PAKISEI A SANI YA: I go koi a wan peesi pe den e soi sani fu fositen. Yu e si taki omen fu den sani gaandi kaba. Son wan abi olo, son wan lasi kololu anga son wan fu den á de hiihii moo. Ma te i luku wan fu den, da yu e si taki sani á du en. A gei nyunyun wan. Kande yu o akisi a sama di e soi yu a peesi taki: „A wan ya nyun moo den taawan?” Ai taigi i taki: „Nono, a gaandi moo gaanse fu den taa sani di de ya. A ná seeka den seeka en tu.” Di i akisi efu a kibii den be kibii en meke a de bunbun ete, a sama e taigi i taki: „Nono, a be de aini winta anga alen. A omen sama be wani poli en tu.” Kande i foondoo, neen i akisi en taki: „Anga san den meke en?”

Beibel de enke a sani ya. Pikinmoo a gaandi moo ala buku di de. Taa gaandi buku de. Ma leti enke den sani fu fosi, den buku ya á bun moo. Den leli di de aini kon gaandi tu, bika koniman fu a ten ya kon si taki sani de taa fasi. Te son wan fu den gaandi buku ya e taki fu dataa sani, yu á poi wooko anga san den taki bika a sani di sikiifi aini sa tyai ogii gi sama. Boiti dati, gaanse fu den buku ya á de hiihii moo. Son pisi fu den lasi efuso poli.

Ma Beibel á de enke den buku ya. Den bigin sikiifi Beibel wan sani fu 3500 yali pasa, tokuso nawan pisi fi en e mankei. A omen sani sama du anga en. Den boon a Beibel, den tapu sama fu tyai en go aini son kondee tu. Boiti dati, den taki Beibel ná abi wini. Ma a Beibel de ete. Kande yu e si enke den sani di sikiifi aini Beibel nai kai anga den sani di koniman kon si aini a ten ya. Ma yu o foondoo te i si taki Beibel be taki omen sani di koniman á be sabi a ten de.​—Luku a faki „A wan gaandi buku efuso wan buku di e taki san o pasa?”

Kande yu e akisi iseefi taki: „Beibel poi yeepi wi aini a ten ya?” Akisi iseefi a sani ya: „Sowtu polobelema e miti libisama aini a ten ya? Sowtu wan fu den moo ogii?” Kande yu o kai oloku, a poli di sama e poli a goontapu, den ogii di sama e du, efuso a bidiigi di den e bidiigi taawan. Luku wantu sani di Beibel e leli, da i akisi iseefi taki: „A goontapu be o moo bun efu sama be e du san Beibel taki?”

BEIBEL TAKI U MU MEKE MOITI FU LIBI BUN ANGA TAAWAN

„Wan sama o de koloku te ai meke moiti fu libi bun anga taawan, bika den o kai en Gadu pikin” (Mateyesi 5:9). „Du ala san i poi fu libi bun anga ala sama.”​—Romesama 12:18.

BEIBEL TAKI U MU ABI TYALI-ATI, U MU E GI TAAWAN PAADON

„Den sama di e soi tyali-ati gi taawan o de koloku, bika sama o soi tyali-ati gi den” (Mateyesi 5:7). „U mu abi boo anga taawan. Gi taawan paadon anga u hii ati tu te wan sama du wan hati sani anga u. Leti enke fa Yehofa * e gi u paadon anga en hii ati, a so useefi mu gi taawan paadon tu.”​—Kolosesama 3:13.

BEIBEL TAKI ALA SAMA MU LIBI NA A WAN

„A wan sama [Gadu] teke meke ala nasi sama a goontapu” (Toli 17:26). „Gadu á lobi a wan sama moo a taawan. Ma winsi sowtu kondee wan sama komoto, efu ai lesipeki Gadu, efu ai libi a wan leti fasi, Gadu o lobi en.”​—Toli 10:34, 35.

BEIBEL TAKI WI Á MU POLI A GOONTAPU

„Yehofa Gadu teke a man, neen a poti en aini a dyali fu Eden fu seeka a dyali” (Genesesi 2:15). Gadu o „kii den sama di e poli a goontapu”.​—Openbaring 11:18.

