti enke fa a be yeepi Elisa.​—Yohanisi 14:12.

18. Saide a de taanga fanowdu fu leli taa baala fu tyai faantiwowtu?

¹⁸ Wi howpu taki a artikel ya anga a wan neen fesi yeepi moo owluman fu poti ten a wan se, fu leli taa baala fu tyai faantiwowtu. Wi e begi tu taki moo baala aini den kemeente de kabakaba fu teke leli. Wi e begi fu den sa koboloiki den sani di den leli fu yeepi a foluku fu Yehofa. A sani ya o meke den kemeente a hii goontapu o kon moo taanga. A sani de o yeepi ala u fu tan dini Yehofa aini den taanga ten di e kon.