1. Saide meke ala u mu meke moiti fu wi anga Yehofa toon moo bun mati?

EFU yu a wan dopu Kotoigi fu Yehofa, da yu abi wan gaan gudu. Yu anga Yehofa a mati. Ma a goontapu fu Saatan anga den sondu fii di wi abi, e meke ai taanga gi u fu wi anga Yehofa tan mati. Neen meke u mu du ala san u man fu wi anga Yehofa toon moo bun mati.

2. Fa u sa kon moo koosube a Yehofa?

² Yu e si Yehofa enke wan tuutuu sama? Yu e si en enke i mati? I be o wani de wan moo bun mati fi en? Yakowbesi 4:8 e taigi u san u mu du. Ape sikiifi taki: „Kon koosube a Gadu, da enseefi o kon koosube a yu.” Te yu o meke moiti fu kon koosube a Yehofa, da yu o si en enke wan tuutuu mati. Leti enke Yesesi, yu o fii tuutuu taki Yehofa de koosube fi i. Yesesi be taki: „A Sama di sende mi kon, de tuutuu.” „Mi sabi en” (Yohanisi 7: 28, 29). Ma san a wantu sani di i sa du fu kon moo koosube a Yehofa?

3. Fa wi anga Yehofa e taki?

³ Efi i wani kon moo koosube a Yehofa, da i mu e taki anga en ala yuu. Ma fa yu o du a sani ya? We, pakisei fa yu anga wan mati fi i di e tan a wan faawe peesi e taki. Wi e sende biifi gi useefi efuso taki a telefon. Yu anga Yehofa e taki te i gwenti begi. (Leisi Psalm 142:2.) Ma fa Yehofa o taki anga i? Ai taki anga i te i gwenti leisi Beibel, a Wowtu fi en, da yu e denki dipi fu san i leisi. (Leisi Yesaya 30:20, 21.) Meke u go luku fa a taki di yu anga Yehofa e taki o meke yu anga en toon moo bun mati. Wi o luku tu san o yeepi i fu si en enke wan tuutuu sama.

4, 5. Fa Yehofa e taki anga i te yu e leisi Beibel?

⁴ U sabi taki Gadu sikiifi en bosikopu poti aini Beibel gi ala sama. Ma a Beibel poi yeepi yu fu kon moo koosube a Yehofa? Eeye! Te yu e leisi Beibel ala dei, da i mu e luku fa yu e fii te yu e leisi en. I mu e sidon denki fa i sa wooko anga den sani di yu e leli. Te i du so, da yu e meke Yehofa taki anga i. Yu o si en tu enke wan bun mati di e yeepi i. A so yu o kon moo koosube neen.​—Hebrewsama 4:12; Yakowbesi 1:23-25.

⁵ Fa yu e pakisei te yu e leisi a pisi pe Yesesi e taki: „Ná feti e suku gudu a goontapu ya moo”? Kande yu e si enke yu e poti a Kownukondee a fesi kaba aini i libi. Kande yu e si enke Yehofa e piisii anga i tu. Ma te yu e e fusutan taki yu á mu libi bigi efuso i man du moo gi Yehofa, da a Yehofa e yeepi i fu fusutan san i mu du fu kon moo koosube neen.​—Mateyesi 6:19, 20.

6, 7. (a) San o pasa anga a lobi di yu anga Yehofa abi gi useefi te yu e leisi Beibel? (b) Sowtu sani u mu holi a pakisei te wi e leisi Beibel?

⁶ Te wi e leisi Beibel, da wi e fusutan san a den sani di u mu du fu man dini Yehofa moo bun. Ma wi e leli tu san a den bun sani di ai du anga den  bun fasi di a abi. A sani ya e meke u moo lobi en. Te wi e moo lobi Yehofa, da enseefi e moo lobi u tu. A so wi anga en e toon moo bun mati.​—Leisi 1 Korentesama 8:3.