BEIBEL TAKI WI Á MU ABI TAKUUDU. WI Á MU LIBI A WAN FASI DI Á FITI

„U mu de na ain, luku bun fu u ná abi nawan sowtu takuudu, bika winsi wan sama abi omen gudu, den sani di a abi á poi gi en libi” (Lukasi 12:15). „Wi á mu gi toli fu hululibi efuso taa sani di á kiin. Boiti dati, den toli di wi e gi á mu soi taki wi abi bigi-ain, bika den sani ya á fiti sama di santa.”​—Efeisesama 5:3.

BEIBEL TAKI WI Á MU E FUFUU TAAWAN, U MU WOOKO TAANGA

„U wani du ala sani anga wan kiin ati” (Hebrewsama 13:18). „A sama di e fufuu, mu kaba anga a du de. Meke a go wooko taanga.”​—Efeisesama 4:28.

BEIBEL TAKI U MU YEEPI DEN SAMA DI DE A NOWTU

„Taki a wan fasi di e toosutu den sama di booko-saka. Yeepi den sama di swaki. U mu pasensi anga ala sama” (1 Tesalonikasama 5:14). „Solugu den pikin di ná abi mma anga dda anga den uman di man dede, te den de a nowtu.”​—Yakowbesi 1:27.

Beibel nai kai den sani ya namo da a kaba. Ma ai leli u fa u mi si den sani ya anga fa u sa wooko anga  den. Efu moo sama be e wooko anga den leli di u kai a tapu ya, libisama á be o lai polobelema so, ná so noh? A sani ya e soi taki den leli fu Beibel de taanga fanowdu, moomoo aini a ten ya. Ma sowtu wini i sa fende nownow fu den leli fu Beibel?

A moo koni sama di be de a goontapu be taki: „A den bun sani di wan sama e du, e soi taki a koni” (Mateyesi 11:19). A sani ya a tuu, ná so noh? A te yu e wooko anga wan leli fosi yu o si efu a abi wini. Kande yu e akisi iseefi taki: ’Efu Beibel e yeepi sama aini a ten ya, da mi mu man si fa ai yeepi mi. Fa a o yeepi mi anga den polobelema di mi abi nownow?’ Luku fa a yeepi wan sama.

A libi fu Delphine, * be e waka bun. A libi be e switi gi en. Neen wantu sani miti en. En meisyo dede. En man towe en. A be kon abi moni polobelema tu. A taki: „Mi á be e fusutan mi libi moo. Mi meisyo dede, mi man gwe fika mi. Mi á be abi peesi fu tan. Mi be e fii enke mi ná abi fa. Mi á be abi kaakiti anga howpu moo.”

A no fosi Delphine fusutan taki san Beibel taki a tuu. Beibel taki: „Wi e libi 70 yali. Efu u taanga  u sa doo 80 yali. Ma den yali ya lai booko-ede anga pina. Den e pasa gaw. Fosi i denki wi á de ya moo.”​—Psalm 90:10.

Delphine suku yeepi aini Beibel. Yu o foondoo te i si fa Beibel yeepi en. Yu o si aini den taa dii artikel taki Beibel yeepi omen taa sama anga den polobelema tu di den wooko anga san a taki. Den si taki Beibel de enke a sani fu fositen di u be taki fi en na a bigin. A á de enke den somen taa buku di e kon gaandi, efuso di nai teli gi a ten ya moo. A fu di a meke anga wan taa sani? A sa de taki a Gadu meke sama sikiifi Beibel?​—1 Tesalonikasama 2:13.

Kande iseefi e si taki u nai libi langa. A libi lai booko-ede. Pe yu e go suku yeepi anga toosutu te den polobelema e moo yu? Pe i sa fende yeepi?

Meke u luku dii fasi fa Beibel sa yeepi i. A poi yeepi i

1. fu polobelema á miti i.

2. fu losi polobelema.

3. te yu abi polobelema.

Den artikel di e kon o taki fu den dii sani ya.