SON SAMA E SI ENKE BEIBEL Á POI YEEPI WI AINI A TEN YA. Wan dataa taki te sama e meke moiti fu libi enke fa Beibel taki, da a leti enke den e teke wan gaandi buku fu 1920 fu leli pikin a sikoo aini a ten ya. Kande wan sama di nai kaba biibi Beibel sa akisi i efi i be o teke wan pampila di e soi fa fu wooko anga wan gaandi computer, fu luku fa i mu wooko anga den kofaliki computer fu a ten ya. Den sani ya e soi taki a omen sama e si enke Beibel a ná fu a ten ya moo.

Saide sama abi a gaandi buku ya fanowdu aini a ten ya pe ala sama e wooko anga omen nyun sani? Te i luku a internet, yu e si fa i mu du son sani anga fa i mu libi. A omen balinen sama e kon a tv fu soi taawan fa den mu libi. Boiti dati, sama sikiifi omen buku fu soi taawan fa den mu libi. A omen miliyun Ameekan dala sama e meke anga den buku ya.

Saide sama abi Beibel fanowdu te i luku ala den kofaliki sani fu a ten ya? A wan sani fu 2000 yali pasa den kaba sikiifi Beibel. I si enke son sama abi leti te den taki Beibel de enke wan fositen sikoo buku efuso wan gaandi buku di e soi fa i mu wooko anga computer? Den sama ya ná abi leti. Saide? Ala yuu sama e meke moo kofaliki sani, den e sabi moo sani. Ma i si enke libisama kengi? Te anga now sama wani sabi saide den de a libi. Den wani sabi san den mu du fu de koloku, fu abi wan bun osulibi anga tuutuu mati.

Winsi fa Beibel gaandi, toku a sa yeepi u fu sabi den sani ya. A o yeepi i fu sabi omen taa sani tu. Na a Gadu di meke u meke sama sikiifi Beibel. A poi yeepi wi. Ai soi u fa u mu losi den polobelema fu u (2 Timotiyesi 3:16, 17). Ma san moo moin, den leli fu Beibel nai gaandi. Wi o fende wini ala yuu te u wooko anga den. A sikiifi aini Beibel taki: „A wowtu fu Gadu de a libi.”​—Hebrewsama 4:12.

Ma Beibel poi du den sani ya tuu? A wan gaandi buku, efuso a moo bun buku di de? A Wakititolen ya na a fosiwan fu wantu Wakititolen di o yeepi u fu sabi den sani ya.