⁷ Efu u wani kon moo koosube a Yehofa, da a de taanga fanowdu fu sabi saide wi e leisi Beibel. Yesesi be taki: „Efu wan sama wani fende a teego libi, da a mu leli sabi yu enke a wan kodo tuutuu Gadu, anga Yesesi Kelestesi di i be sende kon a goontapu” (Yohanisi 17:3). A omen sani u sa leli te wi e leisi Beibel. Ma u mu holi a pakisei taki, a fu di u wani sabi Yehofa moo bun, meke u mu e leisi Beibel.​—Leisi Ekisodesi 33:13; Psalm 25:4.

8. (a) San son sama sa pakisei te den luku san Yehofa du anga Kownu Asariya? (b) Fa yu o si den sani di Yehofa e du te i sabi en bunbun?

⁸ Te wi e si Yehofa enke wan bun mati, da u ná o booko wi ede te Beibel nái taki ala yuu fu saide ai du son sani. A ten di Asariya be de kownu fu Yuda, den sama be e dini falisi Gadu. Ma Asariya á be waka a den baka. „Ala yuu a be e du sani enke fa Yehofa wani” (2 Kownu 15:1-5). Ma Yehofa be meke gwasi kisi Asariya. Fu saide? Beibel nái taki fu a pisi de aini a toli ya. Fa yu e pakisei fu a sani di Yehofa du ya? Yu e si enke Yehofa á du sani a wan leti fasi? Yu e si enke a fu soso a sitaafu Asariya? Nono. Efi i sabi Yehofa bunbun, yu o si taki a nái sitaafu sama fu soso. Ai gi sama a sitaafu di den mu fende (Yelemiya 30:11). Winsi wi á sabi saide Yehofa sitaafu Asariya, toku u sabi taki Yehofa du sani a wan leti fasi.

9. Sowtu taa sani e yeepi u fu fusutan saide Yehofa meke gwasi kisi Asariya?

⁹ Beibel e meke u sabi moo sani fu a libi fu Kownu Asariya. Sama be sabi en tu enke Kownu Usiya (2 Kownu 15:7, 32). A toli di sikiifi aini 2 Koloniki 26:3-5, 16-21 e soi u taki a be e du „sani enke fa Yehofa wani.” Ma a pisi de e soi tu taki bakaten „a kon abi bigi fasi. Neen meke sani á waka bun gi en.” A kownu be wani du wan sani di den pilisite wawan be mu du. Na 81 pilisite be e puubei fu tapu en. Den be taigi en taki a sani di a wani du de á bun. San Asariya du? A bigifasi di a be abi meke en ati boon a den pilisite. Den taa tekisi ya e yeepi u fu fusutan saide Yehofa meke gwasi kisi a kownu.

10. Saide a á de fanowdu fu u sabi ala yuu saide Yehofa e du wan sani? San o yeepi u fu biibi taki ala yuu Yehofa e du sani a wan leti fasi?

¹⁰ San a toli ya e leli u? Aini a toli fu Kownu Asariya, u sabi saide Yehofa sitaafu en. Ma san yu o du te Beibel nái soi saide Yehofa du wan sani? Yu o akisi iseefi efu Yehofa du sani a wan leti fasi tuutuu? Efuso yu o si enke den leli fu Beibel sai kaba fu gi i a fitoow taki Yehofa e du sani a wan leti fasi ala yuu? (Deitolonomi 32:4). O moo yu e leli sabi Yehofa, o moo yu o fitoow en. O moo yu o lobi en tu. A so i ná o booko yu ede fu sabi namonamo fu saide a du wan  sani. Te yu e leisi Beibel, yu o si Yehofa enke wan tuutuu sama. Yu o kon moo koosube neen tu.​—Psalm 77:12, 13.

11-13. Fa i du sabi taki Yehofa e aliki u te wi e begi? (Luku a fowtow na a bigin.)

¹¹ Wi e kon moo koosube a Yehofa te wi e begi. Te wi e begi wi e gafa en, wi e gi en daa, efuso akisi en fu a sa yeepi u tu (Psalm 32:8). Ma efi i wani toon bunbun mati anga Yehofa, i mu biibi tuutuu taki ai aliki den begi fi i.

¹² Son sama taki Gadu nái aliki begi. Den e si enke begi a wan sani di sama e du fu den fii moo bun. Den e si enke begi a wan sani di e yeepi i fu denki bunbun fu den polobelema fi i. Da a so yu e sabi san i mu du. A tuu taki begi e yeepi i a den fasi ya. Ma te yu e taki anga Yehofa aini begi, ai aliki i tuutuu. Fa u du sabi taki Yehofa e aliki den begi fu u tuutuu?

¹³ Pakisei a sani ya: Fosi Yesesi be kon a goontapu, a be si fa Yehofa e piki den begi fu den diniman fi En a goontapu ya. Di Yesesi be de a goontapu, a be e begi en Tata a hemel. A be e taigi en san ai denki anga fa ai fii. Wan leisi a wan hii neti a begi (Lukasi 6:12; 22:40-46). I denki Yesesi be o du a sani ya efu a be sabi taki  Yehofa á be e aliki? A be leli den bakaman fi en tu fa den mu begi. A be o du a sani ya efu a be sabi taki Yehofa nái aliki? A sani ya e soi taki Yesesi be sabi taki Yehofa e aliki te wi e begi. A be taigi Yehofa taki: „Mi Tata, mi e gi i daa di i aliki a begi fu mi. Mi sabi taki yu e aliki mi ala yuu.” Useefi sa abi a fitoow taki Yehofa e aliki den begi fu u tu.​—Yohanisi 11:41, 42; Psalm 65:2.

14, 15. (a) Sowtu wini wi o fende te wi e taigi Yehofa kiinkiin san u wani? (b) Fa a begi fu Kathy yeepi en fi en anga Yehofa toon moo bun mati?

¹⁴ Son leisi a o gei enke Yehofa nái piki den begi fi i. Ma te yu e taigi en kiin san yu abi fanowdu, yu o moo si fa ai piki den begi fi i. Yu o moo biibi en tu. Efu ala yuu yu e taigi Yehofa san a den sani di e gi i booko-ede, da yu anga en o toon tuutuu mati.

¹⁵ Anga ala fa wan sisa di den e kai Kathy be gwenti go aini a peleikiwooko, tokuso a á be e du en anga piisii. * (Luku san sikiifi a ondoose.) A sisa ya taki: „Mi á be lobi a peleikiwooko. Tuutuu, á a be e switi gi mi.” Di a gwe anga pensyun, neen wan owluman gi en taanga-sikin fu du a kowownu pioniliwooko. A sisa taki: A owluman be langa a kowownu pioniliwooko pampila gi mi. A so mi bigin pionili. Ma mi be e begi Yehofa ala dei fu a yeepi mi fu mi lobi a peleikiwooko.” Yehofa be aliki a begi fi en? We, baka di a pionili dii  yali, neen a taki: „Fu di mi e go moo fuu aini a peleikiwooko, anga fu di mi e luku fa taa sisa e peleiki, meke mi go a fesi saafisaafi aini a fasi fa mi e taki anga sama aini a peleikiwooko. Nownow, a ná switi a peleikiwooko e switi gi mi namo, ma mi lobi en tu. Ma a moo gaan wini di mi fende, a taki mi anga Yehofa toon moo bun mati.” A begi fu Kathy yeepi en fi en anga Yehofa toon moo bun mati.

16, 17. (a) San u mu du efu u wani wi anga Yehofa toon moo bun mati? (b) Sowtu toli wi o taki aini a taa artikel?

¹⁶ A u hii libi langa wi abi fu meke moiti fu wi anga Yehofa toon bun mati. U mu meke moiti fu kon koosube neen efu u wani a kon koosube a wi. Meke u soi taki wi e aliki Yehofa fu di wi e sutudeli a Beibel naamo. Meke u taki anga en naamo aini begi tu. Efu u du den sani ya da wi anga Yehofa o toon moo bun mati. A o gi wi a kaakiti tu fu holidoo te wi e miti anga tesi.

¹⁷ Ma winsi fa wi o begi Yehofa ala dei, tokuso a ná ala den polobelema di wi abi o gwe. A sani de sa meke u bigin lasi biibi aini Yehofa. A kan taki wi o si enke Yehofa nái aliki den begi fu u. Kande wi o akisi useefi efu wi anga Yehofa a mati tuutuu. Efu a so yu e fii, da san i mu du? A taa artikel o taki fu a toli ya.